ظولمتده پارلايان ايشيق

   ميللي تئاتر صنعتي نين تشككولو و اينكيشافي يولوندا اؤزونه مخصوص خيدمت گؤسترن سكينه آخوندزاده (1865-1927) نه تك آذربايجاندا، هم ده موسلمان شرقينده پيئس، نثر اثرلري يازان ايلك آذربايجانلي قادين يازيچي، گؤركملي معاريف ايشچيسي، آنا ديلينده اورتا مكتب درسليكلري نين مؤليفي اولوب.  

     اونودولماز مطبوعات خاديمي غولام محمدلي نين بو صنعت فدايسي نين ياراديجيليغي حاقيندا چوخ سايلي آراشديرمالاري وار. آذربايجان ادبياتي و اينجه صنعتي نين اينكيشافيندا ايلكينلردن ساييلان سكينه خانيمي غولام محمدلي «صحنه ميزين ايلك قؤنچه سي، ايفتيخاري» آدلانديريردي. بونا دا سبب واردي. اؤتن عصرين اوللرينده آذربايجان صحنه سينده آكتريسا پروبلئمي ايله ياناشي، قادين مؤليفلرين اولماماسي دؤورون ضيديتلي تظاهورونو، خورافاتين گئنيش ياييلديغيني تصديقله ييردي. تئاتر تاريخيميزه پارلاق صحيفه لر يازميش سكينه آخوندزاده بؤيوك اينسان تاغييئوين قيز مكتبينده ديل و ادبياتدان درس دئمكله ياناشي، تئاتر، صحنه و دراماتورگييا ايله ده ماراقلانيردي. اونون ان بؤيوك آرزولاريندان بيري قادينلارين ادبي فعاليتده ايشتيراكيني گؤرمك ايدي. قلبي نورلو فيكيرلرله چيرپينان بو نجيب خانيم هم ده بؤيوك معاريفپرور ايدي. 

     سكينه آخوندزاده قوبا شهرينده ضيالي عاييله سينده آنادان اولموشدو. آتاسي ميرزه هئيبت آخوندزاده «فدا» تخلوصو ايله شئعيرلر يازان شاعير اولوب. ميرزه هئيبت دؤورونون مشهور عاليمي، فيلوسوف و موتفككيري عابباسقولو آغا باكيخانووون ياراتديغي «گولوستان» ادبي مجليسي نين فعال عوضولريندن بيري ايدي. سكينه خانيمين ادبياتا، تئاترا، اينجه صنعته اولان ماراغي دا محض بؤيودويو موحيطدن، آلديغي تربييه دن بهره له نيردي.  

     1900-جو ايلده سكينه خانيم باكييا دعوت آليب. بير مودت حاجي زئينالابدين تاغييئوين ياراتديغي ايلك روس-موسلمان قيز گيمنازيياسيندا ديل و ادبيات فن لريندن درس دئييب. غولام محمدلي يازيردي: «سكينه خانيم موعليم ليگه باشلاديغي زامان باكي صحنه سينده جاهانگير زئينالوو، ابوالفتح ولي، ميرزاغا علييئو، حوسئين عربلينسكي كيمي تئاتر خاديملري نين ايشتيراكي ايله تاماشالار وئريليردي. قادين روللاريني كيشيلر اوينايير، صحنه قادين آرزوسو ايله، قادينلار ايسه صحنه حسرتي ايله ياشاييرديلار. چادرا آلتيندا تئاترا گليب، اؤرتولو لوژالاردان صحنه يه باخان سكينه خانيمين اورگيندن نه لر كئچميردي؟» 

