آذربايجاندا قادين مطبوعاتي  

  آرزو سولطان 

     يوسيف وزير چمن زمينلي كييئودن آذربايجاندا چيخان ايلك قادين مجموعه سينه گؤندرديگي تبريك مكتوبوندا يازيردي:  ” خانيملار قزئته سي دئديكده ان اول  ” آرواد مسئله سي “  يادا دوشور.  ” آرواد مسئله سي “  ده اينسانلار اوچون حياتي و ضروري بير مسئله دير… “  

     بلي، آذربايجاندا  ” اينسانلار اوچون حياتي و ضروري بير مسئله ني “  احاطه ائدن قادين مطبوعاتي نين يارانماسي ييرمينجي عصرين اوللرينه تصادوف ائدير. ائله بير زامانا كي، قادين پروبلئمي، اونا موناسيبت، اينسان حوقوقلاري نين قورونماسي كيمي غليظ مسئله لر عصرين ايلك اون ايلليگينده چيخان دئموكراتيك روحلو قزئت و ژورناللارين احاطه دايره سينه سيغمادي، ايجتيماعيتين ديقتينده اولان قادينلارين معاريفلنديريلمه سي، قادين آزادليغي مسئله لري قادين مطبوعاتي نين يارانماسي ضرورتيني دوغوردو. 

     بئله بير واختدا دؤورونون طلب و احتيياجلاريني بؤيوك حساسليقلا دويان حاجي زئينالابدين تاغي يئو ميلت قارشيسينداكي خيدمتلري نين سيراسينا بير ياخشيليق دا قوشدو. او، ” ايشيق “  آدلي ايلك قادين قزئتيني تاسيس ائتدي.  ” اونون ايلك نؤمره سي 1911-جي ايل يانوارين 22-ده چاپدان چيخدي ” . (ا.قاسيمووا،  ” ظولمتده  ” ايشيق “  ” ، باكي – 2000، ص.6). قزئتين (بعضي منبعلرده  ” ايشيق ” اي ژورنال آدلانديريرلار) 1911-جي ايلين يانواريندان 1912-جي ايلين دئكابرينا قدر 64 (بعضي منبعلره گؤره 68) سايي ايشيق اوزو گؤروب. مطبوعات تاريخيميز اؤيره نيلركن عصرين اوللري نين نشرلري بورژوا و دئموكراتيك روحلو مطبوعاتا بؤلوندويوندن بو قزئت نئجه دئيرلر، اورتاليقدا قاليب و ايندييه قدر تام تدقيق ائديلمه ييب. آما آيري-آيري مقاله و ماتئرياللار اونون حاقيندا بعضي معلوماتلاري اؤيرنمك ايمكاني يارادير. 

     مجموعه نين رئداكتورو آذربايجانين ضيالي قادينلاريندان بيري، تحصيلينه گؤره حكيم اولان، ايجتيماعي، مدني حياتدا فعال ايشتيراك ائدن، قادين خئيريييه جمعيتلري نين ياراديلماسي نين تشببوسكارلاريندان بيري خديجه علي بَي اووا  ايدي. قزئتين ناشيري ايسه اونون حيات يولداشي موصطافا علي بَي اوو اولدو. حوقوقشوناس، وكيل، ژورناليست، يازيچي م. علي بَي اوو اينسان حوقوقلاري نين، خوصوصيله قادين حوقوقلاري نين مودافيعه چيسي كيمي ده تانينيردي. 

      ” آذربايجان دؤوري مطبوعاتي “  بيبليوقرافيياسيندا  ” ايشيق “  حاقيندا بئله بيلگي وئريلير:  ” هفته ده بير دفعه  – شنبه گونو – نشر اولونان علمي-پئدوقوژي، ادبي، طبابت و ائودارليغا داير قادين مجموعه سي ” . 

