اؤزگور قادين

آذربايجان قاديني

اميلي برونته

+0 به یه ن

اميلي برونته نين قارداشي برانوئلل طرفيندن چكيلميش پورتره سي

اميلي برونته

     اميلي جين برونته (1818 – 1848) رومانتيزم آخيمي نين ان گوجلو اثرلريندن بيريني يازميش اينگيليس ادبيياتچيسي دير. يازديغي تك رومان، اوغولتولو آشيريملار (Wuthering Heights) بوگون اينگيليس ادبيياتي نين ان اؤنملي اثرلريندن بيري اولاراق آنيلماقدادير. 

      اميلي برونته 1818 ايلينده تورنتون، يوركشايردا آنادان اولدو. 6 اوشاغين بئشينجيسي اولان اميلي، شارلوت برونته نين كيچيك باجيسي ايدي. 1820ده عاييله هاوردا داشيندي. اوشاقليق ايللرينده ، آنالاري نين اؤلومونون آرديندان، اوچ باجي (شارلوت، اميلي و آنن) و قارداشلاري برانوئلل برونته خيالي يئرلر دوشله ميشديرلر كي بونلارين آدلارينا حيكايه لرينده راستلانماقدادير. اميلي نين او دؤنمده قلمه آلديغي چاليشمالاريندان چوخ آزي بوگونه اولاشابيلميشدير. اميلي 1838ده حاليفاكس ياخينلارينداكي قيزلار آكادميسينده  چاليشدي. داها سونرا باجيسي شارلوت ايله بيرليكده بروكسلده كي  اؤزل بير اوخولا دوام ائتميشدير. 

  اميلي نين شئعيرده كي  يئتنگي نين عاييله سي طرفيندن كشف ائديلمه سييله، باجيلاري شارلوت و آننه ايله بيرليكده، 1846دا اورتاق بير شئعير كيتابي ياييملاميشديلار. اثري، دؤنمين قادين يازارلارا قارشي اؤن يارغيلي تاوريندان سييريلا بيلمك آماجييلا، هم كيشي هم ده قادين آدي اولاراق ايشله ديلن تاخما آدلارلا باسميشديرلار. ايشلتديكلري تاخما آدلار گئرچك آدلاري نين باش حرف لري ايله عيني باش حرفه صاحيب دي: شارلوت اوچون  كوريرر بلل، اميلي اوچون الليس بلل و آننه اوچون آكتون بلل.   

     1847ده تك روماني اولان اوغولتولو آشيريملاري ياييملاميشدير كي بو رومان اوچ جيلدليك بير سئتين ايلك ايكي جيلديني اولوشدورماقدايدي. سون جيلد باجيسي آننه طرفيندن يازيلان آگنس گري آدلي روماندير. رومانين يئنيليكچي ياپيسي ائلشديرمنلري بير آنلامدا شاشيرتميشدير. هر نه قدر ايلك چيخديغيندا هم ياخشي هم ده پيس يوروملار آلسا دا، رومان زامانلا بير اينگيليس ادبيياتي كلاسيگي حالينا گلميشدير. 1850ده شارلوت روماني يايينا حاضيرلاييب، دوزنله ميش و اميلي نين گئرچك آدي ايله، تك باشينا بير اثر اولاراق اوغولتولو آشيريملار  آدي ايله ياييملاميشدير. 

     باجيلاري كيمي اميلي نين ساغليغي دا ائوده و اوخولداكي ؛آغير قوشوللار ندني  ايله  ضعيف له ميش ، كورلانميشدير.  سپتامبردا قارداشي نين جنازه تؤره ني سيراسيندا ، سويوق دان خسته لنميش هر تورلو طيبي معاليجه ني  رد ائتديكدن سونرا 19 دسامبر 1848ده وفات ائتميشدير. هاورد، وئست يوركشايير، اينگيليسده دفن ائديلميشدير. 

 

اوغولتولو آشيريملار  اثريندن سئچيلميش حيصه لر  :

  اؤزوم باشقاسينا ناراحاتليق ياشادا بيلديگيم موددتجه، همين ناراحاتليغي منه ياشاتمالارينا ايجازه وئرمرم. 

