1. فرانساني خيلاص ائتمك اوچون گلميشم 

   يوز ايلليك موحاريبه  گئديردي. فرانسانين ايري فئوداللاري آراسينداكي چكيشمه لر اؤلكه نين مودافيعه سيني تشكيل ائتمه يه ايمكان وئرميردي. بوندان ايستيفاده ائدن اينگيليسلر هوجوما كئچه رك 1415-جي ايلده آزئنكور شهري ياخينليغيندا غلبه قازانديلار. فرانسانين شيمال حيصه سيني اينگيليسلر تاماميله اله كئچيرديلر. بير طرفدن ده گوجلو فئوداللاردان اولان بورقوندييا هئرسوقو اينگيليس كرالي نين طرفينه كئچدي. پاريس ايشغال ائديلدي. آزياشلي اينگيليس كرالي آلتينجي هئنريخ فرانسا كرالي ائلان اولوندو. فرانسا كرالي نين اوغلو يئددينجي كارل حاكيميتدن كنار ائديلدي. 

  مووففقيتدن روحلانان اينگيليس اوردولاري اؤلكه نين جنوبونا دوغرو ايره لي له ييرديلر. فرانسيز قوشونلاري نين قاليقلاري ايسه لوارا چايي ساحيلينده كي  قالالارا سيغينميشدي. بئله بير شراييطده اينگيليسلر اورلئان شهريني موحاصيره يه آلدي. اورلئان الدن چيخارديسا ايشغالچيلار اوچون جنوبا يول آچيلاردي. فرانسانين طالعي  اورلئاندا حل اولونوردو. 1428-جي ايل ايدي. بو زامان فرانسانين شرقينده شامپان ايالتي ايله لوتارينگييانين سرحدينده يئرلشن دومرئلي كنديندن بير قيز پئيدا اولدو. ژاننا آدلي بو كندلي قيزين دئديگينه گؤره آللاه اونا حؤكم ائدير كي، كرالين يانينا گئديب اوردويا باشچيليق ائده رك، اورلئان اوزريندن موحاصيره ني گؤتورسون و فرانسانين قانوني حؤكمداري كيمي رئيمسده كارلا تاج قويسون. طبيعي كي، قيزا اينانمير، اونون دئديكلريني ساييقلامالار حساب ائدير، اونو اله ساليرديلار. قيز ايسه عيناديندان دؤنمور، دئديكلريني دفعه لرله تكرار ائدير و كرالين يانينا آپاريلماسيني طلب ائديردي. بو ائله بير دؤور ايدي كي، كندليلر فئوداللارين اؤزباشيناليغيندان، ياد ائلليلرين ظولموندن جانا گليب نظرلريني كرالا ديكميشديلر. گوجلو حؤكمدار واحيد دؤولتي تجسسوم ائتديرير، واحيد دؤولت آغالارين اؤزباشيناليغيني ضعيفله ديردي. هم ده حؤكمدارين گوجلنمه سي، اؤلكه نين مودافيعه نين گوجلنمه سي دئمك ايدي. 

  بلي، ژاننا باشقالارينا بنزميردي. او، هر شئيي فرقيندن دويور، برك هيجانلانيردي. قيزين ائشيتديگي داخيلي سسلر حقيقتن وار ايدي: بو سسلر عذاب چكميش آداملارين ناله سي، ايضطيراب ايچينده اولان وطنين فريادي، اونون بؤيوك و حساس قلبي نين هارايي ايدي . 

كندده بئله بير افسانه ياييلدي كي، فرانساني بير قادين برباد ائده جك (يئددينجي كارلين آناليغي كراليچا ايزابو)، آما بير قيز اونو بو بلادان قورتاراجاق. همين قيز لوتارينگييادان، قديم پاليد مئشه سيندن گله جك… افسانه هارادان عمله گلميشدي، هئچ كس بيلميردي. 

   نهايت، ژاننا ووكولئرين كاپيتاني بودريكورو اينانديرا بيلدي. 1429-جو ايل فئورالين 12-ده ژاننا و اونون موشايعتچيلري شينونا، كرالين يانينا يولا دوشدولر. 

