آذربايجانين ايلك قادين حربي طياره چيسي

زولئيخا سئييدمممدووا

 او ياش دؤورونده كي  قيزلار سئوير، عاييله قورور، اوشاق دونيايا گتيرير، اونلاري بؤيودورلر، زولئيخا خانيم موحاريبه يه گئتدي. گئري قاييداندا پارتييا ايشينه جلب اولوندو. ايكي-اوچ ايل سونرا ناظير سئچيلدي. ناظير نئجه اوغلانلا گزردي؟ كيم بو قيزا گول باغيشلايا، گؤروشه دعوت ائده بيلردي؟ 

      …ياي ايدي. يئنه شوولاندا باغ ائوينديديلر. مينا خانيم مطبخده ناهارا حاضيرليق گؤروردو. باشي قاريشيق اولسا دا، بير گؤزو حَيَطده ايدي. اوشاقلاري اويناييرديلار. بؤيوك قيزي سيما خانيم، اوغلانلاري كامال، طلعت و خليل… بس زولئيخا خانيم هاني؟ مينا خانيم اليني ايشدن چكيب اؤزونو حَيَطه آتدي. يوخ، اونون دجل قيزي دا بورادايدي. اورگيندن كئچدي:  " نه عجب… " . كيچيك قيزي ايپه-ساپا ياتماز اوشاق ايدي. هر گون بير اويون چيخاريردي. بير ده گؤروردون يوخا چيخدي. مينا خانيم قيزيني يئرده تاپماياندا آغاجين ان اوجا بوداقلاريندا آختاريردي. اونو گوج-بلا ايله آشاغي دوشورور، اوز-گؤزونده، قوللاريندا، آياقلاريندا تزه يارا يئرلريني گؤرنده آه چكيردي: "بيرجه بو قيز بؤيوسه ايدي… " . 

      مينا خانيم قيزينا فرحله باخيب مطبخه قاييتدي. ايش گؤره-گؤره ده اونون باره سينده دوشوندو. زولئيخا خانيم اونون ايكينجي اؤولادييدي. ايلكي سيمايدي. مينا خانيم اوندان اون دؤرد، زولئيخا خانيمدان ايسه اون بئش ياش بؤيوك ايدي. گلين گلنده مينا خانيمين اون بير ياشي وار ايدي. اونو آتا باباسي مير احمد آغانين عميسي اوغلو مير حبيب آغايا اره وئرميشديلر. مير حبيب آغا تحصيللي ايدي. هم ديني ساواد آلميش، هم ده رئالني مكتبده اوخوموشدو. موحاسيبليگي اؤيرنميشدي. حاجي زئينالابدين تاغييئوين ساغ الي ساييليردي. اونون پوللاري نين نئجه خرجلنديگيني قپيگينه دك حسابلايير، هر آيين سونوندا تاغييئوه معلومات وئريردي. مير حبيب آغانين بو قدر اعتيبار قازانماسي تصادوف دئييلدي. او، عؤمرونده حارام تيكه يه ال اوزاتمازدي. 

  سووئت حؤكومتي قورولاندان سونرا مير حبيب آغانين ايشلري موشكوله دوشدو. اوزون مودت ايشسيز قالدي. ايلك واختلار يئني حؤكومت اونون نه تاتارسكي (اينديكي عليمردان بي توپچوباشوو كوچه سي - رئد.) كوچه سينده كي  ايكيمرتبه لي ائويني، نه ده 1915-جي ايلده شوولاندا تيكديرديگي باغ ائويني اليندن آلدي. او دا، عاييله سي ده بو باغي چوخ سئويرديلر. ان چوخ دا اود پارچاسي زولئيخا خانيم… چونكي بورادا گئنيشلييه چيخيردي. آرابير ائولري نين اوستوندن اوچان طياره لري گؤرنده چيچگي چيرتلاييردي. قوللاريني طياره قانادلاري كيمي آچيب حَيَطده دؤوره وورور، سانكي قوش كيمي سوزوردو. 