  *** 

  قيجينميش ديشلر آراسيندان  " بويورون "  ائله دئييلدي كي،  " جهننم اولون "  كيمي سسلندي. 

  *** 

  او هم سئوگيسيني، هم ده نيفرتيني گيزلي ساخلاياجاق. و اگر او، اؤزونه قارشي هر هانسي بير شخص طرفيندن سئوگي، ياخود نيفرت حيسس ائتسه، بونو ادبسيزليك كيمي قييمتلنديره جك. 

  *** 

  ايجازه وئرين، كؤنول خزينه مين تكرارسيز اولدوغونو گومان ائديم. 

  *** 

  ايتدن ال چكين. اركؤيونلويه اؤيره ديلمه ييب. اونا گؤره ساخلاميريق. 

  *** 

  عذاب چكمگي اؤيرنديگيم واختدان ايندييه كيمي بو گئجه ايله موقاييسه ائديله بيله جك داها بيريني خاطيرلايا بيلمه ديم. 

  *** 

  درراكه لي اينسان اؤزو اولان جمعيت ايله كيفايتلنمه لي دير. 

  *** 

  هميشه سني گؤرمك كيمي ايشگنجه اوچون جاواب وئرمه لي اولاجاقسان. 

  *** 

  غريبه دير، اينسانلار بو دونيادا بير كس لري اولماديغي حالدا نئجه خسيس اولا بيليرلر. 

  *** 

  اؤلكه اوچون اونون مومكون قدر تئز بير زاماندا، طبيعتي نين نينكي سيماسيندا، همچنين عمللرينده عكس اولونماسينا قدر، اعدامي ياخشيليق ساييلمازمي؟! 

  *** 

  غورورلو آداملار اؤزلري اؤز حيرصلي كدرلريني يئمله ييرلر. 

  *** 

  بؤيوك ممنوعنيتله اؤز قلبيمي اونو يارادانا جزا اولاراق محوه گؤندره بيلرم. 

  *** 

  اؤز اوتانج وئريجي حركتينه گؤره خجالت چكير؟ بو يئنيليكدير! 

  *** 

  من اونون آياغي آلتداكي تورپاغي سئويرم، باشي اوزرينده كي  هاواني، توخوندوغو هر شئيي، دئديگي هر سؤزو. هر باخيشيني سئويرم، هر حركتيني و بوتؤولوكله اونون اؤزونو. 

  ***   

  او هئچ واخت اونو نئجه سئوديگيمي بيلميه جك! اونو گؤزل اولدوغونا گؤره يوخ، مندن، منيم اؤزومدن چوخ اولدوغو اوچون سئويرم. قلب لريميز ندن حاضيرلانيب حاضيرلانسين، اونون اورگي و منيمكي – بيردير. 

  *** 

  هر بير كسده بيزيم  " من "  ايميزين يالنيز بيزلرده دئييل، هارداسا باشقاسيندا دا مؤوجودلوغو حاقدا هحيسسي وار و يا اولماليدير.  

  *** 

  اگر هر شئي محو اولوب، او قالسا – هله مؤوجود اولاجام. يوخ اگر، هر شئي قاليب، او محو اولسا، كاينات منيمچون بؤيوك و ياد بير شئيه چئوريله جك. و آرتيق من او دونيانين بير حيصه سي اولماياجام. 

  *** 

  اگر بوتون بو معناسيزليقدا ذره قدر معنا وارسا… 

  *** 

  موقاويمت و سويوقلوق گؤرمه ين كس غدار و قيجيقلانديريجي بيري اولا بيلرمي؟ 

  *** 

  اونلارين خوشبختليگي، شراييط مجبور ائديب، بيري نين ماراقلاري نين ديگري اوچون اساس اولماديغيني حيسس ائتديرديگي آنداجا بيتدي. 

  *** 

  سئوينج او قدر بؤيوكدور كي… قورخورام كي،او بيردن حقيقت اولمايا! 

    *** 

  آرتيق مولاييمليك هردن زييان وورا بيلر. 

  *** 

  اطرافيندا سويوق سيمالار اولاندا اؤلومو قارشيلاماق نه غريبه دير! 

