+0 به یه ن
آذربايجان قادين آشيق لاري : آشيق بستي
كلبجرين لئو (لؤك) كندينده دونيايا گؤز آچميش آشيق بستي آذربايجان اوزان-آشيق صنعتي نين قودرتلي قادين نوماينده لريندن بيريدير. مشهور آغدابانلي قوربانين موعاصيري و صنعت يولداشي اولان، چوخ آغريلي بير طالع و ياراديجيليق يولو كئچن آشيق بستي ادبياتيميزا زمانه سينه بويون اَيمه ين موباريز بير قادين، اوستاد آشيق و اينجه روحلو بير شاعيره كيمي ده داخيل اولوب.
هله گنج ياشلاريندان سئوديگي چوبان اوغلانين ظايم بير بي طرفيندن گؤزلري قارشيسيندا وحشيجه سينه دوغراناراق قتله يئتيريلمه سي بستي نين سينه سينه ساغالماز يارا ووراراق اونون حياتيني و دونياباخيشيني كسكين شكيلده دييشيب. دره بي ليك جمعيتينده قارشيلاشديغي دهشتلي فاجيعه دن سارسيلميش و الي هئچ يئره چاتمايان بينوا بستي شئعيرلرينده خان چوبان آدلانديرديغي ناكام سئوگيليسي نين اينتيقاميني اونو قتله يئتيرن دوشمنلريندن يالنيز حياتي نين آخيريناجان بو زومره ني كسكين ايفشا ائديب لعنتله ين شئعيرلري ايله آليب. او، بوتون شئعيرلرينده گوناهسيز، معصوم اينسانلارين قانيني تؤكن، دؤورونون هارين بي لريني ظاليم، " حاللي-هاوالي " ، وارينا-دؤولتينه گوونن، ياخشي اينسانلارين باشيني كسمه يه حاضير، قودورغان خيصلتلي اينسانلار كيمي لعنتله ييب:
آ بَي، نه گزيرسن حاللي-هاوالي،
سولئيمان مولكونون يييه سي كيمي؟
نه دندير ياخشي نين باشين كسمه يه
حاضيرسان خنجرين تييه سي كيمي؟!
ياشاديغي فاجيعه نين آغيرليغينا تابلاشمايان بستي بو حاديثه دن سونرا دوغما يوردوندا قالا بيلميه رك الينه ساز آليب آشيقليغا باشلايير، كؤچوب باشقا يئرلره گئدير. بير مودت داش كسن بؤلگه سي نين قاباق تپه كندينه كؤچور، سونرا گؤيچه نين ساري ياقوب، گده بگين ميسكينلي كندلرينده و ساموخدا ياشايير. هارادا ياشاماسيندان آسيلي اولماياراق، يازديغي بوتون شئعيرلرينده چكديگي اوزوجو محروميتلري، زمانه نين دؤزولمزليگيني، اؤلكه ده كي دره بي ليگي، حاقين، عدالتين يوخلوغونو يانيقلي بير ديلله بيان ائدير:
بو قيناغا واللاه، منم دؤزورم،
اوسانميشام، اؤلمه يه ده حاضيرام.
درديمي دئمه يه ديوان گزيرم،
يئرده آختاريرام، گؤيده تاپيلماز.
دردلي آشيغين بو بير بندليك قلب چيرپينتيسيندا ياشاديغي دؤورون ايجتيماعي-سياسي منظره سي، اينسانلارين عادي حوقوقلاردان بئله محروم اولمالاري، حاكيمييت سيزليگين، اؤزباشيناليغين ياراتديغي ظولم، اسارت بوتون چيلپاقليغي ايله عكس اولونوب. سونرالار تانينميش ائل آشيغي كيمي مشهورلاشاندا دا بستي حاكيم طبقه يه قارشي عوصيانكار شئعيرلر يازاراق عؤمرونون سونوناجان اونلارلا باريشماييب.
