مهستي گنجوي نين حياتي و ياراديجيليغي

۱۱- عصرين سونلاري ، 12- عصرين اوللرينده ياشاميش بؤيوك آذربايجان شاعيره سي مهستي گنجوي آذربايجان و موسلمان اينتيباهي نين پارلاق نوماينده سي اولماقلا اؤز شعرلرينده صنعتكار، شاعير، موغني و موطريب اوبرازلاريني ترننوم ائدن يئني شهر پئزيياسي نين تمثيلچيسي ايدي. مهستي هر شئيده بيرينجيليك قازانميشدير. او، ايلك مشهور آذربايجان شاعيره سي، ايلك شاهماتچي قادين، ايلك گؤركملي قادين موسيقيچيميز و چوخ احتيمال كي، ايلك قادين بسته كاريميزدير.

اونون ترجومه يي-حالي روايتلر و موعمالار هاله سينه بورونوب، شاعيره نين حياتي باره ده معلوم اولان فاكتلارسا هر حالدا همين دؤورون موسلمان جمعيتي نين آنلاييشيندا حددن آرتيق غئيري-عاديليگي ايله فرقله نير. البت كي، اگر بو فاكتلارا سؤزون حقيقي معناسيندا ياناشيلارسا. روايتلره اساسن، او، گنجه نين خرابات محلله سينده ياشاميش، واختيني قوناقليقلاردا، موسيقي و رقص مجليسلرينده كئچيرميشدير. اونون شئعرلرينده شراب و عشق دويغوسو ترننوم اولونور. شاعيره نين اثرلري ايچريسينده گنجه نين خرابات محلله سينده ياشايان گنج صنعتكارلارا، درزيلره، اَييريجيلره، قيزيل آختارانلارا و باشقالارينا حصر ائتديگي شئعرلر سيلسيله سي داها چوخ مشهوردور:

بنزر، درزي اوغلو، اوزون قمره،

سنه يوز مهستي دؤنر چاكره.

الينده كي ساپ تك يولوم دوشه كاش

شكر دوداغينا گونده مين كره.

 

يون اَييرن اوغلان منيم جانيمدير،

اونون زنخداني بير زيندانيمدير.

اونون دوداغيندان بوسه وئر، آللاه،

چونكي او دوداقلار جان درمانيمدير.

 

تورپاق اله يه نين من عاشيقييم،

ديليم گلمير آچيب سيرريمي دئيم.

او، تورپاق اله ييب قيزيل آختارير

من اليمده قيزيل اونو گزيرم.

پاپاقچي سئوگيليم شؤوق ايله باياق

تيكيردي الينده آتلازدان پاپاق.

هر پاپاغا يوز-يوز آفرين دئديم،

دؤردونه بيري ده بس ايدي آنجاق…

مهستي خانيمين ترجومه يي-حاليندا قطعي موعينلشميش صحيفه لر اولدوقجا آزدير. اونون ياراديجيليقي ايله ماراقلانانلار اوچون رافائل حوسئينووون شاعيره يه بؤيوك محبتله و يوكسك پئشكار اوستاليقلا قلمه آلديغي ” مهستي نئجه وارسا ” كيتابيني اوخوماغي مصلحت گؤررديك.

مهستي گنجوي تقريبن 1089 -جو ايلده گنجه شهرينده دوغولموش و عؤمرونون سونونا قدر بورادا ياشاميشدير. اونون اصل آدي منيجه ايدي، مهستي آديني ايسه اؤزونه ادبي تخلوص كيمي گؤتورموشدو. همين تخلوصون منشايي باره ده بير نئچه روايت واردير. بونلاردان بيرينده دئييلير كي، گويا سولطان سنجرله صؤحبتلريندن بيرينده منيجه اؤز موحيطينده هاميدان كيچيك و گؤرونمز اولدوغونو سؤيله يير. سولطان ايسه اونونلا راضيلاشماييب دئيير كي، ” تو، مه-هستي ” يعني، ” سن هاميدان بؤيوكسن ” ). و گويا ” مه-هستي ” – ” مهستي ” يه چئوريليب، اونون تخلوصو اولور. ديگر بير فرضييه يه گؤره، ” مهستي ” ” مه ” و ” ستي ” اولماقلا ايكي سؤزدن عيبارت و ” بؤيوك خانيم ” آنلامينا گلير. نهايت، باشقا بير احتيمالا اساسن، بو آد ” ماه ” و ” ستي ” ( ” آي خانيم ” ) سؤزلريندن دوزه ليب (نيظامي نين مهين بانوسو دا بونون آنالوقودور). مهستي ياخشي تحصيل آلميش و اثرلريندن ده گؤروندويو كيمي، آشاغيداكي شهر و ويلايتلرده اولموشدور: روم، مرو، بلخ، نيشاپور، هئرات، گنجه، خوراسان، ايراق، زوزن، آرران و س. بير مودت او، بؤيوك سولطان سنجرين ساراييندا ياشاميش، اونون قبوللاريندا و بورادا كئچيريلن ادبي مجليسلرده ايشتيراك ائتميشدير. دئييلنلره گؤره، سولطان سنجرين ديقتيني اونون گؤزله نيلمه دن ياغان قار حاقيندا بداهه تن سؤيله ديگي بير روباعي چكميشدير: ” گؤيلر سنه گوموشو خالچا گؤندريب كي، آتي نين نالي بولانماسين. ” سولطان بو روباعيني ائشيتديكدن سونرا شاعيره ني ” مه-هيستي ” ( ” ان بؤيوك ” ) آدي ايله موكافاتلانديرميش و اونو اؤز ياخين احاطه سينه قبول ائتميشدي. مهستي عؤمرونون چوخ حيصه سيني گنجه ده كئچيرميش، سولطان محمدين و اونون اوغلو سولطان ماحمودون ساراي حياتيندا ياخيندان ايشتيراك ائتميشدي.

