بؤيوك اديبين اثرلري بو گون ده گئندئر مسله لري نين تدقيقي باخيميندان قييمتلي منبعدير 

     اون دوققوزونجو عصرين اوللرينه قدر تحصيلده يالنيز شرق قايدالاري ايله ايداره اولونان آذربايجان جمعيتي اولدوقجا موحافيظاكار ايدي. تاريخه نظر سالديقدا ايلك معاريفچي دئموكراتلاريميزين فعاليتي نين چتين يوللاردان كئچديگيني گؤروروك. جهالت، مؤوهومات و نادانليق شراييطينده معاريفچيليگي اينكيشاف ائتديرمك آسان دئييلدي. لاكين بو اينكيشاف پروسئسي نين اؤزو جمعيتي فورمالاشديردي. بو باخيمدان اون دوققوز عصرين ايكينجي ياريسيندا آذربايجاندا قادينلارين وضعيتي، جمعيتده يئري، اونلارا موناسيبت و س. مؤوضولاري تدقيق ائتمكده دؤورون اديب و موتفككيرلري نين اثرلري موهوم منبع رولونو اوينايير.  

         آكادئميك فيريدون كؤچرلي «م.ف.آخوندووون دونياگؤروشو» كيتابيندا قئيد ائدير كي، اون دوققوز عصرين اديبلري خالقين، خوصوصيله ده قادينلارين معاريفلنمه سي يولوندا موباريزه آپارماقلا ياناشي، قادين حوقوقلارينا دا گئنيش يئر آييريرديلار. معاريفچيليك آذربايجاندا محض بو دؤورده تشككول تاپميش و ييرمينجي عصرين اوللرينه بوتؤو بير ايدئيا، ايجتيماعي جريان كيمي داخيل اولموشدور. بونونلا بئله، معاريفچيليك ايجتيماعي شوعوردا موعين ايزلر بوراخسا دا، موحافيظاكارليغين منفي استئرئوتيپلرينه تام قاليب گله بيلمه ميشدي. محض بو سببدن ييرمينجي عصره قدر آذربايجاندا دونيوي تحصيل سيستئمي اوزره قيزلار اوچون مكتبلر يوخ ايدي. باكيدا ايلك موسلمان قيزلار مكتبي 1901-جي ايلده بؤيوك مئسئنات حاجي زئينالعابدين تاغييئو طرفيندن آچيلميشدي. 

    «قادين صورتلري نين ياراديلماسي ادبياتدا بؤيوك بير اينقيلاب ايدي»

       اون دوققوزنجو عصرده معاريفچيليك آذربايجان گئرچكليگي نين قارشييا قويدوغو وظيفه لرين حللينه كؤمك ائده بيله جك مدني-ايدئولوژي حركات كيمي ديقتي خوصوصي جلب ائدير. دوغرودور، آذربايجان اؤزونون مدني-معنوي حياتي ايله آوروپا مدنيتي نايليتلريني قاوراماغا حاضير ايدي. لاكين ميرزه كاظيم بي دوزگون دئميشدير كي، \ " غرب اؤز سيياستي ايله هئچ زامان آسيادا معاريفي ديرچلده بيلمز. اؤلكه ني يئنيدن قورانلار اونون اؤز ايچيندن يئتيشمه ليدير\ " .  

     همين دؤورده اؤلكه ني يئنيدن قوران ضياليلار سيراسيندا ميرزه شفيع واعظ، ميرزه كاظيم بي، حسن بي زردابي داخيل اولماقلا، ميرزه فتعلي آخوندزاده نين آديني خوصوصي وورغولاماق گركدير. بئله كي، آذربايجاندا معاريفچيليگين و دئموكراتيك ايجتيماعي فيكرين فورمالاشماسي دا بؤيوك اؤلچوده محض اونون آدي ايله باغليدير. ميرزه فتعلي نين ايستر فلسفي اثرلرينده، ايسترسه ده پيئسلرينده قادينلارين دورومونا، اونلارين حيات طرزينه چوخ گئنيش آسپئكتدن ياناشيلير و آذربايجان قاديني نين يوكسك دوشونجه طرزي، دونياگؤروشو تصوير اولونوردو. جليل محمدقولوزاده نين سؤزلري ايله دئسك، «ميرزه فتعلي شرق قادينيني صحنه يه چيخاريب، اورادا دانيشديريب، گولدوروب، آغلاديب و اورادا بيرينجي دفعه  كيشيلر ايچينده ايظهاري-ووجود ائديب».