  اونون حاقيندا خبر گئديب كرالا چاتميشدي. كرال اونون گلمه سينه ايجازه وئرميشدي. چاره سي نه ايدي؟ او، اؤز اؤلكه سي نين صاحيبي دئييلدي. اؤلكه يانغين، احتيياج و آجليق ايچينديدي. كارل يالنيز «بورنئ» كرالي ايدي. او، بورنئ شهري داخيل اولماقلا فرانسانين يالنيز بير حيصه سي نين صاحيبي ايدي. حتّي، اؤزونونكيلر ده اونو كرال سايميرديلار. اونون قانوني تاج قويما مراسيمي اولماميشدي، او، شاهزاده اولاراق قالماقدايدي. كارل اوتاقدا وار-گل ائده رك اؤز-اؤزونه دئييردي: - قيز… خالق اونو قيز آدلانديرير. دئييرلر فرانساني قيز خيلاص ائده جك. قيز!.. نه اولار. آخي نييه ده بختيني سيناماسين؟ بلكه بو خوش علامتي يوخاريدان، آللاهداندير. يالنيز جاهيل و لووغا آدام كؤمك اليني ردد ائدر».

  شينون سارايي قيزي قبول ائتمه يه حاضيرلاشميشدي. عيانلارين، روحانيلرين قراري ايله اونو بوردا سيناق گؤزله ييردي. اگر آللاه طرفيندن گؤندريليبسه، قوي مجليسده كرالين كيم اولدوغونو اؤزو تاپسين. 

  كوچه ده وجده گلميش جاماعات اونو ساراي قاپيلارينادك اؤتوردو. جنگاورلر اونا اورك-ديرك وئرديلر. قبول سالونونون قاپيلاري آچيلاندا گؤزلري قاماشدي. ايچريده كي  بر-بزكلي عيانلارا فيكير وئرمه دن ايره لي له دي و ساده گئييملي آريق بير آدامين قارشيسيندا ديز چؤكدو: - سالام، عزيز شاهزاده! آللاه سيزي خوشبخت ائله سين. - دئدي. هامي چاشيب قالميشدي. 

  او، كارلي ديله توتوردو كي، هئچ ندن قورخماسين، اونا اينانسين و قوشون وئرسين، يئرده قالانلار اونو ناراحات ائتمه مه ليدير. او، فرانساني خيلاص ائتمك اوچون گلميشدير. ساراي آداملاري گؤردولر كي، كرالين اوزو ايشيقلانيب. بو گونلر عرضينده يئددينجي كارل ايلك دفعه  ايدي كي، گولومسونوردو. 

  سارايدا كئچيريلميش سيناقلار كيفايت ائتمه دي. قرارا گلديلر كي، اونو پواتيئ شهرينه گؤندرسينلر. موقدس آتالار اونو يوخلارلار. قوي اونلارين حؤكمو سون حؤكم اولسون. «موقددس آتالار»ين اوزون يوخلامادان سونرا، كرالين، خالقين تاثيري آلتيندا گلديكلري قرار بو سؤزلرله باشلاييردي: «كرال و كرالليغين، هابئله صولح و عدالت حسرتينده اولان زاواللي خالقين احتيياجلاريني نظره آلاراق بيز قيزي اوزاقلاشديرماغي و ردد ائتمگي لازيم بيلميريك…» بو، قيزين حسرتيني چكديگي همين ايجازه ايدي كي، اونسوز ژاننانين جسارتلي پلاني هئچ واخت حياتا كئچمزدي. 

2. قيلينج قالديران قيلينجلا دا اؤلدوروله جك دير 

  ژاننا يوروشه حاضيرلاشيردي. تانييانلار دا، تانيمايانلار دا بو ايشده اونا كؤمك گؤستريرديلر. كرالين امري ايله اونا آغ رنگده دمير گئييم حاضيرلاندي. بير قديم قيلينجين پاسيني تميزله ييب، اونا قين دوزلتديلر. هئچ كس ژانناني كوماندير تعيين ائتمه ميشدي. آما او حبس ائديردي  كي، رولو ندن عيبارت اولاجاق. او، خالق رهبرينه چئوريليردي و بؤيوك بايراغا احتيياجي واردي. شوتلاند رسسامي پاوف آغ قوماش پارچا اوزرينه خئيير-دوعا وئرن آللاه شكليني چكدي. ژاننا بو شكلي «صولح» سؤزو ايله آدلانديردي. پارچانين آرخاسيندا صولحون رمزي اولاراق گؤيرچين شكلي تصوير اولوندو. ژاننا دئييردي: «من بو قيلينجيمي سئويرم، آنجاق بايراغيمي قات-قات اوندان چوخ ايسته ييرم». قيلينج موحاريبه ، اؤلوم جارچيسي ايدي. ژاننانين آغ بايراغي ايسه صولحو، حياتي تجسسوم ائديردي. 

