+0 به یه ن
حسين جاويدين ايدئيالار سيستئمينده قادين آزادليغي پروبلئمي
ائلميرا زامانووا
فلسفه علملري دوكتورو
قادين گولرسه بو ايسسيز موحيطيميز گوله‌جك،
سوروكلنن بشريت قادينلا يوكسله‌جك
آذربايجانين داهي شاعيري و موتفككيري حسين جاويدين ياراديجيليغيندا قادين پروبلئمي، عاييله‌ده و جمعيتده قادينا موناسيبت، قادينين يئري و رولو مسله‌سي موهوم يئر توتور و بو تصادوفي دئييل.
" منيم تانريم گؤزلليكدير، سئوگيدير " ، دئين شاعيري آذربايجان و عوموميتله شرق قاديني‌نين آجي طالعيي دوشوندورمه‌يه بيلمزدي. دئمك اولار كي، جاويدين ائله بير اثري يوخدور كي، اورادا قادينلا باغلي بو و يا ديگر مسله‌يه توخونولماسين و بو مسله‌يه شاعير اؤز موناسيبتيني بيلديرمه‌سين. ايييرمي ايكي پيئس و يوزلرله پوئما و شئعيرلرين ياراديجيسي اولان ح.جاويدين اثرلري‌نين چوخو بيلاواسيطه قادين آدي ايله آدلانديريلميشدير. ( " آفت " ، " مارال " ، " شئيدا " ، " شهلا " و س.) جاويدين تصوير ائتديگي قادينلار موختليف ميلّتلره و زومره‌لره عاييدديرلر و بير-بيرلريندن بير چوخ جهتدن فرقله‌نيرلر. شاعير اثرلرينده موعاصير قادينلارين جمعيتده و معيشتده وضعيتي مسله‌سي‌ايله ياناشي، اوزاق كئچميشده شرق قادينلاري‌نين آغير حياتيني دا تصوير ائدير. لاكين ايستر موعاصير، ايسترسه كئچميشده ياشاميش قادينلارين تصويرينده، جاويدين عوصيانكار، باريشماز، رومانتيك روحو اؤزونو گؤسترير، اونون قادينا موناسيبتي، قادين مسله‌سي‌نين حلي ايله باغلي فيكير و دوشونجه‌لري عكس اولونور.
ح.جاويدي، فئودال-بورژوا جمعيتينده ياشايان و بو جمعيتين قوربانلاري اولان بدبخت، حيات سئوينجيندن محروم، نادانليغين، ديني فاناتيزمين دوغوردوغو اخلاق نورمالاري آلتيندا ازيلن، پول ايله آلينيب-ساتيلان، اؤز ارلري طرفيندن آلچالديلان، محو ائديلن قادينلارين آجي عاقيبتي دايما دوشوندورور و شاعير بو ايجتيماعي عدالتسيزلييه اؤز اعتيراضيني بيلديرير، اينسانلاردا بو ظولمه قارشي باريشمازليق حيسي دوغورماغا چاليشير.
جاويد، قادينين حيات فاجيعه‌سيني، بوتون جمعيتين فاجيعه‌سي سايير، اونو جمعيتده مؤوجود اولان ضيديتلرله باغلايير، عدالتسيز ايجتيماعي قانونلارين نتيجه‌سي كيمي ايضاح ائدير.
هله 1910-جو ايلده يازديغي " آنا " پيئسينده جاويد، قاديني بوتون حوقوقلاريندان محروم ائدن فئودال عادت-عنعنه‌لرينه قارشي چيخير، اونلارا اؤز اعتيراضيني بيلديرير. بو اثرينده شاعير چوخ موهوم بير سوالا، " حياتدا نه‌يين، سئوگي‌نين و يا نيفرتين اساس اولدوغو؟ " سوالينا جاواب آختارير. شاعيري، بو حيسّلردن هانسي‌نين واسيطه‌سيله حياتي مسله‌لري حلّ ائتمه‌يين مومكونلوگو مسله‌سي دوشوندورور و بو مسله‌نين حلّينده او اوستونلوگو سئوگي و مرحمت حيسّينه وئرير. سونراكي اثرلرينده جاويد، يئنه ده بو مسله‌يه قاييدير، لاكين آرتيق اونو عكس مؤوقئعدن حلّ ائدير. " مارال " فاجيعه‌سينده شاعير، آذربايجانلي قيزي مارالين فاجيعه‌لي حياتيني تصوير ائتمكله، آذربايجان قاديني‌نين و بوتؤولوكده شرق قادينلاري‌نين حوقوقسوزلوغونو بوتون چيلپاقليغي ايله گؤسترير. لاكين بو پيئسده جاويد باشقا بير قادين اوبرازي دا يارادير (عصمت) و اونون واسيطه‌سيله جمعيتده يارانماقدا اولان، قادينين حوقوق و آزادليقلاريني مودافيعه ائتمه يه قادير اولان، يئني قووّه‌لرين مؤوجود اولدوغونو گؤسترمه‌‌يه چاليشير.