      دجلليگيندن، عينادكارليغيندان نه قدر ديلخور اولسالار دا، آتا-آناسي اونا گووه نيردي. زولئيخا خانيم اوخودوغو 16 سايلي مكتبده درس علاچيسييدي. واليدئينلري اونون عالي تحصيل آليب نئفت موهنديس اولماسيني ايسته ييرديلر. او دا بونا راضي ايدي. آنجاق گونلرين بيرينده… 

     ايلك دفعه  طياره مئيدانيندا 

      گونشلي بير آپرئل گونو ايدي. فيزيكا موعليملري جومشود افندييئو يئددينجي صينيف شاگيردلريني باكي طياره مئيدانينا ائكسكورسييايا آراريردي. هميشه ماوي گؤيلرده آراديغي طياره لري او گون زولئيخا خانيم ايلك دفعه  ياخيندان گؤردو. اونلارا مفتون اولدو. بو طياره لرين، اصلينده، اؤز دؤورونو باشا وورموش  " ك-5 "  تيپلي كؤهنه مونوپلانلار اولدوغونو سونرالار بيله جك ايلك تصوراتلارينا گولومسه يه جكدي. آنجاق بو دا او گون كئچيرتديگي وورغونلوق حيسسيني آزالدا بيلميه جكدي… 

      او گون ائوه تزه آرزويلا دؤندو.  " طياره چي اولماق ايسته ييرم! " ، - دئدي. آناسي قورخو ايچينده اونا باخا-باخا پيچيلدادي:  " ائله بيرجه بو چاتيشميردي " . قيزي نين ترسليگينه بلد ايدي مينا خانيم. آما بو ايستگيني اونون اوشاقليق تصوراتينا يوزدو. دوشوندو كي، واخت كئچر، ياددان چيخارار. 

      مينا خانيم يانيلديغيني آيلار سونرا آنلادي. طياره چي اولماق سئوداسي قيزي نين باشيندان چيخماميشدي. اؤيود وئردي:  " قيز هارا، طياره سورمك هارا؟ بونو خيالينا دا گتيرمه! " . زولئيخا خانيم داها ديللنمه دي. قيزي نين قلبيندن كئچنلردن خبرسيز اولان مينا خانيم آرخايينلاشدي. 

      زولئيخا خانيم اورتا مكتبي بيتيردي. عزيزبيوو آدينا نئفت-كيميا اينستيتوتونون (اينديكي آذربايجان دؤولت نئفت آكادئميياسي - رئد.) معدن فاكولته سينه داخيل اولدو. طلبه ليك حياتي نين ماراقلي گونلري، درس-ايمتاحان قايغيلاري طياره چيليك آرزوسوندان اؤنه كئچدي… 

      بير طالع دوشموشدو ايزينه. زولئيخا خانيمي بير پاييز گونو يئنيدن طياره مئيدانينا آپاران دا او ايدي. بو دفعه  ائكسكورسييايا طلبه يولداشلاري ايله گئتميشدي. تانيش حيسسلر چوغلادي قلبيني. او گون يولداشلاري كيمي اونو دا  " او-2 "  طياره سينده گؤيلره قالديرديلار. دوغما آبشئرونا، ماوي خزره ايلك دفعه  سمادان باخدي. سحري گون اينستيتوتدا طلبه لر طلبه آئروكلوبو ياراتماق فيكرينه دوشدولر. كلوبا طياره آلماق اوچون پول توپلاماغا باشلاديلار. اونلارا كؤمك ائدنلر ده تاپيلدي. طياره آليندي. بيرجه  "او-2 "  طياره سي نئچه طلبه نين سئوينجينه دؤندو. طلبه آئروكلوبو آز واختدا بوتون اؤلكه ده مشهور اولدو. 1934-جو ايلين باهاريندا باكي آوياسييا كلوبونا زابرات قصبه سي نين ياخينليغيندا مئيدانچا وئريلدي. اراضيني داشدان، كول-كوسدان تميزله ديلر، طلبه طياره دوشرگه سي ياراتديلار. زولئيخا خانيم دا طلبه دوستلاري كيمي تعليماتچي نين تاپشيريقلارينا سعيله عمل ائديردي. چوخ چكمه دي كي، طياره ني ايلك دفعه  ايداره ائتمگين هيجانيني ياشادي. اوزون يوخلامالاردان، سيناقلاردان سونرا، 1934-جو ايلين اوكتيابريندا اونا طياره ده تكباشينا اوچماغا ايجازه وئريلدي. گونلر سونرا اوچوش قروپونو علا قييمتلرله بيتيريب، طياره چي آديني آلدي. پاراشوتچولر قروپوندا مشغول اولدو. 1935-جي ايلين ماييندا پاراشوتله توللانماغي سيناقدان كئچيرتدي. بير دفعه  پاراشوتدن آتيلاندا كولك اونو آپاريب دنيزه توللادي. يئردن بو منظره ني سئير ائدنلر هيجانلانديلار. كاتئرين گئجيكمه سي فاجيعه يه سبب اولار، سودا ايسلانيب آغيرلاشان گئييمي، پاراشوتو اونو دنيزين ديبينه آپارا بيلردي. آما كاتئر لنگيمه دي. اونو خيلاص ائده رك ساحيله گتيرديلر. تاماشايا ييغيشانلار حئيرتلنديلر. پاراشوتچو چوخ گنج، جيليز، قارايانيز بير قيزييدي. آنجاق بيلمه ديلر كي، بو، طياره چيليك صنعتينده اونون نؤوبتي سيناغيدير.  