  ژاننا يئني اوردونون حاضيرلانماسيندا فعال صورتده ايشتيراك ائتدي. قيز حربي اينتيظاما بؤيوك اهميت وئريردي. او، اؤزونون دمير خاراكتئري ايله بونا نايل اولدو. يوروشدن قاباق ژاننا اينگيليس قوشون باشچيلارينا قيسا موراجيعتنامه ديكته ائتدي. مكتوبون اساس مضمونو بوندان عيبارت ايدي كي، صولح موحاريبه دن ياخشيدير. تكليف اولونوردو كي، خوشلوقلا چيخيب، اؤز ائولرينه گئتسينلر. اگر گئتمه سه لر بيلسينلر كي، قيلينج قالديران قيلينجلا دا اؤلدوروله جكدير. 

  نهايت، يوروشه حاضير اولان اوردو 1429-جو ايل آپرئلين 27-ده بلوادان اورلئانا يولا دوشدو. ژاننا سركرده لردن طلب ائتدي كي، اونو بيرباشا اورلئاني موحاصيره يه سالميش اينگيليس قوشونلاري نين كومانداني تالبوتون مؤوقئعلري اوزرينه آپارسينلار. لاكين كاپيتانلار اورلئانين مودافيعه سينه باشچيليق ائدن قراف دونوانين تعليماتينا اساسن اوردونو لوارانين سول ساحيلي ايله آپارديلار. لاكين اورلئانا ياخينلاشاندا گؤردولر كي، بو قدر قوشونو و يوكلري چايين ساغ ساحيلينه كئچيرمك مومكون اولماياجاق. ژاننا قراف دونواني تهديد ائدنده مودريك سركرده اعتيراف ائتمه لي اولدو كي، ساوادسيز كندلي قيزي حاقليدير. بو مسله اطرافلي دوشونولمه ييب. دونوا تاكيد ائديردي كي، ژاننا اوردونو قويوب شهره داخيل اولسون. يالنيز اينانديريجي صورتده ثوبوت ائدنده  كي، او اورلئانا هاوا، سو كيمي لازيمدير، اوندا ژاننا راضيليق وئردي. 

  آپرئلين 29-دا قاش قارالاندا ژاننا اورلئانا داخيل اولدو. بوتون شهر اهلي اونو قارشيلاماغا چيخميشدي. آغ آتين بئلينده، آغ دمير گئييمده، الينده آغ بايراقلا ژاننا اسرار انگيز گؤرونوردو. سانكي، شهري خيلاص ائتمك اوچون گؤيلردن ايندي يئره ائنميشدي. مينلرله آدام اونون آتينا، پالتارينا توخونماق ايسته ييردي. بلي، او مؤعجيزه ايدي و بو مؤعجيزه  ده اورلئاني خيلاص ائتمه لي ايدي! ايندي كيمين بونا شوبهه سي اولا بيلردي. سحريسي ژاننا اؤزو دوشمنله دانيشماق ايسته دي. سئنت-آنتوان ايستحكامينا چيخاراق اينگيليس كاپيتانلاريني سسله دي. ژاننا طلب ائتدي كي، اورلئاندان رد اولوب گئتسينلر. قارشي طرفدن جاواب گلدي: 

  - اؤزون رد اول، فاحيشه! نه قدر سني توتوب يانديرماميشيق، گئت اينكلريني اوتار. 

  - اونسوز دا تئزليكله بورادان گئده جكسينيز، - دئيه قيز آغلايا-آغلايا قيشقيردي. بوتون ايگيدليگينه باخماياراق ژاننا قادين اولاراق قاليردي، قلبينه دَيَنده آغلاييردي.                         

  مايين 2-ده قيز اينگيليس قالالاري نين يئرلشمه سي ايله تانيش اولدو. ائرته سي گون اوردو گليب چيخدي. دونوا خبر گتيردي كي، جون فاستولفون باشچيليغي ايله اينگيليسلره علاوه  قوووه گلير. كاپيتانلار قرارا گلميشديلر كي، ژانناني حربي ايشلره قاريشديرماسينلار. قوي او، بوت اولاراق قالسين. قارا جاماعات بو ايشدن كنار ائديلمه ليدير. غلبه قازانيلسا، بونو اصيلزاده زاده گانلار ائتمه لي ديرلر. دونوا بو فيكره طرفدار ايدي، آما ژانناني دا ياخشي موشاهيده ائتميشدي. بيليردي كي، قيزي بئله آسانليقلا كنارلاشديرماق مومكون اولماياجاق. 

  سحريسي ژاننا غفلتن، توپ سسينه يوخودان آييلدي. بو ندير، يوخسا دؤيوشو اونسوز باشلاييبلار. آرتيق ايكي ساعات ايدي كي، دؤيوش گئديردي. كاپيتانلار قيزدان و شهر ييغما قوشونوندان خبرسيز سئن-لو قالاسينا هوجوم ائتميشديلر. حاضيرليقسيز هوجوم نتيجه وئرمه ميشدي. ايندي فرانسيزلار باشي پوزوق حالدا دؤيوش مئيدانيندان قاچيرديلار. بو واخت ژاننا الينده بايراق اونلارين يولونو كسدي. 