بؤيوك شاعيره نين حياتي باره ده معلوماتلار اساسن اليازما نوسخه لري آذربايجان اليازمالار اينستيتوتوندا، ايستامبولدا و لوندوندا ساخلانان 13- عصره عاييد ائديلن ” مهستي و امير احمد ” داستانيندان گؤتورولور. آذربايجان ادبياتشوناسلاري نين سون تدقيقاتلاري گؤسترير كي، ” داستان ” ين مؤليفي اون اوچ عصرده ياشاميش آذربايجان شاعيري و عاليمي عبدوللا جؤوهري زرگر تبريزيدير و بوراداكي قهرمانلار، او جومله دن شاعير امير احمد، گنجه شاهي (سولطان محمد) و ايكي گنجه شاهي (سولطان ماحمود) رئال شخصيتلردير.

داستانين قيسا مضمونو بئله دير: بلخ شهرينده ياشايان بير ايلاهيات عاليمي نين قيزي اولور. او، اوشاغين طالعيينه باخديرماق اوچون مونججيملره موراجيعت ائدير. اولدوزلار قيزين بؤيوك گله جگيندن، خالقين رغبت و محبتيني قازاناجاغيندان خبر وئرير. همچنين معلوم اولور كي، قيزين طالعيي خراباتلا (ايچكي ايچيلن يئر، مئيخانا) ايله باغلي اولاجاقدير. آتاسي قيزي تربييه اولونماق اوچون مكتبه وئرير. اون سككيز ياشينا قدر بورادا اوخويان قيز ياخشي تحصيل گؤرور. بوندان سونرا آتاسي قيزيني موتخصيصلرين يانينا آپاراراق، اونا 12 موغامي و بونلارين 24 شؤعبه سيني اؤيرتمه لريني خواهيش ائدير. او، همچنين خواهيش ائدير كي، موسيقيچيلر قيزا چنگ، عود و بربد آلتلرينده چالماغي اؤيرتسينلر. جاماعات حئيرتله اوندان سوروشور: ” بو نئجه اولان شئيدير؟ سن اول قيزينا ياخشي تحصيل وئرير، اونا قورآني اؤيره ديرسن، سونرا ايسه اونو رقاصه ليگه حاضيرلاييرسان؟ يوخسا سن ايسته ييرسن كي، قيزين آزغين و اخلاقسيز اولسون؟ ” آتا جاواب وئرير كي، اگر اونون آلنيندا خراباتا دوشمك وارسا، قوي بونا دا حاضير اولسون. آتاسي نين وفاتيندان سونرا مهستي گنجه يه كؤچور و خرابات محلله سينده ياشايير.

داستاندان دا گؤروندويو كيمي، آرتيق 20 ياشيندا مهستي اؤز ساوادي، گؤزلليگي، ملاحتلي سسي و پوئتيك ايستئعدادي ايله موسلمان دونياسي نين بير چوخ اؤلكه لرينده نوفوذ و رغبت قازانميشدي. خراباتدا مهستي نين سسيني دينله مك اوچون اوزاقدان-ياخيندان هم عيانلار، هم ده تاجيرلر گنجه يه گليردي. داستاندا گنجه شاهي آدلانديريلان شهر حاكيمي ده مهستي نين سسي نين وورغونو ايدي.

اونو تئز-تئز سارايا دعوت ائديرديلر. نؤوبتي ضييافتلرين بيرينده شاه صاباحكي گؤروشون شرطلريني سؤيله يير: گئجيكن جريمه اولاراق اوچ بوينوز شراب ايچمه ليدير. ايش ائله گتيرير كي، مهستي گئجيكه سي اولور. او، شرطه تابع اولاراق، دال-بادال ايكي ايري بوينوزو دولدوروب ايچير. سونرا اوچونجو بوينوزو دولدورور، اوزونو شاها طرف توتوب بداهه تن شئعرله اونا موراجيعت ائدير كي، ائي شاه، من اؤكوز دئييلم و بوينوز منه ياراشماز. آنجاق اگر من حتّي اؤكوز اولسايديم بئله، ايكي بوينوز بسيم ايدي. بو شئعر شاهين او قدر خوشونا گلير كي، قييمتلي داش-قاشلا بزه ديلميش بو بوينوزو شاعيره يه باغيشلايير.

