تك آياقلي جاسوس قادين ويرجينييا هايل 

      1945-جي ايلده  آمريكا پرئزيدئنتي هارري ترومن شخصن اؤزو بو موكافاتي هايله تقديم  ائدير و اونا موراجيعتله:  " سن آلمانييا اوزرينده غلبه ميزه بؤيوك تؤحفه وئردين.  سن اولماسايدين، بيز فرانسادا موقاويمت حركاتي تشكيل ائده، آلمانلارين  هر پلانلاريندان واختيندا خبر توتا بيلمزديك. سن اولماسايدين،  ايكي جبهه نين آچيلماسيني اوغورلا  سونا چاتديرا  بيلمزديك " ، - دئميشدي.  

                  دونيادا تانينميش جاسوسلار آراسيندا قادينلار دا اؤزلرينه مخصوص ايز بوراخيبلار. اونلاردان بيري ده ويرجينييا هايل-دير. ويرجينييا هايل 1907-جي ايلده آدلي-سانلي، وارلي بير عاييله ده دونيايا گليب. ويرجينييا هله اوشاق ياشلاريندان اؤز چاليشقانليغي، باجاريغي ايله واليدئينلري نين رغبتيني قازانا بيلميشدي. او، اورتا مكتبده اوخودوغو مودتده اؤز چاليشقانليغي، درسلرده فعالليغي ايله ياشيدلاريندان سئچيليردي. آتاسي دا قيزي نين بو جور چاليشقانليغيني نظره آلاراق، اونو تحصيل آلماسي اوچون پاريسه گؤندرير. داها سونرا ويرجينييا آلمانييادا و ويانادا تحصيليني داوام ائتديرير. گله جگين جاسوسو ايله تحصيليني فرقلنمه باشا وورور.  همين دؤورده ويرجينييانين عاييله سينده هر شئي نورمال گئديردي. بير سؤزله، او دؤورده ويرجينييا قايغيسيز بير حيات ياشاييردي.

