اينديرا قاندي  

  او، هينديستان تاريخينده اؤلكه ني 15 ايل ايداره ائدن يئگانه قادين باش ناظير اولوب. اؤلكه سي نين اراضي بوتؤولوگونو قورودوغونا گؤره سيكخ سئپاراتچيلاري طرفيندن قتله يئتيريلن اينديرا قاندي نين اوغلو دا آناسي نين آجي طالعييني تكرارلادي. بئله كي، باش ناظير سئچيلن راجيو قاندي ده فانات-قاتيلين قورباني اولدو.  

  اينديرا قاندي باشا دوشوردو كي، اونون حياتي تهلوكه آلتيندادير. قتلينه بير گون قالميش او دئييردي: «بو گون من ياشاييرام، صاباح اولا بيلر حياتدا اولمايام… آنجاق قانيمين هر داملاسي هينديستان خالقينا مخصوصدور». 1984-جو ايل اوكتيابرين 31-ده قاندي نين مشهور اينگيليس يازيچيسي و آكتيورو پيتئر اوستين له موصاحيبه سي اولمالي ايدي. او بو گؤروشو صبيرسيزليكله گؤزله ييردي. قاندي نه گئيينه جگي باره ده چوخ گؤتور-قوي ائدندن سونرا زعفران رنگلي پالتاري سئچدي. اونون فيكرينجه، بو رنگ ائكراندا گؤزل گؤرونمه لي ايدي. اونو كؤك گؤسترديگينه گؤره، اينديرا همين گون ترددودله گوللـه كئچيرمز ژيلئتيني چيخاردي.  

  بئانت سينقخ و ساتوانت سينقخ باش ناظيرين ايقامتگاهيندان اوفيسه گئدن يولدا گؤزتچي دسته سينده دايانميشديلار. سيكخ-موحافيظه چيلره ياخينلاشان اينديرا گولومسه دي. بئانت باش ناظيره تاپانچادان اوچ دفعه  آتش آچدي، عئيني زاماندا ساتوانت دا دايانمادان آوتوماتدان آتش آچماغا باشلادي. موحافيظه چيلر جاواب آتشي آچسالار دا آرتيق گئج ايدي. 

  تنها اوشاقليق 

      1917-جي ايل نويابرين 19-دا قديم هيند شهري اولان آللاه آباددا اؤلكه ده مشهور اولان وكيللر عاييله سينده بير قيز اوشاغي دونيايا گلدي، آديني اينديرا قويدولار. بير نئچه گوندن سونرا اونلارين ائوينه مشهور شاعيره نايدودان مكتوب گلدي. او، مكتوبدا يازيردي: «بو اوشاق هينديستانين يئني روحو اولاجاق». بونو او زامان هئچ كيم جيدي قبول ائتمه دي. قارشيدا قيزي تنها اوشاقليق، ياشينا اويغون اولمايان جيدي قرارلارين قبولو، قايغي و عذابلار گؤزله ييردي. 

     ائركن ياشلاريندان اينديرا آنلاييردي كي، هينديستان تحقير اولونوب و اونا گؤره ده اينديرايا ياخين بوتون اينسانلار اؤلكه سي نين موستقيلليگي، اراضيسي اوغروندا موباريزه آپاريرديلار. ماهاتما قاندي نين درسلرينه اساسن اونلار اينگيليس ماللاريني بويكوت ائتمگي موطلق حساب ائدير و بير دفعه  حَيَطده بوتون قييمتلي خاريجي اشيالاري يانديرميشديلار. يالنيز اينديرانين سئويملي كوكلاسي يانديريلمادي، آما بير نئچه مودتدن سونرا او دا كوله چئوريلدي. حياتيندا ايلك معنوي پروبلئمين حلي اينديرايا بؤيوك ائموسيونال گرگينليك گتيردي و او، نئوروز خسته ليگينه توتولدو. اينديرا بؤيوينده بئله كيبريت يانديريلماسي نين سسيني ائشيده بيلميردي.  

  اوشاقليقدا او، عادي اوشاق اويونلاريني دئييل، هيندليلرين موستملكه چيلره قارشي موباريزه سيني اويناييردي. او، ائوده اولانلاري بير اوتاغا ييخيب، قارشيلاريندا ائهتيراسلي چيخيشلار ائديردي.  