اوزون ايللرين اينتيظاريندان سونرا نهايت، گنجه خطيبي نين بير اوغلو اولور. اوشاغين آديني امير احمد قويورلار. اونو كؤرپه ليگيندن تربييه چييه وئرير، دؤرد ياشيندان ايسه مكتبه گؤندريرلر. امير احمد اؤزونو اولدوقجا باجاريقلي و ايستئعدادلي بير اوشاق كيمي گؤسترير و دوغما شهريندن بيرجه آدديم آرالانماسا دا، اونون كامالي نين شؤهرتي اوزاقلارا ياييلير. بير دفعه امير احمد يوخوسوندا گؤرور كي،جنّته دوشوب و بير هوري شراب دولو پيياله ايله اونو قارشيلايير. امير احمد شرابي نوش ائدير و همين آندان او هوري نين گؤزلليگي ايله مست اولور. سحر آتاسي گؤرور كي، امير احمد پريشاندير. اونون غوصه سيني داغيتماقدان اؤترو 400 آتلي گؤتوروب، گنجه ني گزمه سينه ايجازه وئرير. امير احمد محلله لرين بيريندن كئچنده موسيقي صدالاري ائشيدير و اؤيره نير كي، بورا خراباتدير. اوراداكي مئيخانه لردن بيرينده دؤرد موتككه نين اوستونده اوزانميش بير قيز گؤرور. بو، مهستي گنجوي ايدي. امير اونون يوخودا گؤردويو هوري اولدوغونو كسديرير. گنجلر بير-بيرينه عاشيق اولور و روباعيلرله شئعرلشيرلر.

همين گئجه ياتمازدان اول اوغلونون قورآن عوضينه روباعيلر اوخودوغونو گؤرن خطيب برك تعجوبله نير. خراباتدان قاييتميش اوغلونون داورانيشي اونو ناراحات ائدير. خطيب حتّي اونو حكيمه ده گؤسترير، سونرا ايسه ائولنديرمك قرارينا گلير. لاكين هئچ نه ين خئيري يوخدور. امير احمد دئديگيندن دؤنمور و تكباشينا خراباتا، مهستي نين يانينا گئدير. مهستي نين آناسي اونون كيمين اوغلو اولدوغونو بيلنده خوشاگلمز حاديثه باش وئره جگيندن قورخوب، اونو ائولرينه گؤندرمگي خواهيش ائدير. جاوانلارسا اونون سؤزلرينه محل قويمورلار. خطيب اوغلونو گئري قايتارماق ايسته يير و حتّي گنجه شاهينا شيكايت ده ائدير، لاكين اوغلان ايپه-ساپا ياتمير. بئله اولدوقدا آتاسي امير احمدين آردينجا اؤز آداملاريني گؤندرير. اونلار اونو توتوب، زيندانا آتيرلار. اوچ گون – اوچ گئجه آتاسي نين اخلاقا داير نصيحتلريني دينله ديكدن سونرا امير احمد اونون دئديكلرينه راضي اولدوغونو بيلديرير و آزادليغا چيخير. خطيب سئوينديگيندن زنگين بيرضيافت دوزلدير.ضيافت باشا چاتاندان و قوناقلار داغيليشاندان سونرا ايسه امير احمد باش گؤتوروب، يئنه خرابات طرفه گئدير.

امير احمد مهستيني بورادا 40 اينجه بئل قيزين احاطه سينده گؤرور. اونلار نئي، چنگ، دف چالير، اوخويور، رقص ائديرديلر. مهستي موسيقي درسي كئچيردي. بورادا او، آرتيق قارشيميزدا باشقا گؤرگمده دير-نينكي شئعر يازير، اوخويور، بير چوخ آلتلرده چالير، همچنين موسيقي و رقص درسلري ده كئچه بيلير.

او دؤورون موسيقي صنعتي و موسيقي موحيطي ايله تانيشليق اوچون داستاندا گنجه شاهي نين مهستي نين شرفينه وئرديگي ضيافتين تصويري ده ماراقليدير. بورادا موسيقي بير قايدا اولاراق، چنگده، عوددا، بربدده، ابريشيمده، نئيده و تنبوردا ايفا اولونور.

داها سونرا بيز داستاندان مهستي نين گنجه ده ان گوجلو شاهمات اوستاسي اولدوغونو اؤيره نيريك. همين قبولدا گنجه شاهي مهستي ايله شاهماتدا دا گوجونو سينايير. باشقا بير يئرده شاهين امير احمدله مرج گله رك، مين ديناردان شاهمات اويناماسي گؤستريلير. امير احمد قلبه چالير و شاه بورجونو قيزيل پوللا اؤده يير. بير دفعه مهستيني يئنه سارايا، گنجه شاهي نين حوضورونا چاغيريرلار. نه يه گؤرسه غضبلنميش حؤكمدار امر ائدير كي، مهستيني اؤكوز دريسينه بورويوب، زيندانا آتسينلار. آنجاق آلتي گوندن سونرا يئرلي عيانلارين خواهيشي ايله شاعيره ني زينداندان چيخاريرلار و او، غضبله شاهي ايفشا ائدن شئعرلر سؤيله يير.

