"بيرينجي خانيم "  و سارا خاتون   

  اؤلكه نين «بيرينجي خانيمي» (First lady) آنلاييشي دونيا سيياستينه آمئريكا بيرلشميش شتاتلاريندان (ABŞ) گليب. اون دوققوزنجو عصرين اورتالاريندان باشلاياراق آمئريكا پرئزيدئنتلري نين خانيملاريني ساده جه «فيرست لئدي» آدلانديرماغا باشلاميشلار. سونرادان بو آنلاييش ديگر اؤلكه لره ده ياييلميشدير.  ماراقليدير كي، ايلك دفعه  «ABŞ-اين بيرينجي خانيمي» آدلانديريلان شخص پرئزيدئنتين حيات يولداشي اولماييب. 1857-1861-جي ايللر آراسي ABŞ-اين پرئزيدئنتي اولان جئيمس بيوكئنئن (James Buchanan) سوباي اولوب. اونو رسمي گؤروشلرده باجيسي قيزي هارريئت لئين (Harriet Lane) موشاييعت ائتميشدير. جئيمس بيوكئنئن اونو «بيرينجي خانيم» كيمي تقديم ائتديگيندن تئزليكله بو تئرمين آمئريكا سيياستينه داخيل اولاراق ديگر پرئزيدئنتلر طرفيندن ده ايستيفاده اولونموشدور.  

       عادتن، بيرينجي لئديلر اؤلكه سي نين ايجتيماعي-سوسيال حياتيندا فعال ايشتيراك ائدن، بوندان علاوه  دؤولتلراراسي دوستلوق، هومانيتار و مدني امكداشليغي، بين الخالق صولحو، قادين و اوشاق حوقوقلاريني، عوموم بشري دَيرلرين قورونماسيني مودافيعه  ائدن شخصلردير.  

  بو ايفاده عادتن باش ناظير و يا حؤكومت باشچيسي اوچون ايشله ديلمير. 

  آذربايجان تاريخينده مؤمونه خاتون، اينانج خانيم، مئهرجان خانيم، بيرينجي شاه ايسماييلين ياخين سيرداشي اولان تاجلي خانيم و قيزي پريخان خانيم، قوبالي فتحعلي خانين خانيمي طوطو بيكه، گنجه خاني جاواد خانين خانيمي بگيم خاتون و س. كيمي خانيملار بيرينجي لئدي ستاتوسوندا اولموشلار. 

     سارا خاتون

   سارا خاتون - آذربايجان تاريخينده ايلك بيرينجي لئدي ستاتوسوندا اولموشدور و شرقده ايلك ديپلومات قاديندير. آغ قويونلو حؤكمداري اوزون حسنين آناسيدير.  

  سارا خاتون باياندور ائلي ايچينده دوغولموشدور. آغ قويونلولار دؤولتي نين سيياستي نين ساهمانا سالينماسيندا گؤركملي ديپلومات و دؤولت خاديمي كيمي بؤيوك رولو اولموشدور. ايستعدادلي ديپلومات قادين كيمي مشهور اولان سارا خاتون، حتّي آوروپا اؤلكه لرينده ده تانينيردي. او، دؤولتين ايداره ايشلرينينده حؤكمدار اوغلونا ياخيندان كؤمك  ائتميشدير. آغقويونلو دؤولتي نين خاريجي اؤلكه لرله ديپلوماتيك علاقه لرينده سارا خاتونون رولو داها موهوم ايدي. اوزون حسن بوتون خاريجي سيياست مسله لري نين اونونلا مصلحتلشير، ان مسئول ديپلوماتيك دانيشيقلار اوچون اونو گؤندردي. او، نينكي خاريجي اؤلكه لرين آيري-آيري ديپلوماتلاري ايله، همچنين تئيموري حؤكمداري ابو سعيد، عوثمانلي ايمپئراتورو ايكينجي محمت كيمي دؤولت باشچيلاري ايله ده ديپلوماتيك دانيشيقلار آپارميش، آغ قويونلو دؤولتي نين خاريجي سياسي منافعييني مووففقيتله مودافيعه  ئتميشدير. بير ديپلومات كيمي سارا خاتونون فعاليتينده اونون سولطان ايكي محمت له باغلاديغي 1461-جي ايل ياسسي چمن صولحونون بؤيوك اهميتي وار. بو صولح هله ليك اليميزده اولان معلوماتا گؤره، سارا خاتونون خاريجي اؤلكه حؤكمدارلاري ايله باغلاديغي ايلك موقاويله لردن بيريدير. تئيمورلو حؤكمداري ابو سعيدله دانيشيقلار آپاران آغ قويونلو ائلچيلرينه ده سارا خاتون باشچيليق ائتميشدير (1468). آوروپا اؤلكه لري ده بو آذربايجانلي خانيمي چوخ ياخشي تانييير، اونا بؤيوك احتيراملا ياناشيرلار. آذربايجانا گؤندريلن آوروپا، خوصوصيله ده، وئنئسييا ائلچيلرينه وئريلن مخفي معلوماتلاردا موطلق سارا خاتونلا گؤروشمك و اؤز مقصدلري اوچون اونون سارايداكي نوفوذوندان ايستيفاده ائتمك تاپشيريليردي. سارا خاتون ديپلومات و دؤولت خاديمي اولماقلا برابر، بؤيوك حربي سركرده ليك باجاريغينا و حربي اينتويسييايا ماليك قادين اولموشدور. اونون عقلي چئويكليگي دار مقاملاردا تئز قرار چيخارماغا ايمكان وئرميشدير. سارا خاتون غئيرتلي قادين، ديپلومات و حربي ايستعدادا قادير بير اينسان اولموشدور. 

قايناق: تاريخ اينفو

كؤچورن: آيدا بيات