حميده خانيم محمدقولوزاده

حميده خانيم جاوانشير-محمدقولوزاده 1873 -جو ايلده شوشا قزاسي نين كهريزلي كندينده زمانه سي نين گؤركملي معاريفچي ضياليسي، تاريخچي احمد بَيين اوجاغيندا دونيايا گلميشدي. نجيب بير اينسانين عاييله سينده دونيايا گؤز آچان حميده خانيمين آذربايجان مدنيتينه و ادبياتينا حصر اولونان بؤيوك عؤمور يولو دا محض  " اوت كؤكو اوسته بيتر "  مثلي ايله تام اوزلاشير. عاييله مكتبينده تحصيل آلان حميده خانيم هله يئني يئتمه ايللرينده روس ديليني سليس قاوراياراق، او دؤورون كند قيزلاري اوچون سجييه وي اولمايان يوكسك اينتئللئكته، گئنيش دونياگؤروشه ماليك اولموشدو. ايلك حيات يولداشي زادگان نسليندن اولان پودپولكوونيك ايبراهيم بي داواتداروو جبهه ده هلاك اولاندان و آتاسيني ايتيرندن سونرا حميده خانيم جاوانشير كهريزلي ده آتا مولكونو ايداره ائتميشدي. 1905-جي ايلده تيفليسده تانيش اولدوغو ميرزه جليل محمدقولوزاده يه ايكي ايل سونرا اره گئدركن بو ايزديواج چوخلارينا خوش گئتمه ميش، نيكاح اونون اصيلزاده نسلينه ياراشديريلماميشدي. لاكين حميده خانيم بوتون مانعه لره جسارتله سينه گره رك، ميرزه جليله وفالي و فداكار عؤمور-گون يولداشي اولماقلا ياناشي، هم ده اوستاد صنعتكارين ان ياخين معاريفچي سيلاحداشي، ضيالي همدمي،  " موللا نصرالددين " اين ايسه خئييرخواه حيمايداري اولموشدو. بوتون واريداتيني، ثروتيني حيات يولداشي نين ياراديجيليغينا بؤيوك اوركله صرف ائدن حميده خانيم جاوانشير-محمدقولوزاده ميرزه جليلله 25 ايل اصل محبت و قارشيليقلي احتيراملا عؤمور سورموشدو. بو ايللرده ميرزه جليل نه قدر كسكين ضربه لره، ايتتيهاملارا توش گلسه، نادانليقلا قارشيلاشسا دا، ان چتين گونلرده حميده خانيم اونا معنوي داياق اولموش، بو بؤيوك اينساني دايم نيكبين اووقاتا كؤكله ميش، اونون بوتون آغير سيناقلاردان متانتله چيخماسينا يارديم گؤسترميشدي. 

  تاريخ حميده خانيم جاوانشير-محمدقولوزاده ني بؤيوك خئيريييه چي و جفاكئش اينسان كيمي يادداشلارا حك ائديب. تك كهريزلي كندي نين دئييل، جومله قاراباغين اونا كؤمك اوچون پناه گتيرن اينسانلاري نين اليندن توتان، قايغيلاريني حلل ائدن بو خانيم هم ده او دؤورون يارديما احتيياجي اولان ضياليلاري نين دا پروبلئملريني حلل ائتميشدير. جيدي خسته ليگي اولان ميرزه علي اكبر  صابير محض حميده خانيمين مصلحتي ايله ميرزه جليل طرفيندن تيفليسه موعاليجه اوچون دعوت آلير. صابير بو حاديثه ني عباس صحته يازديغي مكتوبدا بئله خاطيرلاييردي:  " ميرزه جليل و حميده خانيم جنابلاريندان چوخ راضييام. بيلميرسن منه نه قدر احتيرام ائديرلر! بو نئچه مودتده تمام مخاريجيمي و زحماتيمي موتحميل اولموشلار. منيم مئهمانخانا، يا خستخانادا ياتماغيما راضي اولماديلار، اؤز ائولرينده منزيل وئرميشلر. خولاصه، بيلميرم نه ديل ايله تشككور ائديم " . حميده خانيمين صابيره گؤسترديگي قايغي حاقيندا ايسه آذربايجان ضياليليغي نين باش تاجي اولان اوزئيير بي حاجي بيلي خوصوصي مقاله يازميشدير. مقاله بو سؤزلرله بيتيردي:  " قوي ادبيات تاريخينه يازيلسين كي، صابير كيمي شاعيري ديري ليگينده تقدير ائدن بير كيشي اولماديسا دا، بير نفر آرواد اولدو كي، شاعيرين  اعاده – صحتي اوچون، ميليونچو كيشيلره  رغمن، اؤز واريندان كئچه جك قدر بؤيوك بير حاميت گؤستردي " . بو حاديثه حميده خانيم جاوانشير-محمدقولوزاده نين وطنداش ماهيتيني، خئييرخواه عمللريني عكس ائتديرن يوزلرله فاكتدان يالنيز بيريدير. 

حميده خانيم 1912-جي ايلدن كهريزليده اؤز وسايتي حسابينا مكتب آچير و بورادا درس دئيير. ميرزه جليلين وفاتيندان سونرا دا اؤلكه نين ايجتيماعي-ادبي حياتيندا فعال مؤوقئع توتان حميده خانيم يازيچيلار ايتتيفاقينا عوضو سئچيلميش، عؤمور-گون يولداشي نين اثرلريني ترجومه ائتمكله ياناشي، بو بؤيوك صنعتكارلا باغلي كؤورك خاطيره لريني بؤيوك اوستاليقلا قلمه آلميشدير. 1955-جي ايلده وفات ائدن حميده خانيم جاوانشير-محمدقولوزاده فخري خياباندا ميرزه جليلين مزاري يانيندا دفن اولونموشدور. 

كوچؤرمن :‌ خاتون