+0 به یه ن
اوغوز ائلي نين خانيملاري
يازان : كامران علي يئو
” دده قورقود “ ائپوسو بيزه بللي اولان بوتون قهرمانليق و وطنپرورليك مضمونو ايله بيرگه قالين اوغوز ائلي نين دوشونجه سيستئميني ده كيفايت قدر نوماييش ائتديرير. آما مسله اوندا دئييل كي، هر بير فولكلور نومونه سي، ياخود فولكلور آبيده سي خالق تفكورونون جانلي اينعيكاس فورماسيدير، هم ده معنا و مطلب اوندادير كي، خالق تفككورونون قورويوجوسو اولان ائپوس متني خالقين همين متنده آچيق شكيلده ايفاده ائده بيلمه ديگي بير سيرا فيكيرلرين ده موحافيظه مكانيدير.
” دده قورقود “ ائپوسوندا قهرمان اوغوز ايگيدلري ايله ياناشي داها قاباريق فورمادا گؤرونن و بعضي مطلبلرين ايدئيا داشيييجيسي اولان قادين اوبرازلاري دا واردير. اونلاردان اوچونون آدي آچيقجا بلليدير: بورلا خاتون، بانوچيچك، سئلجان خاتون. بير نئچه سي نين ايسه آدي دئييلمه سه بئله همين قادينلارين دا ائپوسون استروكتورونداكي يئري و مؤوقئعيي آيدينجا سئزيلير. بو سيرايا ديرسه خانين، دلي دومرولون و سيرگين خانيملاري داخيلدير. بس موختليف بويلاردا نقل ائديلن حاديثه و احوالاتلارلا باغلي اولان بو خانيملار ائپوسون متنينده اؤز فونكسييالاري موقابيلينده نئجه تصوير و تقديم اولونورلار؟
سايجا بيرينجي اولان ” ديرسه خان اوغلي بوغاج “ بويوندا سون درجه قايغيلي گؤرونن و جيدي ناراحاتليق كئچيرن ديرسه خان اؤز خانيميني بئله وصف ائدير:
” برو گلگيل، باشوم بختي، ائووم تختي!
ائودن چيقوب يوريينده سلوي بويلوم!
توپوغيندان سارماشاندا قارا ساچلوم!
قورولو يايا بنزر چاتما قاشلوم!
قوشا بادام سيغمايان تار آغيزلوم!
گوز آلماسينا بنزر آل ياناقليم! “
بو تصوير بير اوغوز خانيمي، ياخود كونكرئت اولاراق بو خانيمين گؤزلليگي باره ده تام و بيتكين تقديماتا برابردير. باشقا سؤزله، همين پوئتيك پارچادا ديرسه خانين خانيمي نين اعجازكار بير پورترئتي جيزيلميشدير. آداما ائله گلير كي، شرطي اولاراق جيزيلان پورترئتده خانيمين سرو بويو، قارا ساچي، چاتما قاشي، دار آغزي و آل ياناغي آچيقجا گؤرونور. حتّي ديرسه خانين خانيمي نين قيرخ اينجه بئللي قيزلا اوغلونون آختاريشينا چيخماسي فاكتيني دا نظره آلساق، بو حالدا ” اينجه بئل “ ايفاده سيني ده هئچ بير ترددود ائتمه دن اونون وصفينه عاييد ائتمك اولار. فولكلور عنعنه سينه گؤره بو تصوير متنين هانسي حيصه سيندسه تكرار ائديلمه ليدير و ائله بئلجه ده اولور. ثوبوت اوچون قازان خانين خانيمي بورلا خاتونون تصويرينه ديقت يئتيرمك كيفايتدير:
” بويي اوزون، بئلي اينجه بورلا خاتون بوينيله قولاغين آلدي، دوشدي.
گوز آلماسي كيبي آل ياناغين توتدي، ييرتدي.
قارغو كيمي قارا ساچيني يولدي ” .