     عبدالرحيم بي حاقوئردييئو ايسه همين فيكري باشقا شكيلده ايفاده ائده رك يازيب: «او زامان قادين صورتلري نين ياراديلماسي ادبياتدا بؤيوك بير اينقيلاب ايدي. آخوندووون پيئسلرينده قادينلار كيشيلردن داها عاغيللي، داها گؤزو آچيق و دوشونجه لي دير. ايلك دفعه  م.ف.آخوندوو دئييب كي، قادينين جمعيتده هم معنوي حوقوقو اولماليدير، هم ده كيشيلرله برابر حوقوقو اولماليدير. آخوندوو او دؤورده مؤوجود دؤولت قورولوشلاريندان كونستيتوسييالي پارلامئنته اوستونلوك وئرير و بئله حساب ائديردي كي، پارلامئنتين بيرينجي اساسي حوقوق برابرليگيدير، يعني كيشيلرله ياناشي قادينلارا برابر حوقوق وئريلمه ليدير».

          قادين آزادليغي جمعيتده آزادليغين طبيعي اؤلچوسودور 

      آذربايجان فيلوسوفو قادينين جمعيتده يئري، رولو مسله سينه دؤنه-دؤنه توخونور، ايجتيماعي حياتين بوتون ساحه لرينده قادينلارا كيشيلرله برابر حوقوق وئريلمه سي فيكريني قطعيتله مودافيعه  ائديردي. اثرلري نين تحليليندن گؤروندويو كيمي، او، قادين آزادليغيني بوتون جمعيتده آزادليغين طبيعي اؤلچوسو ساييب. اديب يازير:  " شريعتين نه حاقي وار كي، قادين طايفاسيني حيجاب آيه  سي واسيطه سيله دايم حبسه آتيب عؤمرو بويونجا بدبخت ائدير و ياشاماق نعمتيندن محروم ائدير " .  

     بئله ليكله، م.ف.آخوندزاده ياشاديغي دؤورده ساوادسيز موللالارين شريعت قايدالاريندان اؤز منافعلرينه اويغئن ايستيفاده ائديب قيزلاري و قادينلاري جهالته محكوم ائتمه لريني تنقيد ائديردي. او، اثرلرينده آذربايجان قاديني نين حوقوقسوزلوغونو تصوير ائده رك، محض بو حوقوقسوزلوقدان اونلارين باشينا گتيريلن آمانسيز بلالاري ايفشا ائديب.  

     ميرزه فتعلي يازيردي كي، قادين طايفاسي آزادليق قايدالاريندا، \ " جمعي حوقوقي بشريتده\ "  كيشي طايفاسي ايله برابر توتولماليدير: \ " اوروپا فيلوسوفلاري قادينلاري بوتون اينسانليق و آزادليق حوقوقلاريندا كيشيلرله شريك ساييرديلار. حتّي بو گون او قيته نين بعضي دؤولتلرينده قادينلاري مملكتي ايداره ايشلرينه داخيل ائديبلر\ " . بونونلا دا همين دؤورده اؤز دونياگؤروشو ايله داها چوخ ايره لي گئتميش معاريفچي اديب آذربايجان قاديني نين دا جمعيتده موهوم مؤوقئع توتماسيني تبليغ ائديردي. جليل محمدقولوزاده بو باره ده يازيردي:«ميرزه فتعلي نين كومئدييالاري نين قادين تيپلري عصرين معيشتدن گؤتورولموش فوتوقراف شكيللري كيميدير. اثرلرده تصوير ائديلن قادينلار معيشتين قادين صيفتلري نين بير جانلي نومونه سيدير. اورادا قادينلار بير دورو آينادا گؤرسنن كيمي گؤرسه نيرلر. اونون اوچون اورادا بيز موختليف تيپلره، موختليف صيفتلره راست گليريك. بو صورتده كي، بو اثرلر معيشتين آيناسيدير. طبيعيدير كي، بورادا بيز قادينلارين ياخشي صيفتلري ايله پيسيني ده، موثبت صيفتلري ايله منفيسيني ده گؤره بيله جه ييك. و غئيري-جوره ده اولا بيلمز كي، قوچاق و باجاريقلي قادينلار ايچينده («حاجي قارا») قورخاق و باجاريقسيز قادين اولماسين («مورافيعه وكيللري») و هابئله صداقتلي، دوغرو و دوروست قاديندان ساوايي حيله  و ساختاكارليغا مايل قادين تاپيلماسين («مورافيعه وكيللري») و بو جوره اولا بيلمزدي».

