اؤزگور قادين

آذربايجان قاديني

آقاتا كريستي - دئتئكتيو ژانري نين كراليچاسي!

+0 به یه ن

آقاتا كريستي - دئتئكتيو ژانري نين كراليچاسي!  

   آقاتا مئري كلاريسسا ميللئر - ( 15 سئنتيابر 1890-جي ايل، دئوون ، اينگيليس - 12 يانوار1976-جي ايل (85 ياش)، اوكسفوردشير، اينگليس) اينگيليس لي يازيچي، دئتئكتيو ژانري نين كراليچاسي. بو لقب اونا هله ايللر اؤنجه وئريلدي. اؤزو ده گله جگي نين نئجه اولاجاغيني اوشاقليقدان تخمين ائتميشدي. بو گون آرتيق اونون اثرلري 103 ديله ترجومه اولونوب. كيتابلاري نين تيراژي ايسه ايلدن-ايله آرتير. 

  ايلك دئتئكتيو رومان و وئريلن وعد 

  بير چوخ مشهور يازيچيلارين حياتي ايله ماراقلاناندا بللي اولور كي، اونلارين چوخونون اوشاقليغي آجيناجاقلي و كئشمكئشلي كئچيب. آقاتانين بو جهتدن بختي گتيرميشدي. زنگين بير عاييله ده دونيايا گؤز آچان قيزجيغازين بؤيودويو موحيط گله جكده يازاجاغي اثرلرينده آپ آيدين تصوير اولوناجاقدي. 

  11 ياشي نين تاماميندا آتاسيني ايتيرن آقاتا آناسي نين حيمايه سينده بؤيويور. او، 8 ياشينا كيمي هئچ بير مكتبده تحصيل آلمير، چونكي آناسي بونون علئيهينه ايدي. آما كريستي هله 4 ياشيندا يازماغي باجاريردي. 

  ياشيدلاريندان، باجي-قارداشيندان چوخ فرقلنن بالاجا قيزين سانكي اؤز دونياسي وار ايدي. آقاتا هميشه خياليندا جانلانديرديغي اوبرازلارلا صؤحبتلشير، فيكيرلريني اونلارلا بؤلوشوردو. ائله همين دؤورلرده آرتور كونان دويلون  " ماوي كاربونكول "  آدلي دئتئكتيو روماني نين سس-سوراغي كريستييه ده گليب چيخير. روماني اوخويار-اوخوماز بالاجا قيزجيغاز اؤزونه سؤز وئرير:  " نه واختسا من ده دئتئكتيو رومان يازاجاغام! " . 

  آقاتا ايلك اثرلريني آناسي نين تاثيري ايله يازير. گوجلو سويوق ديمه دن ياتاغا دوشن قيزا آناسي داريخماماسي اوچون كيچيك حئكايه لر يازماغي مصلحت گؤرور. سونرالار آقاتا موصاحيبه لرينده دئييردي كي، يازيچيليغا بير هوببي كيمي ياناشيرميش:  " اگر كيتابلاريمي هئچ كيم اوخوماسا بئله، من اونلاري حيات يولداشيم اوچون يازاجاغام " ، - دئييردي. 

  رقص مئيدانچاسيندان دونيايا سياحت 

  اونون يالنيز بير آرزوسو وار ايدي: خوشبخت عاييله حياتي... بالئت له مشغول اولان كريستي ايلك حيات يولداشي ايله رقص مئيدانچاسيندا تانيش اولور. هوندور، ساريشين و بير قدر ادبسيز حربچي آرچيبالد اونون ديقتيني ايلك باخيشدان جلب ائدير. بير مودت سونرا او، آرچي ايله بيرگه حياتا راضيليق وئرير. بيرينجي دونيا موحاريبه سي نين باشلانماسي ايله علاقه دار آرچي جبهه يه گئدير. آقاتا ايسه هوسپيتالدا ايشله ديگيندن اونلار نادير حاللاردا گؤروشه بيليرلر. طيبب باجيسي وظيفه سينده چاليشان گله جك مشهور يازار بو ايشيندن هميشه راضيليق ائديردي:  " بو، اينسانين مشغول اولا بيله جگي ان ياخشي پئشه دير " . موحاريبه  بيتديكدن سونرا جوتلوك خوشبخت ياشاماغا داوام ائدير. بو ايللر كريستي اوچون چوخ دوشرلي اولور. حيات يولداشي بيزنئسده فعاليت گؤسترير، اؤزو ايسه قيزي نين قايغيسينا قالير و آرا-سيرا جيزما-قارالاريني ائدير. ايلك كيتابيندان آلديغي قونورارا ائو آلير. ايكينجي اوشاق باره سينده فيكيرلشن آقاتانين فيكري اري نين دئديكلري ايله اوست-اوسته دوشمور. آرچي بير اؤولادلا كيفايتلنديگيني دئيير:  "اوندانسا، ايكينجي ماشين آلماق داها مقصده اويغوندور". 

