آوروپانين دمير خانيمي

وينستون چئرچيلدن سونرا مارگارئت تاچئر اينگيلتره نين ييرمينجي يوز ايلده گئرچكدن ده ان پاريلدايان سياسي فيگورودور .  

   اينگيلتره نين سياسي پارتييالاري نين بيريسي نين قادين ليدئري اولاراق تاچئر 16 ايل ( 1974 - 1990) موحافيظه كار و ياخود كونسئرواتور پارتيياسي نين صدرينده فعاليت ائديب، 1979 دا اينگيلتره نين باش باخاني سئچيليب و بو گؤرَو ده بيرينجي قادين اولاراق، 11 ايل چاليشدي. 

    تاچئر گنجليگينده آتاسي نين ارزاق دوكانيندا ايشله مكله آزاد بازارين قايدالارييلا تانيش اولوب سونرالار كيمييا و حوقوق بؤلگه لرينده تحصيل آليب، اونون سياسي حياتيندا اونا عؤمرونون سونونادك مالييه و روحو جهتدن ان بؤيوك دستك وئرن دوني تاچئرله عاييله قوردو. 

   تاچئر ايش باشينا گلنده اينگيلتره نين سياسي ايجتيماعي و اؤزلليكله ايقتيصادي دورومو چتين پروبلئملري ياشاييردي. ايشسيزليك، موهاجيرلرين اينگيلتره يه تؤكولمه سي، عيرقيچي دسته لري نين يارانماسي، ايرلندييا ايستيقلالچيلاري نين بومبا قويمالاري، اينگيلتره نين آوروپا بيرليگي ايله چتين آنلاشيلماسي و فالكلند آدالاري حاقدا آرژانتين ايله ساواش  ايمكاني تاچئرين قارشيسيندا دوروب چؤزوم يولو گؤزله ييرديلر. 

   ايچ سياست چرچيوه سي نين بيرينجي آدديميندا، تاچئر تام گوجونو اؤلكه نين ايقتيصادي حياتيندا دؤولتين رولون سيلمك و دؤولتي فيرما و كومپانييالاري اؤزللشديرمه و خاريجي كاپيتاللاري جلب ائتمه يه قويدو. 

    اونون ايقتيصادي سياستي سونوجوندا ايلده بير ميليارد پوند ضرر وئرن و ايستحصالي آوروپانين كومپانييالاري نين ايستحصالينين ياريسينداندا آز اولان بريتيش استيل كومپانيياسي آوروپانين ان بؤيوك دمير كومپانيياسينا چئويريلدي. ائله جه ده اينگيلتره نين ان بوشلو كومپانيياسي اولان بريتيش ائير وئيزين اؤزلشمه سيله دونيانين ان تانينميش و ان منفعتلي هاوا يولييلا داشيما وسيله لري سيياهيسيندا يئرلشدي. 

   تاچئرين ايچ سياستيني خولاصه ائتمك اوچون اونون 1975ده نوطقونون بير بالاجا بؤلمه سي يئترلي دير: « هر اينسانين نئجه ايسته ديگي ايشله مه يه، گليريني نئجه ايسته ديگي كيمي ايشلتمه سي، اؤز مولكونه يييه اولما و دؤولتي اؤز آغاسي يوخ بلكه ايشچيسي كيمي يانيندا گؤرمه يه حاقي وار. بونلار اينگيلتره نين ميراثي و آزاد بازارين اصل و گرك پرينسيپ لريدير و باشقا آزادليقلاردا بو آزادليقا باغليدير».

    تاچئر بريكستون كيمي صنعتي و ايشچي اوتوران شهرلرينده 55 فاييزا يئتيشن بئكارچيليق و خالقي  آياغا قالديران بئكارچيليقلا موباريزه آپارماق اوچون يئرينده بير سيرا قانونلار و ائله جه ده سنديكايا عوضو اولمايان ايشچيلري ايشدن محروم ائدن سنديكالارين ايمتييازلارين لغو ائتمه سي ايله اينگيلتره تاريخينده ايشسيزلرين سايين ان چوخ آزالتما رئكوردون الده ائتدي. 

    خاريجي سياست ساحه سينده تاچئرين فالكلند آدالاري اوسته آرژانتين ايله ساواشا گيرمه و ساواشي 3 هفته ده اوتماسي خالقين اونون سياستيندن ريضايتي نين آرتيرماسينا سبب اولدو. 

    آما تاچئري تكجه اينگيلتره نين ديگر باش باخانلاريندان يوخ بلكه ده آوروپانين تام ليدئرلريندن سئچيلمه سينه ايذن وئرن و اونو تاريخده يادداشتدا قالان بير فيگورا چئويرن، آوروپا بيرليگين ديز اوسته چؤكوردن و آوروپا بيرليگي نين بودجه سينه ايشتيراك ائتمه مقصدييله اينگيلتره نين وئرديگي پوللارين گئري قايتارماسيدي. اونون ووروشماسي نتيجه سينده آوروپا بيرليگي 1984 ده اينگيلتره نين وئرديگي و بيرليكدن آلديغي ماددي يارديملارين چكيسي بير اولدوغو حاقدا قرار قبول ائتدي. 

  1976  . اينجي ايلده ساوئت ايتتيفاقي نين « قيزيل اولدوز » گازئتي تاچئرين آنتي كومونيست مووقعيتينه گؤره  و اونو اولوسلار آراسي ايجتيماعيتينده گؤزدن سالماسي اوچون اونا « دمير خانيم » لقبيني وئردي. تاچئرين سياستي نين گؤركملي سونوجلاري و آوروپا بيرليگي قارشيسيندا دايانماسي بو لقبي عكسينه بير آلقيشا چئويريب گؤستردي كي گئرچكدن ده بو لقب تاچئره ياراشان و تاريخه تاپشيريلان بير آلقيش ايدي. 

كؤچورن: آيدا بيات