ائپوسون متنينده باشلانان تصوير عنعنه سي، ياخود ايكي اوغوز خانيمي نين – ديرسه خانين قاديني نين و بورلا خاتونون ظاهيري باخيمدان اوخشارليغي آچيق-آيدين حيسس ائديلير: اوجا بوي، اينجه بئل، آل ياناق، قارا ساچ. ساده جه اولاراق، ديرسه خانين خانيمي نين تصويرينده اولان ” چاتما قاش “ و ” دار آغيز “ ايفاده لري بورلا خاتونون تقديماتيندا يوخدور. ديرسه خانين خانيمي نين تصويري ايله بورلا خاتونون تصويري نين موقاييسه سينده اورتايا چيخان بو فرقليليك ( ” چاتما قاش “ و ” دار آغيز “ ايفاده لري نين اولماماسي!) بورلا خاتونون تصويري نين ناتامامليغي دا دئمك دئييل. يعني بو تصويرلر ايكي اوغوز خانيمي نين بير-بيري ايله ظاهيري اوخشارليغيني سوال آلتينا سالمير و اونلارين بنزييشينه قطعييين خلل گتيرمير. يعني ديرسه خانين خانيمي نين دا، بورلا خاتونون دا تقديمينه عاييد اولان هر ايكي متنه بير سؤيله ييجي نين دانيشيغي، ياخود بير سؤيله ييجي نين ايفاسي كيمي باخماق داها دوغرودور.
آما همين نومونه لرده نظره چارپاجاق و جيدي خاراكتئرده اولان فرق ده آچيق-آشكار گؤرونور. بو اساس و اهميتلي فرق ايسه ظاهيري ائففئكته عاييد اولسا بئله داها چوخ داخيلي مضمون و ماهيت داشييير. صؤحبت بورلا خاتونون آدي نين قارشيسيندا بوتون متن بويو ايشله ديلن ” بويو اوزون “ ايفاده سيندن گئدير. هم موقاييسه، هم ده آيدينليق اوچون قئيد ائدك كي، بورلا خاتوندان فرقلي اولاراق سئلجان خاتونون آدي نين قارشيسيندا ايشله ديلن ” ساري دونلو “ ايفاده سي كيفايت قدر دايانيقلي و ثابيت دئييل. بئله كي، ” قانلي قوجا اوغلو قانتورالي “ بويوندا 5 دفعه ” ساري دونلو سئلجان خاتون ” ، 5 دفعه ” ساري دونلو قيز ” ، 10 دفعه ايسه آيريجا اولاراق ” سئلجان خاتون “ ايفاده سينه راست گلينير. آما ” بويو اوزون بورلا خاتون “ ايفاده سي ” ديرسه خان اوغلو بوغاج “ بويوندا 4 دفعه ، ” قازان بگ اوغلي اوروز بگين توتساق اولديغي “ بويدا ايسه 3 دفعه عئيني فورما و قليبده تكرار ائديلير. حتّي بو مسله ايله باغلي داها ماراقلي جهت ” قام بؤره نين اوغلي بامسي بئيرك “ بويوندا موشاهيده اولونور. بورادا دا ” بويو اوزون بورلا خاتون “ ايفاده سينه عئينن اولكيلر كيمي بير يئرده راست گلينير. سونرا ايسه 2 مقامدا بورلا خاتون آدي ” بويو اوزون “ ايفاده سيندن تجريد اولونور و بو، او زامان باش وئرير كي، قازان خان اؤز بيليگيني بير گونلوك بئيره گه حواله ائتميشدير.
بئله ليكله، تام تصديق ائديلير كي، ” بويو اوزون بورلا خاتون “ موراجيعتينده سؤيله ييجي نين مسله يه آچيق و بيرباشا موناسيبتي قاباريق شكيلده اؤزونو گؤسترير و ” اوجا بوي “ معناسيني وئرن ” بويو اوزون “ ايفاده سي قازان خانين خانيمي و باياندور خانين قيزي بورلا خاتونون بيرينجي خانيم استاتوسونا ماليك اولماسينا ايشاره دير. يعني بورلا خاتونون آدي نين قارشيسيندا ” بويو اوزون “ ايفاده سي نين آرديجيلليقلا و سيستئملي شكيلده ايشله ديلمه سي تصادوفي سجيييه داشيمير و متنده كي تصويري چالار بورلا خاتونون هم عاييله ده كي ، هم ده جمعيتده كي مؤوقئعييني كيفايت قدر سرراست ايفاده ائدير.
بس بانوچيچگين و سئلجان خاتونون تصويري، ياخود تقديمي نئجه دير؟ بو مقامدا بئيرگين بانوچيچه يه اوز توتوب سؤيله ديكلريني خاطيرلاياق:
” قارغو كيبي قارا ساچين يولدينمي، قيز؟!