ماراقليدير كي، جاويد حتّي منفي پلاندا تصوير ائتديگي قادينلاري دا ايتّيهام ائتمكدن قاچينير و اونلارين گوناهلاري‌نين سببيني هر شئيدن اول، جمعيتين اونلارا قارشي عدالتسيز موناسيبتينده گؤرور، قاديني مودافيعه ائتمه‌يين اصلينده عدالتي مودافيعه ائتمهيه برابر اولدوغونو بيلديرير.
قئيد ائتمك لازيمدير كي، جاويدين قادين مسله‌سينه موناسيبتي، اونون قادين حاقيندا گؤروشلري هميشه عئيني اولماميشدير و اونلار زامان كئچديكجه موعين دييشيكليكلره اوغراميشلار. ياراديجيليغي‌نين ايلك دؤورلرينده قاديني اساسن ضعيف، گوجسوز، آلچالديلان، تحقير اولونان بير مخلوق كيمي گؤسترن جاويد، ياراديجيليغي‌نين سونراكي دؤورلرينده، قاديني اؤز حوقوقلاري اوغروندا موباريزه يه قادير اولان بير اينسان كيمي سجيّه‌لنديرير. مثلا، ياراديجيليغي‌نين ايلك دؤورونه عاييد اولان، " بير قيزين فريادي " ، " ورملي قيز " و س. اثرلرينده، شاعير قاديني يازيق، بدبخت، فيزيكي و معنوي عذاب و ايضطيرابلار آلتيندا اينله‌ين بير مخلوق كيمي تصوير ائدير. بو اثرلرده قادين، قفسه سالينميش، آزادليق حسرتي ايله چيرپينان بير قوشدور. جاويد بو شئعيرلرينده قادينلارا مرحمت حيسّيني ايفاده ائدير، لاكين اونلارين بو چوخ‌عصرليك ظولمدن خيلاص‌اولما يوللاريني گؤرمور و بونا هئچ بير اوميدي يوخدور. جاويد دوشونوردو كي، قادينين آزاد اولماسي‌نين، اويانماسي‌نين واختي هله گليب چاتماميشدير. شاعيري، " قادينين خيلاص اولماسي يوللاري نه‌لردير؟ اگر او كؤله‌ليك زنجيريندن خيلاص اولارسا، هارايا گئده جك؟ قادينين جمعيتده وضعيتي نئجه اولماليدير؟ اونون جمعيتده وظيفه‌لري نه‌لردير؟ سواللاري دوشوندوروردو و او، بو سواللارا جاواب آختاريردي.
زامان كئچديكجه، جاويدين بو مسله‌يه موناسيبتي موعينلَشير و كونكرئت شكيل آلير. مشهور " قادين " شئعيرينده او آرتيق قادينين آجي طالعييني تصوير ائتمكله، اونا مرحمت حيسّي ايفاده ائتمكله، اونون اينيلتيلريني ائشيتمكله كيفايتلنمير، اونون جمعيتده و عاييله‌ده رولو مسله‌سيني اؤن پلانا چكير، ديقتي بو مسله‌يه يؤنلدير. قادين اونون نظرينده يئني نسلين تربييه‌چيسي، اينسانليغين آناسيدير. او يالنيز اؤز اؤولادلاري‌نين دئييل، بوتون ميلتين آناسيدير: شاعير يازير:
" قادين! ائي مؤحترم انيسي بشر!
سنسيز اؤكسوز قاليردي چينسي بشر
و يا:
" آنا اؤولاديني بسلر، بؤيودور،
آناسيز ميلّّّت، اَوَت، اؤكسوزدور "
(ح.جاويد، سئچيلميش اثرلري. باكي، 1958، س.506)
ح.جاويده گؤره، قادينين جمعيتده يئري بؤيوك و شرفليدير و اونون ايستيثماري دؤزولمزدير:
" قادين، ائي سئويملي همشيره اويان،
آنا، ائي نازلي قادين، قالخ يوخودان!