            جهالتدن ياخا قورتارماغين يولو تحصيلدن كئچير    

     بير سؤزله، اؤز اثرلرينده قادين صورتلرينه گئنيش يئر آييران بؤيوك موتفككير اونلارين ديلي ايله قادينلارين دوشدويو وضعيتي اونلارين جمعيتده كي  حوقوقسوزلوغو ايله علاقه لنديريردي. عئيني زاماندا او، قادين حوقوقسوزلوغوندان ايستيفاده ائدن كيشيلرين اونلاري \ " آل-وئر\ "  اوبيئكتينه چئويرمه لريني ده پيسله ييردي. مثلا،  " حئكايتي-خيرس-قولدورباسان "  پيئسينده پرزادين ديلي ايله قادين حوقوقسوزلوغونو گؤستره رك، اونلارين ايختيياري نين يا آتا و يا عمي نين الينده اولدوغونو يازيب: «اتا و يا عمي قيزلاري يالنيز اؤز منافعلري نين خئيرينه كيملرسه اره وئرير، قيزلار ايسه ساكيتليكله بونا تابئع اولوردولار». يازيچي-فيلوسوف عئيني زاماندا چوخ آروادليليغي پيسله ييردي. دراماتورق  " سرگوزشتي-وزيري-خاني-لنكران "  اثرينده قادين پئرسوناژلاري نين ديلي ايله چوخ آروادليلليغين نه كيمي فاجيعه لره گتيريب چيخارديغيني گؤستريب.  

     قادينين جمعيتده اويناديغي رولا بؤيوك اؤنم وئرن مؤليف اؤز موشاهيده لري اساسيندا قادينلارين كيشيلردن داها ايراده لي، منن گوجلو اولدوقلاريني وورغولاييردي. مؤليف جمعيتده باش وئرن بوتون بلالارين كؤكونو كيشي ايله قادين آراسيندا برابر حوقوقلارين اولماماسيندا، قادين حوقوقسوزلوغوندا گؤروردو. دوغرودان دا، همين دؤورده كيشيلر قادينلارا يوخاريدان آشاغي باخير، قادينلاري عوام حساب ائدير و اونلارا ائله گليردي كي، قادين يالنيز اوشاق بؤيوتمك، يئمك بيشيرمك، قاب-قاجاق، پالتار يوماق اوچون لازيمدير.  

     قئيد ائدك كي، اون دوققوزنجو عصرين اوللرينده قادينلارين اوزلشديكلري جهالتدن ياخا قورتارماغين يولونون محض تحصيلدن كئچديگيني دئين ميرزه فتعلي نين اثرلري بو گون ده گئندئر مسله لري نين اؤيره نيلمه سي، تدقيقي باخيميندان چوخ قييمتلي منبعدير. اونا گؤره كي، ياشاديغيميز ييرمينجي بير عصرده ده بعضاً قيز و قادينلاريميز محض تحصيل آلماديقلارينا، اؤز حوقوقلاريني بيلمه ديكلرينه گؤره ايستر عاييله ده، ايسترسه ده جمعيتده پروبلئملرله اوزلشيرلر.  

  يازان: مه پاره 

قايناق: مدنيت درگيسي

كؤچورن: آيدا بيات