باشقا بير يئرده قيش اووو زاماني شاعيره نين گنجه شاهينا قار حاقيندا بداهه تن شئعر سؤيله ديگي گؤستريلير. بو شئعرين مضمونو حاقدا يوخاريدا بحث ائديليب. شئعرين گؤزلليگيندن وجده گلن شاه شاعيره بير آت باغيشلايير. لاكين موستبيد شاه طلب ائدير كي، سئوگيليلر آيريلسينلار و مهستي كؤچوب بيريوللوق سارايدا ياشاسين. مهستي امير احمده تكليف ائدير كي، بلخ شهرينه قاچسينلار. اولجه شاعيره اؤزو اورايا گئدير. اونون گليشي شرفينه بلخين و بوتون خوراسانين شاعيرلري بورايا ييغيشير. شئعر ياريشي باشلانير. مهستي پوئتيك تاپماجا سؤيله يير. هئچ كيم اونو آچا بيلمير. ياريشين بو يئرينده هئچ كيمين تانيماديغي بير شخص پئيدا اولور و تاپماجانين جاوابيني گؤزل بير شئعرله سؤيله يير. هامي آنلايير كي، اونلارين قارشيسينداكي شخص امير احمددير.

داستانين سونوندا بيلديريلير كي، سئوگيليلر دوغما گنجه يه قاييدير، اؤز نيكاحلاريني رسمي شكيلده باغلاييرلار و بو نيكاحدان اونلارين ايكي اؤولادي اولور.

آتاسي اؤلدوكدن سونرا امير احمد گنجه نين خطيبي اولور. سونرا او اؤزو ده رحمته گئدير. مهستي امير احمدين اؤلومونه او قدر گؤز ياشي تؤكور كي، آخيردا گؤزلري توتولور. شاعيره اؤز سئوگيليسيندن سونرا جمعيسي ايكي ايل ياشايا بيلير.

داستاندا اونون نيظامي گنجوي نين يانيندا باسديريلديغي گؤستريلير. دوغرودان دا 1923-جو ايلده نيظامي نين مزاري شاه آبباس مسجيدينده باسديريلماقدان اؤترو چيخاريلاركن اونون يانيندا بير قادين جسدي ده تاپيلميشدير. آكادئميك آراسلي بو ايكي داهي شخصين ياشاديغي تاريخلري اوزلاشديرماق غئيري-مومكون اولسا بئله، اونلارين تانيشليغيني ايستيثنا ائتمير. او، حتّي نيظامي نين بير شئعريني ده ميثال گتيره رك، بو ميصراعلارين مهستييه ايتحاف اولوندوغونو احتيمال ائدير:

سنين صنعتين موسيقي چالماقديرسا،

من زيل و بم سسلري دينله مك ايسته ييرم

سورمه لي كيپريكلريني يانا دارتما

بير اوخ آت، گؤزله ييرم

بيليرسن كي، سنسيز ياشاماغا قودرتيم چاتمير،

اگر حياتيمي ايسته ييرسنسه، آل، سنه وئريرم.

گؤرورم، عبث يئره اوغورا اوميد باغلاميشام،

من سون نفسيمله سني چاغيريرام.

نيظامي اؤز جانيني سنه باغيشلايير-

قبول ائت، نئجه كي، من ايضطيرابلاري قبول ائديرم.

داستان اولدوقجا اَيلنديريجي بير ديلله يازيلميشدير. اونون ديلدن-ديله كئچن هر بير حيكايتي ماراقليدير. آنجاق بورادا دئييلنلرين هاميسي اينانديريجي دا دئييل. اوخوجو سانكي نيينسه آخيراجان دئييلمه ديگيني حيسس ائدير. بئله بير تصورات دا يارانير كي، مؤليف بير سيرا ترجومه يي-حال فاكتلاريني بيله ركدن گيزله دير، بونون عوضينده ايسه يالنيز همين دؤورده ياشايانلارين آنلاياجاغي ايشاره لرله دانيشير.

دوغرودان دا او زامان مؤحترم بير ايلاهياتچي نين نه واختسا خاراباتا دوشرسه، حاضيرليقلي اولماسي فيكري ايله اؤز قيزيني موسيقي و رقص درسلرينه گؤندرمه سي اينانديريجي سسلنمير. عئيني سؤزلري خطيب اوغلو امير احمد باره ده ده سؤيله مك اولار. يوكسك ايلاهيات تحصيلي آلان بو گنج مهستي نين آردينجا مئيخانالاري گزير. سولطان سنجرين ساراييندا حؤرمت-عيزت يييه سي اولان مشهور بير شاعيره نين گنج يون اَييريجيلرينه، پاپاقچيلارا، چؤركچيلره، درزيلره، قصابلارا، زرگرلره و ديگر سايسيز-حسابسيز صنعتكارلارا ائعلاني-عشق ائتمه سينه اينانماق ايسه داها چتيندير. سواللار بير-بيريني عوض ائدير.