  - دايانين دوشمنه آرخا چئويرمه بين! ايره لي! 

  بودور، سارسيلميش كاپيتانلارين گؤزلري اؤنونده مؤعجيزه  باش وئرير. يورغون، دوشمندن قاچان عسگرلر قيزين آردينجا گئرييه دؤنورلر. ايندي اونلار هئچ ندن قورخمورلار. دئيه سن، او طيلسيمله نيب، اطرافا سپه له نن اوخلارين هئچ بيري اونا ديمير. اونون سِحربازليغي قورخمازليغيندادير. اينگيليسلر بونو گؤزلميرديلر. چوخ سورعتله قالايا حركت ائدن ژاننانين قارشيسيندا دوروش گتيرمه ديلر. ژاننانين بايراغي سئن-لو قالاسي نين اوستونده دالغالانيردي. قالايا كؤمه يه تله سن تولبوت بايراغي گؤرنده باشا دوشدو كي، گئجيكيب. سئن-لونون آلينماسي او دئمك ايدي كي، موحاصيره حلقه سي ياريليب. همين گون 1929-جو ايل مايين 4-او بئله قورتاردي. بو بؤيوك گوندو و او، حاقلي اولاراق ژاننايا مخصوص ايدي. 

  ايندي قارشيدا دوران اساس وظيفه  تورئل قالاسيني اله كئچيرمك ايدي. لاكين يئنه ده قراف دونوا و كاپيتانلار عملياتين اصل پلانيني ژاننادان گيزلتديلر. اونا تكليف اولوندو كي، ييغما قوشونلا تولبوتون اساس قوووه لري يئرلشن سئن-لوراكس قالاسينا هوجوم ائتسين. بئله ليكله، اينگيليسلرين اساس قوووه لريني ژاننا اؤز اوزرينه چكه جك، اصيل-نجابتلي جنگاورلر ايسه تورئلي چوخ راحات، مانعه سيز اله كئچيره جك و اورلئانين موحاصيره سيني محض اونلار آرادان قالديراجاقلار. احسن؟! 

  ژاننايا طبيعت فيطري خوصوصيتلر بخش ائتميشدي. ساده لؤوح و اورگي آچيق اولان بو قيزي آلداتماق غئيري-مومكون ايدي. اطرافداكيلارا ائله گليردي كي، بو آللاهين مؤعجيزه سي دير. ايندي ده قيز زادَگانلارين ايكي باشلي اويون اويناديقلاريني باشا دوشدو. مايين 6-دا ژاننا اؤز قوووه لري ايله تورئل اوزرينه هوجوما كئچدي. سئنت-اوگوستئن تپه لري نين آرخاسيندا تورئلي موشاهيده ائدن ژاننا بو نتيجه يه گلدي كي، دوننكي فيكري دوغرو اولوب. آيري-آيريليقدا بو ايستحكاملاري آلماق مومكون اولماياجاقدير.  بيرگه حركت ائتمك لازيمدير. زادَگانلار نارازي قالسالار دا دؤيوشده ايشتيراك ائتمه يه مجبور اولدولار. تورئل قالاسي قارشيسيندا آداملاري روحلانديرماق اوچون ژاننا نرديواني چيينينه آلاراق: 

  - كيم مني ايسته ييرسه، آرديمجا گلسين، - دئدي و نرديواني قالايا ديره دي. بو آن اوخ ساغ چيگينليكله دمير گئييمين آراسينداكي بوش يئره ديدي. قيز كؤمه يه گلن عسگرلرين قوللاري اوسته دوشدو. او، ديلخورلوقدان آغلاييردي. آخي غلبه لاپ ياخيندا ايدي. ال آتيب اوخون قيريغيندان ياپيشير، دارتيب يارانين ايچريسيندن چيخارير. يارانين اوستونو ساريييب قاني ساخلاييرلار. ژاننا امر ائدير كي، ياراق-اسلحه ني اونا گئيينديرسينلر. دونوا خواهيش ائدير كي، بو گونلوك كيفايتدير. بو ندير، شئيپور چالينير. گئري چكيلمك سيقنالي وئريلير. ژاننا شئيپورچونون اوزرينه آتيلير، عسگرلره موراجيعت ائدير: 

   - هئچ ندن قورخمايين، اينگيليسلر سيزين اوستله يه بيلمزلر. 