سنين عالمده وظيفه‌ن، حيصه‌ن،
نه بؤيوك، هم نه آغيردير، بيلسن؟!
قادين! ائي سئوگيلي شفقتلي ملك!
بو قدر صبري-تحمّول نه دئمك؟
او لطافت، او نجابتله سانا
بو اسارت، بو حقارت نه روا؟ "
(يئنه اورادا)
" قادين " شعرينده جاويد، جمعيتده لياقتي آمانسيزجا آلچالديلان، بوتون اينسان حاقلاريندان محروم اولان قادينا، اونون حاقلاريني، جمعيتده لاييق اولدوغو يئري قايتارماغين ضروريليگي فيكريني ايفاده ائدير. بو شئعيرينده او، م.هادي كيمي قطعيتله چادرايا قارشي چيخير، اونو " ظولمتين پرده‌سي " آدلانديرير:
" اولويور ايشته حوقوقون پامال
چاليش، اؤيرن، آرا، بول، حقّّيني آل!
پرده‌يي - ظولمت ايچيندن سييريل!
قهرمانلار كيمي قاوغايا آتيل!
دوغرودور، جاويد بير قدر اول يازديغي " پنبه چارشاب " شئعيرينده آذربايجان و بوتؤولوكده شرق قاديني‌نين چادرا اؤرتمه‌سينه بير قدر ساكيت ياناشير، لاكين بو شعرينده ده شاعير، بونون اوزون چكمه‌يه‌جگيني، بير گون قادينين بو اؤرتوكدن آزاد اولاجاغيني بيلديرير:
" اؤرتون، اؤرتون، فاكات اونوتما، ساكين
سنين آچماق زامانين ايشته يارين "
معلومدور كي، جاويدين بو شعرينه م.هادي اؤزونون " عشقي-مؤحتشم " كيتابيندا جاواب وئرميشدير:
" من ايسته‌مم بو اؤرتويو، ائي شاعير ايسته‌مم!
نئچين يا؟
اؤرتو، بونو ياخدي كي، غرب اولدو مؤحتشم،
پُرفيض، پُرضيا "
بو سطرلرده م.هادي اؤزونه‌مخصوص بير ائموسيونالليقلا چادراني مودافيعه ائدنلره قارشي چيخير و حتّي حسين جاويدين " پنبه چارشاف " شئعيرينه اؤز اعتيراضيني بيلديرير. " من " پنبه چارشافين " عدوّو-هئياتييم (هياتي دوشمنييم) " دئيير.
قئيد ائتديگيميز كيمي، جاويد ده هادي كيمي، چادراني قادينلارين دوشمني ساييردي و قادينين اسارتدن خيلاص اولماسي‌نين يولونو، اونون معاريفلنمه‌سينده، علمه، بيليگه يييلنمه‌سينده، اؤز حوقوقلاري اوغروندا موباريزه ده گؤروردو:
" فضلي عورفانلا، موجهّز اولاراق،
جهلي ييخ، غفلتي ياخ، عجزي بوراق!
كيمسه دن گؤزله مه يارديم اصلا،
يالنيز كندينه كندين آغلا! "
(حسين جاويد. سئچيلميش اثرلري، س.507).
