ويرجينا وولف

آدلاين ويرجينيا وولف (Adeline Virginia Woolf  (1882-1941  مودئرنيزم ادبي آخيمي نين قوروجولاريندان بيريدير. آدي جئيمس جويس، فرانس كافكا، مارسئل پروست، ويليام فولكنئر كيمي يازارلارلا بير سيرادا چكيلير. 

  ياشامي 

 جئيمس جويسون دونيا ادبياتينا دامغاسيني  وورموش  " اوليس "  روماني وارسا، ويرجينيا وولفون دا  "دالووري خانيم "  روماني واردير. ويرجينيا وولف 1882-جي ايلده لوندوندا ادبي تنقيدچي سئر لئسلي استيوئن و جولي داكوورتلارين عاييله سينده گؤز آچميشدي. ويرجينيا اونلارين اوچونجو اوشاقلاري ايدي. دول استيوئن و داكوورتلارين ايسه گئنلده 8 اوشاقلاري اولموشدو. استيوئنين بيرينجي ائوليليكدن بير قيزي، داكوورتون ايسه ايكي اوغلو بير قيزي وار ايدي. 

  ذاتن، اوشاق ايكن اؤگئي قارداشلاري نين جينسي تجاووزلرينه معروض قالاراق پسيخي سارسينتي كئچيرميش ويرجينيانين ياشاميندا اؤلوملر هر زامان اؤنملي رول اويناييب. ايلك اؤلومو ويرجينيا 13 ياشيندا ياشادي. او آناسيني ايتيردي. 

  آناسيني ايتيرمه سي ايله باشلايان باش آغريلاري، قاراباسمالار، غريبه  سسلر هئچ واخت ويرجينياني بوراخمادي. او بو آغريلاردان قورتولماق اوچون  بير نئچه كز اؤزونو اؤلدورمه يه چاليشسادا اوغورسوز قالدي. 

  بوندان سونرا بؤيوك عاييله نين يوكونو چكمك اؤگئي باجيسي استئللانين اوزرينه دوشدو. لاكين تئزليكله يئنيجه عاييله حياتي قورموش استئللا بال آييندان قاييداركن وفات ائله دي. بو ويرجينيا اوچون ايكينجي بؤيوك ضربه اولدو. استيوئنلر عاييله سي هر ايكي قادين اؤلومونده آتا لئسليني سوچلانديريرديلار. اونا قادين سومورجوسو، ائقويست بيري كيمي باخير، اونو عاييله ده آرزوولونماز حساب ائديرديلر. 

  آتانين يولو ايله 

  لئسلي استيوئن ۱۹. يوزايلين بؤيوك بريتانيياسيندا سايغي ايله آنيلان اينسانلاردان ايدي. او يازيچي، تنقديچي، فيلوسوف ايدي. لئسلي توپلوم ايچينده نه قدر عاليجناب اولسا دا عاييله ده تيپيك ويكتوريان كيشيسي ايدي. اونون بؤيوك عاييله سي ده پاتريارخال قانونلارلا يؤنَتيليردي.

  ايكينجي ائوليليگي ده اونون قايغيسينا قالان بيري نين اولماسي اوچون گره كلي  ايدي. لئسلي نين ياراديجيليقلا مشغول اولماسي اوچون بيري اونا حياتيني حصر ائتمه لي ايدي. اوسته ليك، آروادي نين اؤلوموندن سونرا لئسلي نين قايغيسي داها دا آرتميشدي. اونون اوشاغي واردي. جوليا اوشاقلاردان چوخ هميشه مشغول اولان اري ايله ماراقلانير، اونون قايغيسينا قاليردي. ويرجينا گونده ليگينده يازيردي:  " اونونلا ( آناملا) هر كزينده  بير نئچه دقيقه دن آرتيق بير يئرده اولدوغوموزو خاطيرلايا بيلرم مي؟ "  

  لئسلي اوشاقلارينا دا ويكتوريان تربييه سي وئرير، اوغلانلاريني قيزلاريندان اوستون توتوردو. بو فرق ايلليك بودجه آييرمالاريندا بئله اؤزونو گؤستريردي. بونا گؤره ده ويرجينيانين اؤگئي قارداشلاري نين تجاووزونه اوغراديغيني بيلسه ده سوسماغا اوستونلوك وئرميشدي. 

