تاريخين ايلك قادين ژئنرالي

قيرقيز توركلري نين  تاريخينده ايندي ده اؤنملي بير يئره صاحيب اولان بير قاديندان دانيشيلير ، بو قادين قيرقيزيستاندا، سوم دئييلن پارانين اللي ليگي نين اوزرينده يئر آلان كورمانجان داتكا دير. كورمانجان داتكا قيرقيز تاريخي نين قازانديغي قادينلارين ان اؤنمليلريندن بيريدير، قادين ژئنرالدير.قيرقيزيستاندا جسارت، اؤزگورلوك و موجادله ني سيمگه له يير. تاريخين ايلك قادين ژئنراليدير. 

كورمانجان 1811 – نجي ايلده اوش شهرينه ياخين مادي قيشلاغيندا مونقوش نسلي نين بارگي  قبيله سيندن اولان بير اكينچي عاييله ده دونيايا گؤز آچير .هله 18 ياشيندا ايكن گؤرمه ديگي بيريسي ايله ائولنديريلير ،آنجاق ياشاديغي دؤنمين قاتي گلنكلرينه قولاق آسماياراق  اري نين  ائوينه گئتمكدن بويون قاچيرير . بو داوارنيشي هركسجه ائلئشديريليب ديشلانسادا ائشيندن آيريلاراق سئوديگي ايله ائولنمه جسارتيني گؤسترير.او زامان گونئي قيرقيزيستاني يؤنتن ائشي آليمبك داتكانين هميشه يانيندا اولور، اونو دستكله يير.ائله كي آليمبك اوزاق اؤلكه لره گئتديگي چاغلاردا يؤنتيمي اونا تاپشيرماغا باشلايير . 

  چوخ سئوديگي ائشي نين اؤلدورولمه سي كورمانجاني چوخ اوزموش اولسا دا اوزرينه يوكله نن  گؤروي لاييقي ايله  يئرينه گتيرمك زوروندا قالير. ائشي اؤلموش و اؤلكه نين يؤنتيمي بيله سينه  گئچميشدير.خوكندلرين خاني هودويار طرفيندن بيله سينه  داتكا عونواني وئريلن كورمانجان( داتكا سؤزونون آنلامي  آلتاي كراليچه سي  دئمكدير، او چاغدا گؤنئي قيرقيزيستانا آلتاي دئييليردي.) تاريخده  ايلك قادين  ژئنرال (آلباي) اولما عونوانيني قازانير. 

      آلتي اوشاق آناسي اولدوغو سؤيلنن كورمانجان داتكانين اوغوللاريندان بيري روسلارا قارشي ساواشاراق افغانيستانا قاچار و اورادا اؤلور. بو ساواش اورتاليغي قاريشديرير. خالق عوصيان ائدير.

25 نيسان 1876-جي ايلده ميخاييل سكوبئليئو، اوشدا آلتاي واديسينه قارشي حربي عملياتا باشلايير. بير ساتقينليق سونوجوندا كورمانجان داتكا اسير آلينيب سكوبئلئوين حضوروونا آپاريلير. سكوبئلئو، كورمانجان داتكاني اؤزل بير سايقي اله قارشيلايير، اونو اَييله رك سالاملايير. كورمانجان ايسه سكوبئلئوين حوضوروندا بير قهرامانا اؤزگو عزمله، ديمديك دايانير. ميخاييل سكوبئليئو اوندان قارشي دورمالارين دايانديريلماسيني ريجا ائدير. كورمانجان بوندان سونرا وادي نين ايچ ايشلري نين باغميسيز اولماسي شرطييله قارشي دورمالاري دايانديراجاغينا داير سؤز وئرير. روس گئنئرالي بو شرطله راضيلاشير.  

  بئله ليكله، آلتاي واديسي نين شاهزاده سي كورمانجان داتكا، 31 ايل قيرغيزلارا باشچيليق ائده رك اونلارين ريفاه ايچينده ياشمالاري اوچون اليندن گلني اسيرگه مير.

كورمانجان آلتايي بئشه بؤله رك ايكي اوغلونون يؤنتيمينه وئرير آنجاق  روسلار قاچاقچيلق ائتمه سوچلاماسيله  بيرينه سورگون و ديگرينه ايسه  اعدام  جزاسي وئريرلر.

 بوتون يئتكيلريني قوللانمايا چاليشان كورمانجانين چابالاري سونوچسوزدور، اوغلو اعدام ائديلير، حتي كورمانجان اعداميندا بولوناراق اوغلونا سون سؤز اولاراق :  " اؤلومون گؤزلري نين ايچينه باخ "  دئيير.

  جسارتي ايله ياشاديغي دؤنمه دامغا ووران كورمانجان اؤولاد آجيسييلا ييخيلميشدير، صاحيب اولدوغو توم وارليغيني ساغا سولا داغيتاراق اسكي كندينه دؤنور، آنجاق يئنه ده آجيسي آزالماز .ساواشچيليغي اولدوغو قدر يازارليغي ايله ده بيلينن كورمانجان 1 شوبات 1907 تاريخينده چكديگي آجيلاردان دولايي ياخالانديغي آغير خسته ليك ندني ايله حياتيني ايتيرير .

  كورمانجان داتكا بير چوخ تئاترو اويونونا، كيتابا ايلهام قايناغي اولموشدور.اركينديك پارك دا هئيكلي تيكيلميشدير.

قيرقيزيستاندا 2011 ايلي  كورمانجان داتكا ايلي اعلان ائديليب دير. 

دوزنله ين : آيدا بيات