+0 به یه ن
خالق جومهوريييتي دؤورونده ادبيات(1920-1918)
شاعيره، ادبياتشوناس گولخاني پناه
20. عصر آذربايجانين ايجتيماعي-سياسي، ادبي-مدني حياتيندا ائله بير عصردير كي، اوندا داها بؤيوك اويانيش وار، بو عصر ميللي آزادليق حيسلري‌نين گوجلنمه‌سي، دؤولتچيليك، آزادليق و ترققي‌پرور حيسلرله زنگيندير. بو ميللي-آزادليغين شيرينليگيني 20. عصرين ايلك اون‌ايلليگينده دادديق، سونرا ايتيرديك و عصرين سون ايكي اون‌ايلليگينده يئنيدن الده ائتديك. قانيميز-جانيميز باهاسينا الده ائتديك...
آذربايجاندا خالق جومهوريتي‌نين قورولماسي اؤلكه‌ميزده ايجتيماعي حياتدا اولدوغو كيمي، مدني، ادبي حياتدا بؤيوك بير جانلانمايا تكان وئردي. خالقيميزين ميللي-آزادليق، دؤولت موستقيلليگي اوغروندا موباريزه آپارديغي و آرزولارينا نايل اولدوغو و قوردوغو خالق جومهوريتي فعاليت گؤسترديگي قيسا مودتده ميللي ايدئيا موباريزه‌سينده، او جومله‌‌دن، رومانتيزم و رئاليزم ياراديجيليق آخينيندا بيرلشير. و بو دؤورده فعاليته باشلايان پارلامئنت آذربايجان ديليني دؤولت ديلي ائلان ائدير. 20. عصرين اوليندن آذربايجان اديب و شاعيرلري موعين مكتبلر، اوسلوبلار اوزره قروپلاشماقدا ايدي. «همين بيرليكلر ادبياتين گئت-گئده داها چوخ ايدئولوِِژي مضمون كسب ائتديگيني، زامانين سياسي كونيوكتوراسينا تابئع اولدوغونو گؤستريردي. بو و يا ديگر سياسي-ايدئولوژي مراما منسوبلوق ايلك ياراديجيليق تشكيلاتلاري‌نين، ياخود جمعيتلري‌نين فعاليتي ايله ياناشي، آديندا دا اؤزونو گؤستريردي: «ياشيل قلم»، «قيرميزي قلم» و س. ادبياتين بو جور «رنگلنمه‌سي» صنعت باخيميندان او قدر طبيعي اولماسا دا، بديعي تفككورون جمعيت حياتينا ياخينليغيندان ايرهلي گليردي. «ياشيل» رنگ توركچولوگون، موسلمانچيليغين، «قيرميزي» ايسه اينقيلابي موعاصيرليگين ايفاده‌سي ايدي».
20. عصرين ايلك ايكي اون‌ايلليگينده آذربايجان چوخ موركب، ايجتيماعي - سياسي جهتدن ان آغير دؤورونو ياشادي. روسييا-ژاپون موحاريبه‌سي، روس ايمپئريياسي‌نين مغلوبيتي، ايجتيماعي - سياسي پروسئسلر، آذربايجاندا گوجله‌نن ميللي - آزادليق حركاتي ادبي پروسئسه‌ده اؤز تاثيريني گؤستردي. اؤلكه‌ده معاريفچيليك حركاتي‌نين گوجلنمه‌سي، معاريفچي ادبياتين اينكيشافينا كؤمك ائتدي. ميللي پروبلئملرين حلي يوللاريني آختارماقدا ضياليلار بير آرايا گلمكده ايديلر. «شرقي-روس»، «هومت»، «موللا نصرالدين»، «فيوضات»، «ايرشاد»، «ايقبال»، «ترققي»، «تكامول»، «يولداش»، «مكتب»، «ديريليك» كيمي مطبوع اورقانلار فعاليته باشلادي، آنا ديليميزده يارانان بو مطبوع اورقانلار خالقيميزين ادبياتي‌نين اينكيشافينا كؤمك ائتميش اولوردو. بونلاردا ايجتيماعي-سياسي و ميللي-معنوي پروبلئملر اؤز عكسيني تاپيردي.
بو دؤورده رئاليزم و رومانتيزم ادبي مكتبلري دؤورون ادبي پروسئسلريني اؤزونده عكس ائتديريردي. «موللا نصرالدين»، «فيوضات» ژورناللاري اطرافيندا توپلانان معاريفچي ضياليلار رئاليست و رومانتيزمين ايدئيا-ائستئتيك دوشونجه‌لريني ايفاده ائديرديلر.
جليل محمدقولوزاده‌نين نشره حاضيرلاديغي «موللا نصرالدين» ژورنالي رئاليست شاعير و يازيچيلاري اؤز اطرافيندا بيرلشديرير، موللانصرالدينچيلر كيمي تانينان اديبلر ادبي ديلي خالقين دانيشيق ديلي‌نين بازاسي اساسيندا ياراتماغي دوشونور. علي بَي حسينزاده‌نين باشچيليق ائتديگي «فيوضات» ژورنالي رومانتيكلرين ايدئيا و دوشونجه‌لريني مودافيعه ائدير و فيوضاتچيلار كيمي تانينان ضياليلار ايسه «اورتا تورك ديلي‌نين فورمالاشديريلماسي ايدئياسي»ني اساس بيلير و «بو مسله‌ده توركييه توركجه‌سي‌نين اساس گؤتورمگي دوشونوردولر».
