دونيا ادبياتيندا قادينلار

يازان :كؤنول قاليب قيزي 

  كؤچورن : آيدا بيات 

  دونياني ايداره ائدن كيشيديرسه، كيشيني ده ايداره ائدن قاديندير. بشرين بو اينجه ليگي نين، عئيني زاماندا اوخشاري اولمايان سرتليگي نين ادبياتا گليشي ده ماراقلي اولوب. لاكين، اونلار ادبي عالمده اؤز ايزلريني قويا بيليب. بو گون دونيا ادبياتي نين آخاريني دييشن قادين يازارلارين ياراديجيليق يولونا نظر سالاجاغيق. دونيا ادبياتي نين قادين زيروه سيندن دانيشاندا ايلك جيغيري مهستي گنجوي ياراديجيليغيندان باشلاييريق. آذربايجان ادبياتيندا روباعي ژانري نين بانيسي ساييلان بو شاعيره دن دانيشديقدا هر بير آذربايجانلي فخر ائتمكده حاقليدير.  " مهستي و امير احمد "  اليازماسيندان آنلاشيلير كي، او، ائركن ياشلاريندا تانينماغا باشلايير. آز سونرا شاهي-گنجه نين، يعني سولطان محمدين ساراييندا تشكيل اولونان ضيافتلره، شعئير مجليسلرينه دعوت ائديلير. شاعيره تخمينن 25-26 ياشيندا ايكن امير احمدله تانيش اولور. امير احمد آتاسي گنجه خطيبي نين ايراده سي نين عكسينه مهستي ايله دوستلوق ائدير و اونون ياشاديغي خارابات محلله سينه تئز-تئز قوناق گلير. مهستي عؤمرونون موعين گونلري، آيلاري بلخ، مرو، نيشاپور، هئرات شهرلريله باغلي اولوب، او، بير مودت مروده ياشاييب-ياراديب. لاكين، منبعلرده كي  معلوماتلار و اؤز شئعيرلري نين وئرديگي بيلگيلر اونو دوغما گنجه موحيطي ايله قيريلماز تئللرله قوووشدورور. شاعير گنجليك چاغلاريندا گنجه دن بير نئچه ايلليك آيريلمالي اولوب، ياراديجيليغي نين يئتكينليك چاغيندا يئنيدن دوغما شهره دؤنوب و عؤمرونون سونونادك بورادا ياشاييب. ايللرين گتيرديگي زنگين تجروبه سي، شاعيرليك ايستعدادي اولان مهستي عؤمرونون بوتون ياش مرحله لرينده اؤز شيرين صؤحبتي ايله ايسته نيلن مجليسي بزه يه بيلردي.  