قارا گؤزدن آجي ياش دؤكدينمي، قيز؟!
گوز آلماسي كيبي آل ياناغين ييرتدينمي، قيز؟! “
بئيرك حقيقتي بيلمك اوچون بانوچيچگه وئرديگي سواللاري تصويرين آلت قاتيندا يئرلشديرير. يعني بانوچيچگين قارا ساچلي، قارا گؤزلو، آلما كيمي آل ياناقلي اولماسي سوالدان قاباق و آچيق-آيدين گؤرونور. ماراقليدير كي، بانوچيچك ده محض بو سواللارين موقابيلينده بئيره گه عونوانلاديغي تصديق ائديجي جاوابيني محض اؤز تصويري نين آلتيندا گيزلتمه لي اولور:
” قارغو كيبي قارا ساچوم يولدوغوم چوق.
گوز آلماسي كيبي آل ياناغيم ييرتديغيم چوق ” .
بانوچيچگين تصويرينده عنعنه دن گلن، يني ديرسه خانين خانيمي نين و بورلا خاتونون تصويريندن سييريليب قالان بعضي مقاملار تكرار ائديلير. آما بو تصويرده ” سرو بوي ” ، ” چاتما قاش ” ، ” دار آغيز “ ايفاده لرينه راست گلينمير.
سئلجان خاتونون تصويرينه گلديكده ايسه قانتورالي اونون گؤزلليگي حاقيندا آشاغيداكيلاري سؤيله يير:
” يالاب-يالاب يالابيينان اينجه تونلوم!
يئر باسميييب يوروين،
قار اوزرينه قان تامميش كيبي قيزيل ياناقليم!
قوشا بادام دار آغيزلوم!
قلمچيلر چالديغي قارا قاشليم!
قورماسي قيرق توتام قارا ساچليم! “
آرتيق بورادا بانوچيچكله موقاييسه ده ” آل ياناق ” ، ” دار آغيز ” ، ” قارا قاش ” ، ” قارا ساچ “ ايفاده لري برپا اولونور، حتّي بئله دئمك مومكونسه، ديرسه خانين خانيمي نين تصويرينه ده تام ياخينليق حيسس ائديلير. آما ايستر ديرسه خانين خانيمي نين، ايستر بانوچيچگين، ايسترسه ده سئلجان خاتونون تقديمينده بورلا خاتونا عاييد اولان ” بويو اوزون “ ايفاده سيندن اولدوغو كيمي ايستيفاده يه سون درجه احتياطلي ياناشيلميش، اصلينده ايسه همين ايفاده ايستيفاده سيز قالميشدير. بو ايسه، شوبهه سيز، بورلا خاتونون استاتوسو ايله باغلي مسله دير.
تحليللر گؤسترير كي، اوغوز ائلي نين خانيملاري نين تصويرينده موشاهيده اولونان پارلاق بير تشبئه موعين فرقلرله هميشه تكرارلانير و بوتون خانيملارا عاييد ائديلير. بو، آلما ياناقلا باغلي اولان مشهور تشبئهدير:
1. ” گوز آلماسينا بنزر آل ياناقليم! “ – بو، ديرسه خانين خانيمينا عاييددير.
2. ” گوز آلماسي كيبي آل ياناغين توتدي، ييرتدي “ – بو، بورلا خاتونا عاييددير.
3. ” گوز آلماسي كيبي آل ياناغين ييرتدينمي، قيز؟! “ – بو، بانوچيچگه عاييددير.
4. ” قار اوزرينه قان تامميش كيبي قيزيل ياناقليم! “ – بو، سئلجان خاتونا عاييدير.
احتيمال ائتمك اولار كي، خانيملارين ياناغي نين بعضاً گوز (پاييز) آلماسي، بعضاً ده قيشدا قار اوزرينه دامميش قانلا موقاييسه سي مؤوسومي خاراكتئرله باغليدير. يعني سؤيله ييجي نين متني پاييزدا، ياخود قيش آيلاري نين بيرينده سؤيله مه سيندن ايره لي گلميشدير.
بئله ليكله، اوغوز ائلي خانيمينا عاييد تصويرين ائتالون واريانتيني برپا ائتمك اولار:
” برو گلگيل، باشوم بختي، ائووم تختي!