      1925-جي ايلده اينديرانين آناسيندا ورم خسته ليگي آشكار ائديلدي، آتاسي اونلاري ايسوئچره يه آپارماغي قرارا آلدي. بئله ليكله، قيزجيغاز آوروپايا دوشدو. او، اول جئنئوره ده بين الخالق مكتبه، سونرا مونتانداكي باشقا مكتبه گئتدي. اؤلكه لرينه قاييداندان سونرا واليدئينلري اونو پانسيونا وئرديلر. بوراني بيتيرديكدن سونرا اينديرا مشهور ميللي تاقور اونيوئرسيتئتينه داخيل اولدو. 1935-جي ايلين يازيندا او، تحصيليني ياريمچيق قوياراق آناسي ايله برابر آلمانييايا آغ جيير خسته ليكلري كلينيكاسينا گئدير. بو آرادا آتاسي اينقيلابي فعاليتينه گؤره حبسخانايا سالينميشدي. آزادليغا چيخاندان سونرا او، حيات يولداشي نين يانينا گلدي، آما تئزليكله قادين دونياسيني دييشدي. 

      قاداغان اولونان ائوليليك 

      سون آلتي ايل اينديرا وطنيندن كناردا ياشادي. بو ايللر عرضينده او، آتاسي ايله آسيا، آوروپا، آفريكانين بير چوخ اؤلكه سيني گزدي. تئز-تئز او، آتاسي نين خاريجي اؤلكه لرين حؤكومت و ايجتيماعي خاديملريله گؤروشلرينده ايشتيراك ائديردي. اوكسفورد اونيوئرسيتئتي نين سومئرفيل كوللئجيني بيتيرن اينديرا حربي وضعيتين گرگين اولماسينا باخماياراق، اؤلكه سينه قاييتماغي قرارا آلير. اونونلا برابر گله جك حيات يولداشي، اصلا پارس (ودا سيتاييش ائدنلر) ايجماعسيندان اولان فئروز قاندي ده هينديستانا قاييديردي. فرقلي ديني كونفئسسييالاري مخصوص اولدوقلارينا گؤره اونلارين آراسيندا رسمي نيكاح غئيري-مومكون ايدي. آنجاق بوتون بونلارا باخماياراق،1942-جي ايلين مارتيندا اونلار ائوله نيرلر. بال آييني بيتيرمه ميش اينديرانين آتاسي و هينديستان ميللي كونقرئسس پارتيياسي نين ديگر عوضولري يئنيدن حبس اولونورلار. گنج ار-آرواد گيزلينجه اونلارين ايشيني داوام ائتديريرلر - قاداغان اولونان ادبياتي يايير، تبليغات ايشي آپارير، حياتلاريني تهلوكه يه آتاراق ميتينقلرده چيخيش ائديرديلر. 1944-جو ايلين آوقوستوندا اينديرانين اوغلو راجيو راتنا دونيايا گلير. او دا گله جكده آناسي نين ايشيني داوام ائتديره رك باش نازير اولور و آناسي كيمي فانات-قاتيل طرفيندن قتله يئتيريلير. ايكي ايلدن سونرا ايكينجي اوغلو - ساندژاي آنادان اولور. سيياستله مشغول اولماق ايستگينه باخماياراق، اينديرا دقيق امين ايدي كي، آنانين اساس وظيفه سي اؤولادلارينا قايغي گؤسترمكدير. اونا گؤره ده وطنداش و آناليق وظيفه سيني برابر شكيلده يئرينه يئتيرمه يه چاليشيردي.  

  1947-جي ايلده هينديستانين موستقيلليگي ائلان اولوندوقدان سونرا اينديرا مجبوري كؤچكونلرله ايش اوزره گنجلر تشكيلاتي يارادير، آتاسينا حؤكومت ايشلرينده يارديمچي اولور، اؤلكه پارلامئنتينه سئچيم كامپانييالاريندا ايشتيراك ائديردي. آتاسي قيزي نين سياسي كاريئرايا جان آتماسينا قارشي چيخميردي، آما اونو دستكلميردي ده. بونا باخماياراق، 1959-جو ايلده اينديرا قاندي هينديستان ميللي كونقرئسي نين صدري سئچيلير. بئله ليكله، اؤلكه تاريخينده ايلك دفعه  قادين حاكيم پارتييانين باشچيسي اولور. 

