+0 به یه ن
توركيه قادين آشيقي : اوزان شاه تورنا
اوزان شاه تورنا، 1950 ايلينده سيواسين، گورون ايلچه سينه باغلي قاينارجا كؤيونده دونيايا گلدي. اوچ ياشيندا ايكن چيچك خسته ليگيندن گؤزلريني الدن وئردي .كيچيك ياشلاريندان موسيقي يه ايلگي دويدو. اون ياشيندا ساز چالماغا، توركو-دئييش سؤيله مه يه باشلادي. 14 ياشيندا پلاك چيخارتدي. وئرديگي كونسئرت لرده دوزه نه باشقالديرما گركچه لرييله دفعه لرجه توتوقلاندي، حبسه ده ياتدي!.. بؤيوك اونه قاووشدو. گؤز تداويسي اوچون يورد ديشيندايكن وطنداشليقدان چيخارتيلدي؛ آلمانيانين، برلين شهرينه يئرلشدي، سور گون ياشادي. بورادا اوزان شيار جان ايله ائولندي، شافاق و شيرين آدلي ايكي قيز چوجوغو اولدو...
وطنداشليغا آلينماسيندان سونرا گلديگي توركيه ده بير قونوشماسيندان دولايي يئنه توتوقلاندي؛ قامو اويو باسقيسي ايله سربست بوراخيلدي... بو چيله لي ياشامدا يوزلرجه شئعير يازدي، پلاك، كاسئت لر چيخارتدي، راديو و تلويزيون پروگراملارينا چيخدي، كونسئرت لر وئردي. ياپيتلاري اولوسلار آراسي ديللره چئوريلدي. اونيوئرسيته لرده كونفئرانسلار وئردي. چوخ يؤنلو ياپيتلاريني ناخيش-ناخيش ايشله يه رك اؤز-چئوره سيني آشدي. بيرچوخ ايلكه ايمضاسيني آتان بويوك اوستاد، توتارلي و باش اَيمز ياپيتلاري و موجادله لري ايله صنعت و دئموكراسي-اينسانليق اؤنجولريندندير. بيرچوخ اؤدوللرين ياني سيرا، " اولوسلار آراسي دوستلوق-باريش و اؤزگورلوك " اؤدولونو آلان ايلك صنعتچيميز اولان آيدين اوزانيميز، عيني زاماندا بيرچوخ كولتور-صنعت-دموكراتيك قوروملارين قوروجوسو-اويه سيدير. آيريجا، كولتور-صنعت وقفي باشقانليغينيدا سوردورمكده دير…
اوزان شاه تورنانين شئعيرلريندن اؤرنكلر:
يازديق
فرهاد داغيندان سوزولدوك
سئوداميزي سويا يازديق
مرد شيرين يولا دوزولدوك
ريياني اويخويا يازديق
نرده ندن ناسيل نه چون
يانيتينا وارماق اوچون
گئجه لري يارماق اوچون
قارانليغي آيا يازديق
شاه تورنا آشقين زاريندا
منصور اناالحق داريندا
كؤر اوغلونون ديياريندا
كوهئيلاني دايا يازديق
اينساني باشا تاج ياپديم
نه اَييلديم، نه ده ساپديم.
آجيلاردان ايلاج ياپديم.
اينساني؛ باشا تاج ياپديم.
تاجي-تختي ييخديم جانلار!
اؤزومو چكديم دارلارا.
گونشيم وورور قارلارا.
اويويان باخان كورلارا،
آجي آجي باخديم جانلار!
اينسانليق اوچون يورودوم.
بدنيم قورلا بورودوم.
موم اولدوم يانديم، اريديم.
مشعله لر ياخديم جانلار!
شاه تورنا، يار ياراسيندان.
گونش دوغار آراسيندان.
نسيمي نين دريسيندن،
بوينوما ايب تاخديم جانلار!
آتشي ياخار گونشيم
آتشي ياخار گونشيم
اولدوزلاري آووچلاريم
دوغمادان مين ايلليك ياسيم
اينسانليغي آماچلاريم
دولو آخديم،بوشا دولدوم
دنيزلره بوخار اولدوم
گوزه قيشا باهار اولدوم
دوزه چيخار ياماجلاريم
شاه تورنا شاخير داليندا
رنگيم وار گولون آليندا
مظلوم اينسانليق يولوندا
چكيلدي تئل تئل ساچلاريم!
گوللرده بوغدولار مني
بؤيوك اوقيانوس دا اوزدوم
گؤللرده بوغدولار مني
ديكنلي يوللاردا گزديم
گوللرده بوغدولار مني
گئچميش ‘آنيلاري’ آنديم
بعضي يانديم بعضي دوندوم
اوجا داغلارا ديرمانديم
يوللاردا بوغدولار مني
شاه تورنا گوللر قوخلاديم
هر سحر واختي يوْخلاديم
آري ايديم چيچك توپلاديم
باللاردا بوغدولار مني
بير يارالي قوشام!
حسرت قالديم گول قوخونا
امديگيم سوتون آغينا
تاخيلديم ظولمون اوخونا
يئتيش قالديم داردا آنام
من بير يارالي قوش ايديم
حسرت چكنه دوش ايديم
يئرلره دوشدوم اوشودوم
قورتار مني قاردا آنام!
گؤنولده شاهيم آتلاندي
گئجه م گوندوزه قاتلاندي
اومودلاريم قاناتلاندي
قويما مني زاردا آنام
شاه تورنايام ساماح چكر
‘مين اوزولر’، بير آه چكر
هر گجه بير صاباح چكر
يئتيش قالديم داردا آنام!
كؤچور‌ن : آيدا بيات