ائودن چيقوب يوريينده اينجه بئللي، بويو اوزون، سلوي بويلوم!
توپوغيندان سارماشاندا قورماسي قيرق توتام قارغو كيبي قارا ساچلوم!
قلمچيلر چالديغي، قورولو يايا بنزر قارا قاشلوم، چاتما قاشلوم!
قوشا بادام سيغمايان تار آغيزلوم!
گوز آلماسينا بنزر، قار اوزرينه قان تامميش كيبي آل، قيزيل يانانقليم! “
يئني بير سوال مئيدانا چيخير: بس بو تصويرلر ائپوسون پوئتيكاسيندا هانسي آندا، هانسي مقامدا مئيدانا چيخير؟ بري باشدان قئيد ائدك كي، همين تصويرلر خوش احوالي-روحيييه وضعيتلريني خاطيرلاتسا دا، اصل حقيقت تاماميله بامباشقادير.
ايلك بويدان بللي اولور كي، ديرسه خان ديگر اوغوز بيلري ايله بيرليكده بايوندور خانين مجليسينه گليبدير. آما بورادا گؤزله نيلمز حاديثه باش وئرير: ديرسه خاني قارا اوتاغا آپاريرلار و بئله ليكله، آغ و قيرميزي اوتاقدا اوتوران بيلرله موقاييسه ده ديرسه خان بير نؤو تحقير ائديلير. سبب ايسه اونون اؤولادي نين اولماماسيدير. مسله نين جيديليگي اوندان عيبارتدير كي، ديرسه خانين اؤولادسيزليغي ايندييه قدر يادا دوشمه ديگي اوچون هئچ بير واختدا ناراحاتچيليق تؤرتمه ميشدير. ديرسه خانين اؤولادسيزليغي نين قاباريق شكيلده اوزه وورولماسي نورمال گؤرونن وضعيتي تاماميله دييشير و ديرسه خان حياتلا اؤلوم آراسيندا قالير. محض بئله بير واختدا – حياتلا اؤلومون موباريزه سي سون درجه كسكينلشديگي زامان ديرسه خان خانيمي ايله قارشيلاشير و يوخاريدا خاطيرلاديغيميز تصوير اونون اؤز ديليندن سؤيله نير: ” برو گلگيل، باشوم بختي، ائويم تختي… “
قازان خانين خانيمي بورلا خاتونا گلديكده ايسه معلومدور كي، او، كافيرلر طرفيندن اسير گؤتورولور. شؤكلو مليك اسيرليكده اؤزونو گيزله دن بورلا خاتونون 40 اينجه بئل قيز ايچريسيندن تاپيليب موعينلشديريلمه سي اوچون تاپشيريق وئرير كي، اوروزون اتيندن قووورما بيشيريب قيزلارين قارشيسينا قويسونلار، هر كيم يئمه سه ، او، بورلا خاتوندور. دئمه لي، بورلا خاتون (داها گئنيش معنادا قازان خان و اوغوز ائلي!) حياتلا اؤلوم آراسيندا قالير. محض بئله بير واختدا اونون گؤزلليگي نين تصويري و تقديمي مئيدانا چيخير: ” بويي اوزون، بئلي اينجه بورلا خاتون بوينيله قولاغين آلدي، دوشدي ” .