هله 1909-جو ايلده يازديغي " مسعود و شفيقه " شعرينده، جاويد آذربايجان جمعيتينده " ظولمت پرده‌سيني " ياريب خيلاص اولان ضيالي قيزلاري، ال‌وئريشسيز ايجتيماعي شراييطده، مولكدار، تاجير، مؤوهوماتچي دين آداملاري‌نين، احاطه‌سينده ياشايان و ياواش-ياواش اؤز حاق و حوقوقلاريني باشا دوشن، علمه، معاريفه ماراق گؤسترن ايلك قادينلارين بديعي اوبرازيني يارادير. " مسعود و شفيقه " شعري‌نين قهرماني شفيقه، جمعيتده حؤكم سورن عدالتسيزليگه قارشي چيخير، اونون سببلريني بيلمك ايسته‌يير، اونا اعتيراض ائدير. دوغرودور، بو هله فعال اعتيراض، عملي موباريزه دئييل، پاسسيو و ضعيف بير چيخيشدير. اونو، بو عدالتسيزليگين نه زامان آرادان گؤتوروله‌جگي دوشوندورور و او هله‌‌ليك بو سوالا جاواب تاپمير. ح.جاويدين " مارال " فاجيعه‌سينده ياراتديغي ديگر قادين اوبرازي - هوماي ايسه آرتيق، ايره‌‌لي‌‌ده قئيد ائتديگيميز كيمي، يئني حيات اوچون اويانميش شرق قادينلاريندان بيريدير. چادرا گئيمكدن ايمتيناع ائدن و بونا گؤره ديندارلارين و مؤعتديل، فاناتيك اينسانلارين تعقيبلرينه معروض قالان بو قادينين ايراده‌سيني هئچ نه قيرا بيلمير. او نَينكي اؤز حوقوقلاريني مودافيعه ائدير، حتّي اسارت آلتيندا اينله‌ين باشقا قادينلارا دا كؤمك اليني اوزادير، اونلارين عذاب و ايضطيرابلاريني هر واسيطه ايله يونگوللشديرمه‌‌يه چاليشير. بو اثرينده جاويد بير داها چادرايا نيفرت حيسّيني ايفاده ائدير، آچيق گزن قيزلاري يئني حياتين جارچيلاري آدلانديرير، اونلاري مودافيعه ائدير.
قئيد ائتمك لازيمدير كي، ياراديجيليغي‌نين بيرينجي دؤورونده جاويدي هله قادينلارين سوسيال-سياسي آزادليقلاري، اونلارين وطنداش حوقوقلاري حاقيندا فيكيرلر مشغول ائتميردي. شاعير يالنيز اونلارين فيزيكي و معنوي ظولم و اسارتدن آزاد اولمالاري حاقيندا دوشونوردو. او آذربايجان قادينلاري‌نين ساوادلي، تربييه‌‌لي، يئني مدني نسلي تربييه ائتمهيه قادير، لياقتلي آنا اولمالاريني ايسته‌‌‌ييردي.
بو تيپ قادينلاري جاويد يوكسك قييمتلنديرير، اونلاري يوكسك معنوي كئيفيتلره ماليك، عاغيللي، ايراده‌‌لي، ناموسلو، غورورلو، متانتلي و صداقتلي اينسانلار كيمي تصوير ائديردي. بو قادينلار، جاويده گؤره، مؤوجود شراييطده اؤز ايستك و آرزولارينا چاتماسالار دا، اؤز منليكلريني، لياقتلريني سونا قدر مودافيعه ائتمهيه قاديرديرلر.
جاويد بو فيكيرلريني بير چوخ اثرلرينده، او جومله‌‌‌‌دن " پئيغمبر " دراميندا دا سسلنديرميشدير. بو اثرينده او محمد پئيغمبري، عدالتين، قادينلارين حوقوق و برابرليگي‌نين، قادين آزادليغي‌نين طرفداري، كؤله‌‌ليگين دوشمني كيمي تصوير ائدير. جاويدين تصويرينده پئيغمبر پوئتيك طبيعته ماليك، صولح‌‌پرور بير اينساندير. شوبهه‌سيز، جاويدين تصوير ائتديگي پئيغمبر اوبرازي اونون ياراديجي تخييولونون محصولودور. بو اوبراز واسيطه‌سيله شاعير قادين حاقيندا اؤز فيكير و دوشونجه‌لريني ايفاده ائتميشدير. بو اثرينده او، دئمك اولار كي، " قادين " شئعيرينده دئديگي سؤزلري، پئيغمبرين ديلي‌‌له، تكرار ائدير:
قادين، قادين؟! اونو دويماق، دويورماق ايستركن
ياخار دوشونجه‌مي بير شؤعله، بير زهرلي تيكن
بوتون حياتي چيچكلنديرن فقط او، نئچين،
نئچين ازيلسين او، بيلمم نئچين سوروكلنسين؟!
قادين-گونش، جوجوق-آي... نورو آي گونشدن آلير
قادينسيز اؤلكه چاپوق محو اولور، زاواللي قالير
قادين الي‌‌‌له فقط بختييار اولور بو جاهان
او بير ملك... اونو تقديس ائدر بؤيوك يارادان
او چوخ سئويملي، گؤزل اينجه، نازلي بير خيلقت،
اونون آياقلاري آلتيندادير فقط جنّت
قادين گولرسه بو ايسسيز موحيطيميز گوله جك،
سوروكلنن بشريت قادينلا يوكسله جك...