   طالئعين گؤزله نيلمز هديه سي

 1929-جو ايلده آمريكا-دا باش وئرن ايقتيصادي بؤحران نتيجه سينده ويرجينييانين آتاسي بوتون وار دؤولتيني ايتيرير. فاجيعه  بونونلا بيتمير. بوتون مولكونو ايتيرن آتا بونا دؤزمور و بير نئچه گون سونرا اينفاركت كئچيره رك دونياسيني دييشير. ويرجينييا ايسه بوتون بو اولانلاردان سارسيلير، آنجاق موباريزه سيني دايانديرمير. گنج قيز آرتيق حياتدا ان اعتيبارلي ايشين دؤولت ايشي اولدوغونو فيكيرلشير و بو ايستگي ايله باغلي خاريجي ايشلر ناظيرليگينه موراجيعت ائدير. ويرجينييانين بختي گتيرير: ناظيرليكدن اونا موثبت جاواب گلير. گنج قيز همين ناظيرليكده بير مودت كاتيبه ايشله يير و رهبرليگين حؤرمتيني قازانا بيلير. او بورادا ايشله ديگي دؤورده خوصوصي خيدمت اورقانلاري طرفيندن جاسوسلوغا جلب اولونور. داها سونرا او، خوصوصي تاپشيريقلا وارشاوايا، رومينييايا و نهايت، توركييه نين ايزمير شهرينه گلير. بورادا بير مودت جاسوسلوق فعاليتيني داوام ائتديرير.  توركييه ده اونون اساس ايشي همين دؤورده آنكارا-بئرلين موناسيبتلريني ايزله مك و بو باره ده معلوماتلار توپلاماق ايدي. بو مقصدله او، توركييه نين عالي دايره لرينده كي  بعضي آداملارلا علاقه  قورموشدو. او، آلمانييا ايله باغلي اونلاردان  ائشيتديكلريني درحال آمريكا خوصوصي خيدمت اورقانلارينا اؤتوروردو. توركييه ده فعاليته باشلاديقدان بير نئچه ايل سونرا او، آمريكا خوصوصي خيدمت اورقانلارينا گؤندرديگي معلوماتدا يازيردي:  " من يوكسك منبعلرده كي  تانيشلاريم واسيطه سيله موعين ائتديم كي، آلمانييانين توركييه ده كي  سفيري آنكاراني هر واسيطه ايله اؤزلري نين موتتفيقينه چئويرمك ايسته يير. آما توركييه ني ايداره ائدنلر بير دونيا موحاريبه سينده باشلارينا گلنلردن احتياط ائده رك، آلمانلارلا موتتفيقليك مسله سينه احتياطلا ياناشيرلار. من ده اؤز نؤوبمده سؤز آراسي تانيشلاريمدا بئله بير فيكير فورمالاشديرديم كي، هيتلئرين موتتفيقي اولماق توركييه ني يئني فلاكته سوروكله يه بيلر. دئيه سن، بونون تاثيري اولدو، سون گؤروشومده هم صؤحبتيم بيلديردي كي، توركييه بو دفعه  تلسميه جك و هيتلئرين موتتفيقي كيمي چيخيش ائتمه يه جك. توركييه گؤزله مه مؤوقئعيي سئچه جك و بو ايشين نئجه نتيجه لنه جگيني گؤزليه جك. امين اولا بيلرسينيز:  ايكي دونيا موحاريبه سي باشلاياجاغي تقديرده، توركييه آلمانييانين موتتفيقي كيمي چيخيش ائتميه جك "  1934-جو ايلده ويرجينييانين حياتيندا يئنه بير فاجيعه  باش وئرير. او، آوتوموبيل قضاسينا اوغرايير. ويرجينييا قضادان ساغ چيخسا دا، سول آياغيني ايتيرير. بئله كي، آياغيندان قانقرئنانين بدنه ياييلماماسي اوچون سول آياغي ديزدن آشاغي كسيلير. بو عمليات ايستانبولداكي آمئريكا خستخاناسيندا آپاريلير. آنجاق قضانين كيملر طرفيندن و نه اوچون تؤره ديلديگي هله ده گيزلي ساخلانيلير. قضادان سونرا آمئريكانين ايزميرده كي  كونسوللوغوندان واشينقتونا گؤندريلن بير مكتوبدا ويرجينييانين اؤز سيلاحي ايله احتياطسيز داورانديغينا گؤره آياغيني يارالاديغي و يارالي آياغي نين كسيلديگي بيلديريلير. 10 آيا ياخين بير مودتده موعاليجه اولونان ويرجينييا نهايت خسته خانادان چيخير و نيويوركا يوللانير. داها سونرا او، رومينييايا گئدير و اورادا جاسوسلوق شبكه سي قورور.

     “Limping lady”  (آخساق خانيم)