لاكين اگر مهستي نين هانسيسا صوفي طريقتي نين عوضوو اولدوغونو و اونون ترجومه يي-حالي نين دا مجازلار اؤرتويونه بوروندويونو قبول ائتسك، هر شئي آيدينلاشار و اؤز يئريني آلار. معلومدور كي، صوفيلر اورتودوكسال موسلمان خاديملري نين تعقيبلريندن قورونماق مقصديله اؤز سؤزلريني چوخ زامان مجازي ديلله سؤيله ميشلر.

ياراديجيليغي

صوفيلر بئله حساب ائديرديلر كي، اينسان حياتي نين عالي مقصدي آللاها محبت اولماليدير. آللاها ميستيك محبت واسيطه سيله موعين وضعيتده-ائكستازدا (حال) اونا قوووشماق، سونرا ايسه اوندا اريمك ده مومكوندور. بو حالا چاتماق ايسه يالنيز موتمادي مشغله لر كئچميش، صوفي شئعرلريني ريتميك موسيقي آلتيندا دينله ميش ( بعضن رقصلرله ده موشاييت اولونان بو مراسيمي ” سما ” آدلانديريرديلار) طريقت نوماينده سينه نصيب اولا بيلردي. آكادئميك ي. ائ. بئرتئلسين يازديغينا گؤره، بو شئعرلر ائروتيك سجيييه لي دونيوي مضمونا، هابئله خوصوصي تئرمينولوگييا ايله قلمه آلينان صيرف صوفي مضمونا ماليك اولا بيلردي. هر ايكي حالدا بو شئعرلر ” ائكستاز حالينا دوشمگي آسانلاشديران ستيمول رولونو اوينامالي ايدي ” . صيرف صوفي شئعرلرينده آللاهين دركينه گؤستريلن عهدلر محبتله عئينيلشديريلير، آللاهين اؤزو دوست، يار آدلانديريلير. صوفي يا عاشيقه، ياخود رينده (عياشا) بنزه ديلير. همين تئرمينولوگييايا گؤره، صوفي نين ائكستاز وضعيتي مئيله سرمست اولماق، طريقت نوماينده لري نين جمعلشديكلري يئرسه خارابات، مئيخانه آدلانديريلير. صوفيلرين اكثريتي مسجيد عوضينه اؤز توپلانتيلارينا گئدير، حديثلر اوخوماغي خراباتدا شئعرلر دينله مك، شرقيلر سؤيله مك و رقص ائتمكله عوضله ييرلر. لوندوندا صوفي نئعمت اوللاهيلر جرياني نين اساسيني قويموش دوكتور جاواد نوربخش ” خرابات ” سؤزونو ” “Town of Ruins”" شكلينده ترجومه ائده رك، بو آنلاييش آلتيندا صوفيلرين توپلانديقلاري يئري نظرده توتور. او، يازير كي، بوتون بو تميزلنمه مرحله لريني كئچن صوفي كاميل اينسانا چئوريلير و حقيقتين آستاناسينا چاتير: ” حقيقت مقامينا بو سياحتي ” روحانيات اونيوئرسيتئتي ” نده، خراباتدا تحصيل آلماقلا عئينيلشديرمك اولار. بو حقيقي ” عالي تحصيل مركزي ” نده پروفئسسورلار يوخدور و يئگانه موعليم موطلق موقدس و كاميل عشقدير. بورادا يئگانه اوستاد دا عشقدير، درسليكلري ده عشق عوض ائدير، كاميل اينسانين اؤزو ده عشقدير. ” بونلاري بيلديكدن سونرا آنلاشيلير كي، روحاني آتا اؤز قيزي مهستيني نئجه بو خراباتا گؤندريرميشدير. بونلاردان خبردار اولمايان اوخوجو ميثال اوچون، صوفي شاعيره سي ربيعي نين (وف. 801) ائهتيراسلي عشقي و شراب مجليسيني ترننوم ائله ين شئعرينده آللاها موراجيعتي نئجه آنلايا بيلردي؟

من اؤز قلبيمده سني هم صؤحبت ائتمشم،

جيسميمي ايسه ايسته ينلره بخش ائتميشم.

جيسميم اونون ايختيياريندادير

قلبيم ايسه اورك همدميمين.

ياخود دا ابو-سعيد آدلي شاعيرين ميصراعلاريني گؤتورك:

ايلاهي! 0 گؤزل دوستا يئتمك اوچون منه يول آچ،

رواج وئر كي، اينيلتيلريم اونا چاتسين.

قوي هيجران گونلرينده اغيارلا اولان رفيقيم

يئنيدن منه گلسين، من ده اونا قوووشوم.