      1935- جي ايلده موسكوادا پاراشوتچولرين بيرينجي عوموم ايتتيفاق توپلانيشيندا زاقافقازيياني تمثيل ائدن كوماندانين يئگانه قيز عوضوو اولدو. فخري فرمان و پاراشوت تعليماتچيسي آدي آليب باكييا دؤندو. آئروكلوبدا اونا تعليماتچي كيمي خوصوصي قروپ وئريلدي. ايلك اؤيرنجيلريندن بيري كئچميش موعليمي جومشود افندييئو اولدو. 

      اينستيتوتو بيتيرنده يئددي يوز ساعاتادك اوچوش كئچيرميش، تعليماتچي كيمي اوچ ايل عرضينده 75 طياره چي، 80 پاراشوتچو حاضيرلاميشدي. طياره چيليك صنعتينده داها پئشكار اولماق ايستگي ايله ژوكووسكي آدينا حربي-هاوا آكادئميياسينا مكتوب گؤندردي. تئزليكله اورادان جاواب گؤندرديلر:  " قادينلار شتورمان فاكولته سينه قبول اولونمور " . كدرلندي. آما بئله آسانليقلا روحدان دوشمك اونا ياد ايدي. آتاسي نين مصلحتي ايله ميرجفر باغيرووون قبولونا گئتدي. اوندا بيرينجي كاتيب اونو تانيدي. سوروشدو:  " پاراشوتدن توللاناندا كولك آپاريب دنيزه آتميشدي. سن همين او قيزسان؟ " . 

      حربي-هاوا آكادئميياسينا داخيل اولماسي اوچون بو دفعه  مركزي كوميته نين آديندان گؤندريلن مكتوبا راضيليق گلدي. موسكوايا گئتدي. 1938-جي ايلين ياييندا ايمتاحان وئردي. ژوكووكسي آدينا حربي-هاوا آكادئميياسينا قبول اولونان ايلك شتورمان قيز زولئيخا سئييدمممدووا اولدو. اؤلكه نين ان نوفوذلو قزئتلري آذربايجانلي قيزين هونريندن يازديلار. 

      مكتبين علاچي طلبه لريندن اولدو. درسلره، تعليملره باشي قاريشدي. گونلرين بيرينده فاكولته كومانديري (اونلار دئكانا بئله موراجيعت ائديرديلر) اونو يانينا چاغيردي. خبر آلدي: 

   - سئييدمممدووا، آتان هارادادير؟ 

  - ائوده. 

  - بيز معلومات آلميشيق كي، او، خالق دوشمني كيمي حبس اولونوب. 

  ائله بيل، باشينا قاينار سو تؤكدولر. باكيدا نه باش وئريب؟ فاكولته كومانديري اونا ايكينجي آغير خبري وئردي: 

  - باكييا سورغو گؤندرميشيك. اگر تصديق اولونسا، سن بورادا اوخويا بيلمزسن. بورا جيدي حربي آكادئمييادير. خبرين اولسون. 

      اوتاقدان چيخدي. بعضي مطلبلري يادينا سالدي… آتاسيني كولاك، يا دا ميليونچو تاغييئوين ياخين آدامي كيمي حبس ائده بيلرديلر. اوسته ليك، او، سووئت حؤكومتيني سئوميردي. دئييردي:  " من لا-ايلاهه-ايللاللاه دئميشم. موسلمانام. كوممونيستين بيلئتينده ايسه يازيليب: كوممونيست آللاهسيزدير. من كوممونيست پارتيياسينا داخيل اولا بيلمرم " . اونو دا دئييردي كي، بو آللاهسيز حؤكومت چوخ دوروش گتيرميه جك، هاي-هايلا گليب، واي-وايلا گئده جك. اونون دئديكلري  " يوخاريلارا "  چاتديريليردي… مير حبيب آغا حبس اولوندو، شوولانداكي ائوي موصاديره ائديلدي. بو معلوماتي كيمسه درحال موسكوايا چاتديردي. زولئيخا خانيمين حربي-هاوا آكادئميياسيندان قووولماسي، گؤره سن، كيمه لازيم اولموشدو؟ 

