+0 به یه ن
آيريليغين حئكايتي
(آغابگيم آغاباجي جوانشيرين ياشام اؤيكوسو)
آراز بويو آتلار دؤردنالا چاپاراق خودافرين كؤرپوسونه ياخينلاشسا دا، سوواريلر ايستكلرينه چاتا بيلمه ديلر. اونلارين حاقلاماق ايسته ديگي دسته چوخدان آرازين او تايينا كئچميشدي. اللريندن آلماق ايسته ديكلري لعل-جاواهيراتي دا آپارميشديلار. قارالان هاوانين رنگيندن خيفت تؤكولوردو. شاماخي نين حاكيمي موصطافا خان آلديغي خبردن سارسيلاراق اؤز-اؤزونه پيچيلدادي: " آه، ايبراهيم خليل خان، بس سن قيزي منه وئره جكدين؟!. سؤزونون اوستونده دورمادين! " .
منزيل باشينا تله سن دوه كارواني نين بزكلي " سالونوندا " يول گئدن آغابگيم آغا ايسه گؤز ياشي تؤكه رك سانكي آرازين سولاريندا دفن اولان آرزولارينا آغي دئييردي:
سنده مسكن سالان نه بختيياردير،
صفالي قوينون، خوش آب-هاوان واردير.
دوه نين بوينوندا سفره چيخان
زنگ كيمي كؤنلوم ده سنه باغليدير.
بلليدير كي، آغا محمد شاه قاجار شوشادا اؤلدورولدوكدن سونرا اوغلو فتعلي شاه ايران تاخت-تاجينا صاحيب اولدو. قاراباغ خاني ايبراهيم خليل ايسه بؤيوك ديپلومات ايدي. دؤولتلر آراسيندا موناسيبتلرده گرگينليك اولماسين دئيه، آغا محمد شاه قاجارين جنازه سيني حؤرمت و احتيراملا تئهرانا يولا سالدي. اونون بو نجيبليگي ايران شاهي نين چوخ خوشونا گلميشدي. بونون عوضينه قاراباغدان قاجاري دفن ائتمه يه گؤندريلن آداملارا خلعت باغيشلاميش، حتّي ايبراهيم خليل خانين اؤزونه موختليف هديه لر، ائلجه ده قيلينج و قيزيل سويونا چكيلميش يهر گؤندرميش، اوسته ليك، ايبراهيم خليل خانلا قوهوم اولماق ايستگيني ده بيلديرميشدي. ايبراهيم خليل خان بو قوهوملوغو اوركدن ايستمه سه ده، موناسيبتلرين دوزلمه سي و قاراباغي ايران قوشونلاري نين هوجوموندان قوروماق اوچون قيزي آغابگيم آغاني فتحعلي شاها وئرمك مجبوريتينده قاليب. او، بو قوهوملوغو محض بو نيتي اوچون قبول ائديب. بو سببدن ده عاغيللي و سئويملي قيزيني دده-بابا قايداسي ايله ايران شاهينا اره وئريب.
بير نووروز بايراميندا باش توتان بو ايزديواج اصلينده آغابگيم آغانين دا اورگينجه دئييلدي. اونون كؤنلونده باشقا بير محبتين تومورجوقلاري گؤيريردي. تأسوف كي، طالعيين يازديغينا بويون اَيمه لي اولدو. تئهرانا يولا دوشمه ميشدن اؤنجه شوشاني، اونون گوللو يايلاقلاريني، داغلاريني، مئشه لريني سون دفعه سئير ائتدي، بوز بولاقلاريندان سو ايچدي. وطنين بوتون گؤزلليكلريني، شوشانين بوتون فوسونكارليغيني گؤزلري ايله يادداشينا حك ائتدي. دئييلنه گؤره، آغابگيم آغا چوخ زئهينلي، حافيظه لي، دونياگؤروشلو، ساوادلي اولوب. عرب، فارس ديللرينده سليس دانيشيرميش. قوراني ازبر بيليرميش. شئعيره بؤيوك هوه سي وارميش. فوضوليني چوخ سئورميش. شئعيرلري شوشادا ديللر ازبري اولان واقيفين ياراديجيليغينا مفتون كسيلرميش. اونون حاقيندا چوخلو افسانه، روايت وار. بو افسانه لرين، دئييملرين كؤكو ده حقيقتلره باغلانير.
فتحعليشاه آغابگيم آغانين تكجه گؤزلليگينه دئييل، عاغلينا، درراكه سينه ده مفتون كسيليب. اونو حددن آرتيق چوخ سئورميش. چاليشيرميش كي، آغابگيم آغا هئچ واخت قملنمه سين، درد چكمه سين. اونون داريخماماسي اوچون اليندن گله ني ائدرميش. دئييلنه گؤره، آغابگيم آغاني اوووتماق، كؤنلونو اله آلماق هئچ جور مومكون دئييلميش. باخماياراق كي، او، سارايدا باش حرم ايدي. آرزولاري، ايستكلري درحال يئرينه يئتيريليردي. حتّي فتحعليشاه چوخ واخت اونون سؤزو ايله دوروب-اوتوروردو. چاليشيردي كي، آغابگيم آغا وطن خيفتي چكمه سين. بو سببدن ده تئهراندا اونون اوچون قاراباغ اوسلوبوندا ساراي تيكديرميشدي. حتّي اونون اطرافينداكي باغلاري، باغچالاري، سو آرخلاريني، بولاقلاري شوشاداكي كيمي دوزلتديرميشدي. لاكين هئچ بير ثروت، ياراديلان يوكسك شراييط شوشاني عوض ائده بيلميردي. دئييلنه گؤره، بير دفعه اوخودوغو مشهور باياتيني فتحعليشاه دا ائشيديب، اورگي ريقته گليب:
من عاشيقم قاراباغ،
شكي، شيروان، قاراباغ.