ياخود بانو چيچگين تصويري نين واختي و زاماني او آنا دوشور كي، بانوچيچگي باشقا بيريسينه اره وئريرلر و 16 ايل اسيرليكده قالان بئيرك توي مراسيمينه گليب چيخير. اصلينده توي مراسيمي بئيركله بانوچيچگين حياتلا اؤلوم آراسيندا قالماغي دئمكدير. بو قارشيلاشما گئنيش معنادا دوغرو ايله يالانين قارشي-قارشييا گلمه سيدير و اوغوز ائلي اوچون حلل ائديجي مقامدير. محض ائله بو مقامدا دا بئيرگين ديليندن بانوچيچگين تصويري وئريلير: ” قارغو كيبي قارا ساچين يولدينمي، قيز؟! “
و ياخود قانتورالي ايله سئلجان خاتون عاييد اولدوقلاري بويون آخيريندا اوز-اوزه گليرلر. حتّي ايكي سئوگيلي نين بير-بيري ايله ووروشماق مقامي دا يارانير. باشقا سؤزله، اونلارين هر ايكيسي حياتلا اؤلوم آراسيندادير. محض ائله بو واخت قانتورالي نين ديليندن سئلجان خاتونون تعريفي ائشيديلير: ” قار اوزرينه قان تامميش كيبي قيزيل ياناقليم! “
خاطيرلاداق كي، هم دلي دومروللا خانيمي، هم ده سيركله خانيمي آراسيندا دا حياتلا اؤلومون سرحددي گؤرونور. بئله كي، دلي دومرول اؤلوم قاباغي خانيمي ايله حالاللاشماق ايسته يير، سيرك ايسه خانيميني گردكده قويوب قارداشيني خيلاص ائتمگه، بير نؤوع اؤلومه گئدير. يعني هر ايكي مقام حياتلا اؤلوم آراسيندا قالماق مقاميدير. ايندي نتيجه چيخارماق اولار كي، دلي دومرولون دا، سيرگين ده اؤز خانيميني تصوير ائتمك، تعريفله مك اوچون بديعي شراييط وار ايميش، آما اونلار بو شراييطدن ايستيفاده ائتميرلر. ندنسه، سؤيله ييجي ده بئله بير شانسي الدن اؤتورور.
اوچونجو سوال: بس بو خانيملار اصلا كيملري تمثيل ائديرلر و اونلار هارادان اوغوز ائلينه گلين گلميشلر؟
ديرسه خانين خانيمي ديرسه خانا اوز توتاراق دئيير:
” آزغون دينلو كافره بن واراييم،
يارالانوب قازليق آتيمدان ائنمه يينجه،
يئنومله آلجا قانيم سيلمه يينجه،
قول-بود اولوپ يئر اوستينه دوشمه يينجه،
يالنوز اوغول يوللاريندان دؤنمييه ييم ” .
كافرلرين آچيقجا يامانلانماسيندان بللي اولور كي، ديرسه خانين خانيمي كافر دوشرگه سيندن دئييل.
يئنه ده خانيمي ديرسه خانا سؤيله يير:
” خان بابامين گؤيگوسي!
قادين آنامين سئوگيسي!
آتام-آنام وئرديگي،
گؤز آچوبان گؤرديگيم،
كؤنول وئريب سئوديگيم، آ ديرسه خان! “
يئنه ده ديرسه خانين خانيمي نين اؤزونو خان قيزي كيمي نظره چارپديرماسي ديش اوغوزدان دئييل، محض ايچ اوغوز قيزلاريندان اولماسي نين تصديقيدير. دئمه لي، ديرسه خانين خانيمي ايچ اوغوزون اؤزوندندير.
بورلا خاتونا گلديكده ايسه بو خانيمين دا ايچ اوغوزدان اولماسي گون كيمي بلليدير، چونكي او، باييندير خانين قيزيدير.
بئيرگين خانيمي بانو چيچگين كيمليگيني موعينلشديرمك اوچون ” قام بؤره نين اوغلي بامسي بئيرك “ بويونون اولينه ديقت يئتيرمك لازيمدير. بورادان آيدين اولور كي، ايچ اوغوزلا ديش اوغوز بيلري باييندير خانين صؤحبتينه ييغيشميشلار. بايبؤره بَي نيسگيلليدير، چونكي اونون اوغلو يوخدور. بيلر بير آغيزدان دوعا ائديرلر كي، اونون اوغلو اولسون. بو زامان بايبيجان بَي ده قيز آرزوسوندا اولدوغونو بيلديرير و سؤيله يير كي، قيزي اولسا، اونو بايبؤره نين اوغلونا وئره جكدير. غئيري-سليس منطيقه گؤره بايبؤره اوغول ايسته ديگينه گؤره او، ايچ اوغوزدان، بايبيجان بي قيز آرزوسوندا اولدوغونا گؤره او، ديش اوغوزدان اولماليدير.