      ” ايشيق ” دا اوشاق تربييه سي، ادبيات، طبابت و ائودارليقلا ياناشي، حوقوقا، مدنيته، شريعت قايدالارينا، دونيا خبرلرينه عاييد موختليف گوشه لر واردي. قزئتده بعضي يازيلار روس ديلينه ده ترجومه اولونوردو. 

1911.نجي ايلده چاپ اولونماغا باشلايان  ” ايشيق “  مجموعه سي جمعي ايكي ايل عؤمور سورسه ده، او نه اينكي ييرمينجي عصرين اوللرينده آذربايجان قادينلارينن گؤزلرينه ايشيق، ذكالارينا نور اولدو، ايسلام دونياسي نين قانونلاري ايله عؤمور سورن قادينلارين شوعورلاريني سيلكله دي، او هم ده آذربايجان مطبوعاتي تاريخينده قادين مطبوعاتي نين بونؤوره سيني، عنعنه سيني ياراتدي، قادين پروبلئملري نين مطبوعاتدا حلي نين زميني اولدو.  “  ” ايشيق “  قارانليق موحيطين، جهالتين قورباني اولدو. بير طرفدن جهالتپرست آداملارين تضييقلري، ديگر طرفدن ايقتيصادي و ماليييه چتينليگي اونو ياشاماغا قويمادي. لاكين اونون مدنيت و مطبوعات تاريخيميزده قويوب گئتديگي نجيب ايز سيلينمه دي ” . (س.گنجه لي،  ” مطبوعات عالمينده قادينلاريميزين ايلك آدديملاري “  مقاله سيندن،  ” آذربايجان “  قزئتي، 11 ماي 2000)  ” ايشيق “   ” سؤندورولدو ” . لاكين اونون شؤله سي نين حرارتي ايله اويانيب ايجتيماعي-مدني حياتا قوشولموش قادينلاري، ضياليلارلا ياناشي، آذربايجانين هر يئريندن  ” ايشيق” ين اوخوجوسونا و مؤليفينه چئوريلميش ساده قادينلارين، تيفليسدن، كييئودن، داغيستاندان، موسكوادان، پئتئربورقدان، خاركوودان اونا مكتوب گؤندرنلرين آلووونو سنگيتمك مومكون اولمادي. اونلار  ” موللا نصرالدين ” ،  ” يئني فيوضات ” ،  ” مكتب ” ،  ” ديريليك ” ،  ” ايقبال ” ،  ” آچيق سؤز ” ،  ” آذربايجان “  كيمي ژورنال و قزئتلرده چيخيشلار ائديب، قادينلارين پروبلئملري نين ديقت مركزيندن اوزاقلاشماسينا ايمكان وئرمه مه يه چاليشديلار. 

     لاكين قادينلارين اؤزلرينه مخصوص مطبوعات اورقانينا اولان احتيياجي بونونلا آرادان قالخمادي. 1918-20-جي ايللرده قادين حركاتي نين ووسعت آلماسي بو ضرورتي داها دا رئاللاشديردي.  دموكراتيك آذربايجان خالق جومهورتي  حؤكومتي بو حركاتي ايستيقامتلنديرمك نيتيله قادينلار اوچون آيري-آيري صحيفه لر، سونرا  ” زحمتكئش قادينلارين يولو “  و  ” قافقازييا زحمتكئش قادينلارين يولو “  آدلي بير سايلي قزئتلر نشر ائتدي. 

     داها سونرا 1922-جي ايلده  ” زاقافقازييا زحمتكئش قاديني “  آدلي ژورنال چاپ اولوندو. تيفليسده چيخان بو ژورنال آذربايجان، گورجو و ائرمني قادينلارينا اونلارين حوقوقلاري باره ده آنلاييش وئرمه يه جهد ائدير، اونلاري آزادليغا چاغيريردي. آما بو، آذربايجان قادينلاري نين اؤز مطبوعاتينا اولان طلباتيني اؤدميردي. ائلجه ده، او بيري رئسپوبليكالارين قادينلاري اؤز آنا ديلينده نشر اولونان مطبوعات اورقانينا احتيياج دويدوقلاريني بيلديريرديلر. 