1926 -جي ايلي آقاتا  " عؤمرومون ان چتين ايلي "  آدلانديرير. او زامان آناسي رحمته گئدير. چتينليك چكن كريستي حيات يولداشيني كؤمه يه چاغيران زامان آلديغي جاواب بو اولور:  " يول اوزوندور و من بازار گونو قولف  اوينونو ايزله مك ايسته ييرم " . بوتون بو باش وئرنلر آقاتاني  " بوغوردو " . گئتديكجه آقاتادا آمنئزييا علامتلري پئيدا اولور. قيزلاري نين آد گونونده آرچي نين موديري نين كاتيبه سينه وورولدوغونو و كريستيدن بوشانماق ايستگيني بيلديرمه سي ايله وضعيت داها دا گرگينلشير: عاييله حياتي سونا چاتير. 

  غئيب اولما و يا اويدورولان نؤوبتي سوژئت 

      ...مشهور رومانلارين مؤليفي بيردن يوخا چيخير. ايكي هفته دن آرتيق لندن پوليسي اونون آختاريشييلا مشغول اولور. بير مودت سونرا  " كراليچا " نين آوتوموبيليني يول قيراغيندان تاپيرلار. اونون اؤلدورولدويو حاقدا موختليف شاييعه لر دولاشماغا باشلايير. گوناهكارلارين سيياهيسيندا اري بيرينجي دايانميشدي. چونكي اورتايا قويولان فاكتلار بونو تصديقله ييردي: آوتوموبيلين آرچي نين معشوقه سي ايله دينجلديگي مكاندان تاپيلماسي، ماشينين ايچينده آقاتايا عاييد اشيالارين اولماسي و س. 

  قزئتلر اونون اؤلوموندن يازديغي زامان آقاتا مئهمانخانالارين بيرينده گيزله نيب اؤزو حاقدا دئييلنلري ديقتله ايزله ييردي. اونون بير ايستگي وار ايدي: اريني اونون اؤلومونده گوناهكار بيلسينلر. او، مئهمانخانادا ياشاياراق اري نين عذاب چكمه سي باره ده يازيلان مقاله لري اوخويوب لذت آليردي. مطبوعاتا ائلان اولوندو كي، آقاتا يادداشيني ايتيرديگيندن كيمليگيني اونودوب. كريستيني ساغ و سالامات تاپاندا قزئتلر اونون  " روجئر ائكرويدون قتلي "  روماني نين رئكلام كومپانيياسي اولدوغونو عالمه جار چكدي. 

  آقاتا كريستي:  " منيم اريم آرخئولوقدور. آرخئولوقلار ايسه كئچميشين دئتئكتيولريدير "  

  موعاليجه آلديقدان سونرا 1928-جي ايلده اريندن بوشانيب هميشه آرزوسوندا اولدوغو ماجرا دولو سياحتلره باشلايير. ايلك اولاراق باغدادا  يولا دوشور. بو سفر زاماني او، 25 ياشلي ماكس آدلي آرخئولوقلا تانيش اولور. عاييله حياتيندان باشي داشا دَيمه سينه باخماياراق آقاتا بختيني بير داها سينايير: اؤزوندن 14 ياش كيچيك اولان ماكسلا ائوله نير. اونلارين تويوندا قوهوملاردان يالنيز آقاتانين قيزي روزاليندا ايشتيراك ائديردي. چونكي چوخلاري اوندان اوز دؤندرميشدي. آقاتا بو ائوليليگينده اؤز خوشبختليگيني تاپير. ياش فرقينه گلنده ايسه آقاتا ظارافاتجا دئييردي:  " ماكس آرخئولوقدو. آرخئولوقلارسا قديمليگي سئوير. اونا گؤره ياشيم آرتديقجا من اونا داها ماراقلي گؤرونورم " . 