ديگر طرفدن بويون اورتاسيندا اونلارين آرتيق بؤيوموش اوغلو و قيزي – بئيرك و بانوچيچك قارشيلاشيرلار: ” چاغيرديلار بئيرك گلدي. بانو چيچك ياشماغلاندي، خبر سوردي. آيدير: ” ييگيت، گليشين قاندان؟ “ بئيرك دئدي: ” ايچ اوغوزدان! “ ” ايچ اوغوزدان كيمون نسيسن؟ “ –دئدي. ” بايبؤره بگ اوغلي بامسي بئيرك دئديكلري منم ” ،-دئدي. قيز آيدير: ” يا نه مصلحته گلدين، ييگيت؟ ” -دئدي. بئيرك آيدير: ” بايبيجان بگون بير قيزي وارميش، آنني گؤرمگه گلديم! ” -دئدي ” . بورادا بانو چيچگين ” ايچ اوغوزدا كيملردنسن؟ “ سورغوسو بانو چيچگين محض ايچ اوغوزدان اولماماسينا ايشاره دير. بو احتيماللار بويون سونونا قدر داوام ائدير و حقيقت تام شكيلده آيدينلاشمير. لاكين ائپوس متني نين باشقا بير يئرينده بو سيررين آچيليشي واردير. بئله كي، سونونجو بويدا آروز دئيير: ” بگلر، بئيرك بيزدن قيز آلميشدير، گويگوميزدير. امما قازانين ايناغيدير. گلسون، بيزي قازانلا باريشديرسون. دئيلوم، گتوره ليم؛ بيزه موطيع اولورسا، خوش! اولماز ايسه، بن ساققاليني توتايين، سيز قيليج آشورين پارلن! آرادان بئيرگي گؤتوره ليم. آندان سونرا قازاني له ايشوميز خئيير اولا! ” .
بو اوچونجو مقامدا مسله ايله باغلي هئچ بير قارانليق يئر قالمير: بانو چيچك ديش اوغوزداندير! اونا گؤره ده كؤبككسمه اولماسينا باخماياراق، بانو چيچگين آليب گتيريلمه سي ايشينده موعيين شرطلر مئيدانا چيخير. شرطلرين چتينليگي بللي اولاندان سونرا ائلچيلييه دده قورقود گئدير و دلي قارجارين طلبلري يئرينه يئتيريلير. آما چتينليك بونولا دا قورتارمير. بئله كي، بايبئجان قيزيني كافر دوشرگه سيندن اولان بايبورد حاصاري نين بيينه وئره جگيني خئيلي اول بيلديرديگي اوچون بو حاديثه دن خبر توتان كافرلر بئيرگي اسير آپاريرلار. يالنيز 16 ايل كئچندن سونرا بئيركله بانو چيچك بير-بيرلرينه قوووشورلار.
بس سئلجان خاتون باره ده نه دئمك اولار؟
اونونلا باغلي بويدا نقل اولونور كي، قانتورالي ائولنمك ايسته يير. لاكين اونا ايچ اوغوزدان و ديش اوغوزدان قيز تاپيلمير. آتاسي مجبور اولوب ترابزونا گلير و ترابزون تكورونون گؤزل-گؤيچك قيزي اولدوغوندان خبر توتور. آما او قيزي آلماغين شرطلري ديش اوغوزدان قيز آلماغين شرطلري كيمي چوخ آغيردير. بونون اوچون قودوز آسلاني، قارا بوغاني و بوغراني مغلوب ائتمك لازيمدير. باشقا سؤزله، بئيرگين قارشيلاشديغي سيناقلار موعين فرقلرله قانتوراليني دا گؤزله يير. بو موباريزه ده ايسه قانتورالي اؤزو قاليب گلير.
دئمه لي، ايچ اوغوزدان دئييل، هم ديش اوغوزدان، هم ده كافر دوشرگه سيندن گتيريلن گلينلر اوچون جيدي شرطلر قويولور. آما هر ايكي حالدا ايچ اوغوزون ايگيدلري – بئيرك و قانتورالي قاليب گلير.