     بئله ليكله، 1923-جو ايلده آذربايجان قادينلار شوراسي نين اورقاني اولان  ” شرق قاديني “  ژورنالي ايشيق اوزو گؤردو. اونون ايلك سايي همين ايلين نويابريندا چاپ اولوندو. 

     ژورنالين ايلك رئداكتورو آينا سولطانووا ايدي. 20-جي ايللرده عرب اليفباسي ايله چاپ اولونان  ” شرق قاديني “  قادينلارا آزادليق، برابرليك ايدئيالاري آشيلايير، معاريف و مدنيتدن يازيردي. آما بوتون بونلارين هاميسي كوممونيزم ايدئولوگيياسي نين سوزگجيندن كئچيريليب اوخوجولارا تقديم اولونوردو. 

      “  شرق قاديني “  ترققي پرور موعليملرين و ايجتيماعي خاديملرين قوووه سينه آرخالاناراق قادين تحصيلي نين، مكتبه قَدر تربييه نين موهوم پروبلئملري نين حلينده گؤركملي رول اويناييردي. آذربايجاندا قادينلارين، قيزلارين تحصيلي، قيز مكتبلري نين، كورسلارين تشكيلي، بورادا آپاريلان تعليم-تربييه ايشي مسئله لرينه ژورنال صحيفه لرينده مونتظم يئر وئريليردي ” .(ج.گنجه لي،   ” مطبوعات عالمينده قادينلاريميزين ايلك آدديملاري “  مقاله سي،  ” آذربايجان “  قزئتي، 12 ماي 2000) 

     بو ژورنال  ” ايشيق “  ايله  تملي قويولموش نجيب ايشين لاييقلي داوامچيسي اولدو و اوزرينه دوشن ميسسيياني اوزون ايللر بويو يئرينه يئتيردي.  ” ايشيق “  بير قيغيلجيم كيمي ايشاريب تئز سؤندوسه ده،  ” شرق قاديني “  آذربايجان قادين مطبوعاتي نين مشعلي اولوب يانا-يانا ياشادي. 

       ” شرق قاديني ” نين بير تاريخي رولو دا اودور كي، او آزاد نفسلي، خوش مراملي مطبوعات اورقاني نين اطرافيندا آذربايجانين بوتون ساوادلي، اوخوموش، موباريز قادينلاري توپلاشميشديلار. ژورنال قادين پوبليسيستلرين، شاعير و يازيچيلارين يئتيشمه سي اوچون بير مكتب رولونو اويناميشدير. علمه، مدنيته، اينجه صنعته، طبابته ماراغي اولان قادينلارين، قيزلارين ايلك مقاله لري ژورنالين صحيفه لرينده درج ائديلميشدي. آذربايجانين ايلك يازيچي و ژورناليست قادينلاري ايله برابر گؤركملي بديعي سؤز اوستالاري نين – ج.محمدقولوزاده نين، س.س. آخوندووون، ع.شايقين، س.حوسئينين، ي.و.چم زمينلي نين، ت.شاهبازي نين، ح.جاويدين، قانتميرين، ب.طاليبلي نين، ه.نظرلي نين و باشقا يازيچيلارين اؤز حوقوقلاري اوغروندا موباريزه يه قوشولان قادينلاريميزين حياتلارينا حصر ائتديكلري حئكايه و شعرلري تئز-تئز چاپ اولونوردو ” . (يئنه اورادا). 

