نيظامي نين حؤكمدار قادين صورتلري  

     نيظامي نين قلمه آلديغي تاريخي قهرمانلار و بونلارلا علاقه دار تصوير ائتديگي حاديثه لر تكجه شاعير تخييولونون محصولو اولماييب، محض مؤوجود تاريخي شخصيت و حاديثه لرين بديعي گئرچكليكله ترننومودور. ايسكندرين آذربايجانا گلمه سي، نوشابه ايله گؤروشو، شيرواندان كئچيب دربنده گئتمه سي، تورك خاقانلاري ايله ديپلوماتيك علاقه لري، صولح-دوستلوق موقاويله لري، عهد-پئيمانلاري، اورتا-آسيا، چينه سفري و ساير ده نيظامي يه معلوم اولان مؤعتبر تاريخي دليللر، حقيقتلر ايدي. و بونلاري اينكار ائتمك اوچون، هله ليك هئچ كس، هئچ بير تدقيقاتچي اورتايا توتارلي فاكت-دليل چيخارا بيلمه ييب. بو حقيقتي تصديق اوچون ايسه تاريخده كيفايت قدر دليللر واردير.  

  نيظاميده وئريلن، تصوير اولونان حاديثه لر تاريخي حقيقتلرله سسله شيرسه، بير-بيرينه اويغون گليرسه، بونونلا تاريخيميزين هله ده قارانليق قالان صحيفه لري ايشيقلانديريلير، موعين معنادا دورولموش اولور. پروبلئمين جيديليگي و تاريخي-علمي اهميتي ده بوندادير. 

  بيز نيظامي نين پوئزيياسينا-عاغلينا، ذكاسينا اينانيريقسا، موراجيعت ائتديگي دليللرين ده تاريخيليگينه، حقيقت اولوغونا اينانمالي، بو دليللره جيدي ياناشماليييق. 

  نيظامي ياراتديغي آذربايجانلي حؤكمدار قادين صورتلريني- نوشابه ني، مهين بانونو، شيريني ده بئلجه تاريخي حقيقتلر مؤوقئعييندن ايشله ميش، اؤلمز تاريخي-بديعي صورتلر ياراتميشدير. 

   " مدنيت مطبخدن باشلايير "  دئييبلر. نوشابه نين ايسكندرين قاباغينا آچديرديغي قوناقليق سوفره سينه نظر سالاق؛ بورادا نه يوخدور؛ نئجه دئيرلر، قوش ايليگي-جان درماني… 

  بورادا نيظامي اثرلري نين  " ائل واريانتلاري " نداكي بير صحنه ني خاطيرلاياق؛ ايسكندر نوشابه دن يئددي ايلين خراجيني طلب ائدير. 

   " ايسكندر دئدي: 

  -منيم قوشونومون خرجي بؤيوكدور. 

  نوشابه دئدي: 

  -نه اولسون، بيز ده درويش اولدوغوندان، بير شئي دوزلدريك كي، سنين يانيندا باشيميز آشاغي اولماسين. 

  ايسكندر دينمه دي. نوشابه ايسكندرين قوشونونا لازيمي قدر حؤرمت ائتدي، اوچ گون-اوچ گئجه ايسكندره بؤيوك حؤرمت ائتدي، قازانلار آسديردي، مجليس قورولدو، دؤردونجو گونو نوشابه يئددي ايلين خراجيني، بير قوشونون ايلليك آزوقه سيني اؤز خزينه سيندن آييريب قاتيرلارا يوكلتديكدن سونرا ايسكندره دئدي: 

  -ايسكندر، من بو گؤزل شهريمي داغيتديرماق، اهاليني قيرديرماق ايسته ميرم. دونيا مالي نه اولان شئيدير، صاباح دوشوب اؤلندن سونرا سنه بير قاريش يئر، بئش آرشين كفن قالاجاقدير، ايندي زحمت چك، چيخاق باييرا. 

  ايسكندر نوشابه ايله باييرا چيخدي، ايسكندر گؤردو يوزه كيمي يوكلنميش قاتير حاضير دايانيبدير. خبر آلدي: 

  -بو قاتيرلار ندير؟ 

  نوشابه دئدي:  

  -يئددي ايلين خراجيدير. 

  ايسكندر دئدي: 

  -من خراج صررافييام، بو اون دؤرد ايلينكيدير. 

  نوشابه دئدي:  

  -مگر سنين نيتين اؤلكه لري داغيديب، قانلار آخيتماغين دونيا ماليندان اؤترو دئييلمي؟ آپار، دونيا مالي دونيادا قالاجاقدير. 