روسييادا 1905 جي ايل اينقيلابي مغلوبيته اوغرادي و بو آزادفيكيرلي، معاريفچي آذربايجان ضياليلاري‌نين ايشيني آغيرلاشديريردي. 1908- 1910 جو ايللرده محمد امين رسولزاده، علي بي حسينزاده، احمد بي آغا اوغلو كيمي ضياليلار آذربايجاني ترك ائتمه‌يه مجبور اولموش، تعقيب اولوندوقلاريندان ايراندا (محمد امين رسولزاده)، توركييه‌ده (علي بي حسينزاده، احمد بي آغا اوغلو) فعاليتلريني داوام ائتديرمه‌لي اولموشلار 1905- 1901 جي ايللرده ستارخان حركاتي بوتون ايرانا، ائلجه‌ده شرقه، مشروطه حركاتي‌نين غلبه‌سي ايجتيماعي- سياسي حركاتا، ائلجه‌ده ادبي پروسئسه جيدي تاثير گؤسترير. بو حاديثه‌لري محمد امين رسولزاده، علي بي حسينزاده سيلسيله مقاله‌لرله دريندن ايزله‌‌يير. «مشروطه حركاتيني ياخيندان ايزله‌ين م.ا. رسولزاده يازديغي سيلسيله مقاله‌لرله ميللي مطبوعاتدا ايجتيماعي تئندئنسييانين، وطنداشليق آمالي‌نين گوجلنمه‌سينه تكان وئرميشدير. علي بي حسينزاده ايسه «سيياستي-فورصت» آدلي فلسفي-پوبليسيستيك تراكتاتيندا شرطي-سيمووليك اوسلوبون ايمكانلاريندان بهره‌لنه‌رك ديقتي آذربايجانين گونئيينده جريان ائدن سياسي حاديثه‌لره يؤنلدير، هر بير ميلت اوچون آزادليغين قاچيلماز اولدوغو ضرورتيني وورغولاييردي».
«صفا»، «پيغام»، «نشري-معاريف»، «جميتي-خئيرييه» كيمي ادبي مدني موحيطه تاثير ائدن جمعيتلرين رولو، خوصوصيله قئيد ائديلمه‌ليدير. اونلارين كؤمگي ايله كئچيريلن يوبيلئي تدبيرلري، نشر اولونان كيتابلار، صحنه‌لشديريلن درام اثرلري ادبي-پروسئسين اينكيشافينا گؤستريلن ديرلي كؤمكلر ايدي. م.ا.رسولزاده «آچيق سؤز» قزئتي‌نين نشرينه باشلاماقلا آذربايجان مطبوعاتي تاريخينده يئني بير يول آچير. بو قزئت «ميللي ايدئولوگييانين فورمالاشديريلماسيندا موستثنا رول اوينادي. اونون صحيفه‌لرينده درج اولونان يازيلار آذربايجان ادبياتي‌نين، مدنيتي‌نين اينكيشافينا بؤيوك تكان ايدي.
اؤلكه‌ده (1918-1920) باش وئرن ايجتيماعي-سياسي حاديثه‌لر، آذربايجان خالق جومهوريتي‌نين يارانماسي خالقيميزين حياتيندا ميثيلسيز رول اوينادي. قيسا بير مودت ياشاسا دا، آذربايجانداكي موستقيل ميللي دؤولت بؤيوك چتينليكلرله قورولان بير دؤولت ايدي و بو يولدا آذربايجان ادبياتي‌نين، مدنيتي‌نين، ضياليلاري‌نين خوصوصي فعالليغي نتيجه‌سينده -1918 -1920-جي ايللر «ميللتيميزين حياتيندا خوصوصي بير مرحله اولموش و اونون گله‌جك اينكيشافينا جيدي تاثير گؤسترميشدير. بو دؤورده خالقيميزين يوز ايلدن آرتيق سورن كؤله‌ليك زنجيريندن خيلاص اولماسي، موستقيل حياتا قدم قويماسي، يالنيز ايجتيماعي-سياسي فضالاردا دئييل، ادبي-مدني ساحه‌لرده‌ده كؤكلو دييشيكليكلرين گئرچكلشديريلمه‌سي اوچون زمين ياراتميشدير. تورك ديلي‌نين دؤولت ديلي ائلان اولونماسي، ميللي مطبوعاتين نشر ايمكانلاري‌نين گئنيشلنمه‌سي ايجتيماعي ايدئاللارلا زنگين بير ادبياتين يارانماسينا تكان وئرميشدير».