  *** 

  سن هئچ لازيم اولماياندا گليب ال آلتينا دوشن، احتيياج اولاندا ايسه هئچ جور تاپيلمايان اشيالار كيميسن. 

  *** 

  وفات ائدنين اشيالاري اؤلندن سونرا او واخت قييمتلي اولور كي، او ياشاياندا دا بيزه ديرلي اولسون. 

  *** 

  او، منده نيفرت اوياتماق اوچون گؤسترديگي بوتون جهدلرده يورولمازليق و باجاريقليليق نوماييش ائتديريردي. 

  *** 

  بئله كي، جاذيبه دارليغي نه قدر آز اولارسا، بير او قدر بو ائوه ياراشاجاق. 

  *** 

  عقلي قابيليتي نين بوتون گوجونو سفربر ائتديكدن سونرا، نهايت، باشا دوشدو كي، من اونو سئوميرم. 

  *** 

  سن مني سئويردين. اوندا نه حاقلا مني قويوب گئتدين؟ فلاكت، تحقير، اؤلوم – آللاهين و ايبليسين گؤندره بيله جگي بو كيمي شئيلر بيزي آييرا بيلمه ديگي بير واختدا، بونو سن اؤزون كؤنوللو صورتده ائتدين. سنين اورگيني من قيرماميشام، اونو اؤزون ائتدين. و اونو قيرماقلا منيمكيني ده چيليك-چيليك ائتدين. 

  *** 

  ياشاتديغين بوتون عذابلارا گؤره سني باغيشلاييرام! اؤز قاتيليمي سئويرم… آما سنينكيني… اونو نئجه سئوه بيلرم؟ 

  *** 

  نه اؤزونه، نه اطرافداكيلارا رحم ائتمه ينلره هردن بيزيم يازيغيميز گلير. 

  *** 

  حياتيم اولمادان ياشايا بيلمه رم! قلبيم اولمادان ياشايا بيلمه رم! 

  *** 

  ساتقينليق و زوراكيليق – هر ايكي اوجو ايتيلنميش نيزه دير. اونو ايشه سالانين اؤزونو دوشمنيندن داها چوخ يارالايير. 

  *** 

  ساتقينليق و زوراكيليق- ساتقينليق و زوراكيليغا لاييقلي جاوابدير. 

  *** 

  او، گؤزله ديگيمدن ده پيسدير. من ايسه، شئيطان شاهيددير، اوپتيميستلردن دئييلم. 

  *** 

  اوتانيب قيزارماغي نين قاني نين آغ اولماماسيني ثوبوت ائتمكدن باشقا بير خئيري يوخدور. 

  *** 

  بد خبر گؤزله مك ياخشي علامت دئييل. 

  *** 

  بئله خوشاگلمز ايش اوچون ان اويغون احوال-روحيييه يه كؤكلنميشديم : كوسگون و ازگين ايديم. 

  *** 

  سن مندن داها خوشبختسن. سن داها مئهريبان اولماليسان. 

  *** 

  اؤز وظيفه سيني ايجرا ائدن اول-آخير موكافاتلانديرير. 

  *** 

  بئله كي، اونلارين هر ايكيسي نين قوووه لري بير مقصده يؤنلميشدير – چونكي بيري سئوير و سئوديگينه حؤرمت ائتمگي آرزولايير، ديگري ايسه سئوير و ديله ييردي كي، اونا حؤرمت ائتسينلر – نتيجه ده، ايسته ديكلرينه مووففق اولدولار. 

  *** 

  ساده جه خارابا قويدوقلاريمدان حظ آلما قابيليتيمي ايتيرميشم. بوش-بوشونا داغيتماق اوچون ايسه چوخ تنبلم. 

  *** 

  نفس آلمالي اولدوغومو ياديما سالماغا مجبور ايديم. آز قالا اورگيمه دؤيونمگي خاطيرلاداجاغيم كيمي! 

  *** 

  من چوخ خوشبختم؛ آما يئنه ده كيفايت قدر خوشبخت دئييلم. 

قايناقلار :

ويكي پدييا

كيتابي كارانداشلا اوخويانلار سايتي

كؤچورن :‌آيدا بيات