  ويرجينا باشقا قارداش-باجيلاريندان فرقلي اولاراق آتاسينا اولان ايلگيسينه آيدينليق گتيره بيلميردي. بلي، اونون اوچون آتاسي ازازيل، يالنيز اؤزونو، ياراديجيليغيني دوشونن واليدئين ايدي. بونونلا بئله آتاسي نين خيالي هئچ واخت اونو ترك ائتمه دي. ويرجينيا اونون يولو ايله گئده رك تنقيدچي اولدو، آتاسي كيمي يازيچيليق ائله دي.  " ماياكدا "  رومانيندا آتاسي نين اوبرازيني جانلانديراراق بير دفعه ليك اونون كابوسوندان خيلاص اولماغا چاليشسادا، آتاسي نين خيالي هئچ زامان اونو بوراخمادي. 

  لئسلي استيوئن 1904- جو ايلده وفات ائله دي. 

  قارداش اؤلومو، باجي تويو 

  آتاسي نين اؤلوموندن سونرا عاييله بلومسبئري بؤلگه سينه كؤچدو. عاييله يه باشچيليغي ويرجينينانين تكجه قان باغليليقلاري دئييل، روحي باغليليقلاري دا اولان باجي وانئسسا ائديردي. بعضي آراشديرماچيلارا گؤره ويرجينيا ايله باجيسي آراسيندا سئوگي علاقه لري وار ايدي. بو عرفه ده قارداشي توبي ده يونانيستان سفريندن قاييداندا خسته ليكدن اؤلدو. يئني بير سارسينتي ياشاميش ويرجينيا چوخ كئچمه دن داها بير ضربه آلدي: وانئسسا مشهور رسسام كلايو بئلله اره گئدير. 

  اويسا ويرجينيا ايله وانئسسا هله اوشاقكن عهد ائتميشديلر كي، هئچ واخت اره گئتمه سينلر. وانئسسا عهدينه وفا ائلمه دي. 

  بلومسبئري قروپو 

  بلومسبئرييه كؤچندن سونرا استيوئنلرين گونلري خوش كئچيردي. اونلارين ائولرينه بريتانييانين گنج، چاغداش، اؤنجول ادبيات، اينجه صنعت، علم آداملاري آياق آچماغا باشلاديلار. 

  بئلجه تاريخه  " بلومسبئري قروپو "  آدييلا دوشن بلومسبئري قروپو ياراندي. اويه لرين آراسيندا ويتا اسئكويل-اوئست، م. فورستئر، دورا كاررينقتون، دونكان قرانت، كلايو بئلل كيمي گؤركملي رسساملار، ادبيات آداملاري ايله ياناشي مشهور ايقتيصادچي 20-جي يوزايلين  ايقتيصاد علمينده دؤنوش ياراتميش جون مئينارد كئينس ده وار ايدي. اونون ايقتيصادياتين دؤولت تنظيملنمه سيندن عيبارت نظريييه سي 20-جي عصرين اولينده دونياني بوروين بؤحراندان ان ياخشي خيلاص واسيطه سي اولدو. كئينسين نظريييه سي دؤولتين ايقتيصادياتي تنظيمله مه سي نين قاچيلماز اولدوغونو بير داها تصديقله دي. 

  بلومسبئري قروپونون تكجه اينگيليس توپلوموندا حاكيم ويكتوريان دونياگؤروشونه قارشي موباريزه اوصولو دئييل، هم ده بير دوستلوق، صميميت قروپو ايدي. بو قروپداكيلارين بير اؤزلليگي ايسه هوموسئكسوال، يا دا بيسئكسوال اولمالاري ايدي. 