آذربايجاندا 1919-جو ايلده باكي دؤولت اونيوئرسيتئتي فعاليته باشلادي. بونونلا بئله، «آذربايجان دؤولت تئاتري»، «تئاتر خاديملري جمعيتي»، «موسلمان موحرير و اديبلر جمعيتي»، «ياشيل قلم» ادبي بيرليگي ياراندي، فعاليته باشلادي. ميللي مطبوعات بو ايللرده اؤز اينكيشافيندا اوغورلار قازاندي: بئله كي، بو دؤورده «آذربايجان» (روسجا، توركجه)، «آذربايجان حؤكومتي‌نين اخباري»، «ايستيقلال»، «آل بايراق»، «بثيرت»، «ايتتيحاد»، «گله‌جك»، «شئيپور»، «دوغرو يول»، «ائل»، «افكاري-نفيس»، «خالق سؤزو»، «حورريت»، «زحمت صداسي»، «مشعل» و س. قزئت و درگيلر چاپ اولونموشدور. عوموميتله، 1919-جو ايلده آذربايجاندا 92 آددا قزئت و درگي نشر اولونموشدور كي، همين قيرخ ايكيسي توركجه، قيرخ دؤردو روسجا، آلتيسي ايسه ديگر ديللرده يايينلانميشدير».
1918- 1920-جي ايللرده محمد هادي، حسين جاويد، عبداله شايق، جعفر جاببارلي، احمد جاواد، اوم‌گولثوم صاديق‌زاده، علي يوسيف پوئزييا ساحه‌سينده اوغورلار قازانديلار. محمد هادي «عسگرلريميزه، كؤنوللولريميز»، «مفخوره‌يي-عالييه‌ميز»، «شهدايي- حورريتيميزين احوالينه-ايتحاف» كيمي شعئيرلرينده الده ائديلن ميللي آزادليغين قورونوب ساخلانماسي اوغروندا ميلتيني موباريزه‌يه سسله‌يير.
«شهدايي-حورريتيميزين احوالينه-ايتحاف» شئعيرلرينده 1918 جي ايلده ائرمني داشناكلاري‌نين تؤره‌تديكلري قانلي جينايتلردن، ائرمني-موسلمان فاجيعه‌سيندن، تؤكولن گوناهسيز قانلاردان سارسيلميش شاعير بو يولدا شهيد اولانلاريميزي آغلايير:
سيزين مزارينيز ايشته قولوبي-ميللتدير،
بو سؤزلريم اورگيمدن گلن حقيقتدير.
سيزي اونوتماياجاق شانلي ميللتيم اصلا،
امين اولون بونا، ائي زيينتي-جاهاني فنا.
سيزينله بولدو بو ميللت حياتي –پور ايقبال.
سيزينله بولدو بو ميلت شرفلي ايستيقلال.
«عسگرلريميزه، كؤنوللولريميزه» شئعيرينده موستقيلليك اوغروندا موباريزه‌ده ايگيد وطن اوغوللارينا اوز توتور، اونلاري وطنپرور اولماغا، تورپاغي، ميلتي، دؤولتي قوروماغا چاغيرير.
م. هادي‌نين بو سطيرلرينده م.ا.رسولزاده نين «آه، آذربايجان! بيز سنين حاقيني طلب ائتمك دئييل، يالنيز آديني سؤيله‌مك اوچون... نه قدر تؤهمتلره معروض قالديق...» كلمه‌لرينده ياشايان بير روح، آمال، ايدئيا وار. م.هادي بولشئويكلرين حاكيميته گلمه‌سينه، خالق جومهوريتي‌نين سقوطونا دؤزمه‌يرك گنجه عوصيانيندا ياخيندان ايشتيراك ائتميش، بو آمال، مقصده خيدمت ائتميش، بو يولدا هلاك اولموشدور.
توركچولوك، تورانچي ايدئيالاري ايله كؤكلنميش عبداله شايقين ياراديجيليغيندا خالق جومهوريتينه بسله‌نن حؤرمت و احتيرام اساسدير. «يئني آي دوغاركن»، «مارش»، «وطنين يانيق سسي»، «آرازدان تورانا» شئعيرلرينده وطنداش شاعيرين قلبي‌نين سسي دويولور. بو شئعيرلرده آزاد، موستقيل دؤولته، خالق جومهوريتينه سئوگي ياشايير. ميلتي، خالقي حاقسيزليغي ييخماغا، «توراندا گون دوغونجا» ظولمتله چارپيشماغا، ايره‌ليده موباريزه يولو ايله قازانيلاجاق غلبه‌لره، اورادا دوغاجاق گونشه-يئني دؤولته، دؤولتين قوردوغو گؤزل، خوشبخت، فيراوان، جنّت كيمي حياتا سسله‌مه وار.
هايدي، يولا چيخاليم، حاقسيزليغي ييخاليم،
توراندا گون دوغونجا، چارپيشاليم.
آرش ايلري، ايلريده جنّت كيمي چمن وار.
گونش اوردا هر دوغار، سعادت اوردا پارلار.
تورك فيرقه‌سي موساوات،
آچاليم قوش تك قاناد.
ساريليب حورريته،
بولاليم شانلي حيات.
