آذربايجان ميللي گئييملري 

  آذربايجان ميللي گئييملري خالقين ماددي و معنوي مدنيتي نين چوخ چتين و اوزون چكن اينكيشاف گئديشي نتيجه سينده يارانميشدير. گئييم خالقين تاريخيله چوخ سيخ علاقه داردير. بئله كي، خالقين ماددي مدنيتيني، خالقي خاص اولان خوصوصيتلري داها چوخ عكس ائتديرير و خالقين سارسيلماز ائتنيك نيشانه لرينه عاييددير. خالقين ائتنيك، تاريخي، خالق ياراديجيليغي نين بديعي خوصوصيتلري، اونلارين موختليف حالدا فورمالاشمالاري، بديعي بزك ناخيشلاري، توخوجولوق خالق گئييمينده اؤز عكسيني تاپميشدير. آذربايجان اون يئددينجي عصرده ياخين شرقين ان بؤيوك ايپكچيليك اؤلكه سي كيمي تانينيردي و شيروان ايالتي آذربايجاندا ان ايري ايپكچيليك رايونو ايدي. بوندان باشقا آذربايجانين شاماخي، باسقال، گنجه، شكي، شوشا رايونلاريندا دا ايپكچيليك ايستحصالي چوخ اينكيشاف ائتميشدير. بو رايونلاردا ايپكدن چوخ قشنگ، بزكلي، ناخيشلي، ظريف قادين باش اؤرپكلري ايستحصال اولونوردو. گئييمين استيلي اونون يييه سي نين عاييله وضعيتيني و ياشيني عكس ائتديريردي. سوباي قيزلارين گئييملري ائولي قادينلارين گئييملريندن فرقله نيردي. جاوان قيزلار داها پارلاق و قشنگ گئيينرديلر. كيشي و قادين گئييملري آذربايجانين بوتون ائتنيك، تاريخي زونالاريندا عئيني ايدي. بونونلا بئله كيشي گئييملري گئييمين يييه سي نين صينفي عكس ائتديريردي.  اوشاق گئييمي اؤز فورماسي ايله بؤيوك گئييمي ايله عئيني ايدي و اونلاردان يالنيز بعضي خوصوصيتلري و اؤلچوسو ايله فرقله نيردي. آذربايجان قادين گئييمي اون دوققوزنجو عصرده، ييرمينجي عصرين اولرينده آلت و اوست گئييملردن عيبارت ايدي. اوست گئييمي ايسه اؤز نؤوبه سينده چيگين اوستو و بئل گئييملريندن عيبارت ايدي. قادين چيگين اوستو گئييمي اوست كؤينگيندن، آرخاليقدان، چپكندن عيبارت ايدي. اوست كؤينگي نين دوز بيچيمي، چيگيني تيكيشسيز و رنگبارنگ قولتوق آلتيندان عيبارت ايدي. بو كؤينكلر اساسن قانوووز و فاي ايپك پارچالاريندان تيكيليردي. چپكن – چيگين اوستو، آستارلي و يالانچي قوللاري ماليك اولان قادين اوست گئييميدير. بو گئييم تيرمه دن، مخمردن و بير نئچه نؤوع ايپك پارچالاريندان تيكيليردي. لبباده – چيگين اوستو اوست گؤدكچه سيدير. بو گئييم سيريقلي آستاردا اولور، تيرمه دن، مخمردن و باشقا پارچالاردان تيكيليردي. گولجه – قادين چيگين اوستو اوست گئييميدير. بو گئييم آستارلي اولور و تيرمه دن، مخمردن تيكيليردي. باهاري – سيريقلي آستاردا قادين چيگين اوستو اوست گئييميدير. اساسن مخمردن تيكيليردي. كوردو – قادين اوست گئييميدير. بو گئييم تيرمه دن، مخمردن تيكيليردي، خز دري و سيخ ناخيشلارلا بزه نيليردي. ائشمك – قادين سيريقلي اوست گئييميدير، تيرمه دن و مخمردن تيكيليردي. بو گئييمين ياخاسي، اتگي و قوللاري سافسار خزدريسيله، قيزيلي شبكه تورلا و شريدله بزه نيليردي. قادين بئل اوست گئييمي – بير نئچه توماندان، جوتبالاقدان و چاخچوردان عيبارت ايدي. شهرلرده قادين ائودن چيخاندا تومانين اوستوندن چاخچور گئيرديلر. كيشي ميللي اوست گئييمي – اوست كؤينك، آرخاليق، قابا و چوخادان (چيگين اوستو) عيبارت ايدي. بير و يا ايكي يانلي آرخاليقلار ايپك، آتلاز، كيشمير، ماهود، ساتين و باشقا پارچالاردان تيكيليردي. قابا – كيشي چيگين اوستو اوست گئييميدير و اساسن تيرمه دن تيكيليردي. چوخا – ايچي توكلو قويون دريسيندن تيكيلميش دويمه سيز، ناخيشلي شوبادير. ميللي گئييم دستينه موختليف نؤوعلو باش گئييملري و آياق قابيلار دا داخيل ايدي. ميللي گئييم دستلرينه يئرلي زرگرلرين ياراتديغي زرگرليك معمولاتلاري دا داخيل ايدي. قادين زرگرليك معمولاتلاري اونلارين تدبيقينه اويغون اولاراق، باش، بويون، دؤش، بئل، بيلك حيصه لرينه بؤلونور.  باش گئييملري. قادينلارين باش گئييملري رنگينه، گؤزلليگينه و رنگارنگليگينه گؤره اولدوقجا جلب ائديجي و ماراقلي ايدي. بورا ايپك كلاغاييلار، چالمالار، نار-نازي، تسك، لچك، اؤرپك، چادرا و س. داخيل ايدي.  باش گئييملري نين گئنيش ياييلميش نؤوعولريندن بيري ايپك يايليق-كلاغايي ايدي. قئيد ائتمك لازيمدي كي، اونون اؤرتولمه سينده ياش و سوسيال فرقلر مؤوجود ايدي: ياشلي قادينلار – آغ، بئژ (آچيق ساري-قهوه اي)، آچيق ماوي رنگلي كلاغايي اؤرتوردو. كلاغاييلاري موختليف جور باغلاييرديلار.  ديگر قادين باش گئييمي تسك (اونو قادين پاپاغي آدلانديريرديلار) ايدي. تسگي بزه ين ناخيشين نؤوعوندن آسيلي اولاراق اونون موختليف آدلاري مؤوجود ايدي: ميرواري پاپاق، قيزيل پاپاق، آي اولدوز. تسگين بير نئچه فونكسيياسي واردي: ساچ، دوزومونو قورويوب – ساخلاماق، ساچلاري ياد گؤزلردن گيزلتمك، اساس تعييناتي ايسه اوندان عيبارت ايدي كي، اوستدن باغلانميش ايپك يايليق سوروشمه سين. هم تسك، هم ده يايليقلار بزه نيليردي. اونلارين اوزرينه ميرواري، مؤهورلنميش فيقورشكيللي قيزيل نيشانلار دوزور و يا قيزيلي تيكمه لي ناخيشلا بزه ييرديلر. ياشلي قادينلار تسگين كنارلاريني چوخ زامان بافتا و يا گولَبتينله بزه ييرديلر. تسگين اوستوندن بؤيوك ايپك و يا پامبيق يايليغين بير اوجونو ساللاييب قالان اوجلاريني آرخادا دويونله ييرديلر.  قادين گئييمي نين ائلئمئنتلريندن بيري ده خوصوصي باش سارغيسي – چوتقو ايدي كي، توندرنگلي پارچادان (قارا و يا توند گؤي ساتين، آتلاس، چيتدن و س.) تيكيليردي. او، هر ايكي طرفدن آچيق، ائنسيز اؤرتو شكلينده تيكيليردي. چوتقونو باشين اطرافيندا (عئيني زاماندا آلني دا اؤرته رك) ائنسيز لئنت شكلينده باغلاييرديلار. چوتقويلا ساچلاري و يا هؤروكلري ييغاراق اونلاري آرخادان ساللاييرديلار. بئله ائو و چؤل ايشلري زاماني راحات اولوردو. بئله ليكله، چوتقو هم گيگييئنيك، هم ده اوتيليتار(بهداشت و فايدالي ليق) اهميت داشيييردي. چوتقونون اوستوندن، بير قايدا اولاراق، يايليق يا دا ايپك و يا پامبيق اؤرتوكلر (چارشاب، اؤرپك، شال و س.) اؤرتوردولر. چوتقو آذربايجاندا ييرمي عصرين 40-جي ايللرينه دك مؤوجود اولموشدور.  