ايلك آذربايجانلي قادين آكتريسالاريندان ( اويونچو)

مرضييه خانيم داوودووا (1901- 1962) 

اؤتن عصرين 20-جي ايللرينه كيمي آذربايجان صحنه سينده قادين روللاريني مين جور مانعه و تحقيره معروض قالان، صنعت يانغيلي كيشي آكتيورلار ايفا ائديبلر.

آذربايجان تئاتري نين آكتريسالارلا باغلي يئني صحيفه سي نين يازيلماسي شرفي محض مرضييه داوودووانين قيسمتينه دوشدو. او، آذربايجان صحنه سي نين ان قودرتلي آكتريساسي ساييليردي. 1901-جي ايلده هشترخاندا آنادان اولموش مرضييه داوودووا ايلك رولونو اويناياندا 16 ياشي واردي. صحنه يه بؤيوك هوسلي يئني يئتمه مرضييه ني ايلك دفعه گؤروب ايستعداديني كشف ائدن اونودولماز حوسئين عربلينسكي اولموش و اونو باكييا دعوت ائتميشدي.

1920-جي ايلده باكييا گلن و طالعييني ابدي اولاراق تئاترا باغلايان مرضييه داوودووا آذربايجان مدنيتي نين، خوصوصيله ده تئاتر صنعتي نين اينكيشافيندا ميثل سيز خيدمت گؤسترميشدير. اؤتن عصرين 20-جي ايللريندن سونرا آذربايجان صحنه سينده فاطما موختارووا، شؤوكت محمدووا، حقيقت ريضايئوا، ثورييا قاجار، مونوور كلنترلي كيمي موقتدير آكتريسالار چيخيش ائديرديلر. اونلارين سيراسينا هوسله قوشولان مرضييه خانيم اوزئيير حاجيبيووون " آرشين مال آلان " موسيقيلي كومئديياسيندا اولجه گولچؤهره، سونرا ايسه جاهان خالا روللاريندا چيخيش ائديب. مرضييه داوودووا آذربايجان كينوسونون اينكيشافيندا دا موعين خيدمتلر گؤسترميش، " حاجي قارا " ، " بير عاييله " ، " باكي نين ايشيقلاري " ، " بير محلله دن ايكي نفر " ، " كوروغلو " و ديگر فيلملره چكيلميشدير. 1956-جي ايلدن عؤمرونون سونونا كيمي آذربايجان تئاتر جمعيتينه رهبرليك ائتميشدير.

كؤچورن: آيدا بيات