ميللي ادبيات تاريخينده «ايستيقلال شاعيري» كيمي تانينان احمد جاوادين «تورك اوردوسونا»، «شهيدلر»، «آذربايجان بايراغينا»، «ائلين بايراغي»، «اينگيليس»، «ايستانبول»، «باكي دئيير كي» و س. شئعيرلرينده اؤلكه‌ده ميللي آزادليق اوغروندا گئدن موباريزه‌لر ترننوم اولونور، بو يولدا جانيني قوربان وئرنلره حؤرمت و احتيرام گؤستريلير. بو شئعيرلرده «بير كره يوكسلن» و بير داها ائنمه ين، اونو ائنديرمه‌يه چاليشانلارا قارشي خالقين آپارديغي موباريزه، بو موباريزه‌ده «مووققتي مغلوبيت»، بئشيگينده بوغولموش موستقيل آذربايجان دؤولتي‌نين بايراغي‌نين 70 ايلدن سونرا يئنه باشيميز اوستونده دالغالانماسي حقيقتي ياشايير، خالقين موباريزه دولو حياتي، قاني جاني باهاسينا الده ائتديگي موستقيللييه يئنيدن قوووشماسي، ميللي دويغولار ياشايير، بو گون ده شاعيرين «آذربايجان بايراغينا» شئعيري، بوراداكي ميللي غورور، ميللي دؤولتچيليگيميز آتريبوتلاريندان بيري كيمي اؤيولن بايراق، شئعيرده كي هر واخت، هر زامان اؤزونو قورويوب ساخلايان موعاصيرليك حيسي - قان باهاسينا الده ائديلميش دؤولته، اونون بايراغينا حؤرمت و احتيرامدان يوغرولموش ميصراعلار يادا دوشور:
توركوستان يئللري اؤپوب آلنيني،
سؤيلويور درديني سانا، بايراغيم!
اوچ رنگين عكسيني قوزغون دنيزدن،
آرماغان يوللاسين يارا، بايراغيم!
احمد جاواد ياراديجيليغيندا اؤلكه‌ني يئنيدن ايشغال ائدن روس ايمپئريياسينا نيفرت حيسي وار. «گؤي‌گؤل» شئعيري‌نين ايدئيا مضمونوندا آزادليق گؤينرتيسي، موستقيلليك آرزوسو، ميللي-ايستيقلال يانغيسي ايله ياناشي عوصيانكار بير قلبين سسي دويولور.
توركچولوك، تورانچيليق ايدئيالارينا گنج ياشلاريندان بؤيوك صميمي رغبتي اولان جعفر جاببارلي ميللي حركاتين گئنيشلنديگي ايلك ايللرده «ترابليس موحاريبه‌سي» و «اديرنه فتحي» پيئسلريني يازدي و بو اثرلر توركييه‌ده باش وئرن اينقيلابي-تاريخي حاديثه‌لري، تورك خالقي‌نين اؤز سووئرئنليگي، اراضيسيني قورويوب ساخلاماق اوغروندا موباريزه‌سيني عكس ائتديريردي.
ميللي حؤكومتين يارانديغي ايللرده پارلامئنتده ستئنوقراف ايشله‌ين ج. جاببارلي دراماتورگييا، ائلجه‌ده ليريك ياراديجيليغيني داوام ائتديرير، ميللي دؤولتچيليگي، وطنين، تورپاغين گؤزلليگيني ترننوم ائدير. ايلك شئعيرلرينده-«آذربايجان بايراغينا»، «سئوديگيم»، «سئويملي اؤلكه‌م»، «سالام» و س. شئعيرلرينده خالق جومهوريتي‌نين شيرين داديني دويان، بو دؤولتين محبتيني قلبينده ياشادان وطنپرور قلبين سسي دويولور. بايراغيميز، توركچولوك، تورانچيليق مفكوره‌سي اؤن پلاندا وئريلير. شاعيرين «آذربايجان بايراغينا» شئعيري شاعيرين «آزادليق و ايستيقلال» سئوگيسيني اوريژينال فورمادا عكس ائتديرن اثرلردن» بيري كيمي يوكسك قييمتلنديريلير.
«آذربايجان بايراغينا» او، شئعيرينده اوچ‌رنگي-آذربايجان بايراغي‌نين رمزلريني بديعي شكيلده وئرير:
بو گؤي بويا گؤي موغولدان قالميش بير تورك نيشاني،
بير تورك اوغلو اولمالي!
ياشيل بويا ايسلامليغين سارسيلمايان ايماني،
اوركلره دولمالي!
شو آل بويا آزادليغين، تجددودون فرماني،
مدنيت بولمالي!
سككيز اوجلو شو ييلديز دا سككيز حرفي اود يوردو،
اسارتين گئجه‌سيندن فورصت بولموش قوش كيبي
سحرلره اوچموشدور.
«سئوديگيم» شئعيرينده‌ده شاعير اوچ‌رنگلي بايراغا، وطنه موقدس حيسلرله ياناشير، بو بايراقدا توركچولوك، تورانچيليق ايدئيالاريني عوموميلشديرير.