  يئنيدن هوجوم باشلايير. آخشام اوستودور. اينگيليسلرين موقاويمتي ضعيفله ييردي. تورئل اله كئچيريلدي. ژاننانين بايراغي قالانين اوستونده دالغالانيردي. اورلئان هوجوم ائدنلري آلقيشلاييردي. بو، مايين 7-دن 8-نه كئچن گئجه شانلي اورلئان شهرينده سوسماق بيلمه ين زنگلرين سسي ايدي. 

  زادَگانلارين يئددينجي كارلا يازديقلاري مكتوبدا ژاننا حاقيندا بير جومله يازيلميشدير: «بير سيرا دؤيوشلرده قيز دا ايشتيراك ائتميشدير». اصل-نجابتلي جنگاورلردن اولان دئ لارئ دونوايا ياخينلاشدي: 

  - مونسئليور، دئيه بيلمزسينيز، اورلئانين موحاصيره سي نئچه گون داوام ائتميشدير؟ 

  - البتته مئسسير، دئيه بيليرم: جمعي ايكي يوز گون. 

  - بس قيزين گلمه سي نين نئچه نجي گونو موحاصيره گؤتورولدو؟ 

  - دوققوزونجو گونو. 

  اونون داها سوالي يوخ ايدي. ژاننا عصرلرين يادداشينا اورلئان قيزي كيمي داخيل اولدو. 

  3. بيز نيزه لريميزين اوجوندا دوشمنه صولح آپاريريق 

          اورلئان غلبه سي بوتون فرانساني حركته گتيردي. فرانسيز خالقي باشيني قالديريردي. دوشمنين مغلوب ائديلمزليگي حاقيندا سؤز-صؤحبتي آلت-اوست اولموشدو. غلبه ني مؤحكم لنديرمك اوچون لاورانين اورتا آخاريني تهلوكه سيزليشديرمك مئنق، بوژانسكي، ژارژو شهرلريني تميزله مك گركدي. يئني اوردونو ياراتماق او قدر ده چتين اولمادي. فرانسانين هر يئريندن ژاننانين يانينا آخيشيب گليرديلر. مايين آخيرلاريندا اونلارين سايي اون ايكي مين ايدي. يئني اوردو حقيقتن خالق اوردوسو ايدي. بو اوردو نه اوغروندا موباريزه آپاراجاغيني بيليردي. 

  ژارژويا ياخينلاشان ژاننا شهرين كاپيتاني قراف سئففولكا قالاني ترك ائديب گئتمگي تكليف ائتدي. كؤمك گلمه سينه اوميديني ايتيرمه ين قراف ايكي هفته واخت ايسته دي. ژاننا شهره هوجوم امريني وئردي. فرانسيزلار شهر ديواري اوزرينه قالخاندا قراف سئففولكون جارچيسي تسليم اولماق حاقيندا خبر گتيردي. آرتيق گئج ايدي. بونونلا دا او، اؤلومون پنجه سيندن قورتاردي. قولـله دن آتيلان داش اونو نرديوانين سون پيلله سينده حاقلاميش و او، سنتيرليه رك خنده يه ياخينلاشدي. لاكين تئز اؤزونو اله آلاراق بايراغي گؤتورموش و عسگرلري هايلاياراق ايره لي جومموشدو.  شهرين اله كئچيريلمه سي او دئمك ايدي كي، اورلئاندان شرقه دوغرو بوتون اورتا لوارا اينگيليسلردن آزاد ائديلميشدي. 

  اييونون 15-ده ژاننانين قوشونو بوژانسكي اطرافيندا ايدي. شهر قارنيزونو يونگول شرطلرله قالاني تحويل وئريب گئتدي. ائله بو واخت ژاننايا خبر گتيرديلر كي، پاتئ كندي طرفدن بؤيوك قوشون گلير. بو افسانوي جون فاستولف ايدي. نهايت كي، جليب چيخميشدي. ژاننا اوردوسونون فورمال كومانداني هئرسوق آلانسونسكي اوندان سوروشدو: - بيز دؤيوشه جه ييكمي ژاننا. 

  - سيزين ياخشي ماهميزينيز وارمي؟ - قيز سوالا سواللا جاواب وئردي 

  -         سيز نه دانيشيرسينيز، ژاننا؟ دوغرودانمي بيز قاچمالي اولاجاغيق. 

  قيز گولومسوندو: - خئير، بيز اينگيليسلري ايزله مه لي اولاجاغيق. 

  دؤيوش اييونون 18-ده باش وئردي. اينگيليس اوردوسونو ژاننا غفلتن حركت ائدن زامان ياخالادي. اونلار قوشونو دؤيوش مئيدانيندي دوزمه يه واخت تاپماديلار. تالبوت اسير آليندي. 