  يازيچي، ادبيات شوناس، ايجتيماعي خاديم، فيلولوگييا علملري دوكتورو، پروفئسسور عزيزه جعفرزاده ادبي فعاليته 16 ياشيندا باشلاييب و  " عزراييل "  آدلي ايلك حئكايه سيني 1937-جي ايلده  " ادبيات "  قزئتينده چاپ ائتديريب. ايلك كيتابي 1948-جي ايلده نشر اولونوب. عزيزه خانيمين نثر اثرلري اساسن تاريخي رومان ژانريندا يازيليب. قادين يازار موعاصير آذربايجان نثر تاريخينده بو ژانري يئنيدن حياتا گتيريب. او، عئيني زاماندا، بير تدقيقاتچي عاليم كيمي آذربايجان علمي قارشيسيندا تقديرلاييق خيدمتلر گؤستريب. اونون كلاسسيك آذربايجان ادبياتي نين، خوصوصيله ده شيفاهي ادبي ايرثيميزين اؤيره نيلمه سي ساحه سينده گرگين علمي آختاريشلاري نين بهره سي اولان اثرلري هميشه علمي ايجتيماعيتين ماراغينا سبب اولوب. عزيزه خانيمين علمي-تدقيقاتلاري اونون ادبي ياراديجيليغينا دا گوجلو تاثير گؤستريب. يازيچي نين اثرلري آذربايجان ديلي نين صافليغي و تميزليگي اوغروندا موباريزه نين باريز نومونه سينه چئوريليب. عزيزه خانيم ادبي و علمي ياراديجيليغي پئداقوژي فعاليتله اوغورلو بير شكيلده علاقه لنديرمگي باجاريردي. علمي تدقيقاتچي كيمي بير سيرا آشيق و شاعيرلرين اثرلريني توپلاييب چاپ ائتديريب كي، بونلارا  " فاطما خانيم كمينه " ،  " كؤنول چيرپينتيلاري " ،  " آذربايجانين آشيق و شاعير قادينلاري "  كيمي توپلولار داخيلدير. اونون بير چوخ توپلاييب چاپ ائتديرديگي اثرلرين اساس حيصه سيني آنا و قادين مؤوضوسو تشكيل ائدير كي، بونلار دا مؤليفه رومانلاريندان آز شؤهرت گتيرمه ييب. عزيزه جعفرزاده نين آذربايجان علمي و ادبياتي قارشيسيندا گؤسترديگي خيدمتلر يوكسك قييمتلنديريليب. او، دؤنه-دؤنه موختليف فخري فرمانلار،  " خالقلار دوستلوغو "  اوردئني و موستقيل آذربايجانين عالي موكافاتي -  " شؤهرت "  اوردئني ايله تلطيف ائديليب. آذربايجان رئسپوبليكاسي پرئزيدئنتي نين فردي تقاودچوسو ايدي. آذرتئلئفيلم بيرليگي اونون حيات و ياراديجيليغي حاقيندا 2 تئلئفيلم چكيب.  

  آذربايجانين گؤركملي شاعيره-قاديني قاراباغين سونونجو حاكيمي مئهديقولو خان جاوانشيرين قيزي، ايبراهي مخليل خانين نوه سي خورشودبانو ناتوان كيچيك ياشلاريندان «قوران» آيه لريني و ديني احكاملاري ازبرله مكله ياناشي، دونيوي علملرله ده تانيش اولوب. اون دوققوز عصرده كوبار عاييله لرين اوشاقلارينا بير قايدا اولاراق دوغما ديلي ايله برابر، عرب و فارس ديلي، اونون صرفي-نحوي تعليم ائديلديگيندن، خان قيزي دا بو ديللري اؤيرنه رك اونلارين واسيطه سيله كلاسسيك شئعيرين قايدا-قانونلاريني منيمسه ييب. او، لازيمي درجه ده بيليك الده ائتديكدن سونرا مونتظم صورتده موطاليعه ايله مشغول اولوب. داهي شرق شاعيرلرين اله دوشن نادير كيتابلاري، قييمتلي اليازمالاري خورشيدبانونو كلاسسيك ادبياتا باغلاييب. ناتوانين ياراديجيليق فعاليتي تكجه شئعيرله بيتمير. او، رسسامليقلا دا مشغول اولوب، نفيس ال ايشلري ياراديب. خان قيزي نين او دؤور قاراباغ ادبي موحيطي نين مركزي ساييلان  " مجليسي-اونس " اون يارانماسيندا دا خيدمتي اولوب.  