اوزون ايللر يازييا آلينمايان، يالنيز خالقين يادداشيندا ياشايان آشيق بستي ياراديجيليغيني ايلك دفعه آراشديريب كيتاب شكلينده اورتايا قويان تانينميش فولكلورشوناس-عاليم، پروفئسسور سدنيك پاشا پيرسولطانلي اولوب. اونون رئداكتورلوغو ايله 1969-جو ايلده اولو صنعتكارين شئعيرلري توپلانميش " لاله " آدلي ايلك شئعيرلر كيتابي ايشيق اوزو گؤروب. سدنيك پاشا پيرسولطانلي بو ايستيقامتده كي آراشديرمالاريني داوام ائتديره رك، 2001-جي ايلده آشيغين " بنؤوشه لر " آدلي ايكينجي كيتابيني نشره وئريب. تدقيقاتچي-عاليم هم ده آشيق بستي ياراديجيليغيني دريندن آراشديراراق، اونون آذربايجان اوزان-آشيق صنعتينده كي يئري، اثرلري نين مزيتي، پوئزيياسي نين ديلي، شئعيرلري نين بديعي-ائستئتيك ديري باره ده چوخ سايلي مقاله لر قلمه آليب. سدنيك پاشا پيرسولطانلي آشيق بستييه مخصوص " بستي و خان چوبان " داستانيني دا برپا ائديب نشره حاضيرلاسا دا، هله كي، بو اثر كيتاب شكلينده چاپ اولونماييب.
آشيق بستي ياراديجيليغي زامان-زامان داها نئچه-نئچه تدقيقاتچي نين ديقتيني چكيب. ادبياتيميزدا ايلك قادين-آشيق صنعتكارلاردان بيري، ائلجه ده يئتكين پوئتيك ياراديجيليغا ماليك شخص اولدوغوندان بير سيرا يازيچي و شاعيرلر ده آشيق بستي نين اؤزو و ياراديجيليغي حاقيندا ديرلي فيكيرلر سؤيله ييب، اونون حاقيندا دولغون مقاله لر يازيبلار. بو سيرادان آشيق بستي نين ياراديجيليغي حاقيندا تانينميش عاليملردن م.ه.تهماسيب، پ.افندييئو، شاميل قوربانوو، شاعير و يازيچيلاردان نيگار رفعيبيلي، عزيزه جعفرزاده، ائلچين، محمد آسلان و باشقالاري نين فيكيرلري داها ماراقليدير.
جمعيتين باسقيلاري اوزوندن اينسانين ياشاديغي شخصي اووقاتي نين بديعي تصويري كلبجرلي آشيقلارين ياراديجيليغيندا هميشه آپاريجي خط اولوب. بو جهت آشيق بستي ياراديجيليغيندا دا گئنيش شكيلده اؤزونو گؤسترير. ياشاديغي فاجيعه لي و آغريلي طالع آشيغين شئعيرلرينده جانلي، يانيقلي بير ديلله تصوير اولونور:
فلك، سنله چوخ ائيلرم ساواشي،
آهيمدان دوماندي داغلارين باشي.
اوزومو يانديرير گؤزومون ياشي،
آغلاماق بستيني كور ائيلر، ائيلر.
اونو دا خاطيرلاداق كي، آشيق بستي نين الينه ساز گؤتوروب آشيقليق ائتمه سي نين اؤزو او دؤور اوچون چوخ بؤيوك بير اينقيلاب ايدي. فئودال-پاتريارخال عادت-عنعنه لري نين، ديني خورافاتين حؤكم سوردويو بير جمعيتده بوتون قاداغالارا قارشي چيخاراق قادينين آشيقليق ائتمه سي، هم ده حاكيم طبقه ني كسكين تنقيد آتشينه توتماسي او زامان اينساندان چوخ بؤيوك جسارت و ايراده طلب ائديردي. لاكين بو مرد قادين نه دؤورون آمانسيز قاداغالارينا بويون اَيميش، نه دوشمنلري نين هده لريندن قورخموش، نه ده آرتيق-اسكيك سؤز-صؤحبتلردن چكينميشدير.
طالعييمين سولطاني من، خاني من،
دوروست باخ، بستييم، ياخشي تاني، من.
باشينا چئويررم بو دونياني من،
دونياني دوز گزديم، يوللاردان سوروش.
خالقيميزين قديم بير دئييمي وار. دئيير، " آشيغي ائل ساخلار " . گؤرونور خالقين دا بستييه اولان بؤيوك سئوگيسي و دستگي دوشمنلريني قورخوتموش، اونا قارشي پيسليكلر ائتمكدن چكينديرميشدير.
ادبياتشوناسلارين آذربايجان اوزان-آشيق صنعتي نين ان بؤيوك قادين نوماينده لريندن بيري حساب ائتديكلري آشيق بستي نين ديلي اولدوقجا زنگين، شيرين و آنلاشيقلي، پوئتيك جهتدن ليريك و اويناقدير. اونون شئعيرلرينده سؤزلر سانكي مورووون، دلي داغين دورنا گؤزلو بولاقلاري كيمي آخير، خان ترتر كيمي جوشوب، چاغلايير. " بنؤوشه لر " شئعيرينده آشيق بستي سؤزون گوجو ايله اينسانين گؤزلري اؤنونده اسرارانگيز، تكرارسيز بير طبيعت لؤوحه سي يارادير، پاك و معصوم بير وارليق جانلانديرير:
او يار گزن اويلاقلاردا،
بير ده آچدي بنؤوشه لر.