اؤلكه‌ده ميللي حؤكومتين سقوط ائتمه‌سييله، خالق جومهوريتي‌نين قوروجولاري، ادبياتا گلن گنج ايستعدادلي قلم صاحيبلري معنوي جهتدن يارالانميشديلار. بو ضربه نين آغريلاريني چكيرديلر. و ج. جاببارلي دا اونلاردان بيري ايدي. «آيدين»، «اوقتاي ائل اوغلو» كيمي اثرلرينده ميللي كدرين موتيولري واردي. قورخماز، موباريز ج. جاببارلي 1920-جي ايل آپرئلين 27-ده حاكيميتين سقوطو حاقيندا قرار قبول ائديلن آخشامي بو ميللي حركاتين بير چوخ جاوان فعاللاري ايله محمد امين رسولزاده نين ائوينه ييغيشيرلار. «گنج موساواتچيلار» حركاتي يارانير. بو گيزلي تشكيلاتين صدري ميرزه بالا محمدزاده، باش كاتيب جعفر جاببارلي اولدو. تشكيلاتين بير سيرا ييغينجاقلاري جعفر جاببارلي‌نين باغيندا كئچيريلير، بولشئويزمه قارشي موباريزه آپاران اؤزكلر ياراديلير. «ايستيقلال» قزئتي درج ائديليردي. 1923-جو ايلده تشكيلاتين عوضولري، او جومله دن ج. جاببارلي دا بولشئويك حؤكومتي طرفيندن حبس ائديلسه‌ده، آوقوستون اورتالاريندا موختليف شرطلر اساسيندا آزادليغا بوراخيلديغي بيلديريلير. اونون ياراديجيليغيني اطرافلي تدقيق ائدن عاليملر بو قناعتده ديرلر كي، «جعفر جاببارلي هئچ بير زامان بولشئويك ايدئيالاريني قبول ائتمه‌‌ميش و سووئت قوروجولوغونون كور-كورانه تبليغاتچيسي اولماميشدير. اونون بو رئژيمله بيرباشا همفيكيرليگيني گؤسترن هئچ بير يازيسي يوخدور. لاكين موعين معنادا آيدين و اوقتايلارين پروتوتيپي اولان ج. جاببارلي‌نين بير خوصوصيتي واردي: دوغما خالقا باغلي اولان اديب اوچون ايدئالسيز، قايه‌سيز، آذربايجانين صاباحينا اينامسيز ياشاماق غئيري-مومكون ايدي. بئله قايه‌لري جعفر جاببارلي قيسمن 20-جي ايللرده بولشئويكلرين خوصوصي آرديجيلليقلا حياتا كئچيرديكلري مدني اينقيلابدا تاپدي. بو اينقيلاب آذربايجان خالقيني آوروپا مدنيتي يولونا يؤنلديردي و محض بو جهت جعفر جاببارلي‌نين خالقيميزين گله جگي باره‌ده آرزولارينا اويغون ايدي. اونا گؤره‌ده بو پروسسئسده ايشتيراك ائدن ج. جاببارليني معنوي ايفلاسدان و عذابلاردان خيلاص ائتدي».
خالق جومهوريتي‌نين كؤمگيني، دؤولتين قايغيسيني اوزرينده حيس ائدن، اونون دستگي ايله خاريجده تحصيل آلان، علمه، بيليگه يييه‌له‌‌نن علي يوسيفين «آذربايجانلي‌يا»، «بايراق»، «ايدئال»، «بير تورك يانقيسي دئيير كي»، «قاراباغ خاينلرين» و س. شئعيرلرينده خالق، ميللت، وطن سئوگيسي اساسدير. «علي يوسيفين شئعيرلريني سجيييه‌لنديرن باشليجا كئيفيت اونلارين جانلي حيس و تصوراتلاردان قايناقلانماسي، يوكسك موباريزليك احوال-روحيييه‌سي‌نين محصولو اولماسيدير. بو جهت بير طرفدن شاعيرين فيطري پوئتيك كئيفيتلري‌نين گؤستريجيسي كيمي اؤزونو بوروزه وئريرسه، قارشي طرفدن اونون يازيلاري‌نين جومهوريت ايدئاللاري ايله باغليليغيندان مايالانير».
رئپرئسسييا قورباني اولموش، حبسخانالارا سالينميش اوم‌گولثوم صاديق‌زاده نين «عسگر آناسينا»، «چكيل، دفع اول»، «بير ماييس گونونده»، «يولونو بكلرديم» شئعيرلرينده آزادليغيني، موستقيلليگيني الده ائتميش آذربايجان خالقينا، اونون يئنيجه قوردوغو آزاد، موستقيل، سووئرئن دؤولتينه محبت، وطنين صاباحي اوچون ناراحاتليق، خالقينا چتين آندا كؤمه‌يه گلن، اونو دوشمن جايناغيندان قورتارماغا چاليشان تورك اوردوسونون آرخا، داياق اولماسيندان اورگينده غورور حيسي دوغماسي، ديلي بير، قاني بير آذربايجان خالقي‌نين، توركلري‌نين حيس و دويغولاري، بو تاريخي حقيقتلرين خالقين روحوندا، يادداشيندا بوراخديغي درين ايزلر ياشايير. اونون شئعيرلرينده عئيني زاماندا اؤلكه‌ده خالق جومهوريتي‌نين سقوطا اوغراماسي، باشيميزا گتيريلن موصيبتلر، تاريخي عدالتسيزليكلر اؤز عكسيني تاپميشدير.