جمعيتين زنگين زومره لري آراسيندا ناز-نازي و قاز-قازي (خالق تئرمينولوگيياسي) كيمي طنطنه لي گونلرده تاخيلان باش گئييملري گئنيش ياييشميشدي كي، اونلاردا قيش واختي باشي باغلاييرديلار و يا چييگنين اوزرينه ساللاييرديلار. (اونلار ايستي اوست قيش گئييميني عوض ائديردي). [ازربايجاندا كئچميشده، ايندي اولدوغو كيمي، بعضي اوجقار يئرلرده پالتو گئيينميرديلر. اوست گئييميني يئرلي و يا فابريك ايستحصال اولان يون شاللار عوض ائديردي]. شاللار فابريك ايستحصالي ايدي.  چالما و دينگه حاقيندا بير نئچه سؤز. ديگر باش گئييملري ايله موقاييسه ده اونلار داها آز ياييلميشدي. بئله كي، اونلارين باغلانماسي قادينلارين چوخ واختيني آليردي. چالماني باشا باغلانميش يايليغا و يا آراقچينا ساريييرديلار. چالمانين اوستوندن بير يايليق دا اؤرتوردولر. بعضي بؤلگه لرده چالما باشدا خوصوصي سانجاقلارلا بركيديليردي. يالنيز شيرواندا چالمانين سارينماسي نين بير نئچه اوصولو معلوم ايدي. دينگه نين باغلانماسي اوچون شالدان ايستيفاده اولونوردو. دينگه چالمادان داها موررككب باش گئييمي ايدي. او دا چالما كيمي باشدا سانجاقلا بركيديليردي.  قادين باش گئييمين ان ساده ائلئمئنتي لچك (دوزبوجاق و يا اوچ بوجاق شكيللي يايليق) ايدي. لچگي ائو ايشلري زاماني، ائلجه ده باشا خينا قوياندا باغلاييرديلار. شهرلرده قادينلار ائودن چيخاركن بوتون بدني اؤرتن چادرا گئييرديلر. كندلي قادينلار چادراني چوخ نادير حاللاردا، يالنيز هردن كنددن اوزاق مسافه يه گئدنده اؤرتوردولر. عادتن باش اوچون يايليقلا (ياشماق) آغيز و بورنون بير حيصه سيني اؤرتمكله كيفايتله نيرديلر. وارلي قادينلار آتلاس، كاسيبلار ايسه ساتين، بئز و يا داما-داما سارپينكادان(نازيك پامبيق پارچا) موختليف چالاردا چادرالار اؤرتوردولر. چادرايلا ياناشي، شهرلرده قادينلار هردن اوزلريني گؤز اوچون كروژئوالي تورلا اؤرتوردولر.  آذربايجانليلاردا پاپاق جسارت، لياقت و شرف رمزي حساب اولونوردو. اونو ايتيرمك بؤيوك روسوايچيليق حساب ائديليردي. كيمينسه پاپاغي نين اوغورلانماسي اونون صاحيبينه قارشي دوشمن هوجومو كيمي قييمتلنديريليردي. كيشي نين باشيندان پاپاغي ووروب سالماق اونو و اونون بوتون نسليني تحقير ائتمك دئمك ايدي. پاپاق و اونون فورماسينا گؤره اونون داشيييجيسي نين سوسيال وضعيتيني موعينلشديرمك اولاردي. كيشيلر ايسته نيلن حالدا پاپاغي باشلاريندان چيخارميرديلار (هتتا يئمك يئيركن)، نامازدان اول دستماز زامان ايستيثنا اولماقلا. ايجتيماعي يئرلرده باش گئييمي اولمادان گؤرونمك روسوايچيليق حساب اولونوردو.  