  جون فاستولف اؤز موشاييعتچيلري ايله بيرليكده اكيلدي. ژاننا دؤيوش مئيدانينداكي قيرغيني ساخلايا بيلمه دي. بو جنگاور موحاريبه لري نين «شانلي» عنعنه لريندن بيري ايدي. بودور، اسير آلينميش اينگيليس  كوستيوموندان خوشو گلن فرانسيز جنگاوري اونو نيزه ايله اؤلومجول يارالايير. ژاننا ال اوستو اينگيليسين يانينا قاچيب اليندن گلن كؤمگي ائتمه يه چاليشدي. او، ايچين-ايچين آغلاييردي. ساده كندلي قيزي غدارليقلا هئچ جوره باريشا بيلميردي. 

  پاتئ اطرافينداكي غلبه اورلئان دؤيوشو كيمي گئنيش عكس-صدا ياراتدي. بو واختا قدر «بورنئ كرالي»نا نيفرت بسله ين بعضي ايري فئوداللار بئله ايندي ترددود ائتمه يه باشلاديلار. ايندي ژاننا قارشيسينا قويدوغو اساس مقصدي يئرينه يئتيرمه لي ايدي. تجيلي كرالي رئيمسه آپارماق و تاج قويما مراسيميني كئچيرمك لازيم ايدي. 

  اييونون 27-ده اؤن دسته لر ژيئندن حركته باشلاديلار. آرتيق آزادليق اوردوسونون تركيبينده اوتوز مينه دك آدام وار ايدي. ژيئندن رئيمسه قدر 300 كم-ليك يول جمعي يگيرمي گون چكدي. يولدا تروا، شالون و ديگر شهرلر اله كئچيريلدي. بير چوخ شهرلر كؤنوللو تسليم اولوردو. اييولون 16-دا آزادليق اوردوسو رئيمسه داخيل اولدو. 17-ده رئيمس كيلسه سينده طنطنه لي تاج قويما مراسيمي كئچيريلدي. كرال والوا يئددينجي كارل آدي آلتيندا فرانسانين قانوني حؤكمداري اولدو. 

  او، اؤز بورجونو يئرينه يئتيرميشدي. اورلئاني موحاصيره دن چيخارميش و يئددينجي كارلي رئيمسه گتيرميشدير. آما پايتاخت هله دوشمن الينده ايكن او گئده بيلرديمي؟ بو خيانت اولاردي. پاريسه گئتمك لازيمدير. بئله بير آندا ساراي صولحدن دانيشماغا باشلادي. حيات اونا بير حقيقتي اؤيرتميشدير. صولحو، آزادليغي، ايستيقلاليتي آمانسيز دؤيوشلرده قازانماليسان. دوشمن هئچ واخت كؤنوللو چيخيب گئتمز. قيز قورخاقلارا دفعه لرله دئييردي: «بيز نيزه لريميزين اوجوندا دوشمنه صولح آپاريريق».

  غريبه  موحاريبه  گئديردي. بؤيوك مسافه لر قطع ائديلير، لاكين دؤيوشلر اولموردو. هامي بير-بيرينه كلك گلمه يه چاليشيردي. آوقوستون 23-ده ژاننا كرالا بيرجه كلمه دئمه دن، شورادان ايجازه آلمادان قوشون باشچيسينا موراجيعت ائتدي:- حاضيرلاشين من پاريسي گؤرمك ايسته ييرم. ايكي گوندن سونرا اونلار پاريسدن ايكي كيلومئتر كناردا يئرلشن سئن-دئنيده ايديلر. پاريسه هوجوم سئنتيابرين 8-نه تعيين ائديلدي. همين گون خريستيان بايرامي ايدي. بونا باخماياراق، ژاننا هوجوم امري وئردي. دؤيوشون قيزغين چاغيندا ژاننا نئجه يارالانديغيني حيس ائتمه دي، اوخ اومباسينا ديميشدي. قيز گؤزونو قيييب اوخو چيخاردي. يارادان قان فيشقيردي. بيرتهر قاناخماني دايانديرديلار. شئيپور سسلندي. بو سس تورئلده ده اونا مانعچيليك تؤرتميشدي. هئرسوق آلاخونسكي دؤيوشو دايانديرماق اوچون ژانناني ديله توتدو. تزه دن آت بئلينه قالخان ژاننا اوجادان سؤيله دي: «من شهري آلماميش قاييتماياجام». سحريسي گون هوجوم اوچون هر شئي حاضير ايدي. بو زامان كرالين امري گلدي. قوشون سئن- دئنييه قاييتمالي ايدي. قيز قورويوب قالدي. امري ايسه يئرينه يئتيرمه مك اولمازدي. 