  1900-جو ايللرده ويرجينيا آتاسي نين پئشه سيني داوام ائتديرمه يه، ژورناللاردا تنقيدي مقاله لر يازماغا باشلادي.  " تايمس "  ژورنالي نين ادبيات علاوه سينه تنقيدي مقاله لر، ائسسئلر يازيردي. بيرينجي روماني اوزرينده ده ايشله ييردي. 

  غئيري-عنعنه وي نيكاح

  ويرجينيا 1912-جي ايلده يازيچي، ژورناليست لوئنارد وولفا اره گئدير. اونلارين ائولنمه سي  قارشيليقلي حؤرمت اوزرينده قورولموشدو. ويرجينيا فريگيت، سئكسوال باخيمدان پاسسيو ايدي. اوشاقليغيندا ياشاديغي جينسي تراوما اوندا پروبلئملر ياراتميشدي، كيشيلردن چكينيردي. بونا گؤره ده آدي يازيچي، رسسام، مشهور باغبان، يوكسك جمعيت قاديني ويتا اسئكويل-اوئستله لئزبييان علاقه ده حاللانيردي. 

  1917-جي ايلده ار-ارواد ويرجينيانين بوتون اثرلري نين نشر اولوناجاغي  " هوقارد-پرئسس "  نشرياتيني تاسيس ائديرلر. لئونارد يولداشينا ياراديجيليغيني داوام ائتديرمه سي اوچون هر جور كؤمكليك گؤستريردي. اگر ويرجينيانين آتاسي نين عاييله سينده آناسي لئسلي نين قايغيسينا قالير، اونون ياراديجيليغي اوچون مونبيت شراييط ياراديرديسا، بو دفعه  ترسينه ايدي، لئونارد اونون قايغيسينا قاليردي. 

  هم مودئرنيست، هم فئمينيست 

  مودئرنيزيم آخيمي نين ياراديجيلاريندان بيري كيمي تانينان ويرجينيا وولف اينگيليس ادبياتيندا اؤز نوواتورلوغو ايله سئچيليردي. او اؤز اثرلرينده مودئرنيزم ادبي پرييوملاريندان ساييلان  " بيلينج آخيني " -ندان گئنيش ايستيفاده ائديردي. 

   " بيلينج آخيني "  جئيمس جويسون، ويليام فوكنئرين ده چوخ گئنيش ايستيفاده ائتديكلري اوصوللاردان ساييليردي. مونولوقلار واسيطه سيله قهرمانين ايچ دونياسي، داخيلي عالمي آيدينلاتيلير، دوشونجه سينه نوفوذ ائديلير. ويرجينيا وولف ايستر  " دالووري خانيم " دا،  " ماياكدا " دا،  " اورلاندو " دا،  " ايللر " ده بؤيودويو ويكروريان اخلاقيني، عاييله سيندن گلمه و جمعيتده ده مؤوجود اولان پاتريارخال موناسيبتلري تنقيد ائديردي. اونون اثرلرينده فئمينيست باخيش گئنيش شكيلده اؤزونو گؤستريردي. ويرجينيا وولف  " گئجه و گوندوز "  رومانيندا قادين حاقلاريندان، صينفي فرقلر، عشق، موباريزه، آزادليق كيمي مسله لردن دانيشير. يازار گونوموزون اينسانين طالعييني يوموريستيك، آما حسساس بير ديلله آنلاتماغا چاليشير. 

  قادينلارين  " اوليس " اي 

   " دالووري خانيم "  اثرينده ده جئيمس جويسون  " اوليس "  اثرينده اولدوغو كيمي بير قادينين بير گونلوك حياتيندان بحث ائدر. بو اثر مودئرنيزم آخيمي نين ان گؤرونوملو اؤرنكلريندن ساييلير. ويرجينا وولفون دئمك اولار كي، بوتون رومانلاري چاغداش رومان ژانرينا ان باريز اؤرنكلر ساييلا بيلر.  " اؤزونه اؤزگو بير اوتاق " اي ايسه بو سيرالامايا داخيل ائتمك اولماز. 