بو شئعيرلرده كي گيزلي معنالاري آنلاماق اوچون يوخاريدا حاقيندا بحث ائتديگيميز رمزلردن خبردار اولماق لازيم گلير. ” داستان ” اين مضمونونو دا ائله بئلجه درك ائتمك ضرورتي يارانير. دوغرودان دا صوفي آللئقوريياسيندان ايستيفاده ائتمكله ” داستان ” اين مضمونونا يئنيدن نظر سالاندا مهستي نين ترجومه يي-حالي داها اينانديريجي گؤرسه نير. البت كي، مهستينيي پوئزيياسي صوفي سجيييه سي داشيييرمي؟-سوالينا جاواب وئرمك موتخصيصلرين ايشيدير، لاكين ” داستان ” اين مهستي ياراديجيليغينا صوفي مضمون وئرديگي شوبهه دوغورمور. ائله اوندان باشلاياق كي، شاعيره نين دوغوم يئري بيله ركدن اينديكي ايرانين شيمال-شرقينه-ائركن صوفيزمين مركزينه دوغرو چكيلميش-دير. ايلكين صوفي موقدسلريندن ابو سعيد ابن ابوالخئير و روباعي ژانري نين گئنيش ياييلماسيندان اؤترو بؤيوك ايش گؤرموش شاعير-عاليم عؤمر خييام دا بو يئرلردن چيخميشلار. مشهور صوفي شاعيري جلالددين رومي و ديگر مشهور صوفيلر ده بورادا دونيايا گلميشلر.

اوخوجونو سانكي ايره ليجه دن خبردار ائديرلر كي، مهستي نين ده ياراديجيليغي محض همين قبيلدندير و ” داستان ” دا صوفي دئييم طرزينه خوصوصي ديقت يئتيريلمه ليدير. اصيلزاده ايلاهياتچي، قيزيندا غئيري-عادي پوئتيك ايستئعداد و موسيقي قابيليتي اولدوغونو گؤردوكدن سونرا اونو اؤز يولو ايله گئتمه يه ايستيقامتلنديرير. او، مونججيملرله ده مصلحت ائدير. مونججيم قيزي محض صوفي جمعيتينده بؤيوك گله جك گؤزله ديگيني بيلديرير. بو اؤن گؤرمه ني شوبهه آلتينا آلماق، مونججيمين مودريكليگينه شكك گتيرمك چتيندير-بئله كي، او دؤورده قادينلار اؤزلريني يالنيز صوفيلر آراسيندا نيسبتن سربست حيسس ائده بيلرديلر. تانينميش اينگيليس عاليمي تريمينگئمين ده يازديغي كيمي، ” ميستيسيزم روحانيات عالمينده يئگانه ساحه ايدي كي، قادين بورادا اؤزونو گؤستره بيلردي. صوفي قادينلار آز دئييلدي و ربيعييه ال-ادويييه بونلار آراسيندا داها چوخ تانينميشدي. ” ” داستان ” مؤليفي نين خرابات آدي آلتيندا صوفي توپلانتيلاريني نظرده توتماسي مهستي نين آشاغيداكي ميصراعلاريندان دا گؤرونور:

خراباتدان چيخان بير آي اوجالدي،

فلگين داميندا بير چادير سالدي.

غفلتن اوجالدي هاتيفدن بير سس:

” بو دونيا بير سامان چؤپونه ديمز. ”

 

كؤنولسوز خرابات ايچره سن گلمه،

درويشليك رمزيني بيلمزسن، گلمه،

باشيندان كئچه نين يولودور بو يول،

بو يولدا چين قوربان وئرمه سهن، گلمه!

 

خرابات-يئريدير ايگيد ارلرين،

بوردا يئري يوخدور بدگؤهرلرين،

حؤرمتله قدم قوي بو يولا، چونكي

يئري دئييل بورا حيله گرلرين.

خراباتين صنعتكار محلله سي كيمي تصوير اولونماسينا و مهستي نين اؤز شئعرلرينده يارا-آللاها دئييل، موختليف صنعت صاحيبي اولان (درزي، زرگر، پاپاقچي و س.) گنج صنعتكارلارا عشق ائعلان ائتمه سينه گلينجه، بو فاكتلار شاعيره نين هانسيسا صنعتكارلار مكتبينه منسوبلوغوندان و مومكوندور كي، اورادا قبول ائديلميش مخصوصي سيمووليكادان خبر وئرير.

بئله مكتبلردن بيري نيظامي نين ده داخيل اولدوغو تورك اخيلر تشكيلاتي ايدي كي، صوفيلره ياخينليغي ايله مشهوردور. عرب سياحي ايبن بطوطه اخيلر باره ده يازير: ” اونلار بوتون توركمن و روم ويلايتلرينده، هر كندده، هر شهرده ياشاييرديلار. و دونيادا غريبلره اونلار قدر جان يانديران، آجلاري دويورماق اوچون اونلار قدر چاليشان، احتيياج چكنلرين دردينه اونلار قدر قالان، ظاليملارين اللريني كسن، حربي رهبرلر آراسيندا ظولمه يول وئرنلري اؤلدورن آداملار تاپماق مومكون دئييل. گنجلر، سوبايلار و تنها آداملار آراسيندان اؤز آداملاريني سئچن شخصلره اخيلر دئييرلر. ”

