+0 به یه ن
وطني سئوه-سئوه....
قلبيندن قلمينه‌جن اؤيه-اؤيه ياشاييب-ياراتدي مدينه گولگون
بو وطنين وطنداشي اولماسي‌يلا فخر ائله‌دي، قلمداشي اولاركن ايسه بئله دئدي:
ايسته‌رم قلبيمين آغريلارينا
سنگر توزلاريندان بير ملهم قويام.
اوفوق گئيينديكجه قيزيل بير دونا،
دينجه‌لم، كاميمجا نغمه اوخويام.
بو يازيدا مرحوم شاعيريميزله ايلك تانيشليغا ائله اونون اؤز ديلي، اؤز قلمي ايله باشلاديق. بير-ايكي جومله‌دن سونرا يئنه شاعيرين اؤز ياراديجيليغيندان نومونه ايله اوزله‌شه‌جكسيز. اؤزو ده يوخاريداكي بنددن نئچه ايللر سونرا گلدييي قناته باغلي ميصراعلارلا. و اگر همين سؤزلرين ورازسينه وارسانيز، اوراداكي خيطابلاري اؤز اوريينيزدن قوپموش كيمي ده حئساب ائده بيلرسيز:
نئيلرم او عؤمرو من
نه قيشي، نه يازي وار!
دويغونون نه دريني،
نه ده كي، دايازي وار!
نئيلرم او عؤمرو من،
نه بير شيرين سوكوتو،
نه ده سئل آخيشي وار.
نه چيلغين بير سئوينجي،
نه ده گؤز ياغيشي وار.
سونونجو ميصراع گؤزومه گؤزه‌گؤرونمز بير " وارليق " گؤستردي، قولاغيما - ائشيديلمز بير صدا ائتدي:
روح...
بو، يالنيز ائله او دونيا ايله بو دونيا آراسيندا ابدي علاقه‌مي؟ اؤزو ده ابدي، اؤلمه‌ين. هامي اوچون بئله‌دير، شاعيرلرچون ايسه... فوضولي بونا " كؤنلوم قوشو " دئييب، " روحوم، سعادتيم سنه پابسته هر زامان " و س. مدينه گولگون ايسه بئله دئييب:
بو ائله-اوبايا قارانقوش كيمي -
هميشه باهاردا گله‌جه‌يم من...
بلي، مدينه گولگون داها چوخ، باهاردا خاطيرلانان شاعيرلردندير. او، آهيل ياشلاريندا دا داها چوخ باهاردان، يازدان يازيب. ياشيدلاري، موعاصيرلري اونو داها چوخ ياز آيلاريندا گؤررديلر. ان چوخ دا سرگي سالونلاريندا، موزئيلرده، صنعتكارلارين يوبيلئي تؤرنلرينده گؤرونردي - اوبرازلارييلا " بير دام آلتدا يايلاييب-قيشلايان " بو شاعير خانيم. اؤزو قيشدا دوغولوب دونياسيني قيشدا دييشسه ده، ائله بيل تيكه‌سي باهاردان وئريلميشدي. يقين، بير آز شاعيرانه تحقيقاتلا باخساق، اؤتن ايللرين باهارلاريندا دا اونون روحونو يان-يؤرميزده - سرگي سالونلاريندا، موزئيلرده، يوبيلئي تؤرنلرينده گؤرموش اولارديق. قلم دونياسي ايسه...
دئييرم، بو گؤزل شاعيرين يازي-پوزو قلميندن اؤنجه، بير آز طالئع قلميندن دانيشاق.
باكيدا دوغولوب باكيدا دفن اولونسا دا، اولوموندا 17 يانوار 1926، اؤلومونده 17 فئورال 1991 يازيلميش بو شاعيرين «جوغرافي پاسپورت»ونا چوخ شهر و قصبه‌لرين آدي دوشوب. سووئتلرين «گؤزونون ايشيغي» صينفينده - فهله عاييله‌سينده دوغولسا دا، اؤز ايچ ايشيغي ايله ضييالانيب. هله پئداقوژي اينستيتوتدان اوول، زامان «موعلليم»ين هيات آوديتوريياسيندا پوخته‌له‌شيب، ضيياليلاشيب. دونيوي «سبب-نتيجه» فلسفه‌سينه «سيغيشمايان» همين سووئت سفسفه‌سي‌نين هانسي پاراقرافيناسا اساسن، 1938-جي ايلده بو عاييله جنوبي آذربايجانا - اردبيله، سونرا ايسه اورادان تبريزه كؤچوب. يئني‌يئتمه مدينه تبريزده توخوجولوق كارخاناسيندا ايلك امك فعاليييتينه باشلاييب. گنج ياشيندان جنوبي آذربايجان دئموكراتيك حركاتينا قوشولوب. بير قدر سونرا تبريز درام تئاتريندا چاليشيب. «آزربايجان» قزئتينين خوصوصي موخبيري اولوب. 1945-1946-جي ايللر جنوبي آذربايجان ميللي آزادليق حركاتي‌نين فعال ايشتيراكچيسي اولوب و سونرالار موباريز، وطنپرور شعئيرلريله بوتون عؤمرو اوزونو بو اينقيلابين جارچيسي كيمي چيخيش ائديب، معنوي كؤنول " سند " اينه " بو يورد - او يورد - بو وطن او وطن " يازيلاري دا يازيليب.
پارچالانميش بو تاي وطندن او تاي وطنه عاييله‌سيله كؤچوب، - گؤزو، چوخ صؤهبت-سؤزو ايسه بورادا قاليب مدينه گولگونون. كؤچ زاماني نه ياشي واردي هله - وور-توت، اون ايكيجه.
