تاريخين آخاريني دييشن قادينلار:

 هاررييئت بيچئر ستووئ

 كؤله ليگين اساسلاريني سارسيدان قادين 

   " قلمله، قيلينجين قازانديغي غلبه دن داها بؤيوك ظفرلره نايل اولماق اولار " 

هاررييئت بيچئر ستووئ  

  ديندار بير عاييله ده آنادان اولدو. كيچيك ياشلاريندان اوجا آللاها داها اوركدن و صداقتله خيدمت ائتمك اوچون يوللار آختاردي:  " ياخشي بير اينسان اولوب عؤمرومون سونونا كيمي آللاها خيدمت ائده جگم "  سؤزلري حيات دئويزي اولدو و بو يولدا اؤزونو شام كيمي اريتدي. آما، ساده جه، ياخشي اينسان اولماق بس ائتميردي، باشقالارينا دا نه ايسه ياخشيليق ائتمه لي ايدي. اونون ياشاديغي دؤورده آغلار زنجي لره قان قوسدوروردولار. بو حالدا اونلارين درديني قلمه آلمالي و بو يوللا كؤله ليگه قارشي اؤلكه ده نيفرت ياراتمالي دي. ائله ده ائتدي. چونكي يازماغي ياخشي باجاريردي.  " توم عمي نين داخماسي " (1852) رومانيني يازاراق، بورادا زنجي لرين باشلارينا گتيريلنلري ائله اورك آغريسي ايله تصوير ائتدي كي، بو، نينكي آوروپادا، هم ده آمريكادا ميليونلارلا آدامين اونلارين حاقلاريني مودافيعه  ائتمك اوچون آياغا قالخماسينا گتيريب چيخاردي. بو اثرين تاثيري ايله آمريكا بيرلشميش اشتاتلاري نين هر يئرينده كؤله ليك سيستئمينه قارشي موباريزه باشلادي. آمريكا-دا و آوروپادا كؤله ليگه قارشي موباريزه نين باشلاماسي نين اساسيني قويان قهرمان قادين ايسه هاررييئت بيچئر ستووئ ايدي.  

آمريكاني ايكييه بؤلن كيتاب  

  آمريكا پرئزيدئنتي آبراهام لينكولن اونونلا اوز-اوزه گلديكده:  " دئمك، بو بؤيوك ساواشي باشلادان كيتابي يازان كيچيك قادين سيزسينيز " ، - دئميشدي. لينكولنون هوسله اوخودوغو  " توم عمي نين داخماسي "  كيتابيندا كؤله ليك رئژيمي نين كسكين تنقيد ائديلمه سي و بو سيستئمين ساخلانماسي نين هم آغلار، هم ده قارالار اوچون لكه اولدوغو حسساس بير شكيلده تصوير ائديلميشدي. او دا واردي كي، لينكولنون  " كيچيك قيز "  دئيه موراجيعت ائتديگي بو بؤيوك يازيچي نين آدي چكيلن اثري درحال ساتيلميشدي و ناشيرلر مجبور اولاراق اونون تيراژيني آرتيراراق، 3 ميليون نوسخه چاپ ائتمه يه مجبور اولموشدولار. لاكين يئنه ده اوخوجولارين اونا اولان طلباتيني اؤده يه بيلمه ميشديلر. اثرين تاثيري آلتيندا آمريكانين شيماليندا كؤله ليگه قارشي موباريزه باشلاميشدي. بو ايسه كؤله ليگين ساخلانيلماسي نين قيزغين طرفداري اولان آمريكانين جنوبوندا اعتيراضلارلا قارشيلانيردي. نتيجه ده، بئله بير وضعيت آمريكانين جنوبو ايله شيمالي آراسيندا وطنداش موحاريبه سي نين باشلاماسينا گتيريب چيخاردي. بو موباريزه ده مينلرله اينسانين قاني آخيديلسا دا، سون نتيجه ده كؤله ليك علئيه داري شيمالين كؤله ليك طرفداري جنوب اوزرينده غلبه سي آمريكا-دا يئني، دئموكراتيك بير دؤورون تمليني قويدو. بونونلا دا هاررييئت بيچئر، اؤزونون ده دئديگي كيمي، قلمي ايله قيلينجين گؤره بيلمه ديگي بؤيوك بير ظفره ايمضا آتدي و آديني تاريخين آخاريني دييشن قادينلار سيراسينا يازديردي.  