      نه ائده جگيني فيكيرلشه-فيكيرلشه كوچه لري دولاشيردي. بيردن ائله بيل ياتميشدي، آييلدي:  " باكيدان جاواب وئرمه ليديرلر كي، بو معلومات دوغرو دئييل! " . شهر باش پوچت ايداره سينه گئتدي. اوستو اؤرتولو تئلئقرام ووردو:  " آذربايجان كوممونيست پارتيياسي نين بيرينجي كاتيبي يولداش باغيرووا! خالق دوشمنلري منيم آتامين صاف آديني لكه لمك ايسته ييرلر. تحصيل آلديغيم حربي-هاوا آكادئميياسينا يانليش معلوماتلار وئريبلر. من رئسپوبليكانين گؤندريشي ايله بورادا اوخويورام. طلبه لر آراسيندا يئگانه قيزام. باكيدان معلومات آلاندان سونرا، منيم بورادا اوخويوب-اوخوماماق مسله مه باخاجاقلار. خواهيش ائديرم، حاقي، عدالتي قورويون كي، يانليش معلومات گلمه سين " . 

  ...باكيدا تئلئقرامي اوخويان باغيرووون باخيشلاري سونونجو جومله ده ايليشيب-قالميشدي:  " خواهيش ائديرم، حاقي، عدالتي قورويون " . كؤمكچيسيندن سوروشدو: 

  - بو موسكوايا اوخوماغا گؤندرديگيميز قيزدير؟ نه اولوب؟ 

  - آتاسي... 

  - آتاسي هاردادير؟ 

  - باييل حبسخاناسيندا. 

  - نئيله ييب؟ 

  - سووئت حؤكومتي باره ده آرتيق-اسكيك دانيشيب، كولاكدي، تاغييئوين موحاسيبي اولوب… 

  - بو قيز اوخوماغا مركزي كوميته نين مكتوبو ايله گئديب. بو مسله رئسپوبليكانين آدينا خلل گتيرر. دئيرلر، خالق دوشمني نين قيزيني موسكوايا اوخوماغا گؤندرميشيك. او سئييدمممدووون حبسي باره ده معلوماتلاري بوتون دفترلردن سيلين. يازين، بو بير نئچه آيي مأذونيتده، يا اعزاميتده اولوب. اؤزونون ده ديليندن ايلتيزام آلين، هئچ يئرده بو حاقدا دانيشماسين.  

      باغيرووون تاپشيريغي يئرينه يئتيريلدي. مير حبيب آغاني كامئرادان چيخارديب كابينئته گتيرديلر. برك-برك تاپشيرديلار:  " بورادا اولدوغونو بير يئرده دانيشسان، اؤزوندن كوس " . هئچ نه آنلامايان مير حبيب آغاني ائوينه يوللاديلار. موسكوايا معلومات گؤندريلدي:  " يالاندير، مير حبيب سئييدمممدوو ائوينده دير. هر شئي قايداسيندادير " . 

      زولئيخا خانيم تحصيليني داوام ائتديردي. مكتبي بيتيرمه لرينه بئش آي قالاندا ندنسه رهبرليك واختي تئزلشديردي. اونلار بير آيا تحصيللريني باشا ووردولار. زولئيخا خانيم ديپلومونو يئنيجه آلميشدي كي، قارداشي كامال باكيدان گلدي. واغزالا گئديب اونو قارشيلادي. يول بويو باكيدان دانيشديلار. آناسي فهله مكتبي نين آردينجا طيب اينستيتوتوندا اوخويوب حكيم اولموشدو. آتاسي پيونئرلر ائوينده موحاسيب ايشله ييردي. زولئيخا خانيم آلديغي خبرلردن سئوينيردي. بيردن ديقتيني كوچه ده توپلاشان آداملار جلب ائتدي. راديودان ياييلان خبري دينله ييرديلر. موحاريبه  باشلاميشدي... 

      او، حربي-هاوا آكادئميياسيندا اوخوياندا نه زامانسا دؤيوشچو اولاجاغيني دوشونمه ميشدي. آنجاق موحاريبه  گئديرديسه، ترددوده يئر يوخ ايدي. دؤيوشلرده ايشتيراك ائتمه لييدي. آكادئمييادا تعليم طياره پولكوندا قيريجي طياره نين شتورماني تعيين اولوندو. پولك موسكوانين مودافيعه سينه گؤندريلدي. 