   " اؤزونه اؤزگو بير اوتاق "  فئمينيزم حركاتي نين كلاسسيك بير اثري اولاراق قبول ائديلير. ساده، آخيجي ديلله يازيلميشدير. بو كيتاب  " قادينلار آراسيندا نييه شئكسپير يوخدور؟ "  دئينلره ان موكممل جاواب ساييلا بيلر. وولف قادينلارا سسلنه رك:  " پول قازانين، اؤزونوزه اؤزگو بير اوتاق و بوش زامان آييرين. و يازين، كيشيلر نه دئير دئيه دوشونمه دن يازين. "  - دئييردي. دؤوروموزده يازماق اوچون  " پول و زامان "  مسله سيني تكجه قادينلارا عاييد ائتمك حاقسيزليقليق اولاردي منجه. 

  ويرجينا وولف گونده ليك يازماغي يالنيز خسته ليك زاماني دايانديريردي. گونده ليكلري 4 جيلدده نشر اولونموشدو. 

  ايكينجي دونيا  ساواشيندان سونرا ويرجينيا وولف بؤيوك بريتانييادا دئمك اولار كي، اونودولموشدو. حتّي چاپ اولونان كيتابلاري نين اوزرينه ده  " لئسلي استيوئنين قيزي، لئونارد وولفون حيات يولداشي  "  كيمي پاتريارخال دامغا ياپيشديريليردي. 

  70-جي ايللرده ايسه فئمينيست حركاتي نين گئنيش تشككول تاپماسي ايله ويرجينيا وولفون يئنيدن دوغوشو باشلادي. او 20-جي عصر بريتانييا و دونيا ادبياتيننين سيماسيني دييشميش بؤيوك شخصيت كيمي گئرچك قييمتيني آلدي. 

  سونونجو اؤلوم 

  ايكينجي دونيا ساواشي نين باشلانماسي ايله ويرجينيانين باش آغريلاري و قورخولاري يئنيدن آرتماغا باشلادي. وانئسساني نين اوغلونون ايسپانييادان اؤلوم خبري گلير. 

  ويرجينينا نين داها طاقتي قالماميشدي. سون زامانلار خسته ليگي شيددتلنميشدي. تئز-تئز ساييقلايير، قاراباسمالار اونو راحات بوراخمير، دليليك علامتلري حيس اولونوردو. بير ياندان دا آلمانلارين اينگيلتره يه هوجومو سيراسيندا (بومبالامادا ويرجينينا نين ائوي ده داغيديلميشدي) ميلليتجه يهودي اولان اري نين اؤلدوروله جگي قورخوسو. ويرجينينا داها بير اؤلومو قالديرا بيلمزدي. چيخيش يولو آختاريردي. چيخيش يولو يئنه ده اؤلوم اولدو. 

  ويرجينيا وولف 1941-جي ايل 28 مارت تاريخينده جيبلرينه چوخلو داش ييغاراق شهر كنارينداكي ائولري نين ياخينليغيندان آخان اووز چايينا اؤزونو آتدي. ارينه يازديغي ويداع مكتوبوندا بو سؤزلر يازيلميشدي:  " منه ائله گلير كي، بيز سنينله دونيانين ان خوشبختي ايديك " . 

  اثرلري

  ·       ائشيگه يولجولوق(1915) 

  ·       گئجه و گوندوز (1919) 

  ·       جاكوبون اوتاغي (1922) 

  ·       دالووري خانيم (1927) 

  ·       ورلاندو: بير ياشام اؤيكوسو (1928) 

  ·       اؤزونه اؤزگو بير اوتاق (1929) 

  ·       دالغالار (1931) 

  ·       لوندرا گؤرونتولري (1931) 

  ·       فلوشه، بير كؤپگين روماني (1933) 

  ·       ايللر (1937) 

  ·       اوچ گينه (1938) 

  ·       پرده آراسي (1941) 

  ·       ويرجينيا وولفون گونلوكلري 

  ·       باز ائرته سي  يا دا چرشنبه آخشامي

    قايناق : ويكي پديا

   كؤچورن : آيدا بيات