محمد سعيد اوردوبادي، علي قولو قمكوسار، جاويد، علي شؤوقو، داوود آغاميرزاده و باشقا صنعتكارلاريميز خالق جومهوريتي‌نين ياشاديغي دؤورون عومومي منظره‌سيني پوئزييادا وئرديگي كيمي، بو ايللرده بديعي نثر ياراديجيليغي ايله مشغول اولان جليل محمدقولوزاده، عبدالرحيم هاقوئردييئو، يوسيف وزير چمنزمينلي، عبداله شايق، سئييد حسين، تاغي شاهبازي كيمي تانينميش اديبلر ده اؤز ياراديجيليقلاريندا بونو عكس ائتديريرديلر.
جليل محمدقولوزاده حئكايه‌لرينده قادين آزادليغي («كونسولون آروادي» «خانين تسبئحي»، «قصاب») پروبلئملرينه توخونور. «زيرراما» حئكايه‌سينده منفي اخلاقي كئيفيتلر تنقيد اولونور. ع.هاقوئردييئوين «ميرزه صفر»، سئييد حسينين «حزين بير خاطيره»، «ايسمايلليي» حئكايه‌لري ديقتي جلب ائدير. «ايسمايلليه» حئكايه‌سينده ادبياتشوناسلار سئييد حسينين «بو تاريخچه نين ايستيقلال و آزادليق حركاتي ايله باغلي مقاملارينا ديقت يئتيريلديگيني، «اصلينده ايسمايللييه‌نين سيماسيندا يازيچي‌نين بوتون روحو و قلبي ايله باغلي اولدوغو دوغما آذربايجانين اوبرازيني ياراتديغيني بيلديريرلر.
عبداله شايقين «عصريميزين قهرمانلاري» روماني‌نين بير حيصه‌سيني جومهوريت دؤورونده قلمه آلديغي، بو عصرده بيرينجي دونيا موحاريبه‌سي، چار روسيياسي‌نين تنززولو، اوكتيابر اينقيلابي دؤورونده يئني نسلي دوشوندورن و ناراحات ائدن پروبلئملرين ديقت مركزينه چكيلديگي قئيد ائديلير.
آغابابا يوسيفزاده‌نين «سينان قاناد» رومانيندا خالقين، ميلتين قايغيلاريني بير وطنداش كيمي ايرهلي چكمك مسله‌لري، وطنين آزاد و آباد ياشاماسي، قورولماسي ايدئيالاري وئريلير.
بو دؤورده جعفر جاببارلي‌نين «اديرنه فتحي»، «ترابليس موحاريبه‌سي»، ياخود «اولدوز»، «ايدين»، حسين جاويدين «ايبليس»، جليل محمدقولوزادنين «آنامين كيتابي»، «كامانچا» اثرلري جومهوريت دؤورونون دراماتورجي اثرلري كيمي بديعي جهتدن يوكسك قييمتلنديريلير. جعفر جاببارلي‌نين درام اثرلرينده توركييه مؤوضوسونون داها قاباريق شكيلده وئريلديگي و بو جهتدن كاميل اثرلر كيمي سجيييه‌لنديريلديگي معلومدور.
تدقيقاتچيلار حسين جاويدين «ايبليس» فاجيعه‌سي‌نين «بو ايللرده جريان ائدن حاديثه‌لرين عومومي روحوندان و ماهيتيندن قايناقلان»ديغيني بيلديرير: «دراماتورق بير دونيا ساواشي‌نين آغير سياسي بؤحراني‌نين و ائرمني-داشناك بيرلشمه‌لري‌نين فيتواسي ايله تؤره‌ديلميش مارت فاجيعه‌سي‌نين اونون شوعوروندا و دونياگؤروشونده ياراتديغي گوجلو تصوراتين تاثيري ايله بئله بير اثرين ياراديلماسيني واجيب حساب ائتميشدير».
دراماتورقون «ايبليس» فاجيعه‌سينه ضيديتلي موناسيبت اولسا دا، عبداله شايق بو اثري تنقيد ائدنلره قارشي چيخير: «جاويدين «ايبليس» فاجيعه‌سيني ايدئولوژي جهتدن تنقيد ائدنلره اونون نه كيمي تاثير آلتيندا يازيلديغيني خاطيرلاتماق اوچون شاعيرين كئچديگي مودهيش بير فلاكتي يازماق مجبوريتينديم. جاويد باكيدا نيكولايئوسكي كوچه‌سينده يئرلشن «تبريز» اوتئلينده ياشاييردي. 1918-جي ايلين مارت حاديثه‌سيندن سونرا يازيچي و مونتقيد حسين صاديق ايله برابر بيزه گلميشدي. جاويدين بت-بنيزي آغارميشدي. او، سون درجه نشه‌سيز و موتاثير گؤرونوردو. احوال سوردوم. حسين صاديق جاويدين اسير دوشدويونو و اؤلومدن قورتولدوغونو سؤيله‌دي.... جاويد آذربايجان صحنه‌سي‌نين شاه اثرلريندن اولان «يبليس» فاجيعه‌سيني بو آجي تاثيرلر آلتيندا يازميشدي».