  بير گون آكادئمييانين موداويملريندن بيري زولئيخا خانيما خبر وئردي:  " سووئت ايتتيفاقي قهرماني راسكووا سيزي چاغير " . وئستيبوله قاچدي. حربي گئييملي راسكووا اونا طرف گليردي. قزئتلرده شكيللريني گؤردويو قهرمانلا كؤهنه دوستلار كيمي گؤروشدولر. راسكووا دئدي:  " منه تاپشيريق وئريبلر كي، اوچ قادين طياره پولكو تشكيل ائديم. بومباردمانچي، قيريجي و يقين كي، گئجه اوچوشلاري اوچون  "پو - 2 "  پولكو " . راسكووا قاباقجا تجروبه لي طياره چيلردن مؤحكم اؤزك ياراتماق فيكرينديدي، بير يئرده ايشله مك اوچون زولئيخا خانيمين راضيليغيني ايسته ييردي. درحال راضيلاشدي. قادين حربي طياره پولكلاريني ياراتماق! بو، موحاريبه  تاريخينده گؤرونمه ميش ايش ايدي. اونلار تصوورلري آلت-اوست ائده جكديلر. ثوبوت ائده جكديلر كي، هاوادا دؤيوشمك يالنيز كيشيلرين ايشي دئييل. تئزليكله كومسومول گؤندريشي ايله كومسومولچو، موسكوانين زاوودلاريندان گنج فهله، اونيوئرسيتئت، آوياسييا و پئداقوژي اينستيتوتلاردان طلبه قيزلار گلمه يه باشلاديلار. زولئيخا خانيمين تركيبينده اولدوغو اوچوش، تئخنيكي و سياسي هئيتلردن عيبارت قروپ ايستي گئييملرله تامين اولوندو. اونلاري قاتارلا شرق طرفه يولا سالديلار. وولقا چايي نين سول ساحيلينده يئرلشن ائنگئلس شهرينده واقوندان ائنديلر. اونلاري قالماق اوچون يئرله، شينئل، اوزون بوغاز چكمه ايله تامين ائتديلر. راسكووانين گؤستريشي ايله دؤيوشچو قيزلارين ساچلاري اوغلان ساياغي ووردورولدو. اصل دؤيوشچو گؤركمي آلديلار. قيريجي، سورعتلي گوندوز بومباردمانچيلاري و يونگول گئجه بومباردمانچيلاردان عيبارت اوچ پولك ياراديلدي. قيريجي پولكون كومانديري تامارا كازارينووا، اونون موعاويني و پولكون شتورماني زولئيخا سئييدمممدووا اولدو. قارلي-چووغونلو گونلرده تعليم اوچوشلارينا باشلاديلار. هاوانين سويوغوندان اونلاري اَيينلرينده كي  ايستي گئييملر ده قورويا بيلميردي. آنجاق قيزلار ديانت گؤسترير، آغلاييب-سيزلاميرديلار. 1942-جي ايلين قيشي، يازي گئجه-گوندوز جيدي حربي تعليملر كئچدي. قيزلار دؤيوشه حاضيرلاشيرديلار… 

  نهايت، حربي خيدمته باشلاماق زاماني گلدي. ساراتووو دوشمن آوياسيياسي نين هوجوموندان قورومالي ايديلر. عئيني زاماندا، حربي و سانيتار قاتارلاري نين كئشيگيني چكير، جبهه  خطينده و اؤلكه داخيلينده خوصوصي اهميتلي طياره لري موشاييعت ائديرديلر. دوشمن قيريجي طياره لري گوندوزلر كشفياتا چيخير، گئجه لر دؤيوشوردو. آلايين قيزلاري دوشمنين هوجوملاريني دفع ائديرديلر. دؤيوشلر بير-بيريني عوض ائديردي… 

  بير دفعه  دؤرد قيريجي طياره خوصوصي اهميتلي طياره ني قارشيلاييب استالينينقرادادك موشاييعت ائتمه لييديلر. قفلتن آلمان طياره سي نين ياخينلاشديغيني گؤردولر. شتورمان كيمي زولئيخا خانيمين خوصوصي طياره دن آيريلماغا ايختيياري يوخ ايدي. قيريجي طياره لردن ايكيسيني گؤندردي. تهلوكه نين قارشيسي آليندي. دوشمن طياره سي اوزاقلاشديريلدي. سونرالار بيلديلر كي، طياره ده كي  آلمانلار طرفيندن داغيديلميش استالينينقراد شهرينه باخماغا گئدن باش كاتيب استالين و ديگر يوكسك روتبه لي شخصلر ايميشلر. آلمان طياره سي نين هوجومو ايسه تصادوفي دئييلدي. اگر آلمانلار طياره ده استالينين اولدوغونو بيلسيديلر، هوجومو اينتئنسيولشديررديلر. 