  كسكين سوژئتلي ژانرين اوستالاري چوخدير، آما آقاتا كريستي، بو ساده اينگيليس قادين دئتئكتيوين يئگانه كراليچاسي ساييلير. اونون رومانلاريني تانييانلار بريتانييا موزه سي نين قارشيسيندا 1920-جي ايلين توند گؤي رنگلي واقونونو گؤرسه لر تعجوب لنمزلر. بو يازيچي نين ان مشهور رومانلاريندا تصوير ائديلن «ماوي ائكسپرئسس»دن بيريدير. واقونا داخيل اولوب، رومانين قهرمانلاري 12 نفرين ياشاديغي شراييطي گؤرمك اولار. بو، آقاتا كريستي نين اؤلومونون 25 ايلليگينه حاضيرلانان خوصوصي ائكسپوزيسييادير. سرگي يازيچي نين آرخئولوژي فعاليتينه حصر ائديليب. البتته، كريستي نين آرخئولوقلوغو رومانلاري نين اوغورويلا برابر توتولا بيلمز. يقين آرخئولوق و دئتئكتيو پئشه لري آراسيندا علاقه  چوخ بؤيوكدور. عاييله ده آقاتا كريستيني او قدر ده درراكه لي اوشاق سايميرديلار. او، اوتانماق و چاشقينليقدان ككله مكدن باشقا بير شئي بيلميردي. اوخوماغي دا فرقلي دئييلدي. او واختلار قيز اوشاغي نين اوخوماسي نه سه بير آبستراكت آنلاييش ايدي، حتّي قيزلار مكتبه گئتمه يه ده بيلردي. كيچيك خانيملاري اره گئتمه يه حاضيرلاييرديلار. اونلار ناخيش وورما، موسيقي و رقصدن عيبارت «علملري» بيلسيدي بس اولوردو. آما يازييا خوصوصي فيكير وئريليردي، چونكي گله جك كاوالئرين مكتوبلارينا لاييقلي جاواب يازماغي هر بير اينگيليس لئديسي ياخشي باجارمالييدي. ترسليكدن آقاتانين يازيسي دا چوخ پيسييدي. عؤمرونون سونونا كيمي او، آرتيق تانينميش يازيچي اولان واختلاردا بئله جيدي قرامماتيك سهولر بوراخيردي. بير دفعه  دايه موشاهيده ائله دي كي، آقاتا تك قالاندا اؤز-اؤزويله دانيشير. داها دوغروسو اؤزويله يوخ، باشقالاري نين گؤرمه ديگي موصاحيبله. آقاتانين آناسي حساب ائله ييردي كي، قيزلارا 8 ياشيندان تئز اوخوماغي اؤيرنمك اولماز. بير گون دايه اوزونده فاجيعه وي ايفاديله 4 ياشلي قيزين آناسينا خبر وئرير كي، «قورخورام كي، مئم، ميسس آقاتا آرتيق اوخوماغي بيلير». بو آنا اوچون فلاكت ايدي! «آليسا، مؤعجيزه لر اؤلكه سينده» اونون ستول اوستو كيتابي ايدي. آرتور كونان دويلون «ماوي كاربونكول» ائشيتديگي ايلك دئتئكتيو رومان اولدو. محض او واخت بئيني نين هانسيسا بير گوشه سينده اؤزونه سؤز وئردي: «نه واختسا من ده دئتئكتيو رومان يازاجام!».ايلك كيتابين قونورارينا ايسه آقاتا و حيات يولداشي ائو آلا بيلديلر.  

  ويرجينييا وولف يازديغي مودئرن رومانلارييلا دونيا ادبياتي تاريخينه اؤز آديني يازديريب. 20-جي عصرين ان ياخشي رومانلاري ايچينده اونون قلمه آلديغي  " دنيز فنري " ،  " ياكوبون ائوي "  ، " پرده آرخاسي " ،  " اؤزونه عاييد بير اوتاق " ،  " گئجه و گوندوز " ،  " دالغالار "  تيپلي اثرلري مودئرن نثر نومونه لري حساب اولونور. ويرجينييا وولفون قادين يازارلارين مانيفئستينه چئوريلن  " اؤزونه عاييد بير اوتاق "  اثرينده شئكسپيرين باجيسي ايله باغلي بير حيصه  وار. 1941-جي ايلده دئپرئسسييايا دوشن وولف اينتيحار ائدير. اؤلوموندن سونرا اونون 26 دفترليك گونده ليگي تاپيلدي. بو دفترلرده يازيچي نين 27 ايل بويونجا دوشوندوكلري، حياتي نين موختليف آنلاري، يازاجاغي اثرلرين مؤوضولاري گئنيش شكيلده قئيد ائديليب. بو قئيدلرده يازيچي، هم ده بير اينسان اولاراق جمعيت حياتيني، اينسان ياشاميني و بو اوزدن اؤزونون قارشيلاشديقلاريني آچيق شكيلده گؤسترير، تحليل ائدير، نتيجه چيخارير. هله ده دئييرلر كي، حياتيني دييشمك ايسته ين قادين بو گونده ليكلري اوخوماليدير.