     30-جو ايللرده ژورنال قادينلار آراسيندا صنايعلشمه نين، كووپئراتيولشمه نين تبليغي نين تريبوناسينا چئوريلدي، اونون صحيفه لرينده كولخوز، سووخوز قوروجولوغو، امك فعالليغي مسئله لري خوصوصي يئر آلدي. ضربه چي قادينلار اؤيولدو. ژورنالين رئداكتورو، تانينميش ايجتيماعي خاديم، پوبليسيست گولاره كؤيلوقيزي حبس اولونوب سورگونه گؤندريلندن سونرا، 1938-جي ايلين فئوراليندان اعتيبارن  ” شرق قاديني ” نين آدي دا دييشديريلدي. ژورنال  ” آذربايجان قاديني “  آدي ايله نشر اولونماغا باشلادي. او آرتيق آذربايجان KP مركزي كوميته سي نين ايجتيماعي-سياسي و ادبي-بديعي آيليق ژورنالي ايدي. 

     1937-40-جي ايللرده ژورنال بير نئچه رئداكتور دييشدي، اونون مؤليفلري، موخبيرلري رئپرئسسييا قورباني اولدو. بئله ليكله، ژورنالين تاريخينده بؤحرانلي گونلر باشلادي. 

     1941-جي ايلده بير چوخ مطبوعات اورقانلاري كيمي  ” آذربايجان قاديني “  دا فعاليتيني دوندوردو. و اونون دونو بير ده اون ايلدن سونرا، 1951-جي ايلين مارتيندا آچيلدي. 50-جي ايللرده ژورنال قادينلارين علم، مدنيت، تصروفات، ايجتيماعي-سوسيال ساحه لرده قازانديقلاري اوغورلاردان يازير، اونلارين معيشت و حيات شراييطي نين ياخشيلاشديريلماسي مؤوضولارينا داها چوخ يئر وئريردي. 

      ” آذربايجان قاديني “  ژورناليني آذربايجان خالقي نين كئشمكئشلي طالعيي نين، اونون حياتينداكي اوغورلو و چتين گونلرين سالنامه سي آدلانديرماق اولار. 

     60-جي ايللرده اونون صحيفه لرينده پارتييا حياتي، پامبيقچيلارين، زحمتكئش قادينلارين هونريندن بهث ائدن اوچئركلر، خالقلار دوستلوغو مسئله لري خوصوصي يئر توتور، حوقوقشوناس مصلحتي، گنجلرين ياراديجيليغي اؤز عكسيني تاپيردي. 

     ژورنالين 1961-جي ايلين يانواريندا درج اولونموش بيرينجي نؤمره سينده كي  يئرئوانا حصر اولونموش  ” سئويملي شهر ” ، فئورالدا چيخان ايكينجي نؤمره ده كي   ” قارغي دالي كنديميزين گؤزه لي اولماليدير “  و س. مقاله لر او دؤورده كي  قادين مطبوعاتي حاقيندا آز-چوخ تصوور يارادير. 

     بونونلا بئله، 30-جو ايللردن فرقلي اولاراق، موحاريبه دن سونراكي حياتيندا  ” آذربايجان قاديني ” نين صحيفه لرينده  ” ائوي نئجه بزمه لي ” ،  ” يئني گئييملر ” ،  ” سوفره “  كيمي روبريكالارا دا يئر وئريليردي. 

     1965-72-جي ايللرده  ” آذربايجان قاديني ” نين رئداكتورو شفيقه آغايئوا، 1972-96-جي ايللرده ايسه خاليده هاسيلووا اولوب. بو ايللرده ژورنالين ايدئيا-بديعي سوييه سي نين يوكسلمه سي قئيد اولونور. 

     او دؤورده ژورنالدا  ” گؤزلليك عالمينده ” ،  ” مدنيت تاريخيميزدن ” ،  ” آچيلماميش صحيفه لر ” ،  ” تئاتر ” ،  ” اينجه صنعت ” ،  ” پوئزييا يارپاقلاري ” ،  ” معنوي تربييه ” ،  ” ائل صنعتكارلاري ” ،  ” خاريجي رفيقه لريميزين حياتي “  و س. يئني روبريكالاردا آذربايجانين تانينميش علم و مدنيت خاديملري، يازيچيلاري چيخيش ائديبلر. 

     80-جي ايللرده ژورنالين تيراژي 30 ميندن 320 مينه قدر آرتيب. 