  او، آرتيق چوخلارينا مانعچيليك تؤره ديردي. اينگيليسلره ده، فرانسيز اصيلزاده لرينه ده، فئوداللارا دا، حتّي كرالين اؤزونه ده. حاكيم طبقه اوندان ياخا قورتارماغين يوللاريني آراييردي. عيانلاري ناراحات ائدن خالقين اوندا اؤز خيلاصكاريني گؤرمه سي ايدي. اونا گؤره ده ژانناني سارايدا  ساخلايير، اونون كنارا چيخماسينا ايمكان وئرميرديلر. اساس دؤيوشلر كومپيئن اطرافيندا گئديردي. بئله آندا ژانناني سارايدا ساخلاماق مومكون ايديمي؟ 1430-جو ايلين آپرئلينده، بير ياز سحري ژاننا جاسوسلاري آلداداراق كيچيك بير دسته ايله كراللا ويداع لاشمادان كومپيئنه يولا دوشدو. قيزين موحاريبه  مئيدانينا قاييتماسي خبري سورعتله اطرافا ياييلدي. چوخدان ايدي كي، خالق ايچريسينده گؤرونموردو. مايين 14-ده ژاننا كومپيئنه داخيل اولدو. شهر اونو طنطنه  ايله قارشيلادي. بير مودتدن سونرا شهر بورقونديياليلار طرفيندن تاماميله موحاصيره يه آليندي. موحاصيره يه دوشنلر تئز-تئز شهردن چيخيب بورقونديياليلارا هوجوم ائديردي. بئله هوجوملارين بيرينده ژاننا يانينداكي جنگاورلرين قفيل شهره ساري چكيلديكلريني گؤردو. ژاننا قالايا ساري دؤندو. بيردن نه گؤردوسه، دامارلاريندان آخان قاني دوندو.  چاي اوزرينده كي  كؤرپونو قالديريرديلار. داها شهره گيرمك مومكون دئييلدي. ژاننا بورقونديياليلارا اسير دوشدو.   

  4. فرانسا خيصلاس اولدو، قيز ايسه محو اولدو 

«ماور آرتيق اؤز ايشيني گؤرموشدور»

  بورقوند اسيري نين طالعيي موعينلشينجه ياريم ايل كئچدي. سئويملي كرالي، بوتون الده ائتديگيله ژاننايا بورجلو اولان يئددينجي كارل اونو اسيرليكدن خيلاص ائتمك اوچون جهد ده  بئله گؤسترمه دي. فرانسا نامينه اؤلومدن قورتارديغي و حاكيميت باشينا قويدوغو آداملار ايندي اونا اعتيناسيز ياناشيرديلار. 

  توتولان گونون سحريسي روانين باش اينكويزيتورو قيزين كوفر اوستونده شوبهه آلتينا آلينماسييلا علاقه دار اولاراق ايديعا ايره لي سوردو. پاريس اونيوئرسيتئتي نين ايلاهياتچيلاري تور آتا ايله تاماميله همراي ايدي. اونو خوصوصي كيلسه محكمه سي موحاكيمه ائتمه لي ايدي. آلتي آيدان سونرا اونون قورخدوغو حاديثه  باش وئردي. بورقوندييا هئرسوقو خئييرخاه فيليپپ ژانناني 40 مين فرانكا اينگيليسلره ساتدي. حؤكومت كوميسسارلاري همين گون جادوگري اؤلدورمك ايسته ين اينگيليس كاپيتانلاري نين قارشيسيني چتينليكله آلديلار. 

  ايستينطاق 1431-جي ايل فئورالين 21-ده باشلاندي. محكمه نين هئيتي آنجاق اينگيليس پرست روحانيلردن عيبارت ايدي. «موقددس آتالار» قرارا گلميشديلر كي، محكمه نومونوي اولسون. محكمه نين صدري يئپيسكوپ پيئر  قيزا موراجيعت ائتدي: - آند ايچ كي، آنجاق دوغرو جاواب وئره جكسن. 

  - من بيلميرم نه باره ده سوروشاجاقسينيز. اؤزوم حاقيندا هوسله دانيشارام. آما ائله شئيلر وار كي، يالنيز آللاها و كرالا عاييددير. او باره ده سوساجاغام. 

  او، محكمه يه مئيدان اوخويوردو. قاچماق جهدي ايله باغلي سوالا: 

  - من قاچماق ايسته ديگيمي اينكار ائتميرم. هر بير دوستاق بو آرزويلا ياشايير، - دئدي. 