  بو سؤزدن سونرا ايسكندر دئدي: 

  -خراجي سنه باغيشلاديم، گئري قايتار قاتيرلاري. 

  نوشابه نين سؤزو ايسكندره بؤيوك تاثير ائتدي. بو شهردن هئچ بير شئي آپارمادي "  [17، س.124-125]. 

  بو، آرتيق خالقيميزين  " دونيا مالي دونيادا قالار "  - داهي كلامي نين ماكئدونييا فاتئحينه رئال تصديقي ايدي؛ خالق دوهاسي نين طنطنه لي نوماييشي ايدي؛ ايسكندري قاندان-قادادان، غارتدن چكينديرمك اوچون اونا عيبرت درسي وئريردي. 

  نيظاميدن، اونون نوشابه صورتيندن صؤحبت دوشنده اورتايا تئز-تئز سوال چيخير، سوروشورلار: بيزيم، تاريخده نوشابه آدلي حؤكمداريميز اولوبمو كي، نيظامي اونو ياراديب؟ 

  بو سوالين جاوابي بئله دير. 

  اولن، آذربايجان شوناسليقدا آخير واختلار موعينلشديريليب اورتايا چيخاريلان بئله بير فيكري خاطيرلاياق: 

   " ماكئدونييالي ايسكندرله حربي موباريزه نين فايداسيز اولدوغونو دويان آييق سيياستچي و اوزاق گؤرن ديپلومات آتروپات يونان-ماكئدونيياليلارلا ياخينلاشاراق دانيشيق يولونو سئچدي. او، ماكئدونييا پادشاهي نين ياخين سيلاحداشلاريندان پئرديكك ايله قوهوم اولدو؛ اونا اؤز قيزيني وئردي "  [34، س.30]. 

  آتروپاتين قيزي نين ايسكندرين سركرده سي و ياخين سيلاحداشلاريندان بيرينه وئريلديگي فاكتي نيظاميده كي  برده پادشاهي نوشابه نين ايسكندرين سركرده لريندن بيرينه اره وئريلديگي فاكتينا اويغون گلير. فرق آنجاق آدلاردادير: تاريخده پئرديكك، نيظاميده دوالي. بئله آد دييشيكليگي نيظاميده موشاهيده اولونان حالدير. نوشابه نين آتروپاتين قيزي اولدوغو فاكتي، هله ليك، بيزه معلوم دئييل. بو باره ده نيظامي ده بير سؤز دئمير؛ شاعير اونون اصلي-نجابتي حاقيندا بير بئيت ايله كيفايتله نيب: 

   " مردليكله بئلينه باغلاميش كمر، 

  كيان نسليندنم دئيه فخر ائدر "  [11، س.196]. 

  لاكين عاغلين منطيقي دئيير كي، آتروپاتئنا اؤلكه سي نين آرازدان جنوبدا يئرلشن و مركزي اينديكي تبريزين ياخينليغينداكي قازاكا (قنجه) تخمين ائديلن حيصه سينه آتروپات حؤكمرانليق ائتديگي كيمي، آرازدان شيمالدا يئرلشن و مركزي برده (م.اؤ.هوروم//هوروم) اولان حيصه سينه ده  " نوشابه "  پادشاهليق ائده بيلردي… 

  سونرا، نوشابه دن، تخمينن ايكي يوز ايل قاباق آذربايجان دؤولتي نين باشچيسي آراز حؤكمداري، قودرتلي قادين توميريس اولموشدور. هئرئدوت  " تاريخ "  كيتابيندا بو باره ده معلومات وئرير؛ توميريسين حؤكمدارليق دؤورو، آنا تورپاغين توخونولمازليغي اوغروندا كوروشا (كئيخوسرووا) قارشي آپارديغي شانلي دؤيوشلر و چالديغي غلبه آذربايجان تاريخي نين پارلاق صحيفه لري ساييلا بيلر. بو مسله ده بيزيم تاريخچيلريميز آغزينا سو آليب سوسدوغو حالدا، يئنه ده پوئزييا ديله گلير، ارسطو دئميشكن،  " پوئزييا تاريخدن داها آرتيق جيدي "  اولدوغونو تصديق ائدير. 40-جي ايللرده س.وورغون ايران غصبكارلاري نين تجاووزونه جاواب اولاراق،  " يانديريلان كيتابلار "  شعرينده همين تاريخي صحيفه لره ايشاره ائده رك يازيردي: 