  ديندار عاييله نين ديندار قيزي  

  هاررييئت بيچئر 1811-جي ايل، اييونون 14-ده آمئريكانين كوننئكتيكوت ايالتي نين ليتچفئلد (Litchfield) قصبه سينده ديندار بير عاييله ده آنادان اولموشدو. هاررييئتين آتاسي ليمان (Lyman) بيچئر كونقرئسين عوضوو ايدي. ليمان بيچئر تانينميش تئولوق و آمريكا اينجيل جمعيتي نين اساسيني قويانلاردان بيري حساب ائديليردي. او دا كؤله ليگه قارشي آچيق شكيلده موباريزه آپاريردي. هاررييئتين آناسي روكسانا فوت (Roxana Foote) دا ديندار بير قادين ايدي و اوشاقلاري نين قلبينه ايلاهي سئوگي و اينسانلارا خيدمت دويغولاري نين سالينماسيني دؤنه-دؤنه دوعا ائديردي. حاديثه لرين گئديشي گؤستردي كي، اونون بو دوعالاري قبول ائديليب. آما هاررييئت 4 ياشيندا اولاندا آناسي دونيادان كؤچدو. آتاسي بوندان سونرا يئنيدن ائولندي. آما روكسانانين اوشاقلاري هئچ واخت اؤگئي آنانين نظارتي و تاثيري آلتيندا اولماديلار. اونلار اوزرينده نظارت آتالاري نين الينده ايدي. هاررييئت ياخشي تحصيل آلا بيلدي.  8 ياشيندا ايكن آتاسي اونو ميسس ساراه پيئرجئ مكتبينه قويدو. 5 ايل بورادا اوخودوقدان سونرا 13 ياشيندا ايكن باجيسي يئكاتئرينا طرفيندن اساسي قويولان هارتفورد قيز آكادئميياسينا داخيل اولدو. او بورادا فرانسيز، ايتاليان و لاتين ديللريني اؤيرندي. همين دؤورده هاررييئت آتاسي نين تشكيل ائتديگي ديني بير مجليسده ايشتيراك ائتدي. بوندان سونرا بوتون حياتيني حضرتي عيسايا حصر ائتمگي قرارا آلدي. بو قرارلا دا او گله جك حياتي نين اساسيني قويدو.  