      زوليئخا خانيمين تركيبينده اولدوغو قادين قيريجي طياره پولكونون وولقا ساحيللريندن باشلايان دؤيوش يولو اوكراينايادك اوزاندي. او، بئش يوزدن آرتيق دؤيوشده ايشتيراك ائتدي. جبهه  يوللاريندا چوخ دهشتلر گؤردو. ياخين دوستلاريندان، رفيقه لريندن نئچه سي گؤزلري نين اؤنونده هلاك اولدو. 

      موحاريبه دن آذربايجانا قهرمان آوياسييا كاپيتاني كيمي دؤندو. قارداشلاري دا اوندان سونرا دؤيوشه گئتميشديلر. يارالانسالار دا، سالامات قاييتميشديلار. موحاريبه  وئتئراني كيمي ائوله تامين اولوندولار. ايكيمرتبه لي آتا مولكونو دؤولته تحويل وئرديلر. آتا-آناسي قيزلاري زولئيخا خانيمين ائوينه داشينديلار. آنجاق هله ده شوولانداكي ائوي نين خيففتيني چكيردي مير حبيب آغا. 

  ...زولئيخا خانيم آذربايجان سسر-اين تمينات ناظيري اولاندا اونا دؤولت باغلاري نين سيياهيسيني تقديم ائتديلر. اونو آتاسينا وئردي. مير حبيب آغا سيياهيني گؤزدن كئچيره-كئچيره موصاديره اولونان باغ ائولري نين كيملره مخصوص اولدوغونو سادالادي. سونرا اونو قيزينا قايتاردي:  " منيم ائويم بورادا يوخدور. خالقين ائوي منه لازيم دئييل " . بير مودت سونرا ايكينجي سيياهي وئريلدي. اوراداكي عونوانلاردان بيري زولئيخا خانيما تانيش گلدي. آتاسينا گؤستردي:  " دئيه سن، بو بيزيم باغدير، گئت باخ " . مير حبيب آغا گئتدي… قاپيسيندان ايچري گيرنده اَييليب تورپاغي اؤپدو. آغلادي. سانكي زولئيخا خانيم آتاسينا يئنيدن بير دونيا باغيشلاميشدي. 

      گوجلو، قورخماز اينسان… 

      ...مركزي كوميته نين نؤوبتي بوروسوندا اونلارين پارتييادا قاليب-قالمامالاري موزاكيره يه چيخاريلدي. كيمسه آنونيم مكتوب يازميشدي: سئييدمممدوولارلا ميرقاسيموولار پارتيياني آلداديبلار، قوهوملاري نين خاريجده ياشاديغيني گيزله ديبلر، اصلينده... 

  اصلينده، مسله بئله ايدي: مينا خانيملا مير اسدوللا ميرقاسيمووون قارداشي عابيدين تاغييئوين ماليييه يارديمييلا خاريجه اوخوماغا گئدن طلبه لردن ايدي. اينقيلابدان سونرا پول گؤندريلمه ديگيندن اونلار چتينليكلرله اوزلشميشديلر. عابيدين گئري دؤنمه ميش، پاريسده وفات ائتميشدي. سئييدمممدوولارلا ميرقاسيموولارين يوكسك وظيفه لرده ايشله مه سيني گؤزو گؤتورمه ينلر بو مسله ني قابارداراق اونلاري لكه لمك ايسته ييرديلر. 

      موزاكيره لردن عصبي لشن زولئيخا خانيم آياغا قالخدي. بيرينجي كاتيب ايمام موصطافايئوه دئدي:  " بيرينجيسي، داييم پاريسده ياشامير، وفات ائديب. ايكينجيسي، عوموميتله، بو مسله ني بورادا موزاكيره ائتمگينيز منيم خوشوم گلمير. سيز نه يي موزاكيره ائديرسينيز؟ 1941-جي ايلده من عريضه يازميشديم كي، ايسته ييرم، دؤيوشه پارتيياچي كيمي گئديم. كوممونيست پارتيياسينا او زامان داخيل اولدوم. ايندي سيز منيم پارتييادا اولوب-اولماماغيمي فيكيرلشيرسينيز؟ پارتييا بيلئتيني منه سيز وئرميسينيز كي آلاسينيز؟ من سيزين مركزي كوميته نين بوروسوندا هئچ ايشتيراك ائتمك ايسته ميرم " . سالوندان چيخدي. كابينئتينه گيرندن اون دقيقه  سونرا موسكوادان اونا زنگ گلدي. باش وئرنلر باره ده آرتيق موسكوايا زنگ ووروب معلومات وئرميشديلر. زولئيخا خانيم قهرمان ايدي. ائله بونا گؤره ده اونو موحاكيمه ائتمه ديلر. 