ميللي بيرليك، معنوي بوتؤولوك ايدئيالاري اوزرينده قورولان دؤولتين طرفداري اولان جليل محمدقولوزاده نين «انامين كيتابي» پيئسي‌نين ادبي تنقيدده درين تحليلي وئريلميشدير: «بؤيوك موتففككيرين فيكرينجه، بيرليگي و بوتؤولوگو اولمايان ميلتين ايقتيصادي، سياسي، معنوي گوج، قودرت صاحيبي اولماسي، تاريخ صحنه‌سينده اوزون مودت دوروش گتيرمه‌سي مومكون دئييلدير. دراماتورق پيئسده بير آنانين اؤولادلاري اولان روستم بي، ميرزه محمدعلي، صمد واحيد تيمثاليندا كؤله‌ليك و اسارتين ميلتين خاراكتئرينده قويموش اولدوغو آجي نيشانه‌لره ديقتي يؤنلده بيلميشدير. عئيني زاماندا، مؤليف ميلتين روحونا هوپدورولموش يابانچي خيصلتلري ديقت مركزينه چكمكله كيفايتلنمه‌‌ميش، بو بلالاردان خيلاص اولماغين يوللاريني گؤسترميشدير».
آذربايجان ادبياتي تنقيدي و ادبياتشوناسليغي جومهوريت دؤورونده اؤزونه‌مخصوص اينكيشاف يولو كئچيب. «بو اؤزونه‌مخصوصلوق، هر شئيدن اؤنجه، ادبي ايرثين ميللي-نظري فيكير موستويسينده تحليل و تدقيقي‌نين آكتوالليق كسب ائتمه‌سي، همچنين ادبياتشوناسليغي مشغول ائدن پروبلئملرين داها اوپئراتيو شكيلده ديقت مركزينه چكيلمه‌سي ايله شرطلنمكده دير. بئله كي، جومهوريت دؤورونده بير طرفدن كلاسسيك ادبي ايرثين تدقيقي ايستيقامتينده موهوم آدديملار آتيلميش، ديگر طرفدن چاغداش ادبي پروسئس يئترينجه ديرلنديريلميش، همچنين ادبياتين نظري-ائستئتيك پروبلئملري‌نين آراشديريلماسي ايله باغلي موعين ايشلر گؤرولموشدور».
محمد امين رسولزاده ميللي آزادليق يولوندا الده ائديلن مووففقيتلرين قازانيلماسيندا بديعي ادبياتين رولونو بئله ديرلنديرير: «آزادليق و ايستيقلاليت اساس سونگولري ايله يوخ، ادبيات و اينجه صنعت واسيطه‌سي ايله الده اولونور» و «قورتولوش گونو» مقاله‌سينده يازير: «ائي ميلتين ليسان اول-قئيبي اولان شاعيرلر، اديبلر، ميلتين عمللريني، اولوي نيت و مقصدلريني اوخشايينيز، كنديسينه ميلت سئوگيسي، وطن محبتي، حورريت عشقي تلقين ائدينيز».
جومهوريت دؤورونده سئييد حسين «ياشيل قلم» ادبي-علمي جمعيت يارادير. بو جمعيت محمد امين رسولزاده، حسين جاويد، سئييد حسين، نجف بي وزيروو، اوزئيير حاجي‌بيوو، عبدالله شايق، احمد جاواد، جفر جاببارلي، سالمان مومتاز، علي يوسيف و ديگر ضياليلاري، صنعتكارلاري اؤزونده بيرلشديريردي. «جمعيتين مقصدي آذربايجان خالقي‌نين فيكرن يوكسلمه‌سينه چاليشماق و آذربايجان ادبياتيندا موشاهيده ائديلمكده اولان يئنيليگي قوووتلنديرمك، اونو توركلويه و ساده‌لشمه‌يه سؤوق ائتمك» ايدي. اونلار موختليف ييغينجاقلار كئچيرير و بو ييغينجاقلاردا قلم صاحيبلري‌نين ياراديجيليغي موزاكيره ائديلير، اثرلرين نثري (مثلن صابيرين «هوپ هوپ نامه»سي‌نين نشري) مسله‌سي موزاكيره ائديلير، ادبياتيميزين تاريخي‌نين اؤيره‌نيلمه‌سي، آراشديريلماسي مسله‌لري ايله ياناشي ادبي-تنقيدين اينكيشافينا دا ديققت گؤستريردي.
يوسيف وزير چمنزمينلي بو دؤور ادبياتشوناسليغينا ديرلي اثرلر وئرميشدير. «آذربايجان ادبياتينا بير نظر» مونوقرافيك تدقيقات اثري 1919 جو ايلده ايستانبولدا نشر ائديلميش اؤز علمي-نظري اهميتي ايله سئچيلير. فيريدون كؤچرلي تيفليسده «آذربايجان تئاتري‌نين ادبياتي» اثريني روس ديلينده نشر ائتديرير.