     1951-91-جي ايللرده  ” آذربايجان قاديني “  مونتظم اولاراق آيدا بير دفعه  نشر اولونوب. 

     90-جي ايللري آذربايجان مطبوعاتيندا يئني مرحله  حساب ائتمك اولار. 

     80-جي ايللرين سونوندا آذربايجاندا ايلك دفعه  عوموم ميللي، غئيري-حؤكومت قزئتلري مئيدانا چيخدي. موستقيل نشرلرين سايي گونبگون چوخالدي. 

     بعضي KİV -لر گوجلو نشر ائولري، هولدينق شيركتلري، گئنيش شبكه لي رئكلام و اينفورماسييا قوروملاري ياراتديلار. KİV دؤردونجو حاكيميت فونكسيياسيني يئرينه يئتيرمه يه، ايجتيماعي فيكره گوجلو تاثير گؤسترمه يه باشلادي. آما مطبوعات اورقانلاري نين سايي نين دورمادان آرتماسي، كئيفيتي نين دايانمادان يوكسلمه سي قادينلار اوچون اولان نشرلرين ساييندا و كئيفيتينده او قدر ده گوجلو عكس اولونمادي. 

     عصرين بؤيوك بير حيصه سي بويو آذربايجاندا يئگانه قادين مطبوع اورقاني اولان  ” آذربايجان قاديني “  ژورنالي دا بو ايللرده چتين گونلريني ياشادي. كاغيذ و ماليييه چاتيشمازليغي 1992-جي ايلده ژورنالين تيراژي نين 5 مينه دوشمه سينه و ايكي آيدا بير دفعه  چيخماسينا سبب اولدو. بو تئندئنسييا 1993-جو ايلده ده داوام ائتدي. 1994-جو ايلده ژورنالين جمعي 4، 1995-96-جي ايللرده ايسه ايكيجه نؤمره سي ايشيق اوزو گؤردو. 

     1997-جي ايلده  ” آذربايجان قاديني ” نين تاريخينده داها يئني بير مرحله  باشلادي. 

     ژورنالين تاسيسچيسي  ” سئويل “  آذربايجان قادينلاري مجليسي و رئداكسييانين كوللئكتيوي، باش رئداكتورو پرئزيدئنت آپاراتي هومانيتار سيياست شؤعبه سي نين موديري فاطما عبدوللازاده اولدو. بو ايسه ژورنالين يئنه ده موعين ايدئولوگييايا خيدمت ائده جگيندن خبر وئريردي. 

     ايندي ايجتيماعي-سياسي، ادبي-بديعي ژورنال آدلانديريلان  ” آذربايجان قاديني “  داها نفيس ترتيباتلا توركييه ده نشر اولونماغا باشلادي. اونون صحيفه لرينده داها چوخ قادينلارين سوسيال پروبلئملرينه و مدنيت يئنيليكلرينه يئر وئريلدي. 

     آما  ” آذربايجان قاديني ” نين بو  ” يئني حياتي “  دا اينتئنسيوليگي ايله سئچيلمه دي. بئله كي، 1999-جو ايلدن ژورنال يئنيدن چتينليكلر منگنه سينده سيخيلماغا باشلادي. ماليييه چتينليكلري اونون اؤلكه خاريجينده چاپ اولونماسيني مومكونسوز ائتدي، ژورنالين تيراژي 2-3 مينه ائندي. 1999-جو ايل عرضينده يالنيز 4 نؤمره سي ايشق اوزو گؤرن  ” آذربايجان قاديني ” نين 2000-جي ايلين سونلاريندا بيرجه سايي چاپدان چيخيب. داها 2-3 نؤمره ايسه چاپا حاضير وضعيتده گؤزله يير. 