سپلندي داغا- داشا،
يالدان آشدي بنؤوشه لر.
يارالي بولبوللر كيمي،
كولا دوشدو بنؤوشه لر.
يارب، او توتقو چاييني،
نئجه كئچدي بنؤوشه لر؟
بنؤوشه يه ادبياتيميزدا بؤيوك كلاسسيكلر چوخسايلي شئعيرلر حصر ائديبلر. بو ايلك باهار موجده چيسي اكثر شاعيرلرين ايلهام پريسي اولوب. لاكين بستي نين بنؤوشه سي باشقالارينا بنزمير، ديگرلريني تكرار ائتمير، اونون بنؤوشه سي اؤزونه مخصوصدور، معصومدور، تزه تردير. بستي نين بنؤوشه سي هم ده سانكي جانلي بير وارليق، آنا طبيعتين بير پارچاسيدير. گؤرونن ده بودور كي، آشيق بستي نين قلمه آلديغي بو شئعير ساده خالقين اؤز ديلينده، ائله اوستاليقلا ايشله نيب كي، ائله بيل ماهير بير زرگر اينجه ليكله قيزيل ساپا ميرواري دوزوب. اونو دا نظره آلساق كي، آشيق بستي نين ياشاديغي ايللرده آذربايجان ادبي ديلي هئچ ده اؤلكه نين بوتون ايالتلرينده هله بير او قدر ده ايشلنميردي، اوندا اونون نه درجه ده گؤزل صنعتكار اولدوغو بير داها آيدين شكيلده اؤزونو گؤسترر. بديعي مجازلاردان، پوئتيك تصوير واسيطه لريندن مهارتله ايستيفاده ائدن آشيق بستي نين شئعيرلريني اوخودوقجا آدام اينانا بيلمير كي، او هئچ بير تحصيل گؤرمه ييب، مكتب اوخوماييب، آنجاق ايلهامي نين و فهمي نين گوجو ايله بو سويييه يه يوكسله بيليب:
بستي دئير: گؤزده قالدي مورازيم،
حيانيم يوللاردي، بير ده كي، سازيم.
هله كي، ائللردن گلير آوازيم،
دئييرلر، ياشايير، ساغ، ياواش-ياواش.
آشيق بستي ياشاديغي دؤورده آغدابانلي قوربانين ياراتديغي " قوربان بولاغي " نين دا ايشتيراكچيلاريندان اولموش، مشهور آشيق علسگر و آغدابانلي قوربانلا بيرليكده چوخ مجليسلرده ايشتيراك ائتميشدير. تصادوفي دئييل كي، اوزان-آشيق صنعتيميزين كوريفئيي آشيق علسگر بستيني " نغمكار بولبول " آدلانديريب، اونون صنعتينه يوكسك قييمت وئريب. بلكه ده آشيق علسگرين و آغدابانلي قوربانين بستييه اولان بؤيوك حؤرمتلري، ائلجه ده اونلارين خالق آراسينداكي يوكسك نوفوذلاري دوشمنلريني بو ظريف ووجودلو، جنگاور اوركلي قادينا قارشي ديگر فيتنه لره ال آتماقدان چكينديريب. هر ايكي اوستاد صنعتكار آشيق بستييه بؤيوك حؤرمت بسله ميش و صنعتيني يوكسك قييمتلنديرميشلر. دؤورونون بؤيوك ساز-سؤز اوستاسي آغدابانلي قوربانين اونا عونوانلاديغي شئعيرده آشيق-شاعيره نين جمعيتده كي يئري، مؤوقئعيي رئال بويالارلا تصوير ائديلير:
باغچا بولبولوسن گوللر عشقينه،
نغمه لي سن-شيرين ديللر عشقينه.
صنعتكار اولوبسان ائللر عشقينه،
شؤهرتين ياييليب هر يانا، بستي.
ائله بستي ده دؤورون عدالتسيزليگيندن جانا ييغيلاندا، غم-الم اوستون گلنده درديني سيرداش سايديغي قوربانلا بؤلوشور:
بو يازيق جانيمي گتيردي جانا،
عدالتسيز ديوان، ظاليم زامانا.
آتشه پروانه، اوخا نيشانه،
پيلته يه شام اولدو جانيم، آ قوربان.