كيشيلرين اساس باش گئييمي قويون خزي و يا قاراگولدن حاضيرلانان پاپاقلار ايدي. اونلارين موختليف فورمالاري و يئرلي آدلاري مؤوجود ايدي. اون دوققوز عصرين سونلارينا عاييد مؤليفلردن بيري پاپاغين حاضيرلانماسي پروسئسيني بئله تصوير ائدير:  ” اولجه، دريني تيكيب اونا پاپاق فورماسي وئريلير، سونرا اونون ترس اوزونو چئويريرلر و پاپاغي يومشاق ائتمك اوچون اونون چيلپاق اوزونه پامبيق و يا كالكا سريرلر. پامبيق و يا كالكانين اوزرينه بير ورق شكر كاغيذي قويورلار، نتيجه ده پاپاق اونا وئريلميش فورماني ساخلايير؛ البتته، شكر ورقي پاپاغين فورماسينا و بؤيوكلوگونه گؤره كسيلير. سونرا شكر ورقي نين اوستوندن هر هانسي بير پارچادان آستار تيكيلير و پاپاق توكلو اوزونه چئوريلير. حاضير پاپاغا سو سيچراداراق 4-5 دقيقه  عرضينده اوزرينده يونگولجه چوبوق گزديريرلر؛ بو زامان پاپاغي سول اله تاخيلميش وضعيتده ساخلاييرلار. سونرا پاپاق 5-6 ساعاتليغا پاپاق اوچون خوصوصي قليبه تاخيلير. بونونلا دا، پاپاغين حاضيرلانماسي بيتير ” . سانكت-پئتئربورقدا كوللئكسييالاريندا، توراينسكايانين يازديغينا گؤره، 4 نؤو پاپاق قورونوب-ساخلانيلير: كونوس و كسيلميش كونوس شكلينده؛ ايچي ياستي ماهود پارچادان اولان دايره شكلينده؛ بير طرفي ايچري باتميش كونوس فورماسيندا پاپاق؛ ايتي اوجلو تپزي و گؤي ستيندن سوتون جوغو اولان خز پاپار. ان ساده و گئنيش ياييلميش عنعنوي پاپاقلار موتال و يا چوبان پاپاقلاري ايدي. اونلاري اوزون توكلو قويون دريسيندن حاضيرلاييرديلار، اونلار كونوس فورماسيندا اولوردو. موتال پاپاغي اساسن كند اهلي نين يوخسول طبقه لري تاخيرديلار.  ” شيش پاپاقلاري “  و يا  ” بي پاپاقلاريني “  كونوس شكلينده و يا ايتي اوجلو حاضيرلاييرديلار. اونلارين تيكيلديكلري ماتئريالين آدينا گؤره عومومي آدلاري وار ايدي: – بوخارا پاپاق، بئله كي، بو پاپاقلار اوچون دريني بوخارادان گتيريرديلر. اونلاري يالنيز بَي زومره سي نين نوماينده لري و همچنين وارلي آداملار تاخيردي. بئله پاپاقلار هم ده شهر آريستوكراتيياسي اوچون ده خاراكتئريك ايدي.  قاراباغدا پارچا اوزلو پاپاق  ” ياپپا پاپاق “  (و يا  ” قارا پاپاق ” ) كيمي تانينيردي. بئله پاپاقلار رنگينه گؤره ده سئچيليردي – قيزيل پاپاق و گوموش پاپاق. نوخا قزاسيندا پاپاق داققا (تاققا) پاپاق آدلانيردي و اونون اوزو مخمردن تيكيليردي.  آذربايجاندا باش گئييملري نين هم ده آشاغيداكي نؤولري مؤوجود ايدي: باشليق، آراقچين، تسك، تسكولاخ، عممامه (چالما) و ب.  باشليق (باش اوچون اولان حيصه ) و اوزون دييرمي كنارلاردان عيبارت ايدي، اونلار عادتن بوينون اطرافينا دولانيردي. قيشدا ماهود و يون باشليق تاخيرديلار. شيرواندا دوه يونوندان اولان باشليقلارا خوصوصي دگر وئريليردي. باشليغين آستاري رنگلي ايپك پارچادان تيكيليردي، چونكي باشليغين قولاقجيقلاري چيگينلرين آرخاسينا آتيلاندا آستار گؤرونوردو. عادتن باشليق ياپينجيني موشاييت ائديردي.  