ف. كؤچرلي ائله بير دؤورده فعاليته باشلاميشدير كي، او دؤورده روسييادا ايجتيماعي-سياسي ضيديتلر كسكينلَشير. آذربايجاندا ميللي شوعور گئتديكجه قوووتله‌‌‌‌نيردي. آذربايجاندا دراماتورگييا، نثر، نظم، رئاليزم اوسلوبو ايله اينكيشاف ائدير، ادبيات ايدئياجا زنگينلَشير، قزئت و ژورناللار ديليميزده نشر ائديلير. آذربايجان ادبياتي تاريخي‌نين سيستئملي شكيلده اؤيره‌نيلمه‌يه مئيل آرتيردي. فيريدون كؤچرلي سيلسيله مقاله‌لريني، «آذربايجان توركلري‌نين ادبياتي» اثريني، «آذربايجان ادبياتي» اثرلريني يازير. اونون ان بؤيوك خيدمتي «چوخ عصرليك آذربايجان ادبياتي ايرثيني توپلاييب، علمي پرينسيپ و آرديجيلليقلا اؤيره نرك اؤز تدقيقاتي‌نين نتيجه‌لريني «آذربايجان ادبياتي» اثرينده خالقين ايستيفاده‌سينه وئرمه‌سي»دير.
يوسيف وزير چمنزمينلي اثرلرينده نسيمي، عباس‌قولو آغا باكيخانوو، ميرزه فتحعلي آخوندوو، قاسيم بي ذاكير، ميرزه علي اكبر صابير و باشقا شاعيرلر، صنعتكارلار حاقيندا، اونلارين ياراديجيليغي حاقيندا نظري فيكيرلريني سؤيله‌‌‌ميشدير، ميرزه فتحعلي آخوندوو ايرثينه خوصوصيله يوكسك قييمت وئريلميشدير: «ميللييت حيسي بيرينجي دفعه اولاراق بو اديبده اويانميشدير و اينتيباهين دليلي اولان كريتيسيزم ده ميرزه فتحعلي‌نين اثرلريله باشلايير».
يوسيف وزير چمنزمينلي «ميللي-مدني ايشلريميز» سيلسيله مقاله‌لرينده كيتاب نشري‌نين واجيبليگيني قئيد ائدير. او يازير: «هانكي يولدا قناعت اولونسا، نشريات اوچون قناعت اولماسين. چونكي بوگونكو باسيلان كيتابلار كسيلن پوللاردان قييمتليدير. بير چوخ پوللار وار كي، صرف اولونور و عملي نتيجه‌لر وئرمير. نشرياتا خرجله‌ننلر ميلت اوچون بؤيوك سرمايه ووجوده گتيرر. بوتون گله‌جگيميز مدني بينالاريميز، ترققي محصوللاريميز بو سرمايه اوزرينه بينالاناجاقدير».
فيرودين كؤچرلي‌نين آذربايجان ادبياتي تاريخي ايله باغلي تدقيقاتلاريني يوكسك ديرلنديرير: «ادبياتيميزي مونتظم بير شكله سالماق و عومومن تانيتماق اهميتلي، هم ده چوخ اهميتلي مسله‌لردندير. بو يولدا ييگيرمي ايلدن بري چاليشماسيله و ادبياتيميزي نيظاما سالماسيله مشهور فيريدون بي كؤچرليدير. فيريدون بي ان موقتَدير، ان سئويملي اديبلريميزدن بيريدير. بو شخص ادبيات تاريخيميزي يازماق ايله بوتون كئچميشيميزي ديريلتدي...».
تدقيقاتچيلاريميز جومهوريت دؤورونون آراشديريجيلاريندان عاديلخان زييادخانين «آذربايجان حاقيندا تاريخي، ادبي و سياسي معلومات» (1919) اثري‌نين «ميللي ادبيات تاريخي‌نين اؤيره‌نيلمه‌سي باخيميندان» ديرلي بيليرلر. آ. زييادخان چمنزمينليدن فرقلي اولاراق آذربايجانلي مؤليفلرين، عرب و فارس ديللرينده يازيب-يارادان اديبلرين ايرثيني ميللي ادبياتيميزين آيريلماز تركيب حيصه‌سي كيمي تدقيقاتا جلب ائتديگيني بيلديريرلر: «تدقيقاتدا آيري-آيري كلاسسيكلرين ياراديجيليغي‌نين باغلي اولدوقلاري ادبي-كولتورولوژي و ايجتيماعي-سياسي موحيط كونتئكستينده تحليله جلب اولونماسي بوتؤولوكده ميللي ادبياتين رئگيونال چالارلاري‌نين اوزه چيخاريلماسينا ايمكان وئرميشدير».
عليمردان بي توپچوباشوو، جئيهون بي حاجي‌بيلي و ب. آذربايجان ادبياتيني، مدنيتيني تبليغ ائتمك مقصديله بير سيرا مقاله‌لر، كيتابلار آوروپادا چاپ ائتديرميشلر. بو دؤورده عبداله شايق، جفر جاببارلي، عباس صحت ياراديجيليغي ايله باغلي موختليف مقاله‌لر يازيلميش، بو مقاله‌لرده «ادبي-ائستئتيك فيكرين ميللي مفكوره‌يه اوستونلوك» وئرديگي، «بديعي اثرلري بو يؤنده ديرلنديرمك مئيلي» ديقتي چكير.
كؤچورن: آيدا بيات