 ويرجينييا آمئريكادا آلتي آي قالديقدان سونرا وئنئزييادا جاسوسلوق فعاليتيني داوام ائتديرمك ايسته يير. گنج قيز آرتيق تك آياقلي ايدي. كسيلن آياغي نين يئرينه ايسه تاختا آياق قويولموشدو. ويرجينييا اؤزونه ماراقلي بير لقب گؤتورور،  " ليمپينگ لادي "  (آخساق خانيم).  " ليمپينگ لادي "  وئنئزييادا بير مودت ايشله يير. موحاريبه  باشلاياندان سونرا 1941-جي ايلده هايل آمريكا خوصوصي خيدمت اورقانلاري طرفيندن آلمانييايا قارشي حياتا كئچيريله جك خوصوصي  عملياتلار قروپونون رهبري تعيين ائديلير. عئيني زاماندا او، رهبرليگين راضيليغي ايله اينگيلتره كشفياتينا ايشله مه يه باشلايير. بو دفعه  هايل  "ماري كودو "  آلتيندا فرانسايا گؤندريلير. او، بورادا فرانسا موقاويمت حركاتي نين ياراديلماسيندا ايشتيراك ائدير.  اونون  بو فعاليتي ايسه فرانسيزلار آراسيندا رغبتله قارشيلانير.  1942-جي ايلده هايل ليون شهرينه گلير و بورادا آمريكا و اينگيليس گيزلي كشفياتي نين يئرلي شؤعبه سي نين ياراديلماسيندا ايشتيراك ائدير، هم ده يئرلي اهالي آراسيندا موقاويمت تشكيلاتي نين اؤزكلريني ياراداراق، اونلاري آلمانلارا قارشي موباريزه يه ايستيقامتلنديرير. آما ايلين سونوندا آلمان كشفياتي هايلين ايزينه دوشور.  آنجاق او، آلمان عكس-كشفياتينا يئرلشديرديگي جاسوسو واسيطه سي ايله بوندان خبر توتور و واختيندا اؤلكه ني ترك ائتمه يه مووففق اولور.  1944-جو ايلده او، يئنيدن خوصوصي تاپشيريقلا فرانسايا قاييدير. قيسا مودتده هايل آلمانلارين جبهه  خطينده عكس-هوجوما حاضيرلاشمالاري و موتتفيق قوشونلاري فرانسادا دارماداغين ائتمه يه حاضيرلاشماسي باره ده خوصوصي معلومات الده ائدير و اونو اينگيليس و آمريكا كشفياتينا اؤتورور.  او بيلديرير كي، آلمانلار اؤز حربي قرارگاهلاريني ليوندان لئ پايا كئچيريبلر. محض بو معلوماتلار نتيجه سينده آمريكا و اينگيلتره اوردوسو جبهه  نين باشقا ايستيقامتيندن آلمانلارا گؤزله نيلمز ضربه لر ائنديرير و بونونلا دا آلمانلارين فرانسادا دارماداغين ائديلمه سي پروسئسي نين اساسي قويولور. بوتون بونلاردا هايلين اويناديغي بؤيوك رول آمريكا پرئزيدئنتينه ده معلوم ايدي. اونا گؤره آلمانلار اوزرينده غلبه ده گؤسترديگي جاسوسلوق خيدمتلرينه گؤره هايل آمريكا-نين عالي اوردئنلريندن بيري ايله تلطيف ائديلير. 1945-جي ايلده  آمريكا پرئزيدئنتي هارري ترومن شخصن اؤزو بو موكافاتي هايله تقديم ائدير و اونا موراجيعتله:  " سن آلمانييا اوزرينده غلبه ميزه بؤيوك تؤحفه وئردين. سن اولماسايدين، بيز فرانسادا موقاويمت حركاتي تشكيل ائده، آلمانلارين هر پلانلاريندان واختيندا خبر توتا بيلمزديك. سن اولماسايدين، ايكي جبهه  نين آچيلماسيني اوغورلا  سونا چاتديرا  بيلمزديك " ، -دئميشدي.   موحاريبه دن سونرا ويرجينييا  مركزي كشفيات ايداره سينده فرانسا حربي و پارلامئنت كشفياتي ايشلري اوزره باش مصلحتچي وظيفه سينه تعيين ائديلدي. 1966-جي ايلده تقاعوده چيخانا كيمي بو وظيفه ده ده ايشله دي.  1945-جي ايلده ويرجينييا گيزلي تشكيلاتدا تانيش اولدوغو پاول قوللوت ايله ائوله نير و آمئريكادا ياشايير. ويرجينييانين جاسوسلوق فعاليتيندن ياخين واختلارا كيمي هئچ يئرده معلومات ياييلماييب. آنجاق 2003-جو ايلده بير ژورناليستين آراشديرمالاري نتيجه سينده ويرجينييا هايلين حياتي، جاسوسلوق فعاليتي اؤيره نيلير. بعضي معلوماتلارا گؤره، او، آمريكا خوصوصي خيدمت اورقانلاري نين آوروپادا خوصوصي جاسوسلوق سيستئميني قوروب و بو گون ده بو سيستئم واسيطه سيله آمريكا غربده كي  موتتفيقلري نين بوتون فعاليتلريني نظارتده ساخلايير.

كؤچورن : آيدا بيات