آراقچين و تسكولاخ سربست باش گئييملري دئييلدي، اونلاري ديگر باش گئييملرييله بيرگه تاخيرديلار (پاپاق، چالما). اونلار آذربايجانليلارين هله اورتا عصرلرده گئنيش ياييلميش تيپيك عنعوي باش گئييملري ايدي. آراقچينلار موختليف نؤو پارچالاردان موطلق بير رنگ آستاردا باشي احاطه ائدن ديير مي شكيللي فورمادا تيكيليردي. آراقچيني كنددن كناردا پاپاقسيز تاخماق ادبسيزليك حساب اولونوردو، بو، يالنيز اوشاقلارا ايجاره وئريليردي. گونده ليك ائو حياتيندا آراقچيني پاپاقسيز دا گئيمك اولاردي. تسكولاخا گلديكده ايسه، اونو ياشلي آداملار گئجه تاخيرديلار.  روحاني شخصلر آراسيندا (موللا، سئييد، شئيخ و ب.) توربان-عممامه (چالما نؤووع) باش گئييمي قاليردي. آذربايجاندا آغ توربان گئنيش ياييلميشدي. عالي روحاني طبقه سي ياشيل عممامه گئييردي.  آذربايجان كيشيلري ساققال و بيغ ساخلاييردي، بئله كي، ياشلي نسيل اوزون ساققال ساخلاييردي، گنجلر ايسه ساققاليني قيرخيرديلار (بو خط آدلانيردي). بعضي كيشيلر آنجاق بيغ ساخلاييردي. بيغ و ساققالا، خوصوصن وارلي عاييله لرده، موتمادي اولاراق قوللوق ائديرديلر. شهرلرده كيشيلر بيغا سورتمك اوچون خوصوصي كرئمدن (بيغ ياغي) ايستيفاده ائديرديلر. ساققال و بيغ اوچون خوصوصي داراقلار (ساققال داراغي) مؤوجود ايدي.  او كي قالدي ساچ دوزومونه، بوردا دئمك اولار كي، داها ياشلي كيشيلر عادتن ساچلاريني ديبيندن قيرخيرديلار. گنجلر آليندان انسيه دن باشي تپه حيصه سيني ائنسيز زولاق شكلينده قيرخيرديلار، يان طرفلرده ساخلاديقلاري ساچلار ايسه قولاقلارين اوزرينه تئللر شكلينده ساللانيردي. بو ساچ دوزومو  ” يان بيرچك ” (حرفي:  ” يان تئل ” ) آدلانيردي. كيشي ساچ دوزوملريندن بيري ده  ” دال بيرچك “  آدلانيردي بو زامان ساچلاري آليندان تا امگك (تپه) حيصه يه دك قيرخيرديلار. بعضي جاوان كيشيلر باشدا بير دسته (ييغين) ساچ (ككيل) ساخلاييردي. بئله نؤوع ساچ دوزوملرينه بوتون آذربايجاندا راست گلمك اولاردي – عئيني زاماندا بير رئگيون داخيلينده.  قادين و كيشي آياق قابيسي. اون دوققوز – ييرمي عصرين اولينده آذربايجاندا كيشي و قادين آياققابيلاري نين بير نئچه نؤووع مؤوجود ايدي. آذربايجانليلار، خوصوصن كنديلر آراسيندا ان چوخ ياييلميش آياق قابي نؤووع – چاريقلار ايدي كي، اونلار يا ايري بوينوزلو قارامالين خام، كندليلرين اؤزلري نين ائعمال ائتديگي دريسيندن (گؤنوندن)، يا دا داها موكممل اوصوللا ائعمال اولونموش دريدن – آشيلانميش گؤندن تيكيليردي. سونونجولار داها باهالي ايدي و اونلاري وارلي كندليلر گئيينيردي، خام دريدن حاضيرلانانلاري ايسه (اوجوز مال كيمي) كاسيبلار. چاريقلاري يون جورابلارين و يا پامبيق پارچادان دولامالارين (پارتاوا، دولاق) اوزريندن گئييرديلر. كاسيب كنديلر اونلاري هم گونده ليك، هم ده بايراملاردا گئييرديلر. بير نئچه چاريق نؤووعونه تصادوف اولونوردو: تك بورون، شيرازي، قيزقايتاران، شاتيري، قوش بورون، شيرواني، كالماني، شيرماي و س. چاريقلار ايكي نؤووع باغلا باغلانيردي: – يا بؤرمه يون (توخونما باغ)، يا دا اَيريلميش (ئشمه) باغلا. هر بيري نين اوزونلوغو جورابلارين تيپيندن آسيلي اولاراق 130-150 سانتيمه چاتيردي. اگر جوراب ديزه قدر گئييليرديسه، اوندا اوزون باغدان ايستيفاده اولونوردو.  