بس ائله ايسه دلي دومرولون و سيرگين خانيملاري حاقيندا نه دئمك اولار؟
دلي دومرولون آتا و آناسي اؤولادلاري اوچون جانلاريندان كئچه بيلمه ديكلري حالدا، دلي دومرولون خانيمي اؤز جانيندان كئچمگه حاضيردير و بونونلا دلي دومرولسوز حياتين بوش و معناسيز اولدوغو باره ده قناعتيني بيلديرير. آما دلي دومرولون قادي نين كيمليگينه گلديكده ايسه بو باره ده آيدين تصوورو دلي دومرول اؤزو يارادير: ” عزراييل آيدير: ” مره، دلي قاوات! دخي نه آمان ديلرسن؟ آغ ساققاللو بابان يانينا واردين، جان وئرمه دي. آغ بيرچكلو آنان يانينا واردين، جان وئرمه دي. دخي كيم وئرسه گرك؟! “ –دئدي. دلي دومرول آيدير: ” حسرتيم واردير، بوليشاييم ” ،-دئدي. عزراييل آيدير: ” مره دلي حسرتين كيمدير؟ “ آيدير: ” ياد قيزي حلاليم وار، آندان منيم ايكي اوغلانجيغيم وار، امانتيم وار، ايسمارلارام آنلارا، آندان سونرا منيم جانيم آلاسان ” ،-دئدي ” . ” ياد قيزي “ ايفاده سي دلي دومرولون خانيمي نين كافر دوشرگه سيندن اولماسيني تام ثوبوت ائدير.
سيرگين خانيمينا گلديكده ايسه اولجه ” اوچ “ و ” آلتي “ رقملري نين ائپوسداكي فونكسيياسينا ديقت يئتيرك و بري باشدان قئيد ائدك كي، اوچ رقمي و اونون اساسيندا يارانان ديگر رقملر اوغوزو سيمووليزه ائدير:
1. ” قازان آيدير: ” اوچ يوز ييگيدلن اوغلو اوروز منيم ائويم اوستونه تورسون ” ،-دئدي ” .
2. ” قاراجيق چوبان كافرين اوچ يوزيني ساپان تاشيله يئره بيراقدي ” .
3. ” سالور قازانلا قاراجا چوبان چاپار يئتدي. چوبانين اوچ ياشار تانا دريسيندن ساپاني نين آياسييدي، اوچ كئچي توييندن ساپاني نين قوللارييدي… اوچ ييلداق تاشي دوشديگي يئرين اوتي بيتمزدي ” .
4.اوروز دوستاقليقدان خيلاص ائديلنده ” اوچ يوز ييگيت اوغوزدان شهيد اولدو ” .
5. ” اوچ يوز آلتميش آلتي آلپ آوا بينسه، قانلو كئييك اوزرينه يوريش اولسا، بكيل نه ياي قوراردي، نه اوخ آتاردي ” .
6.يئنه بكيل حاقيندا دئييلير: ” اوغلاني توناتديلار. آتاسيله-آناسيله گلدي گؤروشدي. اللرين اؤپدي. اوچ ييز ييگيدين يانينا بيراقدي، مئيدانا واردي ” .
7.اگرگ سفره چيخاندا ” اوچ يوز ساي جيدالو ييگيت بونين يانينا جمع اولدي ” .
” آلتي “ رقمينه گلديكده ايسه بو رقم و اونون تؤرمه لري آروزو چيخماق شرطي ايله ( ” آلتميش اركج دريسيندن كورك ائلسه، توپوقلاريني اؤرتميين، آلتي اؤگج دريسيندن كولاه ائتسه، قولاغلاريني اؤرتميين… آت آغيزلو اوروز قوجا چاپار يئتدي ” ) بوتون حاللاردا كافرلره خاصدير:
1. ” شؤكلي مليك آيدير: ” آلتي يوز كافر وارسون، قويوني گتورسين ” ،-دئدي ” .
2. ” ناگاهاندان قاراجيق چوبانين اوزرينه آلتي يوز كافر قويولدي ” .
3. ” اون آلتي بين قارا تونلو كافر آتا بيندي. قازانين اوزرينه آلغار يئتدي. باقديلار گؤرديلر آلتي بؤلوك توز ائندي ” .
4.قانتورالي باره ده دئييلير كي، ” آلتي جللاد انسه سينه گلديلر ” .
5. يئنه قانتورالي اوزرينه هوجوم ائتمه يه حاضيرلاشان تكور حاقيندا سؤيله نير: ” مگر خانيم، تكور پئشيمان اولدي. ” اوچ جانور اؤلدورديگي اوچون بير قيزجيغازيمي آلدي-گئتدي ” ،-دئدي. ايچين قارا تئونلي، گؤگ دمورلي آلتي يوز كافر سئچدي، گئجه-گوندوز يورتديلار. ناگاهاندان يئتديلر ” .
