�آذربايجانين ايلک قادين ژورناليست لريندن

شفيقه خانيم افنديزاده (1882-1959)

�

شفيقه خانيم افنديزاده 1882-جي ايلده گورجوستانين آستخوري کندينده - دؤورونون گؤرکملي پئداقوقو و ضياليسي عاييله سينده دونيايا گؤز آچميش، ايلک تحصيليني آتاسيندان آلميشدير. علمه، بيليکلره يييه لنمه يه ماراغي، فرقلي دونياگؤروشو ايله سئچيلن يئني يئتمه قيز 14 ياشيندا شکيده آتاسي نين چاليشديغي مکتبين نزدينده قيزلار اوچون آچيلميش خوصوصي قروپدا درس دئمه يه باشلاميشدير.

آذربايجاندا قادين ساوادسيزليغينا قارشي چيخان بير چوخ ضياليلار کيمي شفيقه خانيمين آرزوسونو بؤيوک مئسئنات حاجي زئينالعابدين تاغييئو گئرچکلشديردي. بؤيوک خئيريييه چي اؤز جسارتي، عينادلي طلبي، ميللت سئورليگي و بؤيوک نوفوذو، همچنین شخصي ماليييه سي حسابينا باکيدا ايلک قادين مکتبيني آچدي. بئله ليکله ده موسلمان شرقينده قادينلارين يوکسک تحصيل آلماسي نين، ائلجه ده اؤز حوقوقلاري اوغروندا موباريزه يه باشلاماسي نين تمليني قويدو.

1901-جي ايلده تيفليسده زاقافقازييا روحاني ايداره سينده ايمتاحان وئره رک موعليمليک آتتئستاتي آلميش ش.افنديزاده حاجي زئينالعابدين تاغييئوين تشببوثو ايله باکي شهرينده يئنيجه ياراديلميش روس-موسلمان قادين مکتبينه دعوت اولونموش، بورادا 1910-جو ايله دک پئداقوق کيمي چاليشاراق آذربايجان ديلي و ادبياتيني تدريس ائتميشدير.

آذربايجانين ايلک قادين ژورناليستلريندن اولان ش. افنديزاده نين پوبليسيست کيمي " شرقي-روس " قزئتينده، " دبيستان " ، " مکتب " ژورناليندا، " آچيق سؤز " قزئتينده مقاله لري درج اولونماغا باشلاميش، او، 1919-1920-جي ايللرده آذربايجان خالق جومهوريتي نين رسمي دؤولت اورقاني اولان " آذربايجان " قزئتينده بير سيرا ماراقلي و آکتوال مقاله لرله چيخيش ائتميشدير.

كؤچورن :� آيدا بيات