و بير گئجه خياليندان باكي كئچير، - اؤزو ده نئجه كئچير! كؤنلو «قيز قالاسي»نا كؤچور. اوريي‌نين نيسگيل باغلاري داغلانير، قولاقلاريندا «...خزرين قوجاغينداكي - ائي عزيز، مئهريبان، مئهريبان باكي!» كيمي نغملر صدالانير. بايير شهرين آغوشونداكي اينجي – ايچري‌شهر حصرتي قوبارلانير قاني‌نين قايناملاريندا. بو يئني يورددا، يئني‌يئتمه ياشيندا «بير اؤلمز سئودا دولانير باشيندا». دوننه‌سدك بو دونيايا اوشاق-اوشاق، كوسكون-كوسكون باخان بو قيز او گئجه‌دن گولگونله‌شيب، ميصراع-ميصراع دوشونمه‌يه باشلايير. گئجه‌ياري ياتاغيندان دده قورقود ديل-اوسلوبويجا دورو دورور، پنجره‌دن مهستي‌نين روباعي‌يلا - دورو باخير. گؤي اوزونده گؤردويونه بو آنا قدركي آنلاغي‌نين طلبيله داها آي يوخ، اوستاد وورغون طبعي ايله - «گؤيلرين شامي» سؤيله‌يير. دوشدوكلري بو كاسيب داخمانين تايباتاي آچيلي پنجره‌سيني - تيليشكلي، كله‌كؤتور تبريز آيناسيني باكيداكي سيغال-اوواللي آينالارينا داداش سايير، باغچاداكي مئينه‌لري مردكان باغلارينداكي‌نين عيني بيلير. و سن دئمه بو دويغولاردان، سونرالار يازاجاغي بير حسرت شعئيرينه تداروك ائديرميش:
بيز كي اؤزگه دئييليك -
بؤلونك بؤلوك-بؤلوك.
بير اوباييق، بير ائليك -
باكيدان تبريزه‌جن.
ووصال اولسا، نه درديم،
قوشلارلا بحث ائدرديم،
من پييادا گئدرديم -
باكيدان تبريزه‌جن...
مدينه گولگون ياراديجيليغي ايله تانيش اولدوقجا، وطنپرورليگين بيزه تانيش هر ائلئمئنتيني گؤره، هر نوتونو ائشيده بيلريك.
بو قوس-قوجا مملكتين آغ‌بيرچك آنا-شاعيري ايدي مدينه گولگون - ميللي شادليقلاريميزا ادبي ساغليقلار، غم-كدرلريميزه بديعي آغيلار دئيردي. 20 يانوار آجيسي اونون ميصراعلاريندا داها عرشه قالخير، داها اوزاقلارا ياييليردي.
1950-جي ايلدن باشلاييب، عؤمرونون سونونا قدر 20-دن چوخ كيتاب باغلادي مدينه گولگون. وطنه خيدمت و سئوگي موجاهيدي اولان بو ظريف خانيم اوچ دفعه وطنين فخري فرماني، «شرف نيشاني»، «امك وئتئراني» و ديگر اوردئن-مئداللارلا تلطيف ائديلدي. كيتابلارينين بيريندن وئرديييميز آشاغيداكي ايكي بند بو وطنه‌بند شاعيرين بوتون كيتابلاري هاقدا كوممئنتاتورلوق دا ائده بيلر، ظننيمجه:
منه سؤيله‌مه‌يين؛ آز آليشيب-يان،
اينانين، داشي دا آغلادار هيجران.
داغلارين آهيدير - او چن، او دومان،
داغلارين درديني دومانلار بيلر.
مدينه گولگون قريب-قوربتليك ياشايان چوخ شاعيردن فرقلي اولاراق، اؤز ترجومئيي-حاليني دا آنجاق شعئيرلريله تصوير- تقديم ائتميشدير. اؤزو ده چوخ ييغجام، چوخ پوئتيك شكيلده. آشاغيداكي سككيز ميصراع سكسن صحيفه‌ليك نثري يازيدان داها گئنيش، داها ائموسيونال معلومات ساچميرمي:
منيم، ائي دوست، او ساحيلده نئچه نغمه، سؤزوم قالدي،
باهار فصلي آلوولاندي، باغيم، باغچام، دوزوم قالدي.
امك چكديم، سحر-آخشام، چيچكلي، گوللو باغ سالديم.
او باغدا گؤزلري ياشلي، بنؤوشه‌م، نرگيزيم قالدي.
وطن دردي يامان درددير، اسير يارپاق كيمي قلبيم،
هاراي ائللر، ياد ائللرده سئوينجلي تبريزيم قالدي.
دئيين كي، گولگونه گلسين، آليشديم، يانديم حسرتدن،
فقط محو اولماديم، ائي دوست، كول آلتيندا كؤزوم قالدي.
دئييرلر، شاعيرلرين يازماديقلاري يازديقلاريندان قات-قات چوخدور. يالانديرسا دا، چوخ گؤزل، ايستعدادلي يالاندير. و تاسسوف كي، بئله خوش يالانلار آز دئييليب - بوتون عؤمرو بويو دونياميز حاقدا بس قدر يازان، دئين شاعيرلر بارده...
آلتميش بئش ايل ياشاميش بو شاعير نئچه-نئچه ادبي-بديي منظره‌لر ياراتدي، مودريك، فلسفي قناتلره گلدي كي، بو يازيني اونلاردان بيري - اصلينده، ان بشري دَير داشيياني ايله بيتيريرم:
سن دونياني دولان، گز،
بو دونيايا اينان، گز،
بير توخوم دا جوجرمز،
محبت اولماياندا...
طاهير احمدعاليلار
كوچورن: آيدا بيات