آشيق بستي اؤلكه ني دييار-دييار گزيب مجليسلر كئچيرديگيندن خالقين حياتيني، عادت-عنعنه لريني، ديليني گؤزل بيليب. محض بو عاميللر اونون يازديغي شئعيرلرين داها جانلي، داها طبيعي آلينماسيندا بؤيوك رول اويناييب:
آيريليق منه درد اولدو،
زامانا چوخ نامرد اولدو.
ائو- ائشيگيم يئر-يورد اولدو،
بستي، لؤيو گؤرمه ديم هئچ.
بستي يالنيز گرايلي، قوشما ژانرلاريندا شئعيرلر يازماقلا محدودلاشماييب، او، اوزان-آشيق شئعيري نين اكثر فورمالاريندا قييمتلي نومونه لر ياراديب. اولو صنعتكار بديعي مجازلاردان، خوصوصيله طبيعت تصويرلريندن ائله بؤيوك اوستاليقلا ايستيفاده ائديب كي، بونو يالنيز حياتي و طبيعتي دريندن بيلن اينسان باجارا بيلردي:
قايادا- داشدا گزرسن،
چمنده گوله بنزرسن.
گلين كيمي بزه نرسن،
آچيليبدي ياخان، ككليك.
خالقيميزين تاريخن ياشاديغي چئشيدلي آغريلاري، معنوي سيخينتيلاري عكس ائتديرمك باخيميندان باياتي ژانري دا آشيق ادبياتيندا و شيفاهي خالق ياراديجيليغيندا آپاريجي يئرلردن بيريني توتور. خسته قاسيمدان، ساري آشيقدان توتموش ادبياتيميزين بير چوخ نهنگ نوماينده لري بو ژانردا خئيلي قييمتلي بديعي نومونه لر ياراديبلار. آشيق بستي ياراديجيليغيندا دا باياتي ژانري اؤزونه مخصوص مؤوقئعيه ماليكدير. ائل آشيغي ياراتديغي باياتيلاريندا دا ياشاديغي دؤورون معنوي آغريلاريني ديله گتيرير:
بستيني غمي اوزر،
دردي-المي اوزر.
گؤزوم ياشي گؤللنسه،
ايچينده گمي اوزر.
آشيق بستي كؤورك قلبلي بير شخص اولماقلا ياناشي، دوستلوقدا دا اولدوقجا اعتيبارلي بير اينسان ايميش. اوزون ايللر صنعت دوستو اولموش آغدابانلي قوربانين اؤلومونو فاجيعه كيمي قبول ائدن صنعتكار اونون اوزان-آشيق صنعتينده كي يئريني ده دقيق گؤستريب:
آشيقلارين اورگييدي، گؤزويدو،
مجليسلرين صؤحبتييدي، سؤزويدو.
ائله بيل كي، علسگرين اؤزويدو،
آختارما گؤزلريم جاهاني، گئتدي.
آشيق بستي نين اؤزو طرفيندن ياراديلان، اونون ياشاديغي فاجيعه لي سئوگي هئكايتيني عكس ائتديرن " بستي و خان چوبان " داستاني هله اؤز ساغليغيندا سورعتله ديلدن-ديله ياييلاراق مشهورلاشيب، آشيقلار طرفيندن توي شنليكلرينده هوسله سؤيلنه رك خالقين سئوديگي ادبي نومونه يه چئوريليب.
بستي اؤلنه جن ايلك سئوگيسينه صاديق قاليب، دؤنه-دؤنه خان چوبانين دوغولدوغو ائللري، گزديگي يئرلري زيارت ائديب:
بو داغلاردا نئچه لئيلي آغلاميش،
بستي كيمي داغي، داشي داغلاميش.
ياردان بيزه نه نيشانه ساخلاميش،
نه تاپارام تورپاغيندان، ارگونش؟
تأسوف كي، واختيندا يازييا آلينماديغيندان آشيق بستي نين ياراديجيليغي نين آز بير قيسمي بيزلره گليب چاتيب. صنعتكارين دوغولوب-عرصه يه يئتديگي كلبجرين بو گون ائرمني ايشغالي آلتيندا اولماسي، اونون ياراديجيليغينا آز-چوخ بلد اولان ياشلي كلبجرليلرين اكثريتي نين آرتيق دونيالاريني دييشمه لري آشيق بستي نين اثرلري نين توپلانماسي ايشيني بو گون داها دا چتينلشديرير. لاكين بوتون بو ايتكيلره باخماياراق بؤيوك صنعتكارين گونوموزه گليب چاتميش شئعيرلري اونون آذربايجان ادبياتي و اولو اوزان صنعتي وار اولدوقجا ياشاياجاغيندان تام امينيكله خبر وئرير.
كؤچورن : آيدا بيات