  اؤلومو 

  يازيچي 1976 -جي ايل يانوار آيي نين 12 -سي وفات ائديب. او، اؤز آوتوبيوقرافيياسيني بو سؤزلرله بيتيرير:  " ياشاديغيم حيات، منه بخش اولونان سئوگي اوچون آللاهيما تشككور ائديرم... "  

  ماراقلي فاكتلار 

  ·       موصاحيبه لري نين بيرينده اعتيراف ائدير:  " رومانلاريم اوچون سوژئتي من قاب يوياركن تاپيرام. بو آخماق مشغوليت هميشه قتلر حاقيندا فيكيرلره سؤوق ائدير.  

  ·       اقاتا بير مودت اجزاچي ايشله ييب. بو اونون اثرلريندن ده آيدين حيسس اولونور. دئتئكتيولري نين 83-ده قهرمانلاريني زهر ايچديره رك  " اؤلدوروب " . بونون ديگر سببيني كريستي قان ايچينده اوزانميش اؤلولردن خوشو گلمه ديگيني و اودلو سيلاحلاردان باشي چيخماديغي ايله علاقه لنديريب.  

  ·       اوخوجولارين حيسسلرينه حؤرمتله ياناشديغيندان آقاتا كريستي هئچ واخت سئكسوال جينايتلري روماني نين مؤوزوسونا چئويرمه ييب. او بيلديريردي كي، سئكسوال زوراكيليق اينسانين حيسسلرينه منفي تاثير ائدير و اوخوجونو اثرين اساس خطيندين آييرير.  

  ·       هامي نين سئوديگي پئرسوناژ ائركول پوارو آقاتا كريستي نين ايلك رومانيندان اورتايا چيخيب. بو قهرمان اونون سون رومانلاري نين بيرينده وفات ائدير. ماراقليدير كي، بو رومان نشر اولوناندان 40 ايل اول يازيلميشدي. آما ناشيرلر سئويملي پئرسوناژين اؤلومو ايله باغلي اولان كيتابي چاپ ائلمكدن بويون قاچيريرديلار.  

  ·       60 ياشيندا يازيچي واختيله اوپئرا صنعتچيسي اولماغي آرزولاديغيني سؤيله ييب. آما سسي نين اولماماسي اونون بو آرزوسونو اورگينده قويوب.  

  ·       ميلاد بايرامي عرفه سينده ائولنن آقاتا مراسيمده آغ پالتار و فاتا عوضينه پلاش و قيرميزي شلياپا گئيينميشدي.  

  ·       اقاتا كريستي نين يازماق ورديشي غريبه  ايدي: اونا ايستي واننا و آلما لازيم اولورموش.  

  ·       كريستي 60 دئتئكتيو رومان و 19 حئكايه مجموعه سي چاپ ائله ييب. باشقا ديللره ترجومه يه گؤره، شئكسپيردن سونرا او، ايكينجي اينگيليس يازيچيسيدير.  

  ·       اقاتا كريستي نين نوه سي ائولري نين چارداغيندان ننه سي نين 27 كاسئته يازديغي آوديوموصاحيبه سيني تاپيب. آقاتا كريستي بورادا بوتون حياتيني كيچيك دئتاللارا قدر دانيشيب. بورادا بعضي اينتيم مقاملار اولدوغونا گؤره كاسئتلرين هاميسي ايجتيماعيته آچيقلانماييب. كاسئت كوللئكسيياسي چارداقدا 40 ايل گيزلي قاليبميش.  

قايناق : آز- ويكي پئديا

كؤچورن : آيدا بيات