ياز سيز ياز

ياز گلير

اويانير  آغاجلار

آناديليجه سسله يير يازي

اؤزله ين قوشلار

كولك

 اسيم اسيم اسمگه بايراق آختارير

كؤوره لير

 آغلايير

نميش نميش  ياغير ياغيشلار

توپراق،

 آذربايجان ايگي وئرير.

ياز گلير..

بايرامينيز قوتلو اولسون

يورتداشيم  قاريشقالار

بايرامينيز قوتلو اولسون

 ديلداشيم  داغلار  داشلار.

ياز گلنده..

بير بايراق اسيم

بير توپراق  قوخو

بير ماهني سس

گتير

ديوار ديوار ديوار ديوار

يالقيزليغيما

ايكي گؤز  كوچه لره  بولودلاميشام.

ياز

بايراق اويخوسو ايله اويانير

 توپراق

ايگيد جوجرير

گول آچير

بابكي آلمالار

ياز گلير آذربايجانا..

ياريمچيق اؤيكو

بيري واردي بيري يوخ

آلما ياريمچيق

ياپراق ياريمچيق

توپراق ياريمچيق

ياريمچيق بايرامي قوتلايير

 اولوس ياريمچيق.

آيدا بيات