6. ” اول قله نين بير تكورو وار ايدي. آدينا آرشون اوغلي ديرك تكور دئرديلر. اول كافرين آلتميش آرشون قامتي واردي. آلتميش باتمان گورز سالاردي ” ؛ ياخود: ” اول آلتميش باتمان گورزله قازيليق قوجايا دپره توتيب چالدي. يالان دونيا باشينا تار اولدي ” .
7.كافرلرين سيره يه قارشي هوجومو باره ده بئله سؤيله نير: ” كافر تكور آيدير: ” قاتلان، مره قاوات اوغلي، من سانا واراييم! ” -دئدي. آلتي پرلو گورزيني اله آلدي، اوغلانون اوزرينه سوردي ” ؛ ياخود: ” آلتميش ياراقلي آدام سئچديلر، وارديلار. ناگاهاندان آلتميش دمير تونلو كافر اوغلانين اوزرينه گلديلر ” . ” سيرك ده ” قيليج چكوب آلتي كافر دپله دي… “
ايندي اسيرليكده قالان خانيميني خيلاص ائتمه يه يوللانان سيركله خانيمي آراسينداكي ديالوقو خاطيرلاييريق. سيرگين خانيمينا سؤيله ديكلرينه شئعير فورماسيندا نظر سالاق:
” قيز، سن مانا بير ييل باقغيل!
بير ييلده گلمزسم، ايكي ييل باقغيل!
ايكي ييلده گلمزسم، اوچ ييل باقغيل!
گلمزسم، اول وقت منيم اؤلدوگيمي بيله سن.
آيغير آتيم بوغازلايوب، آشوم وئرگيل!
گؤزون كيمي توتارسا، كؤنلون كيمي سئورسه، آنا وارغيل! “
اوچ رقمي اوغوزلارا عاييد اولدوغونا گؤره اوغوز ايگيدي سيرك ده محض ساييب-ساييب اوچده دايانير: ” ايكي ييلده گلمزسم، اوچ ييل باقغيل! گلمزسم، اول وقت منيم اؤلدوگيمي بيله سن ” .
ايندي ايسه سيرگين خانيمي نين سؤزلرينه، داها دوغروسو، اونون سيرگه جاوابينا ديقت وئرك:
” ييگيديم من سانا بير ييل باقام.
بير ييل ده گلمزسن، ايكي ييل باقام.
ايكي ييلده گلمزسن، اوچ-دؤرت ييل باقام.
دؤرت ييلده گلمزسن، بئش ييل، آلتي ييل باقام.
آلتي يول آييردينا چادير ديكم.
گلندن-گئدندن خبر سورام.
خئيير خبر گتورنه آت، تون وئرم،
قافتانلار گئيدورم.
شر خبر گتوره نين باشين كسم.
اركگ سينگي اوزريمه قونديرمييام.
موراد وئر، موراد آل، آندان گئت، ييگيديم! ” .
ماراقليدير كي، سيرك 3-ده دايانماسينا باخماياراق، سيريين خانيمي 6 رقمينه قدر داوام ائدير و 6-دا دايانير: ” دؤرت ييلده گلمزسن، بئش ييل، آلتي ييل باقام. آلتي يول آييردينا چادير ديكم ” . بئله ليكله، سيريين خانيمي نين دوشونجه سيستئمينده 6 رقه مي اساس يئر توتور. ايندي قطعي شكيلده دئمك اولار كي، سيريين خانيمي دا محض كافر دوشرگه سيندندير.
بئله ليكله، ديرسه خانين خانيمي و قازان خانين خانيمي بورلا خاتون ايچ اوغوزدانديرلار. بانو چيچك ديش اوغوزدان، سئلجان خاتون و دلي دومروللا سيرگين خانيملاري ايسه كافر دوشرگه سيندن ايچ اوغوزا گلميشلر. ديش اوغوزدان و كافر دوشرگه سيندن ايچ اوغوزا گلين گلن قيزلار بو دوشرگه لر آراسينداكي باريشيغي سيمووليزه ائديرلر و باريشيغين كاررانتيديرلار. دئمه لي، ” دده قورقود “ ائپوسو ووروش و داوانين دئييل، محض باريشيق و واحيد دونيا مودئلي نين ائپوسودور.
كؤچورن : آيدا بيات
قايناق: ۵۲۵ – جي قزئت ، ۲۰۱۰ – ۱ ماي – ص ۲۴-۲۵