   " بير واراقلا تاريخلري، اوتان منيم قارشيمدا 

  آنام تومريس كسمه ديمي كئيخوسرووون باشيني؟ 

  كوروغلونون، ستارخانين چلنگي وار باشيمدا 

  نسيللريم قويماياجاق داش اوستونده داشيني؛ 

  آنام تومريس كسمه ديمي كئيخوسرووون باشيني "   

  [10، س. 213] 

  س.وورغون نه اوچون توميريسه  " آنام "  دئيه موراجيعت ائتميشدي. چونكي توميريس آذربايجان ميللي دؤولتي نين بانيلريندن ايدي، او،  " آنا "  آدلانماغا لاييق ايدي و شاعير يانيلماميشدي. 

  تكرار ائديريك: 

  نوشابه آديندا حؤكمدار تاريخده اولماسا دا (هله ليك، بيز بونو قطعي تصديق ائده بيلمه سكده)، اونون پروتوتيپي - آراز حؤكمداري توميريس مؤوجود ايدي؛ او دا ايران فاتئحي كوروشلا بئلجه، بوندان دا آغير اوز-اوزه گلميشدي… نيظامي اونون تيمثاليندا نوشابه ني يارادا بيلردي، بونا اونون معنوي حاقي واردي. 

  عئيني سؤزلري  " خوسروو و شيرين " ده كي مهين بانو آنا و وليعهد شيرين حاقيندا دا دئمك اولار. 

  آذربايجان-تورك دؤولتچيليگي تاريخينده قادين پادشاهلاري اولموشدو و شاعير بونلاري بديعي اثره، پوئزييايا گتيريردي. بو، نيظامي نين بؤيوك و تاريخي خيدمتي ايدي. شاعير اوستاليقلا مهين بانونون ديليله بو عنعنه وي حؤكمدارلار سيلسيله سينه باغليليق و صداقت تلقين ائدير. حؤكمدار اولولارا احتيرام بسله يير، اونلارين آدي نين هميشه اوجا توتولدوغونو ايفتيخار حيسسيله ياد ائديردي. مهين بانو شيريني اولو حؤكمدار بابا افراسيياب (الپ ار تونقا) و اونون نسليندن اولماسي ايله فخر ائتمه يه، اونون شرفيني هميشه اوجا توتماغا چاغيرير؛ ايران شهزاده سي خوسروولا گؤروشمه يه ايذن وئرركن، اونا آنلادير كي، اؤزونو آغير آپارسين، آلدانماسين، اصلي-نجابتيني قوروسون. 

  افراسيياب ميلاددان اؤنجه يئددينجي عصرده توران ايمپئريياسي نين باشچيسي، ايمپئراتورو و تاريخده ايران-توران موحاريبه لري نين افسانوي قهرمانيدير. تورك خالقلاري آراسيندا اونونلا باغلي داستان، روايت و افسانه لر، اونون خايين جه سينه، اؤلومونه يارانميش آغيلار مشهوردور... مهين بانو تورك حؤكمدارلار نسلي نين بير حلقه سيدير. لاكين او، نيظامي نين تصويرينجه، حؤكمدار اولماقدان علاوه ، هم ده عيصمتلي، قايغيكئش، پاك و مئهريبان آذربايجانلي-تورك آنادير، اصل دايه-تربييه چيدير. وليعهد-گله جك حؤكمدار شيرينين بؤيويوب بويا-باشا چاتماسي، اخلاق-ائتيكا، ادب-اركان و عادت-عنعنه لر اوزره، ميللي روحدا تربييه آليب كامالا چاتماسيندا اونون امگي بؤيوكدور. بيز بونو شيرينه وئرديگي عاغيل، اؤيود-نصيحتده گؤرور، موشاهيده ائديريك. 

   " خوسروو و شيرين " ده آيريجا بير  " مهين بانونون شيرينه اؤيود وئرمه سي "  فصلي وار. اورادا مهين بانو دؤنه-دؤنه شيرينه دئيير:  

   " ائي گؤزومون نورو! سن قاپيسي مؤهورلو بير خزينه سن، دونيانين ياخشي-پيسيني سيناماليسان. دونيا كلكلر ايشلتمگي باجارير، او، دوررو اوغورلايار، ياقوتو ازر. اورگيمه داميب كي، بو جاهانگير سنينله ائولنمك فيكرينده دير… مباده شيرين سؤزونه آلداناسان. سني روسواي ائديب سونرا آتار،.. سني وفالي و ناموسلو گؤرسه، ائل قايداسي ايله گليب سني مندن ايستر. ناموسلو قيز كيمي دونيادا آدين چكيلر. دونيا شاهليغي سنين اولار… [14 آ، س.115-116]. 