      سونونجو اوچوش 

  ...طياره يه قالخدي. باشقا سرنيشينلر كيمي يئريني تاپيب اَيلشدي. ستواردئسسانين سسي ائشيديلدي.  " كمرلرينيزي باغلايين "  عوضينه دئدي:  "زولئيخا سئييدمممدووا پيلوتون كابينه سينه دعوت اولونور " . تعجوبلندي. كابينه يه كئچيب پيلوت يئرينده نورو علييئوي گؤرنده مسله ني آنلادي. آئروپورتون رهبري نورو علييئو، آوياسييانين قانونلارينا گؤره، ايلده بير نئچه اوچوش كئچيرمه لييدي. كؤهنه تانيشلار گؤروشدولر. نورو اوندان سوروشدو: 

   - زولئيخا، سن  " تو "  طياره سي سورموسن؟ 

  - يوخ. 

  - اوتور. 

  - نورو، بير دقيقه  دايان. ايييرمي ايل كئچيب… بو كؤهنه طياره دئييل آخي. 

  - يوخ، ايداره ائتمه ني وئريرم سنه. 

  - هله بير دقيقه  دايان، باشا سال، بونلار ندير؟ 

      نورو علييئو ايداره ائتمه ني ايشه ساليب زولئيخا خانيما وئردي. تر باسدي اونو. نئچه ايلدن سونرا سئويملي طياره ايله يئنيدن گؤروشوردو.  " تو "  گؤيلرده سوزوردو. سرنيشينلر پيلوت كابينه سينده باش وئرنلردن خبرسيز يول گئديرديلر. ائنيشه آز قالاندا زولئيخا خانيم يئريني نورو علييئوه وئردي:  " اؤزون ائندير " ، - دئدي.  

      قهرمان و حيات 

      آزدانيشان آدام ايدي. موحاريبه دن دانيشماغي ايسه هئچ سئوميردي. خسيس دئييلدي. آنجاق ايصرافچيليغي خوشلاميردي. دئييردي:  " گئجه-گوندوز دؤيوشه گيرمك اينسانين پسيخيكاسينا تاثير گؤسترير. اونا گؤره هر اوچوشدان سونرا بيزه 150-200 قرام سپيرت وئريرديلر كي، ايچك، بير آز ساكيتله شك. قادين خئيلاغي، هم ده سئييد. من سپيرت ايچه جكديم؟ اونلاري ييغيرديم. كيشي آوياسيياسينا دئييرديم سپيرتي صابونلا دييشك. جبهه دن بير چامادان صابونلا قاييتديم " . 

      موحاريبه ، دئييرلر، ان جسور كيشيلري ده دييشير، سرتلشيرلر. زولئيخا خانيمدان موحاريبه  نه يي آلميشدي؟ حيرصلنسيدي، قارشيسيندا دايانماق اولمازدي. آنجاق او سرت گؤركملي اينسانين سينه سينده اينجه بير اورك دؤيونوردو... 

      او، حربي آكادئميياني سئچنده آناسي آغلاييردي. دئييردي:  " قيزلار اره گئدير، ائو-ائشيك يييه سي اولورلار. سنين نه ايشين وار گؤيلرده؟ " . اونا جاواب وئريردي:  "من بو ايدمان نؤوونو سئويرم " . اوندا آتاسي نين مؤوقئعيي آخيرينجي نؤقطه ني قويدو:  " بد گتيرمه. ايسته يير، من قيزيما ايجازه وئريرم " . او ياش دؤورونده كي  قيزلار سئوير، عاييله قورور، اوشاق دونيايا گتيرير، اونلاري بؤيودورلر، زولئيخا خانيم موحاريبه يه گئتدي. گئري قاييداندا پارتييا ايشينه جلب اولوندو. ايكي-اوچ ايل سونرا ناظير سئچيلدي. ناظير نئجه اوغلانلا گزردي؟ كيم بو قيزا گول باغيشلايا، گؤروشه دعوت ائده بيلردي؟ اونا گؤره شخصي حياتي آلينمادي. اؤزو سئوميردي بو باره ده دانيشماغي. ژورناليستلر سوال وئرنده گولور،  " بو مؤوضولارا توخونمايين، لازيم دئييل"، -دئييردي. او، گئج عاييله قورموشدو. اوشاقلاري اولماميشدي. بو دا طالع ايدي. اوشاق دونيايا گتيرمك سعادتيني اوندان اسيرگه ين قدر آناليق خوشبختليگيني اليندن آلماميشدي. قارداشي كامالين حيات يولداشي وفات ائديب، كؤرپه قيزي گولاره آناسيز قالاندا اونو حيمايه سينه گؤتوردو. 1959-جو ايلده زولئيخا خانيمين كيچيك قارداشي خليل اوتوز دوققوز ياشيندا دونياسيني دييشدي. اوندان ايكي ايل قاباق دا سيما خانيم جاوان ياشيندا وفات ائتميشدي. خليلين ايكي اؤولادي ييرمي دوققوزياشلي حيات يولداشي نين اوميدينه قالميشدي. زولئيخا خانيم بو دفعه  ده  " خليلين ياديگاريدير " ، - دئييب، قارداشي نين آلتي آيليق اوغلونا آناليق ائتمك قرارينا گلدي. اوشاغي ائوه گتيرنده گولاره ني گلين كؤچورتموشدو. سونرا اونون ايلكيني - جميلي ده  " نوه مدير " ، دئييب ائوينه گتيردي. قارداشي اوغلو ايله بيرليكده بؤيوتدو، اوخوتدو، ائولنديردي. 