     عوموميتله، آذربايجان رئسپوبليكاسي مطبوعات و اينفورماسييا ناظيرليگي نين 2000-جي ايلين نويابرينا اولان معلوماتينا گؤره، اؤلكه ده 531 قزئت رسمي قئيدياتا آلينيب. اونلاردان 300-دن بير قدر آرتيغي مونتظم ايشيق اوزو گؤرور. فعاليتينه ايجازه وئريلميش ژورناللارين سايي 113، آگئنتليكلر 25، تئلئراديو شيركتلر ايسه 20-يه قدردير. بير سؤزله، آذربايجاندا كوتلوي اينفورماسييا واسيطه لري نين سايي اؤلكه نين پارامئترلرينه گؤره كيفايت قدردير. لاكين بو هئچ ده  ” قادين مطبوعاتي نين “  دا وارليغيندان خبر وئرمير. 

     آذربايجانين قادين مطبوعاتي آمريكا و آوروپا اؤلكه لري نين بو ساحه ده كي نايليتلري ايله آياقلاشماسا دا، هر حالدا سون اونيلليكده بو يؤنده موعين جهدلر اولوب. 

     اونلارين پيونئري 1991-جي ايلده يارانميش  ” جئيلا خانيم “  ژورناليدير. تاسيسچي – ژورنالين كوللئكتيوي عئيني واختدا  ” جئيلا دئكور “  آدلي ژورنال دا ايستحصال ائديب. 1991-جي ايلين دئكابريندا 30 مين تيراژلا چاپ اولونان ژورنال بو يؤنوملو ايلك مطبوع اورقان اولدوغوندان اوخوجولارين رغبتيني قازانيب. ژورنال روس ديلينده چيخيب. 1994-95-جي ايللرده ماليييه چتينليكلري  ” جئيلا ” نين ژورنال دئييل، عئيني آدلي، آ-4 فورماتلي قزئت كيمي ايشيق اوزو گؤرمه سينه سبب اولوب. 1996-97-جي ايللرده توركييه رئسپوبليكاسيندا چاپ اولونان ژورنالين تيراژي 1500 نوسخه يه ائنيب. حاضيردا  ” جئيلا “  ژورنالي (ايندي  ” جئيلا خانيم “  و  ” جئيلا دئكور “  ژورناللاري بير آد آلتيندا بيرلشيب) يئنيدن  ” آذربايجان “  نشرياتي نين مطبعه سينده چاپ اولونور. 2000-جي ايلده اونون بير نئچه سايي ايشيق اوزو گؤروب. سون نؤمره سي 2000-جي ايلين اوكتيابريندا چيخيب. 

     قادين مطبوعاتي ساحه سينده كي   ” جئيلا “  ايله آرادان قالخمايان بوشلوغو 1996-جي ايلين سئنتيابريندان نشر اولونماغا باشلايان  ” شمس “  ژورنالي دولدورماغا جهد ائتدي. 

      ” VSistem inc. “  شيركتينيني تاسيس ائتديگي بو ژورنال دا روس ديلينده، آيدا بير دفعه  اوخوجولارين گؤروشونه گليردي. لاكين جمعي بير ايل ياشايان بو ژورنال آذربايجان قادين مطبوعاتيندا ائله بير يئنيليك ائده بيلمه دي. ساكيتجه مطبوعات عالميندن گئتديگي كيمي، تئزليكله يادداشلاردان دا سيليندي. آراشديرمالار آپاراركن اونون نوسخه لرينه كيتابخانالاردا دا راست گلمه ديم. 

     موختليف ايللرده آذربايجان رئسپوبليكاسي مطبوعات و اينفورماسييا نازيرليگينده  ” شانس ” ،  ” ساري گلين “  و س. آدلي قادين ژورناللاري قئيدياتدان كئچيب. لاكين اونلارين آدي ائله قئيديات شهادتنامه سي نين اوزرينده قاليب. 

     بس قزئتلرله باغلي وضعيت نئجه دير؟ 

     اؤلكه ده چيخان 30-دان چوخ قزئت و ژورنالين باش رئداكتورو ايسه قادينلاردير.  

كؤچورن : آيدا بيات