  خانيم باش-ناظير 

     آما ائو ايشلري اونون واختيني چوخ آپاريردي. بو آرالار اري اورك آغريلاريندان تئز-تئز شيكايتله نيردي. 1960-جي ايلين سئنتيابريندا فئروز آغير وضعيتده خستخانايا چاتديريلير و دونياسيني دييشير. حيات يولداشي نين اؤلومو اينديرا اوچون بؤيوك ضربه اولدو. فيزيكي و معنوي يورغونلوق اونو خستخانا پالاتاسينا گتيردي. دؤرد ايلدن سونرا ايسه اينديرا آتاسيني ايتيردي. تنها قالان قادين (اؤولادلاري اوكسفورددا تحصيل آليرديلار) آتاسي نين باشلاديغي ايشي باشا چاتديرماغي قرارا آلدي. او، 60-جي ايللرين سونو باش ناظير وظيفه سينه يوكسله رك حؤكومتين بانك و ايستحصال ساحه سينده رولونو آرتيريب ستابيل ميللي ايقتيصاديات ياراتماق ايسته ييردي. ايقتيصادي پروبلئملرين حلينه پاكيستانلا 14 گونلوك حربي موناقيشه سبب اولدو. حربي عملياتلار، اوچ ايل داوام ائدن قوراقليق اؤلكه ني آجليق تهلوكه سي قارشيسيندا قويدو. يارانميش وضعيته گؤره بوتون مسئوليت باش ناظير و اونون طرفدارلاري نين اوزرينه قويولدو.  

  1975-جي ايلين ياييندا اؤلكه ده فؤوق العاده وضعيت ائلان ائديلدي: سپئكوليانتلارا قارشي رئپرئسسييا باشلاندي، سئنزورا تطبيق اولوندو. اينديرا قانديني كورروپسييادا، روشوتخورلوقدا، عادت-عنعنه يه و دينه حؤرمتسيزليكده ايتتيهام ائتديلر. نتيجه ده 1977-جي ايلين سئچكيلرينده او قاليب گلمه دي. 

  مغلوبيتدن سونرا اونو ايكي دفعه  حبس ائتديلر. آنجاق رقيبلري نين بوتون ايتتيهاملاري ثوبوتونو تاپمادي. اينديرانين پوپوليارليغي آرتماغا باشلادي، اونون حبسه آلينماسي اينسانلارين ناراضيليغينا سبب اولدو. آزادليغا بوراخيلديقدان سونرا ايسه اونون يانينا بوتون هينديستاندان طرفداشلار گلمه يه باشلادي. 

  آمانسيز قتل 

    1980-جي ايل سئچكيلرينده او، يئنيدن باش ناظير سئچيلدي و اؤتن اون ايلليكده رئاللاشديرا بيلمه ديگي ايقتيصادي پروقرامي حياتا كئچيرمه يه باشلادي. اونون رهبرليگي آلتيندا هينديستان بين الخالق آرئنادا تانيندي، كوتلوي قيرغين سيلاهلاري نين ايستيفاده سي، حاضيرلانماسي علئيه اينه چيخانلاردان اولدو.  

  1984-جو ايلده پئنجاب شتاتيندا مسكونلاشان سيكخ سئپاراتچيلاري اؤلكه ده داخيلي وضعيتي گرگينلشديردي. سيكخلر بو شتاتين اؤلكه دن آيريلماسيني طلب ائدير و آمريتسار شهرينده «قيزيل معبدي»نه سيلاح-سورسات ييغيرديلار. حربي معنادا عمليات اوغورلو آليندي: ائكسترئميستلر معبددن چيخاريلدي، آنجاق ايجتيماعيت بو آدديمي ياخشي قارشيلامادي. عمليات نتيجه سينده چوخلو اينسان هلاك اولدو، سيكخلر اينتيقام آلاجاقلارينا سؤز وئرديلر. ائله گون اولموردو كي، اونلار باش ناظيري، اؤولادلاريني و نوه لريني اؤلومله هده له مه سيندر. اونا دفعه لرله تكليف ائديرديلر كي، موحافيظ ه خيدمتيندن بوتون سيكخلري چيخارسين، آما او بونو لازيم بيلميردي. 

 منبع: «آيسئل» ژورنالي

كؤچورن :‌ اؤزگور قادين