  يازماق، اره گئتمك و يئنه ده يازماق  

  1833-جو ايلده  " Vestern Monthly Magazine"  آدلي بير درگيده ناغيل موسابيقه سي نين كئچيريلديگي باره ده ائلان اوخودو. اولجه دن ده سينه سينده يازماغا بؤيوك بير هوس دويان هاررييئت كيچيك بير ناغيل يازاراق موسابيقه يه گؤندردي. آما هئچ گؤزلمه ديگي حالدا موسابيقه ده بيرينجي يئري توتدو. 1834-جو ايلين آپرئل آييندا اونون بو ناغيلي  " Vestern Monthly Magazine" ده درج اولوندو. بو، هاررييئتي يازماغا داها دا هوسلنديردي. 1836-جي ايلده اؤزوندن 9 ياش بؤيوك اولان پروفئسسور، دين خاديمي، هم ده كؤله ليگه قارشي موباريزه آپاران كالوين استوو (Calvin Stove) ايله عاييله حياتي قوردو. بو ائوليليك هاررييئتين تانينميش يازار اولماسيني ايللرله لنگيتدي. بو ائوليليكدن اونلارين 7 اوشاقلاري اولدو. آما حياتلاري دايم ماددي سيخينتي ايچينده كئچدي و اوشاقلاريندان بيري كيچيك ايكن اؤلدو. بونا باخماياراق، اونلار بير-بيريلرينه داياق اولماغي و چتينليكلره سينه گرمگي باجارديلار. هاررييئت اري حاقيندا:  " اگر سن منيم چوخ سئوديگيم حيات يولداشيم اولماسايدين، سني يئنه ده سئورديم " ، - دئميشدي. اونلارين گئجه-گوندوز چاليشمالارينا باخماياراق، عاييله نين ماددي دورومو آغير اولاراق قالماقدا داوام ائديردي. بونو گؤرن هاررييئت قلميني الينه آلدي و بو يوللا عاييله نين آغير ماددي دورومونون آرادان قالديريلماسي اوچون آز دا اولسا ارينه يارديم ائتمك فيكرينه دوشدو. بئله ليكله، هاررييئتين يازيلاري موختليف قزئت و ژورناللاردا درج اولونماغا باشلادي. يازيلاري درحال ديقتي جلب ائده رك، اونو مينلرله اوخوجونون سئويمليسينه چئويردي. آلديغي قونورارلارلا عاييله نين ماددي دورومونو ياخشيلاشديران هاررييئت داها ايري حجملي اثرلر يازماغا گيريشدي. بو ايشده اونون ان بؤيوك داياغي و ايلهام وئريجيسي يئنه ده اري ايدي.  

  آمريكاني سارسيدان كيتاب  

  1850-جي ايلده آمريكانين اهاليسي نين سايي 23 ميليون نفر ايدي. اونلارين آراسيندا 2،3 ميليون نفر كؤله زنجي ده واردي. هله 19-جو عصرين 30-جو ايللريندن آمئريكادا كؤله ليگه قارشي موباريزه باشلاميشدي. بو موباريزه نين طالعييني ايسه هاررييئتين يازديغي و بوتون آمريكاني سارسيداجاق  " توم عمي نين داخماسي "  كيتابي حل ائده جكدي. او، بو كيتابيندا گؤردوكلريني، شاهيدي اولدوقلاريني، كؤله صاحيبلري نين پولا احتيياجلاري اولاندا زنجي لري دوغمالاريندان آييراراق ساتديقلاريني و اونلارين باشلارينا گتيريلن دهشتلي ايشگنجه لري اورك آغريسي ايله قلمه آلميشدي. قئيد ائدك كي،  " توم عمي نين داخماسي "  اثري قلمه آلينان ايللرده آمريكا-دا آغاسيندان قاچان كؤله لر تعقيب ائديله رك اله كئچيريلير و اونلارا آمانسيز ايشگنجه لر وئريليردي. هاررييئت كؤله ليگي ايفشا ائدن و آمريكا و آوروپاني سيلكليه جك بو اثريني يازاركن كيچيك قيزي هله سود امر ايدي. اونا گؤره ده گوندوز ايشلريني قورتاريب گؤرندن و گئجه كؤرپه سيني ياتديراندان سونرا يوخوسوز گئجه لر كئچيره-كئچيره بو اثريني يازدي. 1851-جي ايلده او، يئني اثري نين ايلك بؤلومونو درج اولونماق اوچون واشينقتوندا نشر ائديلن و كؤله ليك علئيه داري اولان  " National Era" يا گؤندردي. اورادا اوچ آي عرضينده بو اثري نظردن كئچيرديلر و سوندا سئريال شكلينده درج ائتديلر. هاررييئت رومانيني كيتاب حاليندا چاپ ائتديرمك ايسته ييردي. هرچند كي، بو كيتابين اونا شؤهرت و يا علاوه  قازانج گتيره جگينه اينانميردي. بوستونداكي ايري بير نشريات كؤله ليگه قارشي چيخان بو روماني درج ائتمه يه قورخدو. نشريات اؤلكه نين جنوبوندا نشر ائتديگي ديگر كيتابلاري نين ساتيشينا قاداغا قويولاجاغيندان احتياط ائده رك، هاررييئتين اثريني گئري قايتاردي. هاررييئت چوخ چتينليكله ده اولسا، يئنيجه فعاليته باشلايان بير نشرياتي اثري نين چاپ ائديلمه سي اوچون راضي سالا بيلدي.  