(حسين جاويد، اثرلري، دؤرد جيلدده؛ جيلد اوچ. س.47-48. باكي، 1984)
بونونلا ياناشي، جاويد فئودال اخلاقي‌نين، شريعت قانونلاري‌نين كؤهنه‌لميش عادت و عنعنه‌لرين مؤحكم كؤك سالديغي جمعيتده، اؤز آجي حياتيني ياشايان و بو اوميدسيز حياتدان خيلاص يولونو يالنيز اؤلومده آختاران زاواللي قادينلاري ياددان چيخارمير، اونلاري مولكدار ديني اخلاقي‌نين قوربانلاري سايير. بو قادين اوبرازلاري واسيطه‌سيله جاويد، قادينا وحشي موناسيبتين معيشتده و جمعيتده نه قدر درين كؤك سالديغيني گؤسترير، بونا اؤز نيفرتيني و اعتيراضيني بيلديرير. " زاواللي قيز " شئعيرينده شاعير يازير:
" آه، صد آه! يئتميشده اولان بير قوجايا
وئرديلر بير قيزي، سئومه‌دي اونو، زوراً اونا "
سئوگيسيندن ال اوزن قيز بوغولوب درده، غمه،
قوجايا گئتمه‌دن اولموشدو او راضي اؤلومه "
بو اخلاقين ديگر قوربانلاريني جاويد " ايبليس " و " اوچوروم " دراملاريندا ياراتديغي گؤيرچين و خاور اوبرازلاريندا تصوير ائدير. توركييه حياتي‌نين ماتئرياللاري اساسيندا ياراديلميش بو بدبخت قادين اوبرازلاري، اونلارين حيات فاجيعه‌لري و بو فاجيعه‌لرين سببلري موختليفدير. اگر آذربايجانلي قيزي مارالين قاتيلي وحشي عادتلرين حؤكم سوردويو بير شراييطده تربييه آلميش، نادان و جاهيل مولكدارديرسا، داغيستانلي قيزي عيصمتين زورلاييجيسي خانزاده ديرسه، تورك قيزلاري گؤيرچين و خاورين قاتيللري " ضيالي " ، " زادگان " ارلريدير.
خاورين قاتيلي، ويجداندان، مرحمتدن دانيشماغي سئون، بو حاقدا فيلوسوفلوق ائدن، اصلينده ايسه اؤز دوغما قارداشي‌نين قانيني تؤكن عاريف، گؤيرچينين قاتيلي ايسه، يئنه ده " ضيالي " ، خاريجن مدني گؤرونن، غرب اخلاقيني تبليغ ائدن رسسام جلالدير. بو اوبرازلار واسيطه‌سيله جاويد، شرق قاديني‌نين نادانليقدان، گئريليكدن، ديندن، شريعتدن، كؤهنه عادت و عنعنه‌لردن، مولكدار ظولم و اخلاقيندان باشقا، داها بير يئني دوشمني‌نين اولدوغونو بيلديرير؛ بو دوشمن " غرب اخلاقي " ، " مدنيلشديريلميش وحشيليك " ، يئني تيپلي زوراكيليقدير.
ح.جاويد، توركييه حياتيندان گؤتورولموش " آفت " فاجيعه‌سينده بو مؤوضويا بير داها قاييدير و آفت، آلتون‌ساچ و آلاگؤز اوبرازلاريندا، توركييه ده، خوصوصيله ايستانبولون زادگان چئوره‌لرينده، مدنيليگين و يئنيليگين تظاهورو ساييلان غرب اخلاقي‌نين، عاييله موناسيبتلرينده " آزادليغين " يالنيز كيشيلره دئييل، قادينلارا دا محو ائديجي تاثيريني گؤسترير. بو " اخلاقين " تاثيرينه معروض قالميش كيشي و قادينلار، شاعيره گؤره، عئيني خسته‌ليگه توتولموشلار. بو خسته‌ليك يوكسك اينساني حيسّلري، سئوگي و محبتي، آرزو و ايستكلري محو ائدن، عاييله فاجيعه‌لرينه، قادينلارين رذالت و فلاكتينه سبب اولان " مدنيليك " و " يئنيليك " آدلانان خسته‌ليكدير. جاويده گؤره، اصل مدنيتين و يئنيليگين بو، " غرب اخلاقي‌نين " تبليغ ائتديگي " يئنيليك " و " مدنيليك " له هئچ بير علاقه‌سي يوخدور. شاعير، غرب اخلاقيني اصل يئنيليگين يالنيز عئيبه‌جر و زهرلي ايميتاسيياسي سايير و اونو رد ائدير.