ديگر آياق قابي نؤووعو يونگول چووك/چوست (مئخس) ايدي كي، اونلاري اساسن قارا توماجدان تيكيرديلر، دابانسيز اولوردو، اونا گؤره ده اونلاري اساسن ائوده گئييرديلر. هر ايكي جينسين نوماينده لري اوچون، خوصوصن شهرلرده ان چوخ ياييلميش آياق قابي نؤوعو دابانلي (پوللو باشماق، مخمري باشماق)، دال حيصه سي اولمايان، ديك بورونلا دري باشماقلار ايدي. اونلاري شهرلرده چكمه چيلره (باشماقچي) سيفاريش وئريرديلر. بو باشماقلاري ايراندان گتيريلميش توماج، مخمر و يا دريدن تيكيرديلر. اونلاري هم كيشيلر (مردانه باشماق)، هم ده قادينلار (زنانه باشماق) گئييردي.  باكي و آبشئروندا كيشيلر دابانسيز يونگول ياي چوستلاري گئييرديلر، دوبندي آدلانان بو آياق قابيلار يوفتدان (مئشيندن) تيكيليردي. اونلار ايكي ايپله باغلانير و گونده ليك آياق قابي حساب اولونوردو.  اون دوققوز عصرين سونو – ييرمي عصرين اولينده يئرلي آياق قابي آوروپادان گلن نؤوعلرله سيخيشديريلير. سونونجو شهرلرده يئرلي بورژوازييا آراسيندا، سونرا ايسه كند يئرلرينده ياييلماغا باشلادي. نتيجه ده، اون دوققوز عصرين سونوندا باشماقچيلارين سايي كسكين صورتده آزالدي. ميللي آياق قابي نين اساس ائلئمئنتلريندن بيري (هم كيشيلرده، هم قادينلاردا) ناخيشلي يون و پامبيق جورابلار ايدي. آذربايجاندا ائله بير يئر يوخ ايدي كي، اوردا جوراب گئيمه سينلر. اونلاري قادينلار توخويوردو، بونون اوچون هم قويون، هم ده دوه يونوندان ايستيفاده ائديرديلر. سويوق زونادا اوزون بوغاز و شيخ جورابلار، مولاييم ايقليمي اولان اوواليقدا ايسه قيسابوغاز جورابلار توخونوردو. جورابلار هم عادي، هم ده طنطنه لي گونلر اوچون نظرده توتولونوردو. بزكلي جورابلار ساتيشا گئديردي، اونلاري كند تصروفاتي محصوللارينا دييشيرديلر. قاراباغدا جورابلاري خالچا اورنامئنتي ايله (ناخيشييلا) توخويوردولار (اونلار  ” گبه جورابي “  آدلانيردي). گلينين جئهيزينه داخيل اولان جورابلارين گؤزلليگينه خوصوصي ديقت وئريرديلر. جورابلارين ان ياخشي نومونه لري نسيلدن نسله كئچيردي.  كيشيلرينكيندن فرقلي اولاراق، قادين جورابلاري عادتن پارلاق، چوخرنگلي اولوب گؤزل و مورككب رسملر و سيخ، دولغون رنگ آهنگييله زنگين ايدي. اكثر حاللاردا، كيشي جورابلاري بيررنگ و يا ساده ناخيشلي (اغ، قارا و س.) اولوردو. جورابلاري باغلاماق اوچون همين يون ايپدن قوتازلاري اولان باغدان ايستيفاده اولونوردو. باخماياراق كي، جورابلارين رئگيونلار اوزره موختليف نؤوعلري مؤوجود ايدي، اونلارين توخونما اوصوللاري بير-بيريندن سئچيلميردي. يالنيز ناخيش فرقله نيردي.           

 كؤچورن :‌آيدا بيات