      او، ييرمي ايل ناظير ايشله دي. ناظير اولاندا گؤزلري توتولماغا باشلادي. ايشدن آزاد اولونماق باره ده عريضه سينه بيرينجي كاتيب حئيدر علييئو اول قول چكمه دي. ايكينجي دفعه  اونا دئدي كي، گؤرمورم، خبريم اولماز، ائله سنه ده قول چكرم… حئيدر علييئو اوندا دئميشدي كي، زولئيخا خانيم، ائوده اوتورماقدان هئچ نه چيخماز، سيز بيزه لازيمسينيز. اونو دوستلوق جمعيتينه موعاوين تعيين ائتديلر. حئيدر علييئو مودريكليگي سايه سينده زولئيخا خانيم ائوه قاپانماقدان قورتولدو. گؤزلري آرتيق هئچ گؤرموردو. آنجاق ايشه هوسله گئديردي. جمعيته لازيم اولدوغونو دوشونمك اونو جانلانديريردي. بوتون پروبلئملره دؤزوردو. عؤمرونده شيكايت ائتمزدي. يئنه ائتميردي… 

      زولئيخا خانيمين اوغلو 

      بو دانيشديقلاريم منيم آنام زولئيخا خانيم حاقيندايدي... گولاره نين ده، منيم ده تكجه سندلرده آناميز اولماييب او. هر جفاميزا دؤزوب. اعتيبارلي آدام ايدي. سيرلريني چكينمه دن اونا دئيه بيلردين. دوز يول گؤسترردي. جيدي، سليقه لييدي. منه دئييردي، آرخيويمي قورو، بير گون سنه موراجيعت اولوناجاق. بير ده منه وصيت ائتدي:  " من اؤله جگم. كوميسسييا تشكيل ائده جكلر. دئيه جكلر كي، مني فخري خياباندا باسديرسينلار. قويمازسان. مني شوولاندا آتا-آنامين يانيندا دفن ائدرسينيز " . مير مؤوسوم آغا و بيزيم باشقا قوهوملاريميز اورادا دفن اولونوبلار. 1999-جو ايلده آنام دونياسيني دييشدي. وصيتينه عمل ائتديم… 

      نه دئميشديسه، هاميسي يئريني تاپير. آرخيوي ايله ماراقلانيرلار، خاطيره سيني عزيز توتورلار. آذربايجان دؤولت آوياسييا آكادئميياسي بؤيوك ايشلر گؤرور. بو ياخينلاردا زولئيخا سئييدمممدووانين 90 ايلليگيني طنطنه  ايله قئيد ائتديلر.  

      ...ساغليغيندا آنامين اوردئنلري و باشقا اشيالاري تاريخ موزه ينده دايم نوماييش اولونان ائكسپوناتلارين آراسيندا ايدي. 9 ماي غلبه گونونده موعليملريميز بيزي موزه يه آپاريرديلار. من حاقيندا فخرله دانيشيلان او قهرمانين اوغلو ايديم. بو گون ده مندن سوروشسالار،  " قهرمانلار حياتدا نئجه اولورلار؟ " . دئيرم، قهرمانلار موحاريبه  زاماني قهرمانليقلار ائديرلر. آنجاق موحاريبه دن سونرا دا دييشميرلر. اونلار ائله بو حياتدا دا قهرمانديرلار.  

 يازان :آيدين سئييدمممدوو

 كؤچورن : آيدا بيات