     بيرينجي اولماق هم خوشبختليكدير، هم ده اولدوقجا بؤيوك بير مسئوليتين و محروميتين آغيرليغينا تاب گتيرمك قابيليتينه يييه دورماقدير. ايلك قادين رومانچي، ايلك قادين دراماتورق، ايلك قادين درسليك مؤليفي! خورافاتين ظولمتينده بير آذربايجانلي قادينين بونو باجارماسي و فداكارليقلا يئرينه يئتيرمه سي حقيقتن او دؤور اوچون آغلاگلمز هونر و قهرمانليق ايدي.   مقصدي قادينلارين معاريفلنديريلمه سي اولسا دا، اونون گؤردويو ايشلر هئچ ده هميشه محبتله قارشيلاناراق قبول ائديلميردي. نادانلارين موقاويمتيني قيرماق، تعقيبلردن قورتولماق، تضييق لردن قاليب چيخماق بو ظريف دويغولو، غئيرتلي، مرد آذربايجان قاديني اوچون تئز-تئز اؤلومله اوزلشمك دئمك ايدي. سكينه خانيم بوتون بو چتينليكلري دفع ائتمك اوچون اصلينده حياتيني ريسكه قويوردي. حتّي بعضن واليدئين لر اونون اوستونه هوجوم چكه رك دئيرديلر: «سيز درسده قيزلارا شريعتدن دانيشيرسينيز. سونرا ايسه اونلاري اويونباز كيمي صحنه يه چيخاريرسينيز». بئله ايتتيهاملارا دؤزمك اوچون سكينه آخوندزاده منن ده چوخ اذيت چكيردي.  

     خاطيره لردن بللي اولور كي، سكينه آخوندزاده چوخ دوشونوردو. او، ائله بير واسيطه تاپماق ايسته ييردي كي، رفيقه لري هم صحنه ني گؤرسونلر، هم ده اونلارين اوبرازيني يارادان كيشيلر قادين ليباسيندان چيخا بيلسينلر. ايلك ايشي پيئس يازماقدان عيبارت اولدو. «او، اولجه علمين منفعتي»، سونرا ايسه «حاق سؤز آجي اولار» آدلي پيئسلريني يازدي. بلكه ده ايلك دراملار ايدي كي، بورادا حددن آرتيق قادين اوبرازلاري وار ايدي. هر ايكي اثرين رئژيسسورلوغونو مؤليف اؤز اوزرينه گؤتورموشدو. بوتون روللاري ايسه موعليم يولداشلارينا و قيز شاگيردلرينه پايلاميشدي. اثر اوينانيلان گون ايسه مؤليفي قادين اولان پيئسين بوتون پئرسوناژلاريني قادين و قيزلار چاتديريردي. تاماشاچيلار دا آنجاق قادينلاردان عيبارت ايدي. غولام محمدلي يازيردي: «آذربايجان قادينلاري صحنه مدنيتي نين نوباريني بئله دادديلار». 

     سكينه آخوندزاده دراماتورق كيمي تئاتر عالمينده كي  فعاليتيني عينادلا داوام ائتديرمه يه باشلادي. او، توركييه ادبياتيندان دا ماراقلي اثرلري ديليميزه چئويره رك صحنه لشديريلمه سينه كؤمك ائديردي. سكينه آخوندزاده نين ناميق كامال ياراديجيليغيندان حاضيرلاديغي «بختسيز بالا»،  " ظولمون ثمره سي "  آدلي دراملاري اوزون ايللر آذربايجان صحنه سينده حوسئين عربلينسكي نين، عابباس ميرزه شريف زاده نين ايشتيراكي ايله تاماشايا قويولموشدور.  

     عرب و فارس ديللريني موكممل بيلن سكينه آخوندزاده شرق ادبياتينا دريندن بلد ايدي. گئنيش دونياگؤروشونه ماليك اولان بو ايستعدادلي خانيم آذربايجان قيزلاريني آزاد و فيراوان گؤرمك آرزوسو ايله چيرپينيردي. قلمه آلديغي اثرلرينده هميشه بو ايدئيالارين تبليغينه خوصوصي فيكير وئريردي. آچيق فيكيرلي، معاريفپرور بو ضيالي خانيمين قلمه آلديغي مؤوضوع لار حياتدان گليردي. او، آذربايجان قاديني نين دوچار اولدوغو آغير حياتي اورك آغريسي ايله قلمه آلار، قيزلارين اوخوماسي، چاليشماسي اوچون اليندن گله ني اسيرگه مزدي. بوتون يازيلاريندا قيزلارين علم دالينجا گئتمه سيني، ساواد آلماسيني نه تكجه مصلحت گؤروردو، دئمك اولار كي، هايقيريردي. سكينه خانيم هم ده ايلك رومانچي قادين ايدي. او، «شاهزاده ابولفضل و رعنا خانيم» رومانيندا آذربايجان قادينلاري نين حياتيندا كؤك سالميش خورافاتين آرادان قالديريلماسي اوچون چيخيش يوللاريني گؤسترن، بديعي اوصوللا آزادليغين شيرينليگيني تصوير ائدن مؤليف كيمي ديقت چكير. 

