آذربايجان ، قافقاز ، جنوبي آوروپا و ياخين شرقين ايلك طياره چي قاديني:

لئيلا مممدبيووا

لئيلا علسگر قيزي مممدبيووا (1909-1989). آذربايجان طياره چيسي ايدي. آذربايجاندا، قافقازدا، همچنين بوتون جنوبي آوروپادا و ياخين شرقده ايلك قادين طياره چيسي ايدي. 

  مممدبيووا صنعت تحصيليني باكي آئروكلوبوندا آلميش و ايلك اوچوشونو 1931-جي ايلده يئرينه يئتيرميشدير. تحصيليني 1932-جي ايلدن موسكوادا داوام ائتديرن مممدبيووا 1933-جو ايل، مارتين 17-ده موسكوانين توشينو آئرودروموندا او-2 طياره سيندن پاراشوت ايله آتلاناراق سووئت ايتتيفاقي نين ايكينجي قادين پاراشوتچوسو اولموشدور (نينا كامنئوادان سونرا). 1934-جو ايلده جنوبي قافقاز رئسپوبليكالاري آراسيندا كئچيريلن پاراشوتچولر ياريشيندا بيرينجي يئري توتموش و 1941-جي ايله دك آرتيق آوياسييا مايورو اولموشدو. سونرالار صنعتيني باكي آئروكلوبوندا موعليم كيمي داوام ائتديرميشدير. 

      يئتكينليك ياشينا چاتماميش دؤرد اوشاق آناسي (اوشاقلاري نين سايي جمعي آلتي نفر ايدي) مايور مممدبيووانين بؤيوك وطن موحاريبه سينده ايشتيراكيندان ايمتيناع ائديلدي. 

      آئروكلوبون باغلانماسينا گؤره او، دئسانتچي و پاراشوتچو كورسلاريني تدريس ائتمه يه ايجازه آلميشدي. او، موحاريبه  ايللري عرضينده يوزلرله دئسانتچي و 4 مين پاراشوتچو حاضيرلاييب جبهه يه يوللاميشدي. اونلارين آراسيندا ايكي نفر سووئت ايتتيفاقي قهرماني آدينا لاييق گؤرولموشدور. مممدبيووا طياره چي كاريئراسيني 1949-جي ايلده سون اوچوش ايله باشا چاتديرميش، سونرالار OADKYC-نين باكي فيلياليندا صدر موعاويني كيمي چاليشميشدير. 1961-جي ايلده ايسه او آرتيق تقاعوده چيخدي. 

      لئيلا مممدبيووانين بؤيوك اوغلو فيرودين ايكينجي دونيا موحاريبه سينده، كيچيك اوغلو خانلار ايسه قاراباغدا ووروشموشدور. 

      قادين طياره چييه بير سيرا شئعير و كينوفيلم حصر اولونموش، 1995-جي ايلده حاقيندا سندلي فيلم ده چكيلميشدير. 1934-جو ايلده چكيلن  ” عيصمت “  بديعي فيلمي محض لئيلا خانيما ايتحاف اولونموشدور. 

كؤچورن : آيدا بيات