تئهران جنّته دؤنسه،
ياددان چيخماز قاراباغ.
باياتي ايكي عصردير كي، وطن حسرتينده قوورولانلارين ديلي نين ازبريدير. بؤيوك معنالار، اهميت كسب ائدن بو باياتي هم ده قاراباغين، موسيقي بئشيگيميز شوشانين سيموولونا چئوريليب. بو باياتيني ائشيتديكدن سونرا فتحعليشاه فيكيرلشير كي، گرك تئهراندا ائله بير باغ سالديرسين كي، شوشادا بيتن آغاج، مئيوه، گول كوللاري بورادا دا اولسون. حتّي تورپاغي دا، باغباني دا شوشادان گتيزديره رك تئهراندا نهنگ بير باغين يارانماسينا نايل اولوب. " وطن باغي " آدلانان بو باغ جنّت گوشه سينه بنزييرميش. گوزاريني همين باغا سالان آغابگيم آغا بولبوللرين نغمه سينه قولاق آسيب، هر گولون، چيچگين عطريني قوخلاييب، آغاجلارا ديقت يئتيريب. بو زومرود ليباسلي باغدا خاري بولبولدن باشقا هر شئي واردي. بو شوشا گولونون ده اؤزونه مخصوص غريبه ليگي وار. باشينا ها فيرلان، دولان، مين جور نازيني چك. شوشادان باشقا هئچ هارادا بيتمز. آغابگيم آغا باغي سئير ائتديكدن سونرا كدرلي بير شئعير يازيب. ايندي ده موغننيلرين بؤيوك شؤوقله اوخودوغو او مشهور ماهني نين سؤزلري بئله دير:
" وطن باغي " آل-الواندير،
يوخ ايچينده خاري بولبول.
ندن هر يئرين الواندير،
كؤكسون آلتي، ساري بولبول؟!
سحرين گولشن چاغيندا،
نه گزيرسن باغي، بولبول؟!
اوخودون، عاغليم آپاردين،
اولدون منه ياغي، بولبول!
بولبول، سن نالا چكرسن،
گؤز ياشين گيله تؤكرسن،.
اون بير آي جفا چكرسن،
بير آيي دا زاري، بولبول!
بولبول، گئييبسن آل ياشيل،
قوللارين بوينومدان آشير.
آغلاماق منه ياراشير،
قوي آغلاييم، باري، بولبول!
بولبول سني كيم اوچورتدو،
كيم دالدان دالا قاچيرتدي،
كيم سنه باده ايچيرتدي،
كيملر اولدو ساقي، بولبول؟!
عؤمرونون سونونا كيمي وطن حسرتي چكن آغابگيم آغانين بير چوخ شئعيرلري هم ايراندا، هم ده دوغما وطنينده ديلدن-ديله كئچه رك ياشاييب. بعضيلري نين هئچ اونا مخصوص اولدوغو دا اوزون مودت بيلينمه ييب. غريب چي ليگين چوخ اذيتيني چكن بو اينجه روحلو خانيمين شيكايت دولو نامه لريندن بيري ده بئله دير:
افسوس كي، ياريم گئجه گلدي، گئجه گئتدي،
هئچ بيلميرم عؤمروم نئجه گلدي، نئجه گئتدي.
بو غزلين بيزه بللي اولان ميصراعلاري آنجاق بونلاردير. بلكه ده گونئي آذربايجاندا بو غزلين هاميسي وار. تدقيقاتچي و.قولييئو سؤيله يير كي، ايراندا فارس ديلينده آغابگيم آغانين شئعيرلري موطلق وار. چونكي آغابگيم آغا " آغاباجي " تخلوصو ايله هم آذربايجان، هم ده فارس ديلينده ليريك، عاشيقانه، عئيني زاماندا وطن نيسكيللي شئعيرلر يازيب. بير نئچه ايل تئهراندا قالديقدان سونرا عؤمرونون سونونا كيمي قوم شهرينده ياشايان آغابگيم آغا جاوانشير تخمينن 50 ياشيندا دونياسيني دييشيب.
تأسوف كي، بو اونودولماز خانيمين حيات و ياراديجيليغي او قدر ده دريندن آراشديريلماييب، يازديقلاري توپلانيب چاپ ائديلمه ييب. شئعيرلري ساده جه اولاراق ديلدن-ديله كئچه رك بوگونوموزه قدر گليب چاتميشدير. تدقيقاتچيلار تصديقله ييرلر كي، آغابگيم آغا آغاباجيدان بؤيوك ادبي ايرث قاليب. هئچ اولا بيلمز كي، بو جور ايستعداد صاحيبي نين يازديقلاري ايتيب-باتسين. شئعيرلري چوخ اولسا دا، اولماسا دا، آغابگيم آغانين بيرجه باياتيسي ائله اوزون عؤمورلودور كي، اونون سايه سينده ده آذربايجان ادبياتيندا ابدي ياشارليق تاپيب. خان قيزي نين فارس ديلينده يازديغي بير غزلي نين سطري ترجومه سي بئله دير: " تا قييامته قدر يازيلسا قورتارماز، نه سنين گؤزلليگي نين دفتري، نه منيم آيريليغيمين حئكايتي " . بو گؤزلليگين دفتري يقين كي، شوشادير! ايندي ده بيزيم درديميزه، حسرتيميزه چئوريلن شوشا! آللاه سنه رحمت ائلسين، آغابگيم آغا!
فلورا خليل زاده
آذربايجان.- 2011.- 9 فئورال.- س. 7.
كوچؤرمن : اؤزگور قادين