بئله ليكله معلوم اولور كي، گنج صنعتكارلارا حصر اولونموش شئعرلر مخصوصي اولاراق صوفي مجليسلرينده ايفا ائديلمك مقصديله يازيلميشدير و صؤحبت بيزيم آنلاديغيميز معنادا محبتدن گئتمير. همين شئعرلرين اكثر قيسمي دونيوي آنلام داشييير و يالنيز بير نئچه سينده صوفي ايصطيلاحلاريندان ايستيفاده ائديلير. بورادا خاطيرلاماق يئرينه دوشر كي، مهستي نين سلفلريندن اولان قطران تبريزي ده اؤزونون صوفييانه شئعرلرينده يار-آللاه عوضينه مدح ائتديگي حاكيملره اوز توتوردو. زومرود خانيم قولوزاده نين ده يازديغي كيمي، ” شاعير تئز-تئز حؤكمدارلارين فيزيكي گؤزلليگيني – آل دوداقلاريني، نرگيز گؤزلريني، خاللاريني، بنؤوشه يه بنزر زولفونو ترننوم ائدير، اونلارا بسله ديگي اينجه و چيلغين سئوگيدن سؤز آچير، اونلارلا آيريليغين درديندن، ووصالين خوشبختليگيندن دانيشير. ”

اگر ائركن صوفيزم اساس ائعتيباريله بي نصيبلرين رغبتيني قازانميشديسا، فئودال ضياليلاري دا بو طريقتين آزاد دوشونجه تلقين ائدن فلسفه سي جلب ائديردي. ” داستان ” دا همين پروسئس مهستي و امير احمدين خراباتا گليشي ايله ايفاده ائديلير. ماراقليدير كي، امير احمدين ده خراباتا گليشي مهستي نينكي كيمي فؤوق طبيعي قوووه لر طرفيندن موعينلشديريلير. اونلارين بيرينه بو طالع مونججيم واسيطه سيله بيلديريليرسه، او بيرينه يوخودا ايكن ملكلر طرفيندن بوتا وئريلير. ديگر بير ائپيزوددا اونون خراباتا گليشي محض طالعيين حؤكموندن باشقا بير شئي اولماديغيني گؤسترير. آتاسي ايله موباحيثه ائدن امير احمد اونونلا شرط كسير كي، اونو الي-قولو باغلي هئچ واخت خرابات يولونو گئتمه ميش، هميشه اونو مدرسه و مسجيده آپارميش دوه يه مينديرسينلر. اگر دوه مسجيده طرف گئتسه، امير احمد خراباتدان اوز چئويره جك، يوخ، خراباتا طرف اوز توتسا، دوه ني ساتاجاق و بو پولا خراباتدا مجليس قوراجاقدير. دوه خراباتا طرف يؤنه لير. امير احمد دوه ني ساتديغي قيزيل پوللارا صوفي مجليسي قورور. همين ائپيزوددا صوفيلرين ديندارلارلا آپارديقلاري ابدي موباحيثه اؤز عكسيني تاپير-اصل موسلمان هارا اوز توتماليدير – مسجيده، يوخسا خراباتا (صوفي مجليسين)؟ فوضولي يازيردي: ” مسجيده گئديب، ناماز اهلي نين خلقه ائتديگي موعيظه لره قولاق آسماق ايستميرم. ياخشيسي بودور كي، خراباتا، مئيخانايا گئديم، اورادا ساقيني تاپا بيلرم. ” ياخود:

زاهيد، مئيي-نابدندير ايكراه غلط!

سن خواه صحيح توت، خواه غلط.

مسجيدلره گيرديگيم دئگيل رغبتدن

سرمستليگيمدن ائيلرم راه غلط.

ديگر آذربايجان شاعيري، صوفي فلسفه سي ايله مشغول اولان حبيبي خراباتي اؤزونون دوستو، كؤنول باغچاسي نين چيچگي، روحو آدلانديرير، خاراباتدان خواهيش ائدير كي، ” بير قدح شرابلا اونو سرمست ائتسين ” ، ” ووصالا قوووشدورسون ” . خراباتين عادي بير مئي ائوي، صنعتكار محلله سي دئييل، صوفيلر مجليسي اولماسي ” داستان ” ين باشقا بير ائپيزودو ايله ده تصديق ائديلير. امير احمدي خراباتدان قايتارماقدان اؤترو اونون اصيلزاده عميسي پير عوثمان گلير. امير احمد شرط قويور كي، اگر عميسي بير جام شراب ايچرسه، او، خراباتي ترك ائده جك. مجبور قاليب بير جامي ايچن پير عوثمان آرتيق اؤزونو ساخلايا بيلمير، ايكينجي،اوچونجونو ده ايچير و خراباتي مست حالدا ترك ائدير. بوندان سونرا اونو تانيماق مومكون دئييل. او، خراباتين دايمي ساكينينه چئوريلير. شوبهه يوخدور كي، بورادا پير عوثمانين صوفي گؤروشلري تصوير ائديلير، بو، مستليك محض معنوي ماهيت داشيديغيندان، داستاندا سرمست اولماق دئييلديكده روحي ائكستاز نظرده توتولور. عؤمر خييامي خاطيرلاياق

منه ائله گليردي كي، ناماز و اوروجدا

بوتون گوناهلاردان خيلاص اولماق يولونو تاپميشام.

لاكين تصادوفن ووضو ائتمگي اونوتدوم

بير قطره شراب ايچديم و اوروجوم باطيل اولدو.