     مؤليفين الده اولان ياراديجيليق نومونه لرينه بوگونون گؤزو ايله نظر سالاندا حئيرته گلمه يه بيلميرسن. ظولمون، ذيلتين حؤكم سوردويو بير دؤورده بئش درام، بير رومان يازان آذربايجان قاديني اؤتن عصرين اوللرينده اؤز رفيقه لري نين حوقوق و آزادليقلاري نين مودافيعه سي اوچون هانسي چتينليكلرله اوزلشمه ييب. 1922-1923-جو ايللرده نشر اولونموش «يئني تورك اليفباسي»نين هم مولليفلريندن بيري ده سكينه آخوندزاده ايدي.  

     آمالي هميشه ايشيقلي ايدئيالار و مراملار اولسا دا، حياتي او قدر ده خوش كئچمه ييب، عؤمرو تكجه موباريزه لره توش گلمه ييب. طالعيين بوز اوزونو ده گؤروب، اوزون ايللر آغير خسته ليكدن اذيت چكيب. بو سببدن ده باكيدان قوبايا دؤنمك مجبوريتينده قاليب. دئييلنلره گؤره، او دؤورون مشهور آكتيورلاري، صنعت و تئاتر خاديم لري تئز-تئز قوبايا گئدر، سكينه خانيما باش چكرميشلر. دوغولدوغو شهرده ده دونياسيني دييشن بو ايشيقلي قادينين حيات و ياراديجيليغي چوخ ماراقلي و زنگين ايدي. مشهور آكتيور و رئژيسسور حوسئين عربلينسكي اونونلا صؤحبت زاماني صنعت دوستونا خطابن دئميشدي: «سكينه خانيم، قادينسيز تئاتر گولسوز-چيچكسيز باهار كيميدير. چيچكسيز كي باهار اولماز؟! جهالتين اوجباتيندان نه قدر قادين، قيز تئاترا ياخين دورا بيلمير. سيز بؤيوك ايش گؤرورسونوز. قيزلاريميزين اورگينده تئاتر قيغيلجيملاري آليشديردينيز. واخت گلر، بو قيغيلجيملار مشعله دؤنر». 

     حيات هر ايكي شخصيتين آرزولاريني تصديقه يئتيردي. صحنه ميزين كوريفئي آكتريسالاري دورنا قاتاري كيمي ايللرين سيراسينا دوزولدو. آذربايجان تئاتر تاريخينده اؤزونه مخصوص يئري اولان سكينه خانيم آخوندزاده اونودولموش اونودولمازلاردان بيري ايدي. 

     فيلولوگييا علملري دوكتورو نظيف قهرمانوو اونون شوجاعتي ايله باغلي يازير: «سكينه آخوندزاده نين ياشاديغي دؤور جهالتله ترققي نين، نادانليقلا علمين توققوشدوغو، چتين، آغريلي-آجيلي بير دؤور ايدي. او، شخصي حياتيندا چتينليكلري دفع ائتديگي كيمي، ايجتيماعي حياتدا دا موباريز قادين اولموشدور».  

     ميلتينه لياقتله خيدمت ائتميش سكينه آخوندزاده نين ادبي ايرثي نين گئنيش تدقيقينه، نشرينه و تبليغينه ديقت يئتيريلمه ليدير. اونون اثرلري لاتين قرافيكاسي ايله چاپ ائديلمه لي، اورتا و عالي مكتبلرده سكينه آخوندزاده باره ده گنج نسله موطلق بيلگي وئريلمه ليدير. بيز تاريخيميزي ده دريندن اؤيرنمه لي، بو تاريخده مؤحتشم يئر توتان گؤركملي اينسانلاري دا ياخيندان تانيماليييق. 

      يازان : فلورا خليل زاده

     قايناق : مدنيت آز

    كؤچورن : اؤزگور قادين