آشيق پري نين آزاد روحو 

   ترانه واحيد 

     گؤركملي آلمان شرق شوناسي آدولف بئرژئ 1867-جي ايلده لئيپسيقده نشر ائتديرديگي  "مجموعه اشعار شعراي آذربايجان "  آدلي مجموعه ده يازيردي:  " 1829-جو ايلين آخيرلاريندا آراز چايي ساحيل لرينده اوزانان ماراليان كندينده 18 ياشيندا بير قيز ظهور ائتدي. ائشيديلمه ميش بير گؤزلليگه ماليك اولان بو قيز آشيق پري ايدي... "  

     آذربايجان قادين آشيق صنعتي نين بانيسي ساييلان آشيق پري 1813-جو ايلده جبراييل قزاسي نين ماراليان كندينده آنادان اولوب. آشيق پري شعئيرلري نين بيرينده دوغما ديياريني بئله ترننوم ائديردي: 

     پري نين دردي توغياندير، 

     ساكين يئري مارالياندير، 

     گولوم قؤنچه سينده ياندي، 

     بولبوللر افغان ائيله دي. 

     دئييلنلره گؤره، آشيق پري نين آتاسي خيردا آلوئرله مشغول اولدوغوندان اونا ائل آراسيندا تاجير حاجي ساياد دئيرلرميش. پري نين آناسي گولوستان خانيم ايسه زمانه سي نين موترققي فيكيرلي قادينلاريندان بيري اولدوغوندان، پري كيچيك ياشلاريندان روحاني تحصيلي آلير، عرب-فارس ديللرينه دريندن بلد اولور. قاراباغ آشيق مكتبي نين نوماينده لريندن بيري - محمد بي عاشيقدن آشيق صنعتي نين سيرلريني اؤيره نير. او دؤورده گئنيش ياييلميش  " وليجان " ،  " ناغيل كسمه شيكسته " ،  " گوللو قافييه " ،  " قارا قافييه "  ساز هاوالاريني جوره سازدا چالماغي اوستاديندان اؤيره نير. پري ساز چاليب-اوخوماقلا ياناشي، مجليس لرده بداهه تن شعئيرلر دئير، غئيري-عادي ايستعدادي، آزاد روحو، آزاد فيكيرلري ايله هر كسي حئيرت لنديرردي. 

     گؤركملي آلمان شرق شوناسي آدولف بئرژئ داها سونرا يازير:  " ...اونون دئييشمه لري، حاضيرجاواب ليقلا دئديگي شعئيرلر ديقتي جلب ائديردي. اؤز دؤورونون ايستعدادلي شاعيرلري ايله دئييشمه لرده هميشه مووففقيت قازاناردي. هئچ كسين اونا قاليب گلمه سينه ايمكان وئرمزدي " .  

     جان ايچينده من بو جاني نئيلرم، 

     لعلي-يمن، بدخشاني نئيلرم، 

     خاني، بيي، من پاشاني نئيلرم، 

     پري يم، ائيلرم دوعالار سنه. 

     آشيق پري عاشيقانه ليريك شعئيرلر يازار، صاف محبتي، آنا طبيعتي، عولوي اينسان حيس لريني اؤزونه مخصوص اوستاليقلا ترننوم ائدردي. اودور كي، حياتي ليك و صميمي ليك آشيق پري شعئيرلري نين اساس خوصوصيت لريندندير. 

     داد ائيلرم هاراي ناشي اليندن، 

     ياندي جيگر عشق آتشي اليندن، 

     من نه دئييم گؤزوم ياشي سئليندن 

     اوركوشور سونالار، گؤللر اويانير. 

     تانري آشيق پريني سانكي قاراباغ ادبي موحيطينه دوشونولموش شكيلده گؤندرميشدي. او، هم ظاهيري گؤزلليگي، هم ايستعدادي ايله قاراباغ ادبي موحيطيني اؤز اطرافيندا جمع لشديرميش، سازلا-سؤزون ايشيغيندا اونلاري والئه ائتميشدي.  

     بؤيوك ادبيات شوناس عاليم فيرودون بي كؤچرلي 1903-جو ايلده يازيردي:  " اؤزونون عاغيل و ايستعدادي ايله چوخلاريندا حئيرت دوغوران گؤزل و گنج شاعيره آشيق پري اوزامانكي ساوادلي، تحصيل گؤرموش ادبي سيمالارين ديقت مركزينده دايانيردي " . آشيق پري موعاصيرلري محمد بي آشيق، جعفرقولو آغا نوا، اسد بي و باشقا نئچه-نئچه دؤورونون گؤركملي صنعتكارلاري ايله ياخين دوست اولموش، اونلارا شعئيرلر حصر ائتميشدير.  

     آشيق پري نين شعئيرلري اون دوققوزنجو عصرين اورتالاريندان ادبيات شوناس لارين ديقتيني جلب ائتميش، بوتون تذكيره و ادبيات مونتخبات لاريندا شاعيره نين شعئيرلريندن نومونه لر وئريلميش، آدي ايفتيخار حيسي ايله چكيلميشدير. 1856-جي ايلده نئسئسوو تئيمورخانشورادا - اينديكي شيمالي قافقازين بويناكسك شهرينده چاپ ائتديرديگي  " مجموعه واقف و معاصران ديگر "  آدلي مجموعه سينده آشيق پري ياراديجيليغيندان سؤز آچير. مير مؤحسون نوواب، سالمان مومتاز، علي عباس مونزيب، عزيزه جعفرزاده، سدنيك پاشايئو و باشقالاري آشيق پري نين ياراديجيليغي باره ده ديرلي فيكيرلر سؤيله ميشلر.   

     آشيق پري چوخ ياشاماميش، تخمينن 1848-جي ايلده، 37 ياشيندا دونياسيني دييشميشدير.  

     بير ديلبر پرييه پري قان آغلار، 

     چكيليب سينمه دويونلو داغلار، 

     اؤلوبدور بولبولوم، لال اولوب داغلار، 

     ساراليب، ساويليب گوللر، آغلارام. 

     ايللر، قرينه لر كئچسه ده، آشيق صنعتي نين گؤزل پريسي قاراباغين بير پارچاسي كيمي روحوموزدا، يادداشيميزدا، تاريخيميزده ياشاياجاق، اونون ظريف دويغولاري زامان-زامان آشيق شعئيريني بزه يه جك. 

كؤچورن : آيدا بيات