ياراتديغي قادين اوبرازلاري واسيطه‌سيله جاويد اؤزونون يوكسك اخلاقي ايدئيالاريني ايفاده ائدير. " آفت " درامينداكي آلاگؤز، جاويدين تصوور ائتديگي، تميز سئوگي، صداقت، صميمي و هارمونيك عاييله موناسيبتلري آرزوسوندا اولان ايدئال قادين اوبرازيدير. آلاگؤز تواضعكار، عاغيللي، ناموسلو، جمعيته و ميلّته خيدمت ائتمك آرزوسو ايله ياشايان، كيچيك حيسّ و ماراقلاردان اوزاق، دوستلارينا، سئوگيليسينه، واليدئينلرينه حسّاسليقلا ياناشان، نجيب بير قاديندير. جاويد اؤز قادين ايدئاليني يالنيز زادگان عاييله‌لرده دئييل، هم ده يوخسول عاييله‌لرده آختارير. اونون ياراتديغي موثبت قادين اوبرازلاري ايچريسينده، يوخسول عاييله‌لردن چيخان، لاكين ناموسلو زحمتي ايله ياشايان، چوخ واخت غيبطه ائديله‌جك متانت و جسارت گؤسترن قادينلار چوخلوق تشكيل ائدير ( " آنا " پيئسينده سلما، " مارال " دا نازلي و سلطنت و باشقالاري).
ح.جاويدين سئنتيمئنتال-رومانتيك روحدا تصوير ائتديگي قادينلار دا بير چوخ نجيب اينساني كئيفيتلره ماليكديرلر ( " شئيخ صنعان " دراميندا زهرا و خومار اوبرازلاري).
سووئت دؤورونده ياراتديغي اثرلرده ده جاويد قادين آزادليغي مسله‌سينه توخونور و بير سيرا يئني تيپلي قادين اوبرازلاري يارادير. " سلمانين سسي " شئعيرينده سلما، " شهلا " پيئسينده شهلا، آرتيق آزادليق الده ائتميش، اينسانلارين حؤرمت و رغبتيني قازانميش، يئني جمعيتين قورولماسينا و مؤحكملنمه‌سينه خيدمت ائدن قادينلاردير.
لاكين جاويد بو دؤورده يازديغي اثرلرده چوخ موهوم بير مسله‌يه ديقت يئتيرير و جمعيتده هله اصل آزادليقدان محروم اولان قادينلارين مؤوجود اولدوغونو گؤسترير. " آذر " پوئماسيندا شاعير، چادرالاريني آتسالار دا، فيكير و معنوياتجا يئني حياتدان كناردا قالميش، يئنيليگي مودايا اويماقدا گؤرن، مئششانليق باتاقليغينا غرق اولموش قادينلاردان صؤحبت آچير.
آذربايجان قاديني‌نين چادرادان خيلاص اولماسيني بؤيوك تاريخي حاديثه كيمي ديرلنديرن جاويد اونون هله تام آزادليغا چاتماديغيني بيلديرير و بو آزادليق يولوندا بؤيوك بير مانعه‌نين - " معنوي چادرانين " مؤوجود اولدوغونو قئيد ائدير. جاويد يازير:
" اينقيلاب، ايشته، آتيب چارشافي سيز
او سيياه پرده‌يي ردّ ائيله‌دينيز
قئيد ائديركن بونو تاريخ آنجاق
بير فضيلت دئيه آلقيشلاياجاق
سيزي آلداتماسين آما بو غورور
چارشاف آتماقلا بيتر سانما قوصور،
چوخ بئيينلر يئنه هپ پرده‌‌‌ليدير
معنوي پرده‌يي دفع ائتمه‌ليدير
شاعير حاقلي اولاراق قادين آزادليغي‌نين و عوموميتله اصل آزادليغين، هر شئيدن اول، بئيينلرده، دوشونجه‌لرده، شوعورلاردا قلبه چالماسي‌نين ضروريليگيني وورغولايير و آذربايجان قادينلاري‌نين آزادليغين بو يوكسك زيروه‌سيني فتح ائتمه‌سيني آرزو ائديردي.
كؤچورموش: آيدا بيات