«اتالار» عصبيلشميشديلر. خئير، عزيزلريم، ايندي ژاننا پواتيئده كي  ژاننا دئييلدي. اؤتن ايكي ايل اونا چوخ شئي اؤيرتميشدي. او بيليردي كي، نينكي اؤز حياتي، هم ده اؤز وطني نين شرفي اوغروندا موباريزه آپارير. بويورون، نه قدر ايسته سنيز سواللار وئره بيلرسينيز، جناب ايلاهياتچيلار. 

  - بايراغينا مؤوجود شكلي چكمه گي سنه كيم امر ائتميشدي؟ 

  - آللاهين گؤستريشلريندن ساوايي هئچ نه ائتمه ميشم. هوجوما كئچنده بايراغي اؤزوم گؤتوروردوم كي، هئچ كسي اؤلدورمه ييم و هله بير دفعه  ده اولسون آدام اؤلدورمه ميشم. 

  - آللاه اينگيليسلره نيفرت ائديرمي؟ 

  - آللاهين اونلارا نيفرت ائتمه سي باره ده هئچ نه معلوم دئييل. آما امينم كي، بوردا اؤلنلردن باشقا بوتون اينگيليسلر فرانسادان قووولاجاقلار. 

  - مگر آتا-آنادان ايجازه سيز ائودن گئتمك بؤيوك گوناه دئييلميدير؟ 

  - بورج مني بو يولا چاغيردي. يوز آتام-آنام اولسايدي، يئنه ده چيخيب گئدرديم. 

«موقددس آتالار» چاشيب قالميشدي. اونو داها چتين وضعيته سالماق لازيمدير، - دئيه دوشوندولر. 

  - دئ گؤرك ميلاد گونو پاريسه هوجوم ائتمك ياخشي حالديمي؟ 

  -   ميلاد بايرامينا رعايت ائتمك، شوبهه سيز، ياخشيدير. آما بو بايراملاري هر كس اؤز ويجدانيندا عزيز ساخلاسا، داها ياخشي اولار. 

  - عسگرلري دؤيوشه روحلانديرماق اوچون هانسي جادوگرليك اوصوللاريندان ايستيفاده ائتميسن؟ 

  - من اونلارا «ايره لي!» دئميشم و بيرينجي اؤزوم قاباغا آتيلميشام. 

  - نييه كاسيبلار يانينا گليب، موقدس آدام كيمي سنه احتيرام بسله ميشلر؟ 

  - كاسيبلار اونا گؤره خطيريمي ايسته ييرديلر كي، اونلارلا مئهريبان ايديم و اليمدن گلن كؤمگي ائديرديم. 

  - نه اوچون پئيمسده تاج قويما مراسيمي واختي باشقا سركرده لرين بايراقلاريندان فرقلي اولاراق، سنين بايراغينا اوستونلوك وئريرديلر. 

  - بو بايراق زحمت و هونر بايراغي اولدوغونا گؤره شرف ده اونوندور، - دئيه ژاننا غورورلا جاواب وئردي. 

  كيلسه خاديملري حيس ائديرديلر كي، 19 ياشيندا اولان قيز اونلاردان گوجلودور.او، اؤز حاق ايشي ايله گوجلو ايدي. بيليردي  كي، اورادا، آزادليقدا گؤردويو ايشي بورادا، محكمه ده باشا چاتديرماليدير. لاكين هانسي محكمه ده. بو، نتيجه سي اولجه دن بللي اولان محكمه ايدي. بورادا عدالتدن اثر-علامت يوخ ايدي. ائله بو محكمه ده اونا حؤكم وئردي. او، جادوگردير و موطلق جزالانديريلماليدير.

  1431-جي ايل مايين 30-دا روان شهري نين كؤهنه بازار مئيدانيندا ائشافوت قورولموشدو. ائشافوتون اورتاسيندا ديره يه يازيلي لؤوحه وورولموشدو: «ژاننا آدلي بو قيز مورتد، عيفريت… قان ايچن، شئيطانين نؤكري، تفريقه چي و كافيردير».

  اؤلومو چوخ ساكيت قارشيلادي. چونكي منن او قاليب ايدي. قارا توستو اونو بورويونجه، خالقينا سون سالاميني گؤندريردي. 

  بير آز كئچمه ميش، 1466-جي ايلده فرانسا محكمه سي اونا برائت قازانديراجاق، 1920-جي ايلده ژانناني اوددا يانديران كاتوليك كيلسه سي اونو موقدسلر سيراسينا داخيل ائده جك، 1979-جو ايلدن فرانسادا هر ايل مايين ايكينجي بازار گونو ژاننا دارك گونو كيمي قئيد ائديله جك. بونلار سونرا اولاجاق. تاريخ اونا اؤز قييمتيني وئردي. زامانين سيناغيندان چيخميش ژاننا دارك آزادليق سيموولونا چئوريلدي.

قايناق: تاريخ اينفو