صوفي ايجماعلاريندا پير و شئيخ (مورشيد) دئديكده نوفوذلو مودريكلر نظرده توتولوردو. گؤرونور، امير احمدين عميسي عوثمانا ” پير ” آديني صوفيلرين بوتون مقام و مرتبه لريني كئچه رك مورشيد سويييه سينه يوكسلديكدن سونرا وئرميشلر. مهستي خانيمين ياراديجيليغيندا ائله شئعرلر ده وار كي، او، هر جور سيمووليكاني توللاياراق، اؤز سئوگيليسينه بسله ديگي اولوي حيسسلردن سؤز آچير:

من، ائي خطيب اوغلو، سنه جانانام

بيل، اؤلونجه سنه صاديق اينسانام.

اؤلمه يه حاضيردير يولومدا چوخو

منسه ايسته ييرم عشقينله يانام.

امير احمده بسله نن سئوگي ابدي عشقين ان يوكسك پيلله سيدير. شاعيره يه گؤره، بو عشق ابدي محبتين مئعياريدير. آنجاق اونون نظرينده بوندان دا اولوي بير سئوگي مؤوجوددور. بو – دوست، يار، درويش، فقير، قصاب، ياخود اخي طريقتينه منسوب ديگر گنج صنعتكار اوبرازلاري نين شخصينده رمزله شن ايلاهي محبتدير. شاعيره نين اؤزونون ده قئيد ائتديگي كيمي، بو، ” خطيب اوغلونا بسله نن محبتدن ايكي مين مرتبه آرتيقدير ” ، خوصوصيله ده بندني آللاها ياخينلاشديران ” سرمست (ائكستاز) وضعيتده. ” داستان ” اين سونو دا تيپيك صوفي سجيييه داشييير. مهستي اؤز ياري نين اؤلومونه او قدر گؤز ياشي تؤكور كي، كور اولور و اؤلور. احتيمال اولونور كي، اونو زمانه سي نين داهي شاعيري و بؤيوك شئيخي نيظامي گنجوي نين يانيندا دفن ائديرلر. مهستي نين صوفي طريقتينه منسوبيتينه داير بيرباشا منبعلر يوخدور، اونون اكثر شئعرلري ايسه او قدر طبيعي و رئاليستجه سينه يازيلميشدير كي، حتّي نه قدر ايسته سن ده اونلاردا هانسيسا گيزلي معنالار تاپماق مومكون دئييل. بعضن ايسه شاعيره اؤزونون صوفيزمه عاييدليگي باره ده آز قالا آچيق ايشاره لر وورور:

بير اليميزده قدح، بيرينده قورآن

گاه آييق اولوروق،گاه سرخوش.

بيز بو فاني دونيادا كيميك؟

كافير دئييليك، آما حقيقي موسلمان دا دئييليك.

آزاد محبته، شراب و رقص مجليسلرينه چاغيريش، خوصوصيله ده بو چاغيريشين قادين ديليندن ائشيديلمه سي دي نين ايجتيماعي حياتين بوتون ساحه لرينده حؤكمرانليق سوردويو همين دؤورلرده حتّي اؤزونون صوفي آنلاميندا بئله حاكيم ديني احكاملارا و دؤولتين شخصيت آزادليغينا گؤسترديگي تضيق سيياستينه قارشي گيزلي بير ائعتيراض دا ساييلا بيلردي.

مهستي گنجوي نين حياتي و ياراديجيليغي

مهستي گنجوي نين خالق شئعري طرزينه ياخين فورمالي روباعيلري و اؤز فلسفي ماهيتي ائعتيباريله درين مضمونلو شئعرلري آذربايجان و عومومن شرق پوئزيياسي تاريخينده مؤهوم رول اويناميشدير. بير چوخ تدقيقاتچيلار مهستي نين روباعيلريني عؤمر خييام مكتبينه عاييد ائديرلر. بونا باخماياراق، چاغداش ادبياتشوناسلارين اكثريتي نين فيكرينجه، شاعيره اساسي قطران تبريزي و عيزالدين شيرواني طرفيندن قويولموش آذربايجان شئعر مكتبي نين عنعنه لريندن بهره لنميشدير.

قايناق: ويكيپئديا

كؤچورن : آيدا بيات

كيتاب تانيتيمي :

مهستي گنجوي.

روباعيلر

” ليدئر نشريات ” ، باكي، 2004، 144 ص.، تيراژي 25000.

 

 

PDF yüklə

 

كيتابدا كلاسسيك آذربايجان ادبياتي نين قودرتلي نوماينده سي مهستي گنجوي نين موختليف منبعلردن گؤتورولموش روباعيلري توپلانميشدير. بو روباعيلر دؤورونون هومانيست پوئزيياسي – خاقاني، نيظامي ياراديجيليغي ايله ياخيندان باغلي اولماقلا دونيوي حيسسلر ترننوم ائدير، اينساني، اونون گؤزلليگيني، آرزو و ايستكلريني ايفاده ائدير، اونون حيات عشقي نين، رنگارنگ دويغولاري نين پوئتيك ايفاده سي كيمي اؤزونو گؤسترير.