  آذربايجان قاديني اوچون، شيرين اوچون عيصمت، پاكليق، تميز آد، باكيره ليك دونيانين وار-دؤولتيندن آرتيقدير. شيرين بونو چوخ گؤزل بيلير، اونون تربييه سي بو روحدا اولوب. بونا گؤره مهين بانونون نصيحتلرينه بئله جاواب وئرير، خوسرووون آل ديلينه آلدانيب تسليم اولماياجاغينا آند ايچير: 

   " اونون جامالي نين عشقيندن قان آغلاسام دا، يالنيز حالال آروادي اولاجاغام "  [14 آ، س.116] -  

  دئيير. آنجاق بوندان سونرا، مهين بانو آنانين اورگينه توختاق گلير. شيرين نينكي آلدانير، تسليم اولور، عكسينه عاغلي، درراكه سي، شيرين ديلي، سؤزو-صؤحبتي ايله خوسرووو آييلدير، اونو غئيرته گتيرير، اونا دوشدويو آغير، بؤهرانلي وضعيتدن خيلاص اولماق يوللاريني اؤيره دير، اونا، الدن گئتميش تاخت-تاجيني قايتارماق اوچون گوجلو معنوي تاثير گؤسترير.  

   " من دورموشام بوردا، شاهليغي آل سن، 

  اؤز تختيني قايتار، الينده يم من…  

  بو دؤولت ازلدن سيز نسيلده دير 

  چوخ عاييب اولسون كي، باشقا الده دير "  [14، س.131-132]. 

  خوسروو شيرينين عاغلي، تدبيري اؤنونده تسليم اولور و اعتيراف ائدير كي: 

   " منه اؤز حاليمدان وئره رك خبر، 

  سؤزو ياخشي، يامان دئدين موختصر "  [14، س.134]. 

  بو، بؤيوك معنوي غلبه ايدي. گنج وليعهد كيفايت قدر عاغيللي، ذكالي و تدبيرلي ايدي، سلفي برده حؤكمداري نوشابه نين سويييه سينه يوكسلميشدي. نوشابه ده بئلجه ماكئدونييالي فاتئحه قاليب گلميش، اونو سارسيلتميشدي. ديقت ائدين! عئيني حالدا نوشابه دونيا فاتيحي ماكئدونييالي ايسكندره تاثير ائدير، اونا  " مردليگين يولونو گؤسترير " ، اونو فاتئحليكدن ال چكمه يه چاغيرير؛ ايسكندر اعتيراف ائتمه لي اولور، اؤز ديلي ايله دئيير كي؛  

   " عشق اولسون بو فيكري ساغلام قادينا 

  مردليگين يولونو گؤستردي مانا "  [19، س.218]. 

  هئرئدوتون  " تاريخ "ينده حؤكمدار توميريس ايران حؤكمداري كوروشو عئيني شكيلده صولحه دعوت ائدير، او ايسه بونا محل قويمور، بونا گؤره ده اونو محو ائدير، حتّي اؤلوسونون باشيني كسديرير… بونلار هله بيزده تاريخيميزين آچيلماميش پارلاق صحيفه سي، دؤولتچيليك عنعنه لريميزين داواميدير. 

  بو تاريخ يازيلماليدير!! 

  دئمه لي، آذربايجان قادين حؤكمدارلاري نسلي داوام و بيري ديگريني عوض ائديردي. نيظامي تاريخي باخيمدان بو حقيقتلري قلمه آليب بديعي صورتلر سيلسيله سي ياراتميش، اونلاري بير-بيريني تاماملايان شخصيتلر كيمي، دونيا ميقياسينا چيخارميشدي. 

  نيظامي نين حؤكمدار قادينلاري خالقيميزين معنوي عالمي، عاغلي، ذكاسي، تدبيري، دؤولتي ايداره تجروبه سي و باجاريغي نين بديعي تصديقيدير. 

  لاكين بيز شيرينين و نوشابه نين سيماسيندا نيظامي نين داها بؤيوك و بشري فيكيرلري نين، دؤولتچيليگي، عاييله-محبت فلسفه سي نين ماهيتيني گؤرور و درك ائديريك. مسله نيظامي ياراديجيليغي اوچون اولدوقجا موهومدور، اينسان حياتي نين معناسي ايله سيخ باغليدير.   

 قايناق : اولو ديل سايتي

كؤچورن : آيدا بيات