  كيتابين ساتيشي 3 ميليونو اؤتدو  

  يئني رومان ايلك ساتيشا چيخاريلديغي گون 3 مين عدد ساتيلدي. آما كيتابا ماراق بؤيوك ايدي. اونا گؤره تجيلي اولاراق اونو يئنيدن 300 مين عدد چاپ ائتمه لي اولدولار. آما بو دا بس ائتميردي و دونيانين هر يئريندن كيتاب اوچون سيفاريشلر گليردي. اونا گؤره ده گنج نشريات گئجه- گوندوز بو روماني چاپ ائتمكله مشغول اولوردو. آز سونرا كيتابين تيراژي 3 ميليونا چاتدي و اونلارين هاميسي ساتيلدي.  كيتاب دونيانين 50-دن چوخ ديلينه ترجومه ائديلدي. آما كؤله ليك طرفدارلاري هاررييئتين يالان يازديغيني ايديعا ائديرديلر. بونو گؤرن هاررييئت عصبيلشه رك  " توم عمي نين داخماسي نين آچاري "  آدلي اثريني يازدي. او، بو كيتابيندا او دؤورده كؤله لرين معروض قالديقلاري ظولم باره ده و اونلارين حئيوان كيمي آلينيب-ساتيلماسي باره ده قزئتده وئريلن يازيلاري ثوبوت كيمي اورتايا قويدو. بو اثرين اونا بؤيوك شؤهرت گتيرمه سيندن روحلانان هاررييئت بيچئر 1856-جي ايلده  " Dred "  رومانيني يازدي. بو اثر ده تئزليكله ساتيلدي و مؤليفي نين شؤهرتيني داها دا آرتيردي.  

   " توم عمي "  كؤله ليگي سارسيتدي  

  بو اثردن سونرا آمريكادا كؤله ليگه قارشي يئني ساواش باشلادي.1854-جو ايلده كؤله ليگه قارشي موباريزه گئنيش ووسعت آلدي و اؤلكه ده يئني دئموكراتيك تمللره صاحيب اولاجاق رئسپوبليكاچيلار پارتيياسي ياراديلدي.1860-جي ايلده آبراهام لينكولنون باشچيليق ائتديگي بو پارتييا حاكيميته گلدي و كؤله ليگي قورويوب ساخلاماق ايسته ين جنوبا قارشي موحاريبه  باشلادي. موحاريبه  شيمالين غلبه سي ايله باشا چاتدي و كؤله ليك رسمن لغو ائديلدي. هاررييئت بو غلبه دن سونرا لينكولن ايله گؤروشدو. لينكولن:  " دئمك او بؤيوك ساواشي باشلادان كيتابي يازان كيچيك قادين سيزسينيز " ، - دئيه رك اونونلا سالاملاشدي. وطنداش موحاريبه سي باشا چاتاندان سونرا هاررييئت عاييله سي ايله بيرليكده بير مودت فلوريدادا ياشادي. او بورادا قادينلارين حوقوقلاريني مودافيعه  ائدن آداملارين آراسينا قاتيلدي. هاررييئت  " Heart and Home"  آدلي درگيده قادينلارين حاقلاريني مودافيعه  ائدن يازيلار يازدي. فلوريدادان گئرييه هارتفوردا دؤنن هاررييئت بورادا  " موقدس تاريخين قاديني "  ( " Voman in Sacred History " ) آدلي اثريني يازدي. كؤله ليگين لغو ائديلمه سينده بؤيوك امگي اولان و قلمي ايله بؤيوك بير اوردونون گؤره بيلمه ديگي ايشي گؤرن هاررييئت بيچئر 1896-جي ايلده 85 ياشيندا وفات ائتدي. 

كؤچورن : آيدا بيات